தமிழகம் முழுக்க குளங்கள், ஏரிகள் மறைந்து ஏரியாவாகிவிட்டன. நிலத்தடி நீரை அசுரத் தனமாக உறிஞ்சும் ராட்சஸ இயந்திரங்களால் வரவேற்காத வறட்சி! சென்னையைப் பொறுத்தவரை பூண்டி, சோழாவரம், செங்குன்றம், செம்பரம்பாக்கம் ஏரிகள்தான் மக்களுக்கான தாக சாந்தி. ஆனால், நாளுக்கு நாள் லட்சங்களில் 'வந்தாரை வாழவைத்துக்' கொண்டு இருப்பதால் இந்த ஏரிகளையும் நம்பியிருக்க முடியாது. தெலுங்கு கங்கைத் திட்டம், வீராணம் என்று திட்டங்களாக அடுக்கினாலும் பற்றாக்குறை என்னவோ பருத்துக்கொண்டே போகிறது. பாலாற்று படுகையின் கடைசித் துளியையும் கவர்ந்துகொண்டாயிற்று! இனி, சென்னையின் தண்ணீர் தேவைக்கு எங்கே போவது?

''இதோ பரந்து விரிந்து அலையடித்து அழைக்கிறதே... கடல்!'' என்று வங்கக் கடல் நோக்கி கை காட்டுகிறார்கள் குடிநீர் வாரிய அதிகாரிகள்.

'வரும் ஜனவரி முதல் கடல் நீரைக் குடிநீராக சென்னை மக்கள் குடிக்க முடியும்' என்று அமைச்சர் மு.க.ஸ்டாலின் அறிவித்து இருப்பது உண்மையில் சந்தோஷமான சங்கதிதான். ஆனால், 'இது எந்தளவுக்குச் சாத்தியம்... கடல் குடிநீர் உடல் நலனுக்கு ஆரோக்கியமானதா...' போன்ற கேள்விகளுக்கு விடை கேட்டுப் போன என்னை கைப் பிடித்து அழைத்துச்சென்று மீஞ்சூர் 'டீசாலினேஷன் பிளான்ட்' முன் நிறுத்தினார்கள். கடல் நீரைக் குடி நீராக்கும் திட்டத்தின் பிரமாண்ட ஃபேக்டரியை 'டீசாலினேஷன் பிளான்ட்' என்கிறார்கள். சவுதி அரேபியா, ஐக்கிய அரபு நாடுகள், அமெரிக்கா, சில ஐரோப்பிய நாடுகளிலும் இந்தியாவில் குஜராத், லட்சத் தீவுகளில் சிறிய அளவிலும் செயல்படுத்தப்பட்டு வருகிறது இந்தத் திட்டம். மீஞ்சூர் ப்ராஜெக்ட்தான் இந்தியாவின் முதல் பெரிய தண்ணீர்த் தொழிற்சாலை!

'மெட்ரோ வாட்டரி'ன் செயற்பொறியாளர் சேதுராமன் ஆலையை சுற்றிக் காட்டி விளக்க ஆரம்பித்தார். ''பல நாடுகளில் அனல் மின் நிலைய வெப்பத்தை பயன்படுத்தி, கடல் நீரை ஆவியாக்கி பின்னர் சுத்திகரித்து நன்னீராக்கி விநியோகிக்கும் தொழிற்சாலைகள் இருக்கிறது. ஆனால், மீஞ்சூர் ஆலையில் பயன்படுத்தப்படுவது நவீன தொழில்நுட்பமான சவ்வூடு பரவல் முறை (reverse osmosis). இந்த முறையில் சுற்றுச் சூழலுக்கு எந்த பாதிப்பும் இருக்காது என்பதால் இதற்கு டிக் அடித்திருக்கிறது தமிழக அரசு. கடலில் இருந்து குழாய்கள் மூலமாக கொண்டுவரப்படும் தண்ணீர் ஆலையின் முன்புறத்தில் சேமிக்கப்படும். கடல் மட்டத்தைவிட 10 அடி ஆழத்தில் குழாய்கள் புதைக்கப்படும். தரைக்கு கீழே 10 அடி ஆழத்தில் குழாய்கள் இருப்பதால் கடல் நீரை பம்ப் செய்ய வேண்டியது இல்லை. கடல் நீரோடு வரும் மீன்கள், சிறிய பூச்சிகளை தடுத்தால் மட்டுமே போதும்.

அங்கிருந்து பம்ப் செய்யப்படும் நீரில் சில ரசாயனங்கள் சேர்த்து பாசி மற்றும் சிறிய துகள்களை பிரித்து எடுத்துவிடுவோம். அதைத் தொடர்ந்து முதல் வடிகட்டியில் தண்ணீரில் கலந்து இருக்கும் மணல் துகள்கள் வடிகட்டப்படும். அடுத்ததாக நுண்வடிகட்டி மூலம் கடல் நீர் மேலும் ஃபில்டர் செய்யப்பட்டு சவ்வூடு பரவல் நிலைக்கு அனுப்பப்படும். அங்கிருக்கும் டியூப் லைட் போன்ற அமைப்புக்குள் உயர்வேக அழுத்தத்தில் கடல்நீர் செலுத்தப்படும். குழாய்க்கு உள்ளே மிக நுண்ணிய ஃபில்டர்கள் இருக்கும். அதிவேகத்தில் தண்ணீர் பாய்ச்சப்படும்போது, அதில் உள்ள உப்பை ஃபில்டர்கள் பிரித்துவிடும். குடிப்பதற்கு உகந்த நீர் குழாய்க்கு வெளியே வந்துவிடும். ஒரு லிட்டர் கடல் நீரிலிருந்து 44 சதவிகிதம் நன்னீர் பெறலாம். இந்த நன்னீரை மாதவரம் நீரேற்று நிலையத்துக்குக் குழாய் மூலம் கொண்டுசேர்த்து, அங்கிருந்து செங்குன்றம் நீரேற்று நிலையத்துக்கு அனுப்புவோம். ஏரியில் இருந்து பெறப்படும் தண்ணீரோடு இந்த தண்ணீரும் கலக்கப்பட்டு பொதுமக்களுக்கு விநியோகிக்கப்படும்!'' என்றார் சேதுராமன்.

சென்னை குடிநீர் வாரியத் தலைமை பொறியாளர் இளங்கோவன் கூறுகையில், ''ஹைதராபாத்தின் தனியார் நிறுவனம் ஸ்பெயின் நிறுவனத்துடன் இணைந்து இந்த ஆலையை இயக்கும். 25 ஆண்டுகளுக்குப் பிறகு அரசே ஏற்று நடத்தும். தற்போது 1,000 கிலோ லிட்டருக்கு ரூ.48.55 வீதம் தினசரி 100 மில்லியன் லிட்டரை சென்னை குடிநீர் வாரியம் வாங்கும். தினமும் அரசுக்கு 50 லட்ச ரூபாய் செலவாகும். இந்த கடல் குடிநீர் ஆரோக்கியமானதாக இருக்குமா என்று சிலர் கேள்வி எழுப்புகிறார்கள். ஒரு லிட்டர் நல்ல தண்ணீரில் எவ்வளவு தாதுப் பொருட்கள் இருக்குமோ, அதே அளவுதான் இந்த தண்ணீரிலும் இருக்கும். இந்திய தரச் சான்று 'ஐ.எஸ்10500'க்கு உட்பட்டுதான் இந்த தண்ணீர் தயாரிக்கப்படுகிறது. இங்கிருந்து பெறப்படும் தண்ணீர் செங்குன்றத்துக்குக் கொண்டுசெல்லப்பட்டு, அங்கு சுத்தம் செய்யப்பட்ட ஏரித் தண்ணீருடன் சேர்த்துதான் வழங்கப்படும்!'' என்றார்.

'மெட்ராஸ் மெடிக்கல் மிஷன்' சிறுநீரகவியல் மருத்துவர் தமிழ்ச்செல்வியிடம் கடல் குடிநீரின் ஆரோக்கியம் குறித்து கேட்டபோது, ''சுத்திகரிக்கப்பட்ட கடல் குடிநீர் உடல் உபாதைகளுக்கு வழிவகுக்கும் என்று இதுவரை எந்த ஆதாரமும் இல்லை. சவுதி போன்ற நாடுகளில் கடல் நீரை குடிநீராக பயன்படுத்தும் மக்களின் கிட்னியில் கல் வந்ததாக சர்ச்சை எழுந்தது. ஆனால், அதற்கு கடல் குடிநீர் காரணம் இல்லை என்று பின்னர் அறிவித்தனர். ஆனால், இங்கு தயாரிக்கப்படும் குடிநீரின் தரம் உலகத் தர நிர்ணயங்களை பூர்த்திசெய்தால், கவலையேபடாமல் குடிநீராகப் பயன்படுத்தலாம்!'' என்றார்.

தண்ணீர்... தண்ணீர்!