''1961-ம் வருடம் சென்னை மருத்துவக் கல்லூரியில் சுகாதார ஆய்வாளருக்கான டிப்ளமோ படித்துக்கொண்டு இருந்தபோது, 15 நாட்கள் பயிற்சிக்காக காஞ்சிபுரம் சென்றிருந்தோம். பேரறிஞர் அண்ணாவின் இல்லம் வழியாகச் செல்லும் வாய்ப்பு கிடைத்தது. அண்ணாவோடு ஒரு புகைப்படம் எடுத்துக்கொள்ள எங்களுக்கு ஆசை.

தகவல் அனுப்பவும், அண்ணா எங்களை வீட்டுக்குள் வரச் சொன்னார். பலரும் காத்திருந்தனர். 'உங்களுடன் போட்டோகிராபர் வந்திருக்கிறாரா?' என்று கேட்டார். 'இல்லை!' என்றோம். 'அப்படியானால் போட்டோ ஸ்டுடியோவுக்கே சென்றுவிடுவோமா?' என்று அண்ணா கேட்கும்போதே, ஓர் அவசர அழைப்பு. கட்சிப் பிரமுகர் ஒருவர் லாரி விபத்தில் காயம்பட்ட தகவல். 'நாளை பார்க்கலாம். கோபித்துக்கொள்ளாதீர்கள்!' என்று அண்ணா மருத்துவமனைக்குக் கிளம்பிச் சென்றுவிட்டார்.

மறுநாள் காலை போட்டோகிராபருடன் சென்றுவிட்டோம். தகவல் அறிந்த அண்ணா எங்களை வரச் சொல்லிவிட்டு, அவசர அவசரமாக முகச் சவரம் செய்து, குளித்து, ஆடை மாற்றிக்கொண்டு வந்தார். அண்ணாவுக்கு நன்கு அறிமுகமான அந்த போட்டோகிராபர், 'என்ன அண்ணா, இன்னிக்கு நீட்டா ஷேவ் எல்லாம் செய்திருக்கிறீர் கள்?' என்று கேட்டார். அதற்கு அண்ணா, 'காலேஜ் ஸ்டூடன்ட்ஸோடு போட்டோ எடுக்கும்போது நாமளும் நீட்டா, டிரிம்மா இருக்க வேண்டாமா?' என்றார் சிரித்துக்கொண்டே. அந்தப் பேரறிஞருக்குள் இருந்த குழந்தைத்தனத்தை நாங்கள் உணர்ந்த தினம் அது!''

- ந.திருநாவுக்கரசு, தஞ்சாவூர்-7.

''சில மாதங்களுக்கு முன் திருச்சியில் நடைபெற்ற விழாவில் பங்கேற்க சினேகா வந்துஇருந்தார். அவரை வரவேற்று உபசரிக்கும் பொறுப்பு என் வசம். ஏர்போர்ட்டில் இருந்து சினேகாவை பிக்-அப் செய்து ஹோட்டலுக்கு அழைத்துச் சென்றேன். முதல் வார்த்தையிலி ருந்தே நெருக்கமான ஒரு தோழியைப் போலவே பழகினார். 'நீங்கள் என்ன செய்துகொண்டு இருக்கிறீர்கள்?' என்று என்னிடம் கேட்டார். கல்லூரியில் படித்துக்கொண்டு, லோக்கல் சேனல் ஒன்றில் நிகழ்ச்சித் தொகுப்பாளராக இருப்பதாகக் கூறியதும் ஆச்சர்யம் அடைந்தார். 'நீங்க ஸ்கூல்ல படிச்சிட்டு இருப்பீங்கன்னு நான் நினைச்சுட்டு இருக்கேன். ஹே! உண்மையைச் சொல்லுப்பா... சினிமா நடிகைகிட்டயே உன் வயசைக் மறைக்கிறியா?' என்று விடாமல் கலாய்த்துக்கொண்டு இருந்தார். நான் கல்லூரி மாணவி என்பதை அவர் நம்பவே இல்லை. பிறகு, என் காலேஜ் ஐடென்ட்டி கார்டைக் காண்பித்த பிறகுதான் நம்பினார்!''

- எம்.அஞ்சலி, திருச்சி.

''உலக சாம்பியன் ஆவதற்கு முன் 1993-ம் ஆண்டு ஒரே நேரத்தில் 40 பிளேயர்களுடன் செஸ் விளையாட ராஜபாளையம் வந்திருந்தார் விஸ்வநாதன் ஆனந்த். அப்போது அவர் உலகின் ஐந்தாம் நிலை செஸ் வீரராக இருந்தாலும், உலக சாம்பியன் காஸ்பரோவ் மற்றும் முன்னாள் உலக சாம்பியன் கார்போவ் இருவரையும் வென்றிருந் தார். ஆனால், அந்த வெற்றிக்கு உண்டான எந்தப் பிரதிபலிப்பும் இல்லாமல், மிகவும் இயல்பாக எங்களுடன் உரையாடிக்கொண்டு இருந்தார். நாலு பிளேயர்களுடன் டிரா செய்தவர், மற்ற அனைவரையும் வென்றார். போட்டிகள் முடிந்த பிறகும் உடனே கிளம்பிச் செல்லாமல், போட்டோக்களுக்கு போஸ் கொடுத்தவர், இளம் பிளேயர்களுக்கு நிறைய டிப்ஸ் வழங்கினார். அன்று அவரிடம் டிப்ஸ் கேட்ட பலரும், இன்று இந்தியாவுக்காக சர்வதேச அளவில் விளையாடி வரும் பிளேயர்கள்!''

- வி.ஞானகுகன், ராஜபாளையம்.