`டாக்டர் மன்மோகன் சிங் மீன்ஸ் பிசினஸ்!’ - `தி ஆக்ஸிடென்டல் பிரைம் மினிஸ்டர்’ டிரெய்லர் | The accidental prime minister film's trailer released

வெளியிடப்பட்ட நேரம்: 18:13 (27/12/2018)

கடைசி தொடர்பு:18:13 (27/12/2018)

`டாக்டர் மன்மோகன் சிங் மீன்ஸ் பிசினஸ்!’ - `தி ஆக்ஸிடென்டல் பிரைம் மினிஸ்டர்’ டிரெய்லர்

மன்மோகன் சிங், கடந்த 2004-ம் ஆண்டு பிரதமரான சூழ்நிலை குறித்தும் அவரது ஆட்சிக் காலம் குறித்தும் எடுக்கப்பட்டுள்ள `தி ஆக்சிடென்டல் பிரைம் மினிஸ்டர்’ படத்தின் டிரெய்லர் வெளியிடப்பட்டிருக்கிறது.

மன்மோகன் சிங் கதாபாத்திரத்தில் அனுபம் கெர்

முன்னாள் பிரதமர் மன்மோகன் சிங்கின் ஊடக ஆலோசகராக இருந்த சஞ்சயா பாரு எழுதிய `தி ஆக்சிடென்டல் பிரைம் மினிஸ்டர்’ என்ற புத்தகத்தை அடிப்படையாகக் கொண்டு அதே பெயரில் படமாக உருவாக்கி இருக்கிறார்கள். பென்குயின் பதிப்பகம் வெளியிட்ட அந்தப் புத்தகம் பெரும் அதிர்வலைகளை ஏற்படுத்தியது. இந்தப் புத்தகம் முழுக்க முழுக்க கற்பனையே எனப் பிரதமர் அலுவலகம் மறுப்பு தெரிவித்திருந்தது குறிப்பிடத்தக்கது. மன்மோகன் சிங் ஆட்சிக் காலத்தில், நிர்வாகத்தில் சோனியா காந்தியின் தலையீடு இருந்தது என அந்தப் புத்தகத்தில் சஞ்சயா பாரு பகிரங்கமாகவே குற்றம்சாட்டியிருந்தார்.

சோனியா காந்தியாக சூசன் பென்னெட்

அறிமுக இயக்குநர் விஜய் தத் இயக்கியிரும் இந்தப் படத்துக்கு ஹன்சல் மேத்தா திரைக்கதை எழுதியிருக்கிறார். பொருளாதார வல்லுநரான மன்மோகன் சிங், கடந்த 2004 முதல் 2014 வரை 10 ஆண்டுகள் வரை நாட்டின் பிரதமராகப் பதவி வகித்தார். அந்தக் காலகட்டத்தில் மன்மோகன் சிங்கின் வாழ்க்கையை அடிப்படையாகக் கொண்டு திரைக்கதை எழுதப்பட்டிருக்கிறது. மன்மோகன் சிங் கதாபாத்திரத்தில் அனுபம் கெர் நடித்திருக்கிறார். நடித்திருக்கிறார் என்பதைவிட மன்மோகன் சிங்காகவே அவர் தெரிகிறார். 

அனுபம் கெர்

அப்போதைய காங்கிரஸ் தலைவர் சோனியா காந்தியாக சூசன் பெர்னெட்டும், ராகுல் காந்தியாக அர்ஜூன் மாத்தூரும், பிரியங்கா காந்தியாக அஹானாவும் (Aahana) நடித்திருக்கிறார்கள். அதேபோல், மன்மோகன் சிங்கின் ஊடக ஆலோசகராக இருந்த சஞ்சயா பாரு கதாபாத்திரத்தில் நடிகர் அக்‌ஷய் கண்ணா நடித்திருக்கிறார். இவர் பா.ஜ.க முன்னாள் எம்.பி வினோத் கண்ணாவின் மகன் ஆவார். 

 

 

 

2 நிமிடங்கள் 43 விநாடிகள் ஓடும் படத்தின் டிரெய்லர், படத்தில் இடம்பெற்றுள்ள கதாபாத்திரங்கள் மற்றும் சம்பவங்கள் அனைத்தும் `தி ஆக்சிடெண்டல் பிரைம் மினிஸ்டர்’ புத்தகத்தில் இடம்பெற்றவை’ என்ற டிஸ்க்ளெய்மரோடு தொடங்குகிறது. 2004-ம் ஆண்டு மக்களவைத் தேர்தலில் காங்கிரஸ் கட்சி வெற்றிபெற்ற பின்னர், மன்மோகன் சிங் பிரதமராகத் தேர்வு செய்யப்பட்டது, ரஷ்யாவுடனான அணுஆயுத ஒப்பந்தம், காஷ்மீர் விவகாரம் என அவரின் 10 ஆண்டுக்கால ஆட்சியின் பல்வேறு விவகாரங்கள் குறித்த காட்சிகள் டிரெய்லரில் இடம்பெற்றுள்ளன. டிசம்பர் மாதத்தில் வெளியிடத் திட்டமிட்டிருந்த படம், தற்போது 2019-ம் ஆண்டு ஜனவரி 11-க்குத் தள்ளிப் போயிருக்கிறது.