கடந்த சில வாரங்களாக நாம் பார்த்து வந்த ஃபேஸ்புக் Personalization பிரச்னை

ஓரளவுக்கு முடிவுக்கு வந்ததுபோல் தெரிகிறது. ஃபேஸ்புக்கின் CEO ஸக்கர்பெர்க், 'தெரியாம பண்ணிட்டேங்ணா... இனி இப்படிப் பண்ண மாட்டேங்ணா!' பாணியில் தனக்கு நெருங்கிய வலைதள நண்பர்களுக்கு இ-மெய்லினார். தற்போது பயனீட்டாளர்கள் எளிதாகத் தங்களது ப்ரைவஸியைக் காத்துக்கொள்ள புதிய மாற்றம் ஒன்றை ஃபேஸ்புக் வெளியிட்டு இருப்பது பதிவு செய்யப்பட வேண்டியது. தெளிவான விவரங்கள் வேண்டுபவர்கள் இந்த வீடியோவைப் பார்க்கலாம் http://new.youtube.com/watch?v=nuLBJ3HZjn4-feature=player_embedded

சராசரி கணினிப் பயனீட்டாளராக உங்களுக்கு இந்தச் சம்பவம் நடந்திருக்கும் சாத்தியக்கூறுகள் மிக அதிகம். கணினியில் ஏதோ வேலை செய்யத் தொடங்குகிறீர்கள். திடீரென நீலத் திரையில் எண்களும், எழுத்துக்களுமாக ஏதோ வெளிப்பட, கணினியைப் பரிதாபமாக மலங்க மலங்கப் பார்த்தபடி உட்காந்திருக்க, அதில் வேலை பார்த்துக்கொண்டு இருந்த உங்களுக்கு விண்ணென்று பொறி பறக்கக் கோபமும் பதற்றமுமாகக் கணினியை அணைத்து மீண்டும் தொடங்குகிறீர்கள். கணினி பொறியாளர் அல்லாத ஒவ்வொருவருக்கும் இந்தப் பிரச்னை திருகு வலி தர கியாரன்ட்டி. பொதுவாக, கணினி தடாரென இப்படி கிராஷ் ஆவதற்குக்

காரணங்கள், கணினியின் வலுவையும் மீறி ஏகப்பட்ட மென்பொருட்களை ஒரே நேரத்தில் இயக்குவது, கணினியின் மெமரியைச் சரிவர உபயோகிக்க முடியாத / சோதிக்கப்படாத மென்பொருட்களை இயக்குவது, வைரஸ் தாக்குதல். இப்படிச் சில...

'எனக்கு இந்தப் பிரச்னை வந்ததே இல்லை. ஏன்னா, நான் 'ஆப்பிள்'தான் கடிக்கிறேன்' என்று பின்னூட்டமிடத் துடிக்கும் சிறுபான்மை கணினி பயனீட்டாளர்களுக்கு ஒரு முக்கியப் புள்ளிவிவரம். உலகத்தின் மேசைக் கணினிகளில் 95 சதவிகிதம் இன்னும் மைக்ரோசாஃப்டின் விண்டோஸ் கணினிதான். இந்தப் பிரச்னையைத் தீர்க்க முடியவில்லை என்றாலும், பிரச்னை வருவதற்கு முன், புயல் அறிவிப்புபோல 'இப்படி நடக்கப் போகிறது' என்று தெரிந்துகொண்டால், அதைத் தவிர்க்கலாமே எனத் தவித்த அனுபவம் உண்டு என்றால், உங்களுக்கு நற்செய்தி சில பாராக்களில் இருக்கிறது.

சில வருடங்களுக்கு முன்பு வரை, கணினிகள் அலுவலகங்களிலும், வீடுகளிலும் வாங்கி வைக்கப்பட்டு, தனித் தீவுகளாக இயக்கப்பட்டு வந்த காலம் உண்டு. கணினி என்றால் இணையத்துடன் இணைக்கப்பட்டுதான் இருக்க வேண்டும் என்ற நிலை வந்துவிட்ட இந்நாட்களில், பயனீட்டாளர்களின் பயன்பாட்டு விவரங்களைத் தொடர்ந்து திரட்டி, அதன் மூலம் கிடைக்கும் அறிவைப் பயன்படுத்தி, உங்களது கணினியை நீங்கள் பயன்படுத்தும் விதத்தைக் கணித்து, பிரச்னையை முன்னறிந்து சொல்லிவிடலாம் என்ற ஐடியாவின் மீது கட்டப்பட்ட நிறுவனம் ஒன்று, இந்த வாரம் இணைய சந்தைக்கு வந்திருக்கிறது. நிறுவனத்தின் உரலி new.soluto.com

இணையத்தின் டிரெண்ட் ஏரியாக்களை இப்படி நான்கு வகையாகப் பிரிக்கலாம். Local, Mobile, Social, Global. இந்த வாரத்தில் இன்றைக்கெல்லாம் ஹாட் ஏரியாவாக இருக்கும் 'இடம் சார்ந்த சேவையை' அலசலாம். நாளரு ஐடியாவும், பொழுதொரு appsயுமாக, Location Based Service எனப்படும் சேவைகள் வெளிவந்த வண்ணம் இருக்கின்றன. இடம் சார்ந்த சேவைகள் மேற்கண்ட நான்கு டிரெண்டுகளையும் பயன்படுத்துவது குறிப்பிடத்தக்கது. இவற்றின் அடிப்படை ரொம்பவும் சிம்பிள். காலையில் வீட்டில் இருந்து புறப்பட்டது முதல் மீண்டும் வீடு சேரும் வரையும், பல இடங்களுக்கு நீங்கள் சென்றிருப்பீர்கள்தானே? கணபதிபவனில் காபி/காலை உணவு, அலுவலகம், செட்டிநாடு ரெஸ்டாரென்ட்டில் மதிய உணவு, அலுவலகம், ரோட்டோர நாயர் டீக் கடை, பீச் / பார்க் / தியேட்டர் / டாஸ்மாக் என வயது, விருப்பத்துக்கு ஏற்ப விசிட் அடித்த ஒவ்வொரு இடத்துக்கும் அதற்கே உரிய Latitude, Longitude எண் இருக்கும். (இந்த காம்பினேஷனை geocode என்பர் சுருக்கமாக). உங்களது வீட்டின் geocode என்ன என்பதைத் தெரிந்துகொண்டுதான் ஆக வேண்டும் என்றால் http://itouchmap.com/latlong.php உரலியைச் சொடுக்கி, உங்கள் விலாசத்தைக் கொடுத்தால், geocode கிடைக்கும். iPhone போன்ற ஸ்மார்ட் போன் கைவசம் இருந்தால், நீங்கள் இருக்கும் இடத்தின் geocode தெரிந்துகொள்ளலாம்.

இடம் சார்ந்த சேவைகளின் அடிப்படை பயனீட்டாளர்களை அவர்கள் செல்லும் இடங்களில் Check-in செய்யவைப்பது. இதில் பிரபல சேவையான new.foursquare.com பயனீட்டாளர்களை அவர்களது சேவையை ஒரு விளையாட்டாகப் பயன்படுத்தவைப்பதில் பெரு வெற்றி கண்டு இருக்கிறது. உதாரணத்துக்கு, தூத்துக்குடி ஆழ்வார் மிலிட்டரி ஹோட்டலுக்கு அடிக்கடி செல்லும் வசீகரன் அங்கு செல்லும்போது எல்லாம் இடம் சார்ந்த சேவையைப் பயன்படுத்தி Check-in செய்கிறார். மற்ற அனைவரையும்விட அதிகமாக அவர் அந்த இடத்தை check-in செய்தால் அவருக்கு அந்த இடத்தின் 'மேயர்' பதவி வழங்கப்படும். புலிகேசிக்குக் கொடுக்கப்படும் காமெடி பட்டமாக இருப்பதாகத் தோன்றினாலும், இடம் சார்ந்த சேவைகளின் வியாபார உபயோகம் பிரமாதமானது. உதாரணத்துக்கு, UK வில், பிரபலமான Dominos Pizza தனது கடைகளில் 'மேயராக'த் தேர்வானவர்களுக்கு இலவச Pizza வழங்கப்படும் என்று இந்த வாரம் அறிவித்துள்ளது. தொடர்ந்து ஐந்து முறை எங்களது கடைகளில் Check-in செய்பவர்களுக்கு 10 சதவிகிதம் காபி விலையில் தள்ளுபடி என்கிறது பிரபல காபி நிறுவனமான Starbucks. மிகப் பெரிய நிறுவனங்கள் மட்டும் அல்லாமல், சிறு தொழில்களும் இடம் சார்ந்த சேவைகளைத் தங்களுக்குப் பயனுள்ள வகையில் பயன்படுத்திக்கொள்ளத் தொடங்கிஉள்ளன. சில வாரங்களுக்கு முன், கார் டீலர் கடையில், சர்வீஸுக்காகக் காத்துக்கொண்டு இருந்தபோது, அந்த இடத்தை Check-in செய்யும்போது, சின்னதாக கீழே ஒரு விளம்பரம் 'நீங்கள் இருக்கும் இடத்துக்கு மிக அருகில் உள்ள இந்தியா பேலஸ் உணவகத்தில் 20 சதவிகிதம் buffet lunch தள்ளுபடி' என்றது. இடம் சார்ந்த சேவை என்ற ஐடியா தொடக்க நிலையில் இருக்கும்போதே இந்தப் போடு போடுகிறது என்றால், இது எப்படிப் பிரமாண்டமாக வளரப்போகிறது என்பதை நினைப்பதே கடினமாக இருக்கிறது.

இந்தியாவில் இப்போதைக்குப் பேசுவதற்கும் குறுஞ்செய்தி அனுப்பவும் மட்டும் பெரும்பான்மையாக அலைபேசி சார்ந்த தொழில்நுட்பம் பயன்படுத்தப்பட்டு வருகிறது. ஆனால், GPS வசதி உள்ள ஸ்மார்ட் போன் பெருகி வருவதால், விரைவில் இந்தியாவில் இடம் சார்ந்த சேவைகள் பிரபலமாவது உறுதி. இடம் சார்ந்த சேவையை நீங்கள் எப்படிப் பயன்படுத்துவீர்கள்? விகடனின் ஃபேஸ்புக் குழுவில் எழுதுங்கள்... அங்கே கதைக்கலாம்!