நடிகர் சங்கத் தேர்தல்... தயாரிப்பாளர் சங்க மோதல்... என்ன நடக்கிறது கோலிவுட்டில்?

ச ங்கம் என்றாலே சர்ச்சைகளும் சண்டைகளும் சகஜம்தான். அதிலும் திரைப்பட சங்கங்களில் அனல் பறக்கும் ஆக்ஷன் காட்சிகள் அவ்வப்போது அரங்கேறுவது வழக்கம். ஏற்கெனவே தயாரிப்பாளர் சங்கத்தில் பல மோதல்கள் நடைபெற்றுக்கொண்டிருக்கும் போது, விரைவில் நடிகர் சங்கத் தேர்தலும் வரவிருப்பதால் கோஷ்டி பிரிந்து கொடி பிடிக்கத் தயாராகிறது கோலிவுட். என்னதான் நடக்கும்?

. நடிகர்கள் சங்கம் - மாறும் அணிகள்

‘சரத்குமார், ராதாரவி தலைமை சரியில்லை’, ‘நடிகர் சங்கத்துக்குச் சொந்தமான கட்டடம் கட்ட வேண்டும்’ என்ற இரண்டு அம்சங்களை முன்வைத்து, சென்ற நடிகர் சங்கத் தேர்தலில் விஷால் நடிகர்களை அணிதிரட்டினார். நாசர், விஷால், பொன்வண்ணன், கார்த்தி, கருணாஸ் ஆகியோர் தங்கள் அணிக்கு ‘பாண்டவர் அணி’ எனப் பெயரிட்டுத் தேர்தலை எதிர்கொண்டு வெற்றிபெற்றனர். ஆனால், இப்போது விஷால் அணியில் இருந்த பலரே எதிரணிக்கு மாறியுள்ளனர். வரவிருக்கும் நடிகர் சங்கத் தேர்தல், இந்த அணி மாற்றத்தால் மீண்டும் பரபரப்பைக் கிளப்பும் என்கிறார்கள்.

. நடிகர் சங்கத் தலைவர் நாசர், “சென்ற தேர்தலில் நாங்கள் கொடுத்த வாக்குறுதிகளை முழுமையாக நிறைவேற்றிவிட்டோம். முக்கியமாக சங்கக் கட்டடப் பிரச்னைக்கு நிரந்தரத்தீர்வு கண்டுள்ளோம். கட்டடத்தின் வேலைகள் கிட்டத்தட்ட முடிந்துவிட்டன. இன்டீரியர் வேலைகள் மட்டுமே மீதி உள்ளன. அந்தப் பணிகளும் ஆறேழு மாதங்களில் முடிந்து விடும். தேர்தல் ஜூன்-ஜூலையில் நடத்தத் திட்டமிடப்பட்டுள்ளது. தேர்தலில் பொன்வண்ணன் தவிர எங்கள் அணி அப்படியே போட்டியிடவுள்ளது. சங்கத் தேர்தலை மேற்பார்வையிடும் ஓய்வுபெற்ற நீதிபதி பத்மநாபன் தேர்தல் தேதியை அறிவித்தவுடன் தேர்தல் வேலைகளைத் தொடங்குவோம்” என்றார்.

. ஆனால், நாசர் இப்படிச் சொன்னாலும் விஷால்மீது அதிருப்தியில் உள்ளவர்கள் அவருக்கு எதிராகப் படை திரட்டுவதற்கான வேலைகளைத் தொடங்கி யுள்ளனர். கடந்த நடிகர் சங்கத் தேர்தலில் விஷால் அணியிலிருந்த நடிகர் உதயா, ஆர்.கே. சுரேஷ் ஆகியோர் இப்போது விஷாலை எதிர்த்து நிற்கும் முடிவில் இருக்கிறார்கள்.

விஷால் அணியில் தீவிரமாக இருந்த ஜே.கே.ரித்தீஷ் ஒருகட்டத்தில் விஷாலுக்கு எதிராகத் திரும்பினார். ராதாரவிக்கு ஆதரவாக இருந்தவர்களில் 400க்கும் மேற்பட்ட உறுப்பினர்கள் தகுதி நீக்கம் செய்யப்பட்டி ருந்தனர். அவர்களை மீண்டும் சங்கத்தில் இணைக்கும் வேலைகளை, ஜே.கே. ரித்தீஷ் முன்னெடுத்தார். அவர் திடீரென்று இறந்துவிட்டாலும், தகுதிநீக்கம் செய்யப்பட்ட உறுப்பினர்கள் விஷாலுக்கு எதிராக உருவாகும் அணியினருடன் இணைவார்கள் என எதிர்பார்க்கப்படுகிறது. இவர்களைத்தவிர, ராதிகா ஓர் அணியைத் திரட்டிவருவதாகவும் சொல்லப்படுகிறது. தேர்தல் வருவதற்குள் இன்னும் என்னென்ன அணிச்சேர்க்கைகள், அணிமாற்றங்கள் நடக்குமோ என்ற ஆவலில் இருக்கிறது கோலிவுட்.

தயாரிப்பாளர்கள் சங்கம்: தாறுமாறு சண்டை!

தமிழ் சினிமாவில் பலம்வாய்ந்த அதிக சக்திகொண்ட அமைப்பு என்றால் அது தமிழ்த் திரைப்படத் தயாரிப்பாளர்கள் சங்கம்தான். அதனால் இங்கு சர்ச்சைகளும் அதிகம். தயாரிப்பாளர்கள் சங்கத்தின் உள்ளே எத்தனை சர்ச்சைகள் இருந்தாலும் அவை பெரும்பாலும் மீடியா வெளிச்சத்துக்கு வராது. அவர்களுக்குள் ளாகவே பேசித் தீர்க்கப்பட்டுவிடும். ஆனால் நடிகர் சங்கம் போலவே தயாரிப்பாளர்கள் சங்கத் தேர்தலிலும் விஷால் போட்டியிட, இங்கும் பரபரப்பு பற்றிக்கொண்டது. எல்லா விஷயங்களும் வெளிச்சத்துக்கு வந்தன.

‘தயாரிப்பாளர்கள் சங்கத் தலைவர் பதவிக்கு ஒரு நடிகர் எப்படிப் போட்டியிடலாம்’ என்பதில் தொடங்கி, ‘அவர் தமிழர் இல்லை’ என்பது உட்பட விஷால்மீது பல விமர்சனங்கள் முன்வைக்கப்பட்டன. ஆனால், அத்தனையையும் மீறி, தேர்தலில் வெற்றிபெற்று தயாரிப்பாளர் சங்கத் தலைவரானார் விஷால்.

‘ஃபெஃப்ஸியுடன் உடன்பாடு, ஆன்லைன் பைரஸியை ஒழிப்போம், தமிழ் ராக்கர்ஸை முடக்குவோம், லோக்கல் கேபிள் சேனல்கள் மூலம் சங்கத்துக்கு வருவாய் ஏற்படுத்துவோம், தியேட்டர் ஆன்லைன் புக்கிங் கட்டணத்தைக் குறைப்போம்...’ என்பவை உட்பட பல வாக்குறுதிகளை அளித்துதான் தலைவரானார் விஷால். ஆனால், இந்த வாக்குறுதிகளை அவர் நிறைவேற்றவில்லை என்று பலரும் அதிருப்தியில் இருக்கின்றனர்.

. விஷாலின் அரசியல் பிரவேசமும் பலரால் கடுமையாக எதிர்க்கப்பட்டது. சேரன், டி.ராஜேந்தர் ஆகியோர் உள்ளிருப்புப் போராட்டம், பொதுக்குழுவில் எதிர்ப்பு ஆகியவற்றை மேற்கொண்டனர். இந்த மோதல்கள் உச்சத்துக்குப் போய், விஷாலுக்கு எதிரணியில் இருந்தவர்கள் சங்கப் புதுக்கட்டடத்துக்கே பூட்டு போட்டனர். விஷயம் முற்றிப்போய், தயாரிப்பாளர் சங்க முன்னாள் நிர்வாகி ராதாகிருஷ்ணன் தொடர்ந்த வழக்கில், நீதிமன்ற உத்த ரவின்பேரில் தயாரிப்பாளர்கள் சங்கத்தை நிர்வகிக்க சிறப்பு அதிகாரி நியமிக்கப்பட்டார். ஆனால் சிறப்பு அதிகாரி நியமனத்தை எதிர்த்து, தயாரிப்பாளர் சங்கச் செயலாளர் கதிரேசன் வழக்கு தொடர்ந்தார். சங்கத்துக்கு நிதி திரட்டுவதற்காக ‘இளையராஜா 75’ நிகழ்ச்சியை விஷால் தரப்பினர் நடத்துவதற்கு எதிராகவும் நீதிமன்றம் சென்றனர் எதிர்த்தரப்பினர்.

இதற்கிடையில் சிறப்பு அதிகாரிக்கு உதவிடும் வகையில் ADHOC கமிட்டி அமைக்கப்பட்டுள்ளது. அதில், பாரதிராஜா, சத்யஜோதி தியாகராஜன், எஸ்.வி.சேகர், ஜே.சதீஷ்குமார், கே.ராஜன், டி.சிவா, ராதாகிருஷ்ணன், துரைராஜ், சிவசக்தி பாண்டியன் என ஒன்பது நபர்கள் உள்ளனர்.

ADHOC கமிட்டியின் உறுப்பி னரும் மூத்த தயாரிப்பாள ருமான சத்யஜோதி தியாக ராஜனிடம், “விஷால் தலைமையிலான நிர்வாகம், நலிந்த உறுப்பினர்களுக்கு அதிகப்படுத்திய பென்ஷன், சிறப்புத்தொகை இந்த இடைக்காலத்தில் வழங்கப்படுமா” என்று கேட்டோம்.

. “நியாயப்படி பொதுக்குழுவில் முடிவு செய்யப்பட்ட தொகையைத்தான் நாங்கள் கொடுக்க முடியும். ஆனால் சங்கத்தில் இதற்கெல்லாம் பணம் இல்லை என்று கேள்விப்பட்டோம். விஷால் தலைமையிலான நிர்வாகம் 50 லட்சம் ரூபாயை மட்டுமே டெபாசிட்டாக வைத்துள்ள தாகத் தெரிகிறது. இதை நலநிதியாகச் செலவழித்தால் சங்கத்தை நடத்துவதே சிரமம். இந்த இக்கட்டான சூழலில்தான் இன்று இருக்கிறோம்” என்கிறவர் இந்தக் குளறுபடிகளுக்கான காரணம் குறித்துக் குற்றச்சாட்டு களை அடுக்குகிறார்.

“இளையராஜா-75 நிகழ்ச்சி சங்கத்துக்கு நிதி திரட்ட நடத்தப்படும் மிகப்பெரிய நிகழ்ச்சி. ஆனால் அதை உறுப்பினர்களுக்கு முறையாக அறிவிக்கவும் இல்லை. நிகழ்ச்சி வேலைகளுக்கு முறையாக டெண்டர்கள் பெறப்படவும் இல்லை. இந்த நிகழ்ச்சி குறித்துத் தொடரப்பட்ட வழக்கில் நிகழ்ச்சிக்கான வரவு செலவுக் கணக்குகளை வெள்ளை அறிக்கையாகச் சமர்ப்பிக்கச் சொன்னது நீதிமன்றம். அதையும் நிர்வாகிகள் செய்யவில்லை.

இவைதவிர, சங்கத்தில் வழங்கப்பட்டு வந்த பென்ஷன், நலிந்த உறுப்பினர்களுக்கு மட்டுமல்லாமல் வசதியாக இருப்பவர்களுக்கும் வழங்கப்பட்டது தெரிய வந்துள்ளது. எனக்கும் 67 வயது ஆகிறது, நானும் சங்க உறுப்பினர்தான். அதற்காக எனக்கும் பென்ஷன் கொடுங்கள் என்று கேட்பது நியாயம் இல்லையே!

. மேலும், ஒரு நேரடித் தமிழ்ப் படத்தைத் தயாரித்து ரிலீஸ் செய்திருந்தால்தான் ஒருவர் சங்கத்தின் நிரந்தர உறுப்பினராக முடியும். ஆனால், சங்கத்தின் சிறப்புச் சலுகைகளைப் பெறு வதற்காகவே சிலர் வேற்று மொழிப் படங்களைத் தமிழ் டப்பிங் செய்து உறுப்பினராகி யுள்ளனர்.

ஒரு தொழில் சார்ந்த சங்கமாக உருவாக்கப்பட்ட தயாரிப்பாளர் சங்கம், இன்று வெறும் நலவாரியமாக மட்டுமே செயல்பட்டு வருகிறது. நிர்வாகிகளும், உறுப்பினர்களுக்கு நல்லது செய்தால் தேர்தலில் அவை வாக்குகளாக மாறும் என நினைத்து வாக்கு வங்கி அரசியல் செய்கிறார்கள். இவற்றைச் சரிசெய்ய, சிறப்பு அதிகாரியுடன் அமர்ந்து உறுப்பினர்கள் பட்டியலைச் சரி பார்த்த பிறகு அடுத்த தேர்தலுக்கான ஏற்பாடுகளைச் செய்ய வேண்டும். ஆடிட்டர் உதவியுடன் 2018-19 ஆண்டுக்கான வரவு செலவுகளைப் பார்த்து உறுப்பினர்களுக்கு முழுத்தகவல்கள் தெரிவிக்க வேண்டும்” என்கிறார் தியாகராஜன்.

தயாரிப்பாளர்கள் சங்கத்தில் பொருளாளராக இருந்த எஸ்.ஆர்.பிரபுவோ, “சினிமாத் தயாரிப்பில் இருக்கும் வியாபாரச் சிக்கல்களைக் களையவில்லை என்றால் நலிந்த தயாரிப்பாளர்களின் எண்ணிக்கைதான் அதிகமாகும். ‘இளையராஜா 75’ விழாவை நாங்கள் திட்டமிட்டபடி நடத்த விட்டிருந்தால், எதிர்பார்த்த லாபம் கிடைத்திருக்கும். ஆனால், எதிரணியினரின் குறுக்கீடுகளால் 20 சதவிகித லாபம் மட்டும்தான் கிடைத்திருக்கிறது. இவையெல்லாம் ஆரோக்கியமான விஷயங்கள் அல்ல.

. நிர்வாகரீதியாகப் பல மாறுதல்களை எங்கள் அணி செய்திருக்கிறது. ஆரம்பத்தில் விஷால் உறுதி யளித்ததுபோல், கட்டப்பஞ்சாயத்து களின்றிப் பல படங்களை ரிலீஸ் செய்திருக்கிறோம். இதுவரை இல்லாத அளவு எங்கள் காலத்தில்தான் நிறைய வேலைகள் செய்துள்ளோம்” என்கிறார்.

இந்தத் தயாரிப்பாளர் சங்கத் தேர்தலில், விஷால் தலைமையிலான அணி மீண்டும் நிற்க வாய்ப்பில்லை என்றே தெரிகிறது. நடிகர் உதயாவைத் தொடர்ந்து விஷாலின் அணியிலிருந்து வெளியேறிய ஆர். கே. சுரேஷ், “நாளுக்குநாள் அதிருப்தியாளர்களை சம்பாதித்துக்கொண்டே போகிறார் விஷால். அரசு சார்ந்து இயங்கும் ஒரு துறைதான் சினிமா. அதன் முக்கியமான தயாரிப்பாளர் சங்கத் தலைமைப் பதவியில் இருந்த விஷால், நேரடி அரசியலில் ஈடுபட்டிருக்கக் கூடாது. அது சங்கத்தை பாதித்திருக்கிறது. அவர்மீது வைக்கப்படும் ஊழல் குற்றச்சாட்டு களைவிட இந்த பாதிப்புதான் முக்கியமானது.

நாங்கள் முக்கியமான பதவிகளுக்கு அனுபவம் வாய்ந்த ஆட்களை அணுகியுள்ளோம். பாரதிராஜா சார் அதில் முதல் சாய்ஸ். நடிகர் சங்கத் தேர்தலைப் பொறுத்தவரை எனது உறுப்பினர் காலம் குறைவு என்பதால் என்னால் போட்டியிட முடியாது. அதனால் எங்கள் தரப்பில் யார் யார் போட்டியிடுகிறார்கள் என்பதைத் தேர்தல் தேதி அறிவிக்கப்பட்ட பிறகு தெரிவிக்கிறோம்” என்கிறார்.

நாடாளுமன்றத் தேர்தல், சட்டமன்ற இடைத்தேர்தல் சூடு எல்லாம் தணிந்த பிறகு, சினிமா சங்கங்களின் தேர்தல்களுக்கான பரபரப்புக் களம் தயாராகியுள்ளது.

தமிழ் சினிமாக்களில் சுவாரஸ்யம் இருக்கிறதோ இல்லையோ, கண்டிப்பாக தமிழ் சினிமாவுலகத் தேர்தல்களில் சுவாரஸ்யம் சூடுகிளப்பப்போகிறது.

- எம்.குணா, அலாவுதின் ஹுசைன்; படங்கள்: தே.அசோக்குமார்

நடிகர் சங்கத் தேர்தல்... தயாரிப்பாளர் சங்க மோதல்... என்ன நடக்கிறது கோலிவுட்டில்?

எம்.குணா

அலாவுதின் ஹுசைன்Follow