Published:Updated:

பி.ஏ. தர்பார்!

பி.ஏ. தர்பார்!

பி.ஏ. தர்பார்!

பி.ஏ. தர்பார்!

Published:Updated:

பி.ஏ. தர்பார்!
பி.ஏ. தர்பார்!
பி.ஏ. தர்பார்!

ஒட்டுமொத்த விகடனுக்கும் ஒரே ஷார்ட்கட்!

ப.திருமாவேலன்
படங்கள்: கே.ராஜசேகரன்,சு.குமரேசன்
பி.ஏ. தர்பார்!

லைவர்கள்... விநோதமானவர்கள். அப்படிப்பட்ட மனிதர்களுக்கு அருகில் இருந்து பணியாற்றும் பி.ஏ-க்கள் எப்படி இருப்பார்கள்? மனைவி மக்களுக்குக்கூட குறிப்பிட்ட நேரங்களை மட்டுமே ஒதுக்கும் தலைவர்கள், இந்த பி.ஏ-க்களை மட்டும் எப்போதும் அருகில் வைத்திருக்கிறார்கள். நின்றால், நடந்தால், குனிந்தால், நிமிர்ந்தால், இவர்கள் இல்லாமல் தலைவர்கள் இல்லை.

பி.ஏ-க்கள்பற்றிப் பேசினாலே அரசியல் வட்டாரத்தில் ஒரு பெயரைச் சொல்வார்கள். முன்னாள் அமைச்சர் நாஞ்சில் மனோகரன், தனது வாழ்நாள் முழுவதும் பி.ஏ-வாக வைத்திருந்தது சின்னி கிருஷ்ணன் என்பவரை. 'சின்னி நடந்தால் நாஞ்சிலார் நடப்பார். அவர் கையெழுத்து போடச் சொன்னால் நாஞ்சிலார் நம்பிப் போடுவார். அவரை இவர் மனப்பூர்வமாக நம்புவார். சின்னியும் அவருக்கு உண்மையாக இருப்பார். இதுதான் பி.ஏ-க்களின் இலக்கணம்' என்பார்கள். தனது நிழலைக்கூடச் சந்தேகிப்பவன்தான் தலைவனாக இருக்க முடியும் என்பது உண்மைதான். ஆனால், அவர்களும் ஓர் ஆளை நிச்சயம் நம்பித்தான் ஆக வேண்டும். அப்படிப்பட்ட பி.ஏ-க்களின் கதை இது...

சண்முகநாதன் - கருணாநிதி!

பி.ஏ. தர்பார்!

காங்கிரஸ் ஆட்சிக் காலத்தில் எதிர்க் கட்சியாக இருந்து தனது கரகரக் குரலால் கோப வார்த்தைகளைக் கருணாநிதி உமிழ்ந்துகொண்டு இருந்த நேரம்... ஆட்சிக்கு விரோதமான வார்த்தைகளை அலேக்காகப் பிரித்து வழக்குகளைப் பாய்ச்சியது அந்நாளைய அரசு. 'அட்சரம் பிசகாமல் யாரப்பா என்னுடைய பேச்சை எழுதிக் கொடுப்பது' என்று கேட்டுத் தெரிந்துகொண்டார் கருணாநிதி. தான் அமைச்சராக ஆனதும் அந்த நபரை அழைத்து வந்து, தன் பி.ஏ-வாக நியமித்துக்கொண்டார். 40 ஆண்டுகள் கடந்த பிறகும் கோபாலபுரத்தில் எல்லாப் பிள்ளைகளையும்விட ஒழுங்கான பிள்ளையாக இருக்கும் சண்முகநாதன்தான் அவர்.

மேடையில் கருணாநிதி முழங்கிக்கொண்டு இருந்தால், குனிந்த தலை நிமிராமல் எழுதிக்கொண்டு இருப்பார் சண்முகநாதன். கருணாநிதி வீடு போய்ச் சேர்ந்து சாப்பாடு முடிப்பதற்குள் பேச்சை அடித்து முடித்து முரசொலிக்கு அனுப்பிவிடுவார். கோபாலபுரம் மாடியில் கருணாநிதி இருந்தால், தரையில் உட்கார்ந்து பழைய காலத்து பேப்பர்களை விரித்துப்போட்டு எதையாவது தேடிக்கொண்டு இருப்பார் இவர். கருணாநிதிக்கே ஏதாவது பெயர்க் குழப்பம், தேதி மறதி ஏற்பட் டால், பட்டென்று சொல்லிவிடும் ஆளாக வலம் வருகிறார் சண்முகநாதன்.

இருந்தாலும், இருவருக்கும் ஊடலும் மோதலும் எப்போதும் உண்டு. நான்கைந்து முறை சண்முகநாதனே கருணாநிதியைவிட்டு விலகியும் இருக்கிறார். இடைப்பட்ட காலத்தில் குணசிங், எழில் ஆகிய உதவியாளர்களை கருணாநிதி வைத்திருந்தாலும், சண்முகநாதன் இல்லாமல் அவராலும் இருக்க முடியவில்லை. 'அவர் என்னைச் சகித்துக்கொள்கிறாரா அல்லது நான் அவரைச் சகித்துக்கொள்கிறேனா?' என்ற அர்த்தத்தில் கருணாநிதியே கிண்டலடிக்கும் அளவுக்கு இந்த நட்பு அலாதியானது.

சண்முகநாதன், தன்னுடைய எல்லையை உணர்ந்தவர். யாருடனாவது கருணாநிதி பேசிக்கொண்டு இருக்கும்போது அதைக் கவனித்துச் சிரிப்பது, உள்ளே புகுந்து கருத்துச் சொல்வது போன்றவற்றைச் செய்ய மாட்டார். மனைவி, மக்களே சண்முகநாதன் வழியாகத்தான் சிலபல கருத்துக்களை அறிந்துகொள்கிறார்கள் என்ற வகையில் கருணாநிதிக்கு இணையானவராகவே உடன்பிறப்புக்களால் எதிர்கொள்ளப்படுகிறார் சண்முகநாதன்!

பூங்குன்றன் - ஜெயலலிதா!

பி.ஏ. தர்பார்!

அம்மாவின் முதல் பி.ஏ... சசிகலாதான். ஆரம்ப காலத்தில் டெல்லிக்கு உடன் செல்வதில் தொடங்கிய நட்பு, அதன் பிறகு உடன்பிறவாச் சகோதரியாக உருமாறுவது வரை தொடர்ந்தது. அதன் பிறகு, தனக்கு உறவினரும் மன்னார்குடி வட்டாரத்தைச் சேர்ந்தவருமான புலவர் சங்கரலிங்கத்தைத் தோட்டத்துக்குள் அழைத்து வந்தார் சசிகலா.

அறிக்கை எழுதுவது முதல் பத்திரிகைகளில் முக்கியமானதைப் படித்து கருத்துச் சொல்வது வரை சங்கரலிங்கம் முக்கியமானவராக வலம் வந்தார். அவரது மகன்தான் பூங்குன்றன். எம்.இ., பட்டதாரியான இவர் அவ்வப்போது வந்து போனார். அதன் பிறகு, நிரந்தரமாகத் தங்க ஆரம்பித்தார். இதெல்லாம் 12 ஆண்டுகளுக்கு முந்தைய விஷயங்கள்.

2001-ம் ஆண்டு ஜெ. முதலமைச்சராக ஆனபோது, அரசு அதிகாரிகள் கூட்டம் அதிகமானது. அவர்களே அனைத்தையும் பார்த்துக்கொண்டதால், பூங்குன்றன் வேறு வேலை தேடிப் போய்விட்டார். இடையில், புலவர் சங்கரலிங்கம் மரணம் அடைந்து... அடுத்த தேர்தலில் அ.தி.மு.க-வும் ஆட்சியைப் பறிகொடுத்தது. உடனே, அம்மாவுக்கு பூங்குன்றன் நினைவுதான் வந்தது. அழைத்து வரப்பட்டார்.

ராஜா அண்ணாமலைபுரத்தில் இருக்கிறது இவரது வீடு. தினமும் காலையில் 9 மணிக்கு போயஸ் கார்டனுக்குள் இவரது புல்லட் நுழையும். அம்மாவுக்குப் பிடித்த பச்சை நிறம்கொண்டது அது. வீட்டுக்குள் நுழைந்ததும் சிறு அலுவலக அறை இருக்கிறது. அங்குதான் இருப்பார் இவர். மாடியில் இருக்கிறது ஜெயலலிதா அறை. அங்கு இருந்து இன்டர்காமில் அம்மா அழைத்தால் மட்டுமே பூங்குன்றன் தொடர்புகொள்வார். ஜெயலலிதா பெயருக்கு வந்திருக்கும் அத்தனை கடிதங்களையும் பிரித்துப் படிக்கும் உரிமை பெற்றவர். பெரும்பாலும் தோட்டத்துக்கு வருபவை புகார்க் கடிதங்கள்தான். அது அப்படியே சின்னம்மா கைக்குப் போகும். அதில் 'அவசியமானவை' மட்டுமே அம்மாவின் கவனத்துக்குக் கொண்டுசெல்லப்படும். இதனாலேயே பல பெருந்தலைகள் வீழ்த்தப்பட்டுள்ளன. யார் என்ன சொன்னாலும் பூங்குன்றன் மீது ஜெயலலிதா நம்பிக்கை இழக்கவில்லை!

அருணகிரி-வைகோ!

பி.ஏ. தர்பார்!

ஐக்கிய நாடுகள் சபைக்குச் செல்லும்போது யாராவது ஒருவரை உடன் அழைத்துச் செல்லலாம் என்று 2000-ம் ஆண்டில் வைகோவுக்குச் சொல்லப்பட்டது. மற்ற எம்.பி-க்கள் தங்களது மனைவி, மகனை அழைத்துச் சென்றார்கள். ஆனால், நான் என் உதவியாளரைத்தான் அழைத்து வருவேன் என்று, வைகோவால் அழைத்துச் செல்லப்பட்டவர் அருணகிரி. பி.காம்., பட்டதாரி. அவரது அப்பா சங்கரன்கோவில் நகரசபைத் தலைவராக இருந்த பழனிச்சாமி. அருணகிரியை டெல்லிக்கு அழைத்துச் சென்று ஏதாவது வேலை வாங்கித் தாருங்கள் என்று வைகோவிடம் சொல்லியிருக்கிறார். விண்ணப்பத்தை வாங்கிப்பார்த்த வைகோவுக்கு அருணகிரியின் அழகான கையெழுத்து பிடித்துப் போனது. 'என்னுடைய வீட்டிலேயே தங்கிக்கொள்' என்று சொல்லி, ஒரு கம்பெனியில் வேலை வாங்கிக் கொடுத்தார். மற்ற நேரங்களில் வைகோவுடன் இருந்தார். 23 ஆண்டுகளாக வைகோவை வலம் வருகிறார் அருணகிரி.

வைகோவின் பேச்சுகளை அன்றைக்கு இரவே அடித்து பத்திரிகைகளுக்கு அனுப்புவதில் ஆரம்பித்தார். அதில் முக்கியமான உரைகளை இதுவரை 80 புத்தகங்களாகவும் கொண்டுவந்துள்ளார். தேர்தல் சுற்றுப் பயணங்கள் அனைத்திலும் அருணகிரி இருப்பார். மற்ற நேரங்களில் திருச்சி அடைக்கலம், பாலன், தி.மு.ராஜேந்திரன், செல்வராஜ் போன்றவர்களையும் உடன் அழைத்துச் செல்கிறார் வைகோ.

செஸ் விளையாட்டு தொடங்கி உலக அரசியல் வரை ஆர்வம்கொண்டவராக இருப்பதால், அருணகிரி அது தொடர்பான புத்தகங்களையும் எழுதியிருக்கிறார். வைகோ வாழ்க்கை வரலாறு, ம.தி.மு.க. கட்சியின் வரலாறு ஆகியவற்றை எழுதிக்கொண்டு இருக்கிறார். ம.தி.மு.க-வின் அதிகாரபூர்வ ஏடான சங்கொலியை இப்போது இவர்தான் கவனிக்கிறார். கன்னியா குமரி முதல் சென்னை வரை வைகோ நடந்து வந்த 51 நாள் எழுச்சி நடைப் பயணத்திலும் முழுமையாக நடந்து வந்தவர். வைகோவின் வேகத்துக்கு ஈடுகொடுக்கும் ஆளாக அருணகிரி இருப்பதால், இத்தனை ஆண்டுகள் தொய்வில்லாமல் தொடர்கிறார்!

நடராஜன் - ராமதாஸ்!

பி.ஏ. தர்பார்!

டாக்டர் ராமதாஸ் மேடையேறியதும் அவர் கையில் தண்ணீர் சொம்பைக் கொடுப்பவர் பெயர் நடராஜன். கருணாநிதிக்குப் பின்னால் சண்முகநாதனுக்கு நாற்காலி போடுவதைப்போலவே நடராஜனுக்கும் இருக்கை காலியாக இருக்கும்.

தைலாபுரம் தோட்டத்தில் அய்யா இருந்தாலும் எந்த வெளியூருக்குப் போனாலும் அவரைத் தொடர்ந்தே வருவார் நடராஜன். திண்டிவனத்தில் இருந்த ராமதாஸ், தைலாபுரம் வந்த காலத்தில், தன் 12 வயதில் ராமதாஸிடம் சேர்ந்தார். உதவியாளராக இருந்தவர், காலப்போக்கில் அவரது நம்பிக்கையைப் பெற்றார். திருமணம் நடத்திவைத்ததுகூட ராமதாஸ்தான். முதலில் போன் தொடர்புகளை இணைக்கும் நபராக இணைந்தார். இன்று நடராஜனின் செல்போன்தான் ராமதாஸின் எண். அந்த லைனில்தான் அனைவரிடமும் தொடர்புகொள்கிறார்.

நடராஜனின் அமைதி கலந்த சுறுசுறுப்பைப் பார்த்ததும் முழுமையாகத் தன்னுடன் வைத்துக்கொண்டார். தெரிந்தவர்களைப் பார்த்தால்கூடக் கொஞ்சம் யோசித்த பிறகே சிரிப்பார் நடராஜன். அவரிடம் இருந்து ஒரு வார்த்தை வாங்குவதுகூட சிக்கலான விஷயமாகவே இருக்கும். 'சாதாரணமாக வந்த ஒரு சிறுவன், இவ்வளவு கெட்டிக்காரனாக ஆவான் என்று எதிர்பார்க்கவில்லை' என்று கட்சியின் முக்கியப் புள்ளிகளே ஆச்சர்யப்படும் அளவுக்கு வளர்ந்துவிட்டார் நடராஜன்!

பார்த்தசாரதி - விஜயகாந்த்!

பி.ஏ. தர்பார்!

கேப்டனின் செயலர் பார்த்த சாரதி! விஜயகாந்த்துக்குப் பக்கத்தில் எதற்கும் சம்பந்தம் இல்லாத ஆள் மாதிரி அமைதியாக நின்றிருப்பார். ஆனால், முக்கியமானவை எதுவானாலும் 'பார்த்தசாரதி' என்று இவரிடம் அழைத்துச் சொல்லி விட்டுத்தான் அடுத்த ஸ்டெப் வைப்பார் விஜயகாந்த்.

பூர்விகம் காஞ்சிபுரமாக இருந்தாலும் சென்னையில் குடியேறிய குடும்பம். தியாகராயர் கல்லூரியில் படித்தவர். அப்போதே விஜயகாந்த் படங்கள் பிடித்துப்போய், சூப்பர் சுப்பராயன் மூலமாக அவரைச் சென்று சந்தித்திருக்கிறார். அடிக்கடி போய்ப் பார்க்க... சினிமா ஆசை பார்த்தசாரதிக்கும் வந்தது. 'புலன் விசாரணை' படத்தில் அசிஸ்டென்ட் டைரக்டராகச் சேர்த்துவிட்டார். அதன் பிறகு, விஜயகாந்த்துடன் நிரந்தரமாகத் தங்கும் அளவுக்கு இருவருக்கும் பிடித்துப்போனது. சினிமா கால கட்டங்களில் லேசாக இருந்த நெருக்கம், அரசியல் கட்சி ஆரம் பித்தபோது அதிகமானது.

கேப்டன் வீட்டில் இருந்தாலும், ஆபீஸில் இருந்தாலும், அவருக்கு அருகில் இருப்பார். பத்திரிகைகளின் முக்கியச் செய்திகளை பார்த்தசாரதி படித்துச் சொல்வார். தன்னுடைய கருத்துக்களை சொல்லி மக்கள் என்ன மாதிரிஎல்லாம் நினைப்பார்கள் என்று விஜயகாந்த் கேட்கும் உரை கல்லாக இருக்கிறார் இவர்.

எளிமையான ஆள். ஒரு பைக் வாங்கித் தருகிறேன் என்று விஜயகாந்த் சொன்னபோதும் மறுத்து விட்டாராம். பஸ் மற்றும் ஆட்டோ பயணங்கள்தான். பொதுமக்களின் நாடித் துடிப்பை உணர இந்த நேரத்தைப் பார்த்தசாரதி பயன்படுத்திக்கொள்கிறார். மனைவி, மகன் இருவரும் கேப்டனின் ரசிகர்கள். அதனாலேயே பார்த்தசாரதியை விஜயகாந்த்துக்கு நேர்ந்துவிட்டார்கள்!

பி.ஏ. தர்பார்!
பி.ஏ. தர்பார்!
                            
      
தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism