இதைப் படிக்காதீங்க!

இதைப் படிக்காதீங்க! . முதல் இடத்தைச் சுற்றிவரும் ஐந்தாறு சூத்திரதாரிகளுக்கு சென்னையின் பிரதான இடத்தில் மதிப்புக்குரிய இடம் சலுகை விலையில் தரப்பட்டது. அடுக்கு மாடி ஆக்கி லாபம் பார்க்கும் காரியங்கள் தொடங்கிவிட்டனவாம்.

. மிரட்டும் மந்திரி நடத்தும் கல்வி நிறுவனத்தில் சரியாகச் சம்பளம் தரப்படுவதில்லையாம். எப்படிக் கேட்பது என்று பயத்தில் இருக்கிறார்கள் ஊழியர்கள். 'ஐ டோன்ட் கேர்' என்கிறாராம் மந்திரி!

. சர்ச்சையில் சிக்கிய ஆசிரமத்துக்கு மனைவியுடன் சென்று ஆசி வாங்கிய சிரிப்பு நடிகர், 'அந்தப் படம் கிடைச்சாப் போட்டுறாதீங்க' என்று நிருபர்களுக்கு போன் போட்டுக் கெஞ்ச ஆரம்பித்துஇருக்கிறார்!

. ஞாபக சக்தி குறைந்து வருவதாக சிகிச்சை பெற்ற மூத்த அமைச்சர், அதற்கான பில்லை மட்டும் மறக்காமல் க்ளைம் பண்ணிவிட்டாராம்!

. கண் சிவக்கும் தலைவர், அம்மா கட்சியைத் திட்டிப் பேசுவதில்லையே என்று சிலர் புகார்ப் பத்திரிகை வாசித்தார்களாம். 'அப்படி ஒரு கட்சி இருந்தாத்தானே திட்ட முடியும்' என்று இன்னும் சிவந்தாராம்!

. 'நான் திருந்திட்டேன்' என்று தயாரிப்பாளர்கள் பலருக்கும் தானே போன் செய்து பேசியதில், கலக்கல் காதல் நடிகருக்குக் கை மேல் பலனாம். ஏழெட்டுப் படங்கள் புக் ஆகிய திருப்தியில் கட்சியைக் கலைத்துவிட முடிவெடுத்துள்ளாராம்!

. மீண்டும் பசையான துறை தனக்கு வரப் போகிறது என்று இரண்டு வாரங்களாகச் சொல்லி, சிரித்த முகத்துடன் வலம் வந்தார் சீனியர் அமைச்சர். ஆனால், ஏமாற்றம்தான் கிடைத்தது. ஆள் சைலன்ட் ஆகிவிட்டார்!

.

இதைப் படிக்காதீங்க!

Vikatan Correspondent