Published:Updated:

ஆயிரம் சூரியன் ஆயிரம் சந்திரன் ஒரே ஒரு பூமி - 34

ஆயிரம் சூரியன் ஆயிரம் சந்திரன் ஒரே ஒரு பூமி - 34
பிரீமியம் ஸ்டோரி
ஆயிரம் சூரியன் ஆயிரம் சந்திரன் ஒரே ஒரு பூமி - 34

ம.செந்தமிழன் - படங்கள்: வி.பால் கிரேகோரி

ஆயிரம் சூரியன் ஆயிரம் சந்திரன் ஒரே ஒரு பூமி - 34

ம.செந்தமிழன் - படங்கள்: வி.பால் கிரேகோரி

Published:Updated:
ஆயிரம் சூரியன் ஆயிரம் சந்திரன் ஒரே ஒரு பூமி - 34
பிரீமியம் ஸ்டோரி
ஆயிரம் சூரியன் ஆயிரம் சந்திரன் ஒரே ஒரு பூமி - 34
ஆயிரம் சூரியன் ஆயிரம் சந்திரன் ஒரே ஒரு பூமி - 34

`னைத்தையும் உள்ளடக்குதல்' என்றொரு குணம் உண்டு. ஆகாயமாகிய வான்வெளியைப் பாருங்கள். அது, அனைத்தையும் உள்ளடக்கிக்கொண்டுள்ளது. ஆனாலும், ஐம்பூதங்களில், வெளி (ஆகாயம்) என்ற தனி ஒரு பூதமாகவும் அது உள்ளது. `யாவையும் எனதுள்ளே இருக்கின்றன; ஆயினும் எனக்கெனத் தனி குணம் உண்டு’ என்பது இறையியல்பு. மனம்தான் உடலை உள்ளடக்கி வைத்துள்ளது. ஆனாலும், மனதுக்கெனத் தனித்தன்மை உண்டு.

சுவைகளில் `உவர்ப்பு’ இவ்வாறான பெருங்குணம் கொண்டது. உப்பின் சுவையை நம் மொழியில் `உவர்ப்பு' எனக் குறிப்பது மரபு. அறு சுவைகளில் மற்ற ஐந்து சுவைகளையும் உவர்ப்புச் சுவை உள்ளடக்கியுள்ளது. அதேவேளை, தனக்கெனத் தனிச்சுவை அடையாளத்தையும் பல்வேறு பண்புகளையும் கொண்டிருக்கிறது.

உணவின் வழியாக எல்லா சுவைகளும் உடலுக்குள் செல்கின்றன. ஒவ்வொரு சுவைக்கும் ஐம்பூத இயல்பு உள்ளது. இந்த அனைத்து பூதங்களையும் அல்லது சுவைகளையும் செரித்த பிறகே அவற்றின் மீதங்களை உடல் உவர்ப்புச் சுவைக்கு மாற்றுகிறது. சிறுநீர், வியர்வை, கண்ணீர் ஆகியவை உவர்ப்பானவை. விந்து நீர் உவர்ப்புச் சுவை கலந்தது. உடலின் பெரும்பகுதி வெளியேற்றங்களில் உவர்ப்புச் சுவை இருப்பதைப் புரிந்துகொண்டால், பூமியின் குணத்தையும் உடலின் இயல்புகளையும் ஒருசேர அறிந்துகொள்ளலாம்.

ஆயிரம் சூரியன் ஆயிரம் சந்திரன் ஒரே ஒரு பூமி - 34

ஒட்டுமொத்த விகடனுக்கும் ஒரே ஷார்ட்கட்!

பூமியின் பெரும்பகுதி கடல் நீராக உள்ளது. பூமியின் உள்ளும் புறமும் சுழலும் ஐம்பூதங்கள் அனைத்தையும் உள்வாங்கிச் செரிப்பதில் கடலுக்குத்தான் முதல் இடம் வழங்கப்பட்டுள்ளது. கடல் நீர், யாவையுமாக இருக்கிறது; தனக்கென்ற அடையாளங்களையும் வைத்துக்கொள்கிறது. பூமியின் காற்றைச் சுத்திகரிப்பதில் கடல் முதல் இடம் வகிக்கிறது. பூமியின் வெப்பத்தைத் தாங்குவதில் கடலுக்கு முதல் பொறுப்பு உள்ளது. பூமியின் நீரை அல்லது மழையைச் சீராக்கி வைப்பதில் கடல் முன்னிலை பெறுகிறது. பூமியின் நிலத்தை வடிவமைப் பதிலும் கடலுக்குத்தான் முதல் அதிகாரம் உள்ளது. நிலப்பகுதிகளின் வரை படத்தை அது மாற்றிக் கொண்டே இருக்கிறது. கடல் தள்ளி நின்றால் ஒரு வரைபடம்; உள்ளே வந்தால் வேறு படம். பூமியின் ஐம்பூதச் சமநிலையில் கூடுதல் வலிமையைக்கொண்டுள்ளது கடல். அதனால்தான் அது உவர்ப்புச் சுவையுடன் இருக்கிறது.

உடல் எனும் அண்டத்திலும் உப்பு நீர்தான் மிகுதியாக இருக்கிறது. உடலின் உள்ளே வரும் காற்று, உணவு, நீர் ஆகியவற்றைச் சீரான நிலையில் வைத்திருப்பதில் உவர்ப்பாகிய உப்புச் சுவைக்குத்தான் முக்கியப் பங்கு உள்ளது. ஆகையால்தான் உணவில் உப்புச் சுவையை மட்டும் குறைந்தளவில் சேர்க்கிறோம். உள்ளே வரும் எல்லா உணவில் இருந்தும் உப்பைப் பிரித்து எடுக்கும் வல்லமை நம் உடலுக்கு உண்டு. உப்பைப் பிரிக்கும் பணி உடலைப் பொறுத்தவரை பொறுப்பு வாய்ந்த பெரும்பணி.

உடல் உவர்ப்புச் சுவையைப் பிரித்து வெளியேற்றுவதும், கடல் நீர் நிலத்துக்்குள் புகாமல் பாதுகாப்பதும் ஒன்று. உடலில் சேகரமாகும் உவர்ப்புச் சுவையைப் பிரிப்பதில் சுணக்கம் இருந்தால், உடலின் செல்களுக்குள் உள்ள நீரும் உவர்ப்புமிகுந்ததாகிவிடும். நாளடைவில், உவர்ப்புச் சுவை உடலில் ஆதிக்கம் செலுத்தத் தொடங்கும். உவர்ப்பின் ஆதிக்கம் என்றால், நுண்ணுயிர்ப் பெருக்கத்தைக் கட்டுப்படுத்திவைப்பது. அதாவது, உவர்ப்புச் சுவையில் நுண்ணுயிரிகள் பெருக்கம் குறையும். ஊறுகாய், இறைச்சி, மீன் ஆகியவற்றில் உப்பு சேர்ப்பது அந்தப்பொருட்களில் நுண்ணுயிர் பெருகக் கூடாது என்பதற்காகத்தான். உவர்ப்புச் சுவையை அதிகமாகச் சேர்த்துக்கொண்ட உடலின் வளர்சிதை மாற்றம் பாதிக்கப்படும். இந்த நிலை நீடிக்கக் கூடாது. ஒருவேளை, நீடித்தால் உடலில் உயிர் தங்காது.

எல்லா சுவைகளையும் தனக்குள்  அடக்கிவைத்துள்ள உவர்ப்புச் சுவை, நம் உடலுக்குள் நின்று நிலைப்பது நல்லது அல்ல. எது எல்லாவற்றையும் தனக்குள் அடக்கிக் கொண்டுள்ளதோ, அதை ஓரிடத்தில் அடைக்க முடியுமா என்ன? அப்படி அடக்க நினைத்தால், அடக்கி வைக்கப்படும் இடமே அழியும் அல்லவா. இதுதான் உவர்ப்பின் சிறப்பு.

கணக்கு இல்லாத அளவுகளில் உவர்ப்புச் சுவை, உடலுக்குள் வருகிறது. உவர்ப்புச் சுவையின் தாக்கம் இல்லாத ஒரே ஓர் உணவும் பூமியில் இருக்காது. உப்பு எனும் ‘குணத்தைப்’ பற்றிய நவீன மருத்துவப் பாடங்களுக்கும் என் கருத்துக்கும் வேறுபாடுகள் உண்டு. நான் கூறுவது ஐம்பூதக்கொள்கையின் அடிப்படையிலான சுவைத்தன்மையை. அந்த வகையில், பொருளின் குணத்தைவிட, சுவை முக்கியம். விந்துநீரின் உட்பொருட்களில் சர்க்கரை அதிகமாக உள்ளது. ஆனால், அதன் சுவை உவர்ப்பாக உள்ளது. இதுதான் நீங்கள் கவனிக்கவேண்டிய பாடம். உட்பொருளைக் காட்டிலும் சுவைக்கு ஆற்றல் மிகுதி.

ஆயிரம் சூரியன் ஆயிரம் சந்திரன் ஒரே ஒரு பூமி - 34

`நீர் என்ன சுவையில் இருக்கும்?’ எனக் கேட்டால் பதில் கூறிவிடலாம். அந்தப் பதில் கடல் நீருக்குப் பொருந்தாது.  ஆகவேதான் உடலுக்குள் வரும் எல்லா உணவுகளிலும் உவர்ப்புச் சுவை உண்டு என்கிறேன். இந்த அளவு மிகுதியாக உவர்ப்பு உள்ளே வருவதால் அதன் வெளியேற்றமும் கூடுதலாகத்தான் இருக்க வேண்டும். உவர்ப்புச் சுவை எந்த அளவுக்கு வெளியேறுகிறதோ, அந்த அளவுக்கு உடலில் நீர் குறையும். நாம் நீர் அருந்த வேண்டும். நீர் அருந்தியதும் மீண்டும் உவர்ப்பு வெளியேறும். இப்போது பசி எடுக்கும். நாம் உணவு உண்ண வேண்டும்.

மிகையான காற்றும் வெப்பமும் இருந்தால் அல்லது நீர் இருந்தால் உடல் திணறும், பசிக்காது. காற்று, வெப்பம், நீர் ஆகிய இந்த மூன்று பூதங்களையும் வெளியேற்றும் வல்லமை உவர்ப்புக்கு உண்டு. வியர்வை, சிறுநீர் ஆகிய இரண்டின் வழியாகவும் மிகையாக இருந்தவை வெளியேற்றப்படும். நீர் வெளியேற்றமும் நடந்துவிட்டதால் உடலில் நீர்ச்சத்து குறையும். இந்தத் தகவலை தாகம் எனும் உணர்வு நம்மிடம் தெரிவிக்கும். நாம் நீர் பருக வேண்டும். இப்போது, நீர்த்தன்மையில் சீரானநிலை உருவாகிவிடுகிறது. சிறிது நேரத்தில் உடலின் உள்வெப்பம் அதிகரிக்கிறது. இதுதான் பசியை அழைத்துவரும் செயல்பாடு.

இந்த விளக்கத்தை இங்கே குறிப்பிடக் காரணம், `தாகம் எடுத்தால் எங்கள் குளிர்பானத்தைப் பருகுங்கள்’ என்ற மூடத்தனம் இப்போது பரப்பப்படுகிறது. இது பல்வேறு சிக்கல்களை வரவழைக்கும் பழக்கம். தாகம் எடுத்தால் தண்ணீர்தான் அருந்த வேண்டும். தவித்த உடலுக்கு தண்ணீர்தான் அமுதம். நீருக்குப் பதிலாக, பழச்சாறு, இளநீர், பதநீர் போன்றவையும் அருந்தக் கூடாது. இவை எல்லாம் உடலுக்கும் சூழலுக்கும் நன்மை தருபவைதான். ஆனால், தாகம் எனும் உணர்வுக்கான மரியாதையை இ்ந்தப் பொருட்களால் தர முடியாது.

ஆயிரம் சூரியன் ஆயிரம் சந்திரன் ஒரே ஒரு பூமி - 34

உடலில் சேர்ந்திருந்த உவர்ப்பு வடிவக் கழிவுகளை வெளியேற்றவும், அவ்வாறு வெளியேற்றிய பிறகு உருவாகும் வறட்சியைச் சமாளிக்கவும்தான் தாகம் எடுக்கிறது. அந்த நேரத்திலும் ஏதேனும் நிறுவனத் தயாரிப்பு பானங்களைப் பருகினால், உடலில் மிகுதியாக நஞ்சுதான் சேரும். மரபு வழிப்பட்ட இளநீர் போன்ற பானங்களிலும் பலவகைச் சத்துகள் உள்ளன. அந்தச் சத்துகளை எல்லாம் செரிப்பதற்கான சூழல் உடலில் இருக்காது. தாகம் எடுக்கும்போது `நம் உடல் பழைய கழிவுகளை வெளியேற்றும் பணியில் உள்ளது. ஆகவே, புதிய உணவுகளை உள்ளே தள்ள வேண்டாம்’ என்ற தகவலைப் புரிந்துகொள்ள வேண்டும்.

பதநீர், இளநீர் போன்றவை எல்லாம் வெயிலில் சோர்வடைந்த சூழலுக்கான ஊட்டச்சத்துகள் நிறைந்தவை. இவற்றை உணவுக்குப் பதிலாகவும் நீருக்குப் பதிலாகவும் உட்கொள்ளக் கூடாது. மாறாக, பசி, தாகம் இரண்டும் இல்லாத நிலையில் அருந்த வேண்டும். இளநீரில் உள்ள ஊட்டச்சத்துகளை மட்டும் மனப்பாடம் செய்துவிட்டு, ‘இளநீர் நல்லது’ என்ற குறுக்குவழிப் புரிதலுக்கு ஆட்பட்டோர் இப்போது அதிகரித்துள்ளனர். உடலுக்குத் தேவை இல்லாத நேரங்களில் அல்லது உடல் ஒவ்வாமையை வெளிப்படுத்தும் சூழல்களில் இளநீர் அருந்தினால் மிக மோசமான விளைவுகள் உருவாகும். நிறுவனத் தயாரிப்பு பானங்களை எல்லாம் வாழ்க்கையில் இருந்தே வெளியேற்றிவிட்டால், உடலுக்குள் இருக்கும் ஐம்பூதங்களும் உங்களைக் கையெடுத்து வணங்கும்.

இப்போதைய நவீன சமூகத்தின் அன்றாடத்தைக் கவனியுங்கள். வியர்வையே இல்லாத சூழலை உருவாக்கப்பட்டுள்ளது. வியர்வை வழியாக வெளியேறவேண்டிய உவர்ப்பு எனும் பெருங்கழிவுக்கு இந்த வாழ்வியலில் உள்ள மாற்று ஏற்பாடு என்ன?  எப்போதும் குளிரில் வாழும் வகையில் பனிக்கரடிகளும் பாண்டா கரடிகளும் படைக்கப்பட்டுள்ளன. ஆகையால்தான் அவற்றின் உடல் உரோமங்களால் மூடப்பட்டுள்ளது. மனிதகுலத்தின் சிறுபான்மையினர்தான், குளிர் நாடுகளில் வாழ்கிறார்கள். அவர்களது தோலில் உள்ள வெண்மைதான் அவர்களுக்கான வெப்பத்தைத் தரும் பாதுகாப்பு அரண்.

ஆயிரம் சூரியன் ஆயிரம் சந்திரன் ஒரே ஒரு பூமி - 34

தமிழ்நாட்டில் வாழும்போதும் குளிரில் இருக்க வேண்டிய தேவை என்னவெனச் சிந்தியுங்கள். வியர்வைக்கான வாய்ப்பு எப்போதாவது உருவானாலும், வியர்வையை இழிவாகக் கருதும் போக்கு வளர்ந்துவிட்டது. வியர்வையையும் அதன் துர்நாற்றத்தையும் விவரிக்கும் விளம்பரங்கள் வருகின்றன. வியர்க்காமல் இருப்பதற்கான சோப்புகள், பூச்சுகள் (Creams) நவீன மனிதர்களின் அலமாரிகளில் கொலுவீற்றிருக்கின்றன. இந்தப் பொருட்களின் தயாரிப்பில் சேர்க்கப்படும் வேதி நஞ்சுகளைப் பற்றி எழுதினால், வேறு வேலையே பார்க்க முடியாத அளவு எழுதவேண்டியிருக்கும். ஆனால், இந்தப் பொருட்களின் துணையுடன் வியர்வையைத் தேக்கிவைத்தால் உடலின் உள்ளே தடுத்து வைக்கப்படும் உவர்ப்பின் தீமைகளைக் குறிப்பிட்டாக வேண்டும்.

உவர்ப்புச் சுவைமிக்க நீர்க்கழிவுகளை உடலில் தேக்கினால், அதிகமாகப் பாதிப்படையும் முதல் உறுப்பு மண்டலம் சிறுநீரகம். உவர்ப்பை வெளியேற்றுவதையே தன் வாழ்நாள் பணியாகச் செய்யும் உறுப்பு மண்டலம் இது. வியர்வையை அனுமதித்துவிட்டால், சிறுநீரகங்களின் சுமை குறைகிறது. சிறுநீராக அனுப்பத்தக்க உவர்ப்புப் பொருட்களை மட்டும் பிரிப்பதில் அவை கவனம் செலுத்தும். மனிதர்களின் வியர்வைத் தடுப்புச்செயல்களால், உடலின் உள்ளே உவர்ப்பு நீர்க்கழிவு அதிகரிக்கிறது. இந்தக் கழிவுகளைச் சிறுநீரகங்கள் மிகுந்த சிரமத்துடன் வெளியேற்றுகின்றன.

குளிரூட்டப்பட்ட அறைகளில் இருக்கும்போது அடிக்கடி சிறுநீர் வருவது இதனால்தான். வெப்பம் மிகுந்த இடத்தில் இருந்தால் அதிக தாகம் எடுக்கும், அதிக நீர் பருகினால் அதிக சிறுநீர் கழியும். இது இயற்கையின் இயல்புப்படி நிகழும் செயல்முறை. குளிர்ச்சியான அறைகளில் இருக்கும்போது, உடலின் உள்வெப்பம் தூண்டப்படும். புறத்தில் இருந்து எந்த பூதம் மோதுகிறதோ, அதற்கு எதிரான பூதத்தை உருவாக்குவது உடலின் இயல்பு என்பதை முந்தைய பகுதிகளில் குறிப்பிட்டிருந்தேன். அந்த வகையில் உள்வெப்பம் அதிகமானால், உடலின் உள்ளே இருக்கும் நீர்மக் கழிவுகள் வெளியேறத் தொடங்குகின்றன. இந்தக்கழிவுகள் எல்லாம் மென்மையான திடப்படிமங்களாக உடலின் உட்சுவர்களில் இருப்பவை. திடீரென உருவாகும் உள்வெப்பத்தில் இவை உருகுகின்றன. புறத்தில் குளிர்ச்சி இருப்பதால் வியர்வையாக வெளியேற்ற முடியாது. ஆகவே, இந்தக்கழிவுகள் சிறுநீரகத்தை அடைகின்றன. இப்போது சிறுநீரகம் தேவையே இல்லாமல் கூடுதல் பணிகளைச் சுமக்கிறது.

தாகம் எடுத்தால் நீர் பருகுதல், சோர்வாக இருக்கையில் இயற்கை பானங்கள் அருந்துதல் ஆகிய நடவடிக்கைகளின்போது உருவாகும் நீர்மத்தைச் சிறுநீரகமும் தோல் மண்டலமும் நீராகவும் வியர்வையாகவும் வெளியேற்றி விடுகின்றன. ஆனால், குளிரூட்டப்பட்ட அறைகளால் உருவாகும் நீர்க்கழிவுகள் இவ்வாறான இயற்கை நிகழ்வுகள் அல்ல; விபத்து போன்றவை. வாழ்க்கையில் விபத்து நேரலாம். விபத்தை மட்டுமே விதியாக மாற்றிக்கொள்ளக் கூடாதல்லவா!

- திரும்புவோம்...

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism