ஒபாமாவின் ஆட்டம்!

பி.ஆரோக்கியவேல் . இ ந்த ஆண்டு இந்தியர்களோடு இணைந்து தீபாவளியைக் கொண்டாட ஒபாமா

தம்பதியர் வந்திருந்தார்கள்- இது செய்தி ஒன்று! ஒபாமாவுக்கு பாதுகாப்பு அளிக்க 34 போர்க் கப்பல்கள் மும்பைக்கு அருகில் நடுக் கடலில் நங்கூரமிட்டு இருந்தன. விமானம் விமானமாக ஆயுதங்கள் வந்து இறங்கின - இது செய்தி இரண்டு. ஆனால், இது போன்ற அத்தனை செய்திகளையும் தூக்கிச் சாப்பிட்டுவிட்டார் மிஷேல் ஒபாமா!

ஒபாமா அமெரிக்க அதிபரானதில் இருந்து, அவருக்கு நிகராகக் கவனம் ஈர்த்தவர் அவரது மனைவி மிஷேல் ஒபாமா. காரணம், அவரது 'டிரெஸ்ஸிங் சென்ஸ்'! உற்சாகத் துள்ளலை வெளிப்படுத்தும் டிசைனர் ஆடைகள் உடுத்துவது மிஷேலுக்கு 'உடல்' வந்த கலை! ஆனால், அம்மணி மும்பை வந்து இறங்கும் வரை, இந்தியாவில் அவருக்கு ரசிகர்கள் கிடையாது. இதனை முன்னரே உணர்ந்துதானோ என்னவோ, ஜேம்ஸ்பாண்ட் பட நாயகி போல முட்டி வரை நீளும் கறுப்பு ஷூ, ஓவர் கோட் என்று வாஷிங்டனில் கணவருடன் விமானம் ஏறினார். ஆனால், மும்பை சிவப்புக் கம்பளத்தில் கால் வைத்தபோது, பாரம்பரிய ஆடைக்கு மாறி இருந்தார். அந்த பட்டுத் துணிக்கு ஏற்ப கழுத்தில் முத்து மாலை. உயரமும் ஒடிசலான உருவமும் மிஷேலை அந்த உடையில் மேலும் அழகாகவும் கண்ணியமாகவும் காட்டின!

. மும்பையில் `45 ஆயிரம் கோடி மதிப்புள்ள அமெரிக்க விமானங்களையும், மின் உற்பத்தி சாதனங்களையும் இந்தியாவுக்கு விற்பதில் கணவர் மும்முரமாக இருக்க... மிஷேல், ஆதரவற்ற சிறுவர்களோடு பாண்டி விளையாடினார். விடுகதைகள் போட்டு பதில் கேட்டார். அனைத்துக்கும் மேலாக, அவர்களோடு கை கோத்துக்கொண்டு 'ரங் தே பஸந்தி' சினிமா பாடலுக்கு நளினமாக நடனம்ஆடினார். மறுநாள், கல்லூரியின் திறந்தவெளி விளையாட்டு மைதானத்தில், சுட்டெரிக்கும் வெயிலில் ஒபாமா தம்பதியர் இளைஞர்களைச் சந்தித்தனர். அங்கும் சிக்ஸர், ஃபோர் என்று ஸ்கோர் செய்யத் தவறவில்லை மிஷேல். 'சிகாகோவின் சாதாரண குடியிருப்பில் வளர்ந்தவள் நான். எனக்கும் என் சகோதரனுக்கும் கார், பங்களா என்று என் பெற்றோர்களால் எதையும் வழங்க முடியவில்லை. ஆனால் உழைப்பு, படிப்பு ஆகியவற்றின் மதிப்பைக் கற்றுக்கொடுத்தார்கள்!' என்று நெகிழ்ச்சியாகப் பேசிவிட்டு, 'ஆகவே இளைஞர்களே... நீங்கள் உங்களுக்காக மட்டும் கனவு காணாதீர்கள். உங்கள் நாட்டுக்காக மட்டும் கனவு காணாதீர்கள். மொத்த உலகத்துக்காகவும் கனவு காணுங் கள். உலகம் எதிர்நோக்கி இருக்கும் பிரச்னை களை உங்களால்தான் தீர்க்க முடியும். அதனால்தான் என்னுடைய கணவர் எந்த நாட்டுக்குச் சென்றாலும், அந்நாட்டின் தலைவர்களை மட்டும் சந்திக்காமல் உங்களைப் போன்ற இளைஞர்களைச் சந்திப்பதிலும் உறுதியாக இருக்கிறார்!' என்று உணர்ச்சிகரமாக முடித்தார் மிஷேல்.

மனைவிக்குச் சற்றும் சளைக்காமல் ஒபாமாவும் தன் இமேஜை ஏகத்துக்கும் உயர்த்திக்கொண்டார், இந்திய சுற்றுப் பயணத்தில். மன்மோகன் சிங்குடன் இணக்கமாக மணிக்கணக்கில் பேச்சு வார்த்தை நடத்தியதாகட்டும், மாணவர்கள், சிறுவர்களிடம் நேரம் காலம் பார்க்காமல் சரளமாக உரையாடியதாகட்டும்... 'மிஸ்டர். ஃப்ரெண்ட்லி' பிம்பத்தை அழுத்தமாகப் பதித்துக்கொண்டார். இதற்கும் பின்னணி காரணம் இல்லாமல் இல்லை. ஒபாமா இந்தியா கிளம்பிய சமயம்தான், அமெரிக்க காங்கிரஸ் தேர்தல் முடிவுகள் வெளியாகின. அதில், ஒபாமாவின் ஜனநாயகக் கட்சி பெரும் பான்மை ஆட்டம் கண்டுவிட்டது. இப்போது பெரும்பான்மை பலம், எதிரணியான குடியரசுக் கட்சிப் பக்கம். அந்தக் காயத்துக்கு மருந்து போடுவதாக இந்தியப் பயணத்தை அமைத்துக்கொண்டார் ஒபாமா. அமெரிக்கா வுக்கு லாபகரமான பயணமாக இந்தப் பயணத்தை அமைத்துக்கொள்ள இந்தியர்களை ஏகத்துக்கும் புகழ்ந்து தள்ளினார். இந்திய நாடாளுமன்றத்தில் ஒபாமா நிகழ்த்திய உரையில் அத்தனை தாஜா.

. நாடாளுமன்றத்தின் கூட்டுக் கூட்டத்தில் ஒபாமாவை வரவேற்றுப் பேசிய துணை ஜனாதிபதி அன்சாரியும், சபாநாயகர் மீரா குமாரும்... எழுதிவைத்ததைப் பார்த்துப் படித்தார்கள். ஆனால், ஒபாமாவோ பராசக்தி சிவாஜி கணேசன் கணக்காக, ஏற்ற இறக் கங்களோடு ரவீந்திரநாத் தாகூர், விவேகானந்தர் என்று துவங்கி, பஞ்சதந்திரக் கதைகள்

. வரை மேற்கோள் சிலம்பம் சுழற்றினார். டெல்லி சாந்தினி சவுக் துவங்கி, பெங்களூரின் அடுக்கு மாடிக் கட்டடங்கள் வரை குறிப்பிட்டு, இந்தியா வின் பூகோளத்தையும் ஒரு அலசு அலசினார். முத்தாய்ப்பாக 'பகூத் தன்யவாத்... ஜெய்ஹிந்த்!' என்று உரையை முடிக்க, சி சென்டர் ரசிகர்கள் போல நமது எம்.பி-க்கள் கைதட்டி ஆரவாரித் தார்கள். வெல்டன் ஒபாமா!

பின் குறிப்பு: இந்தப் பயணத்தில் ஏதேனும் ஒரு கட்டத்தில் மிஷேல் ஒபாமா சேலையணிந்து காட்சியளிப்பார் என்று எதிர்பார்த்திருந்தார்கள் மீடியா மக்கள். ஆனால், மிசஸ் ஒபாமா கடைசி வரை சேலையில் வீடு கட்டவே இல்லை என்பது அவர்களுக்குச் சின்ன ஏமாற்றம்தான்!

.

விகடன் லேட்டஸ்ட்

ஒபாமாவின் ஆட்டம்!

Vikatan Correspondent