"1974-ம் ஆண்டு என்று நினைவு. காரைக்குடி அழகப்பா கல்லூரி மாணவன் நான். ஒரு வெள்ளிக்கிழமை மாலை பொதுக்கூட்டத்தில் பெருந்தலைவர் காமராஜர் பங்கேற்கிறார் என்பதால், கல்லூரிக்கு விடுமுறை அறிவிக்கப்பட்டது. ஓய்வு விடுதியில் தங்கியிருந்த காமராஜரைச் சந்தித் துப் புகைப்படம் எடுத்துக்கொள்ளலாம் என்று 10 மாணவர்கள் சென்றோம். ஆசையோடு அழைத்து அன்புமொழி பேசுவார் என்று ஆர்வமாக உள்ளே சென்ற எங்களுக்குக் கிடைத்தது அதட்டலான அர்ச்சனைதான். 'என்னங்கடா, காலேஜுக்குப் போகாம இங்க எதுக்குடா வந்தீங்க?' என்று கர்ஜித்தார். 'காலேஜுக்கு விடுமுறை' என்றாலும் அடங்காமல், 'ஓஹோ! நான் வர்றேன்னு ரவுடித்தனம் பண்ணி மூடவெச்சிட்டீங்களாக்கும். இதுக்குத்தான் உங்க அப்பன் ஆத்தா காலேஜுக்கு

அனுப்பினாங்களா?' என்று விடாமல் வெளுத்தெடுத்தார். நாங்கள் நடுங்குவதைப் பார்த்ததும் கொஞ்சம் சமாதானமாகி, 'நீங்கள்லாம் படிச்சுப் பட்டம் வாங்கி மத்தவங்களும் படிக்கத் தூண்டுகோலா இருக்கணும்!' என்று கோபம் அடங்கிக் குழந்தையாகச் சிரித்தார். முதலில் புகைப்படம் எடுக்கச் சென்ற மாணவன் தலைவரின் காலடி ஓரம் உட்காரவும், அவன் முதுகில் பளார் என்று ஓங்கி அடித்து, எழுந்து நிற்கச் சொல்லி புகைப்படம் எடுத்துக்கொண்டார். அடுத்து சென்ற நான் தலைவரின் அருகில் சோபாவிலேயே அமர்ந்து படம் எடுத்துக்கொண்டேன். காமராஜரின் கம்பீரமும், ஆளுமையும், நேர்மையையும், எளியவர்களையும் மதிக்கும் பண்பையும் அத்தனை பக்கத்தில் இருந்து பார்த்தது என் வாழ்நாளுக்கான பயன்!''

- த.தியாகையா, சென்னை-37.

''ஜெர்மனியின் ஃப்ராங்ஃபர்ட் ஏர்போர்ட். லண்டன் செல்லும் விமானம் தாமதமாகப் புறப்படும் என்ற அறிவிப்பு காரணமாக நொந்துபோய் அமர்ந்தேன். அட, என் கண்களை என்னால் நம்ப முடிய வில்லை. கொஞ்சம் தள்ளி தனிமையில் அமர்ந்திருந்தது ரஜினி. அவரைப் பார்த்ததும் நான் பதற்றத்தில் திக்குமுக்காடித் திண்டாடிவிட்டேன். ஆனால், அவரோ யாரோ எவரோ போல, 'ரஜினி'க்கும் தனக்கும் துளிகூட சம்பந்தம் இல்லை என்பது போல அமர்ந்திருந்தார். ரஜினியின் அபூர்வமான தனிமையைக் கெடுக்கலாமா என்று நான் தயங்கித் தயங்கிப் பார்க்க, என்ன நினைத்தாரோ... ரஜினியே என்னருகே வந்து பேசினார். அரை மணி நேரத்துக்குள் 4, 5 சிகரெட் பிடித்திருப்பார். 'ஏன் இவ்வளவு சிகரெட் பிடிக்கிறீர்கள்?' என்று கேட்டேன். 'நல்லா கவனிச்சுப் பாருங்க. ஒரு சிகரெட்டைப் பத்தவெச்சா ரெண்டு அல்லது மூணு பஃப்தான் இழுப்பேன். அப்புறம் தூக்கிப் போட்டுருவேன். எனக்கு சிகரெட் பத்தவைக்குறதுல ஒரு த்ரில். அதான்!'னாரு.

'தமிழ் சினிமாவுல நிறைய புதுப் பசங்க வந்துட்டாங்க. இனிமேலும் நாம நடிச்சுட்டு இருக்க முடியாது. எப்படா கழண்டுக்கலாம்னு நேரம் பார்த்துட்டு இருக்கேன்'னு மனசுவிட்டு ரஜினி பேசிட்டு இருந்தது 2001-ம் வருஷத்தில். ஆனா, அதுக்கப்புறம்தான் 'சந்திரமுகி', 'சிவாஜி'ன்னு அவரோட மாஸ் ஹிட் படங்களில் நடிச்சார் சூப்பர் ஸ்டார்!''

- ஸ்ரீகாந்த் ஸ்ரீனிவாசன், சென்னை-42.

''நானும் என் நண்பர்களும் தமிழ்நாடு - கேரளாவின் ஆல்டைம் வாய்க்கால் வரப்புத் தகராறான முல்லைப் பெரியாறு அணை அமைந்திருக்கும் தேக்கடிக்குச் சென்று இருந்தோம். டோல்கேட்டில் பாஸ் வாங்கக் காத்திருந்த கார் ஒன்றில் நடிகை சோனியா அகர்வால். '7ஜி ரெயின்போ காலனி' படப்பிடிப்புக்கு வந்திருப்பதாகக் கூறினார். காரில் டைரக்டர் செல்வராகவனும் இன்னொருவரும் அமர்ந்திருந்தார்கள்.

நாங்கள் சோனியாவுடன் போட்டோ எடுக்க அனுமதி கேட்க, அவர் செல்வராகவனைப் பார்த்தார். அவரும் ஓ.கே. சொல்லிவிட்டார். போட்டோ எடுக்க ஆள் இல்லாததால், கேமராவை செல்வாவுடன் இருந்த நபரிடம் கொடுத்து எடுக்கச் சொன்னோம். உடனே கார் டிரைவர் பதறி ஓடி வந்து, கேமராவை வாங்கி அவரே போட்டோ எடுத்துக் கொடுத்தார்.

'7ஜி ரெயின்போ காலனி' படம் ரிலீஸானதும் அடிச்சுப் பிடிச்சு முதல் ஷோ பார்த்தோம். அதில் ஹீரோ ரவி கிருஷ்ணாவை எங்கோ பார்த்தது போல இருக்கே என்று யோசித்தால், அட... அன்று காரில் செல்வா அருகில் அமர்ந்திருந்த, நாங்கள் போட்டோ எடுக்கச் சொன்னதும் டிரைவர் பதறிய அந்த நபர்!''

- ப.நிஸாருல் ஹக், சென்னை-1.