Kutty story - சினிமா விமர்சனம்

எதிர்பாரா முத்தம் - கௌதம் மேனன்

கல்லூரி நண்பர்களான ஆதிக்கும் மிருணாளினிக்கும் இடையேயான நட்பு இறுதிவரை அப்படியே இருந்ததா, திருமணமாகி வெவ்வேறு பாதையில் சென்றுவிட்ட அவர்கள் இருவரும் பின்னொரு நாளில் சந்திக்கையில் அதற்கான விடை கிடைத்ததா, ஆணும் பெண்ணும் நட்புடன் மட்டுமே இறுதிவரை இருந்துவிட முடியுமா என்ற அலுத்து சலித்துப்போன கதையையே (மீண்டும்) இயக்கியிருக்கிறார் கௌதம் மேனன்.

. மிருணாளினியாக அமலா பால் நிறைவு. காபி ஷாப்பில் அவரின் கடிதத்தைக் காதலன் படிக்கையில் தயக்கமும் வெட்கமும் கலந்து அவர் வெளிப்படுத்தும் முகபாவங்களில் அவ்வளவு யதார்த்தம். வழக்கம்போல் கௌதம் மேனனின் ரோபோ உடல்மொழி பாடாய்ப்படுத்துகிறது. இளவயது கௌதமாக வரும் வினோத்தும் அதே உடல்மொழியை வெளிப்படுத்துவது கொடுமை! ரோபோ சங்கரின் காமெடி ஓரளவுக்கு ரசிக்கவைக்கிறது. கார்த்திக்கின் இசையும் மனோஜ் பரமஹம்ஸாவின் ஒளிப்பதிவும் மெல்லிய தென்றலின் வருடல். மேட்டிமைத்தன பாத்திரங்கள், அழகியல் பாவனையுடன் யதார்த்தத்தை மீறிய வசனங்கள் பிடித்தவர்களுக்கு இந்த முத்தமும் பிடிக்கலாம்.

. அவனும் நானும் - விஜய்

. கல்லூரி மாணவி பிரீத்தி எதிர்பாரா தருணமொன்றில் கருவுறுகிறார். படிப்பும், குடும்பத்தினரைப் பற்றிய பயமும் கண்முன் வந்து நிற்க, கரு உருவாகக் காரணமானவனும் இறந்துவிட்டதாய்த் தெரியவர, பின் என்ன செய்கிறார் என்பதே கதை. மேகா ஆகாஷுக்குத் தன் ‘ஒரு பக்க கதை’யை நினைவுபடுத்தும் வகையில் இதிலும் அப்படியானதொரு பாத்திரம். ஆனால், அதிலிருந்த உயிர்ப்பான நடிப்பு இதில் மிஸ்ஸிங்! சமுதாயக் கட்டமைப்புகளைத் தாண்டி பெண்களுக்கான சுதந்திரத்தை வலியுறுத்தும் சினிமாக்கள் வரும் காலகட்டத்தில் 10 வருடம் பழைமையான மெசேஜைச் சொல்லி கலையுலகைப் பின்னுக்கு இழுத்துச் செல்கிறது இந்த ‘அவனும் நானும்.’

லோகம் - வெங்கட் பிரபு

. விர்ச்சுவல் ரியாலிட்டி கேம் ஒன்றில் சந்தித்து நண்பர்களாகும் இருவர், காதல் வயப்படுகின்றனர். பார்க்காமல் காதல், காதலியைத் தேடும் காதலன் என அதே ஆதாம் ஏவாள் காலத்துக் கதைதான். (கேமில் நாயகன், நாயகி பெயர்களும் ஆடம், ஈவ்தான்) ஆனால், களம் மட்டும் புதிது. கலகல நண்பர்கள் கேங்க், பப் பார்ட்டி கலாட்டா என தன் வழக்கமான கிளிஷேக்களைத் தாண்டி வித்தியாசமாக யோசித்திருக்கிறார் இயக்குநர் வெங்கட் பிரபு. மெய்நிகர் காலத்தில் காதலும் எப்படி வெர்ச்சுவலாக மாறியிருக்கிறது என்பதற்கு உதாரணமாக 90 சதவிகிதம் கேமிங் காட்சிகளாகவே நகர்கிறது படம். ஆனால் அதற்கு சம்பந்தமே இல்லாமல் டைனோசர் காலத்தில் உருவான ஸ்டேஜ் 4 கேன்சர் க்ளைமாக்ஸ். வீடியோ கேம், விர்ச்சுவல் உலகம், சமூக வலைதளத்தில் ஓடும் அந்த கமென்ட்ஸ் செக்ஷன் எனப் பலவற்றுக்கு மெனக்கெட்டு தன் அக்மார்க் குறும்பு முத்திரையைப் பதித்திருக்கிறார் வெங்கட் பிரபு. ஆடமாக வரும் வருண் நடிப்பில் இன்னும் பல லெவல்கள் தாண்ட வேண்டியிருக்கிறது. சாக்ஷி அகர்வால், சங்கீதா ஒரு காட்சிக்கு வந்து போகிறார்கள். பிரேம்ஜியின் பின்னணி இசை பலம் சேர்க்கிறது.

ஆடல் பாடல் - நலன் குமாரசாமி

‘கற்பு நிலையென்று சொல்லவந்தார். இரு கட்சிக்கும் அஃது பொதுவில் வைப்போம்’ என்ற பாரதியாரின் வரிகள்தான் ‘ஆடல் பாடல்’ கதை.

. குடும்பத்துக்கு வெளியே உறவு வைத்திருக்கும் கணவன், அதேபோல் மனைவிக்கும் ஒரு மீறல் இருப்பதாகக் கேள்விப்பட்டால் எப்படி அதை எதிர்கொள்வான் என்பதைப் பண்பாட்டுப் போலித்தனங்களை உடைத்துக்காட்டுகிறது படம்.

. ‘சூது கவ்வும்’, ‘காதலும் கடந்து போகும்’ என இரண்டு கவனம் ஈர்த்த படங்களைக் கொடுத்துவிட்டு அமைதி காத்த நலன் குமாரசாமி மீண்டும் இயக்குநர் அவதாரம் எடுத்திருக்கிறார். ஆணின் ஈகோ, குற்றம் என்பதை உணர்ந்திடாத ஆணாதிக்க மனப்பான்மை ஆகியவற்றை அம்பலப்படுத்தும் காட்சிகளிலும் வசனங்களிலும் தனி முத்திரை. “நீ தப்பு செஞ்சேன்னு தெரிஞ்சாலும் நான் அதை ஏத்துக்கணும். ஆனா நான் தப்பு செஞ்சேனா, இல்லையான்னு தெரிஞ்சாதான் உன்னால வாழ முடியும், இல்லை?” என்கிற வசனம் ஆணாதிக்கத்தின் கன்னத்தில் விழுந்த அறை. கணவன் - மனைவியாக விஜய் சேதுபதி - ‘அருவி’ அதிதி பாலன் பக்கா! விஜய் சேதுபதி தன் ஸ்டார் பிம்பத்தை விடுத்து இயக்குநரின் நடிகராகக் கதைக்கு ஏற்ற நடிப்பை வழங்கியிருக்கிறார். அவருக்கு ஈடுகொடுத்து அதிதி பட்டாசாய் வெடித்திருக்கிறார். முக்கியக் கதாபாத்திரங்களான இவர்களின் பெயரைச் சொல்லாமல் ஹரி பிரசாத், காமாட்சி எனத் திரையில் தோன்றாத பாத்திரங்களைப் பெயர்களுடன் உலாவவிட்டது சுவாரஸ்யமான திரைக்கதை அமைப்பு. எட்வின் லூயிஸின் பின்னணி இசை ஆடலுக்கும் பாடலுக்கும் சுவை சேர்க்கிறது.

Kutty story - சினிமா விமர்சனம்

விகடன் விமர்சனக்குழு