Published:Updated:

குட்பை கேப்டன்!

எம்.குணா

குட்பை கேப்டன்!

எம்.குணா

Published:Updated:
##~##

கேப்டன் லட்சுமி சேகல்  மறைந்துவிட்டார். அவருக்கு 98 வயது. வாழ்வாங்கு வாழ்க்கை வாழ்ந்துவிட்டுத்தான் மறைந்திருக்கிறார். ஆனாலும், அவருடைய மரணத்தை இயல்பானதாக எடுத்துக்கொள்ள முடியவில்லை.

 நேதாஜி சுபாஷ் சந்திரபோஸால் உருவாக்கப்பட்ட இந்திய தேசிய ராணுவத்தில், 'ராணி ஜான்சி படை’  பெண்கள் படைத் தலைவராக இருந்தவர் லட்சுமி. சென்னையின் புகழ்பெற்ற வழக்குரைஞரான சுவாமிநாதன் - சமூக சேவகர் அம்முக்குட்டி தம்பதிக்கு 1914-ல் பிறந்தார்  லட்சுமி. தேசப்பற்று மிக்க குடும்பச் சூழலில் வளர்ந்த லட்சுமியின் வாழ்வில் பின்தங்கிய மக்களின் வாழ்க்கை பற்றிய சிந்தனைகளை விதைத்தது கேரளத்தில் இருந்த அவருடைய பாட்டி வீடு. பழங்குடியினப் பெண்களின் வாழ்க்கை அங்குதான் லட்சுமிக்கு நெருக்கமானது. 1938-ல் மருத்துவர் பட்டம் பெற்ற லட்சுமி அடுத்த சில ஆண்டுகளிலேயே சிங்கப்பூர் சென்றார். நேதாஜியை அவர் சந்தித்தபோது அவர் வெளிப்படுத்திய எண்ணங்கள் இந்திய தேசிய ராணுவத்தில் பெண்களுக்கு என்று பிரத்யேகப் படையை உருவாக்கும் உத்வேகத்தை நேதாஜிக்கு அளித்தது. ஆசியாவிலேயே முதன்முதலாகப் பெண்களுக்கான படைத் தளபதியாகப் பொறுப்பேற்றார் லட்சுமி. பர்மியக் காடுகளில் ஆங்கிலேயப் படைகளுக்கு எதிரான கடுமையான போரை முன்னெடுத்தார். சிறை பிடிக்கப்பட்டார். விடுதலையான பின் 1947-ல் இந்திய தேசிய ராணுவத்தில் தளகர்த்தர் களில் ஒருவரான பிரேம்குமார் சேகலை மணந்த அவர் மீண்டும் மருத்துவச் சேவையில் கவனம் செலுத்தத் தொடங்கினார்.

ஒட்டுமொத்த விகடனுக்கும் ஒரே ஷார்ட்கட்!

குட்பை கேப்டன்!

தன்னுடைய 57-வது வயதில் மார்க்சிஸ்ட் கட்சியில் சேர்ந்தபோது, ''என் தாய் வீட்டுக்கு வந்துள்ளதைப் போல உணர்கிறேன்'' என்றார்.  அனைத்திந்திய ஜனநாயக மாதர் சங்கத்தைத்  தொடங்கியதில் லட்சுமியின் பங்கு முக்கியமானது. பெண் உரிமைக்காகத் தொடர்ந்து முழங்கிவந்த லட்சுமி அழகிப் போட்டிகளுக்கு எதிராகக் குரல் கொடுத்தவர். ''சுதந்திரப் போராட்டத்தில் லட்சுமியின் அணுகுமுறையைப் பார்த்து, அவரால் கவரப்பட்ட நடுத்தரக் குடும்பத்தைச் சேர்ந்த ஏராளமான பெண்கள் 'ராணி ஜான்சி படை’யில் சேர்ந்தனர். பின்னாளில் கொல்கத்தா வில் நடைபெற்ற ஒரு விழாவில் வங்காளிகளின் எதிர்ப்பையும் பொருட்படுத்தாமல், 'இந்திய தேசிய ராணுவத்தின் பெண்கள் படையில் தமிழ்ப் பெண்களின் பங்களிப்பே முக்கியமானது’ என்று பதிவுசெய்தார்!'' என்கிறார் லட்சுமியின் நெருங்கிய நண்பர்களில் ஒருவரான பேராசிரியர் மா.சு.அண்ணாமலை.

ஆழ்ந்த அமைதிகொள்ளுங்கள் கேப்டன்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism