சமூகம்
Published:Updated:

ஜெயேந்திரரின் கடைசி ஆசை

ஜெயேந்திரரின் கடைசி ஆசை
பிரீமியம் ஸ்டோரி
News
ஜெயேந்திரரின் கடைசி ஆசை

ஜெயேந்திரரின் கடைசி ஆசை

காஞ்சி காமகோடி பீடத்தின் 69-வது பீடாதிபதியாக ஜெயேந்திர சரஸ்வதி சுவாமிகள் பொறுப்பேற்ற பிறகு, கட்சிப் பாகுபாடு இல்லாமல் மாநில முதல்வர்கள், பிரதமர்கள், மத்திய அமைச்சர்கள் உள்ளிட்ட அரசியல்வாதிகளும், நீதிபதிகள் உள்ளிட்ட உயர் பொறுப்புகளில் இருப்பவர்களும் ஆசீர்வாதம் வாங்கிச் செல்லும் அளவுக்கு அவரது செயல்பாடுகள்  இருந்தன. பரபரப்பான அரசியல் மையமாக காஞ்சிபுரத்தை மாற்றியவர் ஜெயேந்திரர். பிப்ரவரி 28-ம் தேதியும், மார்ச் 1-ம் தேதியும் மீண்டும் அதேபோன்ற பரபரப்பை காஞ்சிபுரம் சந்தித்தது. ஆனால், எல்லோரும் வந்தது... அவருக்கு அஞ்சலி செலுத்துவதற்கு...

ஜெயேந்திரரின் கடைசி ஆசை

பிப்ரவரி 27-ம் தேதி காஞ்சிபுரத்தில் ஆய்வு செய்ய, தமிழக கவர்னர் பன்வாரிலால் புரோஹித் வந்தார். அப்போது, சங்கர மடத்துக்குச் சென்று ஜெயேந்திரரிடம் அவர் ஆசிபெற்றார். அதே நாளில், பள்ளிக் கல்வித்துறை அமைச்சர் செங்கோட்டையனும் காஞ்சிபுரத்தில் சில நிகழ்ச்சிகளை முடித்துவிட்டு, காமாட்சி அம்மன் கோயில் விழா நிகழ்வைக் காணவந்தார். அவரும், ஜெயேந்திரரிடம் ஆசிபெற்றார். இவைதான், ஜெயேந்திரரின் கடைசி அரசியல் சந்திப்புகள்.

பிப்ரவரி 28-ம் தேதி காலையில் ஜெயேந்திரரின் உயிர் பிரிந்தது. ஜெயேந்திரருக்கு பணிவிடைகள் செய்துவந்த சங்கர மடத்தைச் சேர்ந்த சிலரிடம் பேசினோம். அப்போது, ஜெயேந்திரர் குறித்து உருக்கமாக பல விஷயங்களை நம்மிடம் பகிர்ந்தனர். ‘‘ஜெயேந்திரருக்கு நீண்ட காலமாகவே உயர் ரத்த அழுத்தம் இருந்துவந்தது. சங்கரராமன் கொலை வழக்குக்குப் பிறகு மனதளவிலும், உடலளவிலும் ஜெயேந்திரர் சோர்வாகவே இருந்தார். உடலில் சர்க்கரை அளவும் அடிக்கடி குறைந்தது. அதனால் சோர்வு, மயக்கம், மூச்சுத்திணறல் போன்ற பிரச்னைகள் அவருக்கு அடிக்கடி ஏற்பட்டன. அதற்காக அவர் சிகிச்சைகளும் பெற்றுவந்தார். மூச்சுத்திணறலால் கடுமையாக அவதிப்பட்ட ஜெயேந்திரரை, மூன்று மாதங்களுக்கு முன்பு போரூர் ராமச்சந்திரா மருத்துவமனைக்கு அழைத்துச் சென்றனர். ‘எனக்கு சிகிச்சை வேண்டாம். நான் காரிலிருந்து இறங்கமாட்டேன். என்னைத் திரும்ப அழைத்துச் செல்லுங்கள். சங்கர மடத்திலேயே என் உயிர் பிரிய வேண்டுமென்று ஆசைப்படுகிறேன்’ என்று பிடிவாதமாகச் சொல்லிவிட்டார். கடந்த மூன்று மாதங்களாகவே, வழக்கமான உணவு எதையும் அவரால் முழுமையாக எடுத்துக்கொள்ள முடியவில்லை” என்றனர்.

ஜெயேந்திரரின் கடைசி ஆசை

பிப்ரவரி 28-ம் தேதி வழக்கம்போல காலை 5 மணிக்கு எழுந்து, தியானம் செய்தார் ஜெயேந்திரர். பிறகு, தீர்த்தத்தைப் பருகிவிட்டு பூஜைகளைத் தொடர்ந்தார். காலை 6.45-க்கு மூச்சுத்திணறல் ஏற்பட்டு அந்த இடத்திலேயே சாய்ந்தார். உடனே உதவியாளர்கள் ஓடிவந்து எழுப்பினார்கள். சங்கர மடத்துக்குச் சொந்தமான சங்கரா மருத்துவமனைக்கு அவரைக் கொண்டு சென்றார்கள். ஆனாலும், பலனில்லை. இதைத் தொடர்ந்து காமாட்சி அம்மன் கோயிலில் நடைபெற்ற பூஜைகள் விரைவாக முடிக்கப்பட்டு நடை சாத்தப்பட்டது. எல்லோரும் அஞ்சலி செலுத்தியபின்பு, சங்கர மடத்தில் உள்ள பிருந்தா வனத்தில் மகா பெரியவர் சந்திரசேகரேந்திர சுவாமிகள் சமாதிக்கு அருகே ஜெயேந்திரரின் உடல் அடக்கம் செய்யப்பட்டது. 

மகா பெரியவரின் புகழ் உலக அளவில் ஒலிக்க வேண்டும் என ஆசைப்பட்டவர் ஜெயேந்திரர். சங்கர மடத்தின் சார்பாக இந்தியா முழுவதும் கல்வி நிறுவனங்கள், மருத்துவமனைகளை உருவாக்கி, பெரிய அளவில் மடத்தின் செல்வாக்கைக் கொண்டுசெல்ல நினைத்தார். இடையில் பெரிய சறுக்கலாக அமைந்தது, காஞ்சி வரதராஜ பெருமாள் கோயிலின் மேலாளர் சங்கரராமன் 2004-ம் ஆண்டு கொலை செய்யப்பட்ட வழக்கு. இந்த வழக்கில் ஜெயேந்திரர், விஜயேந்திரர் உள்ளிட்டோர் மீது வழக்குப்பதிவு செய்யப்பட்டது. அவர்கள் இருவரும் கைது செய்யப்பட்டு சிறையில் அடைக்கப்பட்டனர். புதுச்சேரி சிறப்பு நீதிமன்றத்தில் நடைபெற்ற இந்த வழக்கு விசாரணையின் இறுதியில், இவர்கள் இருவரும் விடுதலை பெற்றனர். 

ஜெயேந்திரரின் கடைசி ஆசை

“அதன்பிறகு, மடத்தில் சிலரது நடவடிக்கைகள் குறித்து தனது அதிருப்தியை ஜெயேந்திரர் சொன்னார். அது விஜயேந்திரருக்குப் பிடிக்கவில்லை. இரண்டு தரப்பிலும் கோப தாபங்கள் அதிகரித்தன. ஒரு கட்டத்தில் முழுமையாக தன்னை அனைத்து செயல் பாடுகளிலிருந்தும் ஜெயேந்திரர் விடுவித்துக் கொண்டார். மடத்தின் பூஜைகளில் ஜெயேந்திரர் கலந்து கொள்வார். ஆனால், நிர்வாக விஷயங்களில் ஒதுங்கியிருந்தார். விஜயேந்திரர் தான் நிர்வாகத்தை முழுமையாக கவனித்துக்கொண்டார். இதற்கு வயது, முதுமை ஆகிய காரணங்களை ஜெயேந்திரர் ஒரு பக்கம் சொன்னாலும், இருவருக்குமான மனக்கசப்புகள்தான் காரணமாக இருந்தன.

இது, அவரது உடல்நிலையையும் மனநிலை யையும் பாதித்தது. அடிக்கடி மும்பை சென்றார்...திருப்பதி சென்றார்... தன்னை சுற்றி உள்ளவர்களையும் நம்ப முடியாததால் நிம்மதியில்லாமல் தவித்தார்”என்கிறார்கள் ஜெயேந்திரருக்கு இறுதிக்காலத்தில் நெருக்கமாக இருந்தவர்கள். 

 ‘‘காஞ்சி ஏகாம்பரநாதருக்கு தங்கத் தேர் செய்ய வேண்டுமென்பது ஜெயேந்திரரின் கடைசி ஆசை. அதற்காக பக்தர்களிடம் தங்கம் வசூலித்து அந்தப் பணிகளைக் கவனித்துவந்தார். அதிலும் அவருக்குச் சிலர் சிக்கல் கொடுத்தனர். அது நிறைவேறாமலே போய்விட்டது’’ என வேதனையுடன் சொல்கிறார்கள் காஞ்சி மடத்தில் உள்ளவர்கள்.

 - பா.ஜெயவேல்
படங்கள்: பா.காளிமுத்து, கே.ஜெரோம்

அற அரசு நடத்தியவர்!

‘‘ஜெ
யேந்திர சரஸ்வதி சுவாமிகள் மடாதிபதியாகப் பொறுப்பேற்ற காலகட்டம், தமிழகத்திலும், தேசிய அளவிலும் பல சவால்கள் எழுந்தன. பாரம்பர்யமான மடத்தின் மடாதிபதியாக இருந்த ஜெயேந்திரர், இந்தக் காலகட்டத்தில் அதற்கான பணியை மேற்கொள்வதே முக்கியமானது என்று தீர்மானித்தார். தாய் மதத்தை விட்டுப் பலரும் செல்வதைத் தடுக்க வேண்டும் என்ற முனைப்புடன், தலித் மக்கள் வசிக்கும் பகுதிகளுக்கு நேரில் சென்று உபதேசித்தார். தாய் மதத்துக்குத் திரும்பிய மீனவர்களுக்காக நெல்லை இடிந்தகரையில் விநாயகர் ஆலயம் திறந்து வைத்தபிறகு, அங்கு வந்து ஜெயேந்திரர் சொன்ன வார்த்தைகள் இன்னும் எதிரொலிக்கின்றன. ‘வேதங்கள்தான் நமக்கு அடிப்படை. வேதத்தை வகுத்தளித்த வியாசர், மீனவ சமுதாயப் பெண்ணுக்குப் பிறந்தவர்’ என்று மீனவர்கள் மத்தியில் பேசினார் அவர்’’ என்று ஜெயேந்திரர் தொடர்பான நினைவுகளை அசைபோடுகிறார், பி.ஜே.பி எம்.பி இல.கணேசன்.

ஜெயேந்திரரின் கடைசி ஆசை

‘‘காஞ்சி மடத்தின் சார்பாக அவர் ஏராளமான சமூகப் பணிகளைத் தொடங்கினார். ‘ஜன கல்யாண்’ என்ற அமைப்பு மூலம் அதை ஊக்குவித்தார். மடத்துக்கு எல்லோரும் வர இயலும்; தன்னாலும் எல்லாப் பகுதிகளுக்கும் சென்று மக்களைச் சந்திக்க முடியும்’ என்று வாழ்ந்து காட்டியவர் ஜெயேந்திரர்.

அயோத்தி பிரச்னையில் தலையிட்டு, தான் ஒரு மடாதிபதியாக இருந்தபோதும் அதிலிருந்து சற்று இறங்கிவந்து, பல்வேறு தரப்பு நபர்களைச் சந்தித்து தீர்வு காண முயற்சி செய்தவர் அவர். எவருக்கும் தெரியாத ஒரு செய்தியை இப்போது வாசகர்களுடன் பகிர்ந்துகொள்கிறேன். சென்னை சேத்துப்பட்டில் அமைந்துள்ள காஞ்சி மடத்தின் கிளையில், பல ஆண்டுகளாக தமிழ் இலக்கிய வகுப்புகளை நடத்தி வருகிறார்கள். அவர் தொடங்கிய அந்தத் திட்டத்தை விஜயேந்திர சுவாமிகள் விரிவுபடுத்தி வருகிறார். இது பலருக்கும் தெரியாது. ஆனால், தெரிய வேண்டிய உண்மை. ‘இந்து தர்மத்தைப் பாதுகாக்க வேண்டுமெனில் வேதங்களையும் ஆலயங்களையும் பாதுகாப்பது போலவே, நம் பாரம்பர்யமான கலைகளையும் பாதுகாக்க வேண்டும்’ என்று கருதினார் மகா பெரியவர். அதைச் செயல்படுத்திக் காட்டினார் ஜெயேந்திரர். குறிப்பாக, ஆலயத்துடன் சம்பந்தப்பட்ட நாதஸ்வரக் கலைஞர்களையும் ஓதுவார்களையும் ஊக்குவித்ததில் மடத்தின் பங்கு பெரும் பங்கு. வில்லுப்பாட்டு கலைஞர் சுப்பு ஆறுமுகம், கரகாட்டக் கலைஞர் மதுரை ஓம் பெரியசாமி போன்றவர் களையும் காஞ்சி மடம் ஊக்குவித்தது. ஆன்மிக ஈடுபாட்டுடன், நடைமுறைக் கல்வியையும் கற்றுத்தர உருவாக்கியதுதான் சங்கரா பல்கலைக்கழகம். அத்துடன், மருத்துவத்தையும் அவர் ஊக்குவித்தார். குறிப்பாக, ஆயுர்வேத மருத்துவம் காஞ்சி மடத்தால் ஊக்கம் பெற்றது. இப்படி ‘அற அரசு’ நடத்தியது காஞ்சி மடம். ஜெயேந்திரர் சுவாமிகள், மக்களுக்கும் பணியாற்றினார்; மகேசனுக்கும் பணியாற்றினார்’’ என்று முடிக்கிறார் இல.கணேசன்.

- எஸ்.முத்துகிருஷ்ணன்