கடந்த மாதத்தில் மும்பையில் ஒருநாள்.... தாவூத் இப்ராஹிம், சோட்டா ராஜன் போன்ற நிழல் உலக தாதாக்களின் செல்போன் எண்களை பொது இடங்களில் எழுதி ஒட்டியிருந்தார்கள். 'அட... யார் லைனுக்கு வந்தாலும் ஒரு பேட்டி தட்டலாமே!'

என்ற ஆர்வம் உந்தித் தள்ளினாலும், எதற்கும் மும்பையின் போலீஸ் கமிஷனர் சிவானந்தனிடம் ஒரு வார்த்தை கேட்டுக்கொள்வோம் என்று அவரை லைனில் பிடித்து விவரம் கேட்டேன். கபகபவென சிரித்தவர், ''நல்லவேளை என்னை முதல்ல கூப்பிட்டீங்க. ஒருவேளை தாவூத் இப்ராஹிம் நம்பருக்கு டயல் பண்ணியிருந்தீங்கன்னா, இந்நேரம் எங்க அதிரடி போலீஸார் உங்களைச் சுத்தி வளைச்சு இங்கே தூக்கிட்டு வந்திருப்பாங்க. அந்த கிரிமினல்ஸ்கூட முன்னாடி தொடர்பில் இருந்தவங்களை வளைச்சுப் பிடிக்கத்தான் இந்த வலை விரிச்சிருக்கோம். நாங்களே எதிர்பார்க்காத பல கொழுத்த மீன்கள் சிக்கியிருக்கு. நல்ல வேட்டைதான்!" என்றார். இதுதான் சிவானந்தன் டச்!

10 வருடங்களுக்கு முன், மும்பை க்ரைம் பிராஞ்சின் உயர் அதிகாரியாக சிவானந்தன் பொறுப்பு ஏற்றுக்கொண்டதில் இருந்துதான் 'என்கவுன்ட்டர்' என்ற வார்த்தை நாளிதழ்களில் இடம் பிடிக்கத் தொடங்கியது. தொடர்ந்த அதிரடிச் சரவெடி வேட்டையில் மும்பையை மிரட்டிக்-கொண்டு இருந்த சுமார் 220 தாதாக்கள் க்ளோஸ். 26/11 மும்பை தாஜ் ஹோட்டல் தாக்குத-லுக்குப் பிறகு, மும்பை கமிஷனராக நிய-மிக்கப்பட்ட சிவானந்தன், ஜூன் 1 முதல் சிவானந்தன் மகாராஷ்டிரா மாநில டி.ஜி.பி!

தன்னுடைய 87 வயதுத் தாயார் லட்சுமி அம்மாளிடம் ஆசி வாங்க கோவை வந்திருந்த சிவானந்த-னைச் சந்தித்தேன்.

''உங்கள் துப்பாக்கி இதுவரை எத்தனை பேரைச் சுட்டிருக்கும்?"

''ஒரு ரகசியம் சொல்லவா? இந்தத் துப்பாக்கியை இதுவரை நான் பயன்படுத்தியதே இல்லை. எனது பாய்ஸ்தான் சுடுவார்கள். நான் போட்டுக் கொடுக்கும் ஸ்கெட்ச்சை அவர்கள் நிறைவேற்றுவார்கள். பிறகு என் துப்பாக்கிக்கு என்ன வேலை இருக்கப்போகிறது!"

''மும்பைத் தீவிரவாதத் தாக்குதல் குற்றவாளி கசாப்பை நாள் ஒன்றுக்கு லட்சக்கணக்கில் செலவழித்துப் பரமாரிக்கிறீர்களாமே!"

''அந்த லட்சக்கணக்கான ரூபாய் அவன் பராமரிப்புக்கு அல்ல; பாதுகாப்புக்கு. சாவி கொடுத்துவிடப்பட்ட பொம்மை அவன். சின்னப் பையன். அந்தப் பயங்கரத்தை பாகிஸ்தான்தான் அரங்கேற்றியது என்பதற்கான ஒரே சாட்சி அவன்தான். அதனால் அவன் உயிருக்கு எந்த நேரமும் அதி ஆபத்து காத்திருக்கும். அதனால், இத்தனை பாதுகாப்பு ஏற்பாடுகள் அவசியம்!''

''இனியும் கடல் மார்க்கமாக படகில் வந்து இன்னொரு தாக்குதலைத் தீவிரவாதிகள் நடத்த முடியும்தானே!"

''அதற்கு வாய்ப்பே இல்லை. ஒருவேளை தீவிரவாதிகள் கடல் மார்க்கமாக ஊடுருவினால், மும்பையின் எந்தப் பகுதியாக இருந்தாலும் எங்கள் போலீஸார் மின்னல் வேகத்தில் எதிர்த்தாக்குதலில் இறங்கிவிடுவார்கள். கடலிலும் தரையிலும் ஒரே நேரத்தில் செல்லக்கூடிய வாகனங்களை வாங்கி இருக்கிறோம். 'க்விக் ரியாக்ட் டீம்' என்ற பெயரில் 1,500 அதிரடி வீரர்களைத் தயார்படுத்தி உள்ளேன். தீவிரவாதிகளை எதிர்த்துப் போரிடுவதற்கான உலகத் தரப் பயிற்சியில் இருக்கிறார்கள் அவர்கள். புல்லட் புரூஃப் வாகனங்கள், மொபைல் எக்ஸ்-ரே வாகனங்கள், அதிநவீன கன்ட்ரோல் ரூம், வெடிகுண்டினைச் செயல்இழக்கச் செய்யும் பிரிவு என மும்பை போலீஸ் முன் எப்போதையும்விட பலமிக்கதாக மாற்றிய திருப்தி எனக்கு இருக்கிறது!''

''அதே சமயம் போலீஸாருக்கு மனரீதியான அவஸ்தைகளும் அதிகரித்திருப்பதைக் கவனித்துஇருக்கிறீர்களா?"

"கவனிக்காமலா? நானும் போலீஸ்காரன்தானே! டென்ஷன் இல்லாத மனநிலையில்தான், விவேகமாக, வீரமாக, ஒரு போலீஸ்காரனால் மோத முடியும். போலீஸாரின் உடல், மன நலனை அதிகரிக்க முதற்புள்ளியாக 'ஆபரேஷன் ஆரோக்கியா' என்ற பெயரில் 32 ஆயிரம் போலீஸாருக்கு தலைமுதல் கால் வரையிலான மருத்துவப் பரிசோதனையை முடித்துவிட்டேன். 25 உடற்பயிற்சிக் கூடங்களை அமைத்துவிட்டோம். காவலர்களுக்கும் எனக்கும் நேரடிப் பாலமாக இருக்கும் வகையில் 'சாம்வாடு' என்ற பெயரில் ஒரு பத்திரிகை ஆரம்பித்தேன். அதில் அவர்கள் என்னிடம் தெரிவிக்க வேண்டிய அத்தனை தகவல்களையும் கொட்டுகிறார்கள். நானும் பதில் அளிக்கிறேன். இந்த பத்திரிகை ஒவ்வொரு போலீஸ் குடும்பத்துக்கும் செல்லும்!"

"உங்கள் குடும்பத்தினர் குறித்து..."

''உஷ்ஷ்ஷ்... அது மட்டும் ரகசியம். வேலை வேறு, குடும்பம் வேறு. எனது வெற்றிக்குக் காரணம் எனது குடும்பத்தினரின் பாதுகாப்பும்தான்!"