Published:Updated:

மேலாண்மை ஆணையம்... தமிழ்நாட்டுக்குக் கைகொடுக்குமா, கைவிரிக்குமா?

மேலாண்மை ஆணையம்... தமிழ்நாட்டுக்குக் கைகொடுக்குமா, கைவிரிக்குமா?
பிரீமியம் ஸ்டோரி
மேலாண்மை ஆணையம்... தமிழ்நாட்டுக்குக் கைகொடுக்குமா, கைவிரிக்குமா?

பிரச்னைகு.ராமகிருஷ்ணன்

மேலாண்மை ஆணையம்... தமிழ்நாட்டுக்குக் கைகொடுக்குமா, கைவிரிக்குமா?

பிரச்னைகு.ராமகிருஷ்ணன்

Published:Updated:
மேலாண்மை ஆணையம்... தமிழ்நாட்டுக்குக் கைகொடுக்குமா, கைவிரிக்குமா?
பிரீமியம் ஸ்டோரி
மேலாண்மை ஆணையம்... தமிழ்நாட்டுக்குக் கைகொடுக்குமா, கைவிரிக்குமா?

காவிரி நதிநீர்ப் பங்கீட்டுப் பிரச்னையில் உச்ச நீதிமன்றமும் மத்திய அரசும் ஆடிய கண்ணாமூச்சி ஆட்டம் தற்போது முடிவுக்கு வந்துள்ளது. காவிரி நடுவர் மன்றம் வழங்கிய இறுதித் தீர்ப்பை நடைமுறைப்படுத்துவதற்கான ‘காவிரி வரைவுச் செயல்திட்ட’த்தை நீண்ட இழுத்தடிப்புக்குப் பிறகு கடந்த மே 14-ம் தேதி, உச்ச நீதிமன்றத்தில் மத்திய அரசு தாக்கல் செய்துள்ளது. அதில், சில திருத்தங்களைச் செய்து, ஜூன் மாதத்துக்குள் காவிரி மேலாண்மை ஆணையத்தை அமைக்க உச்ச நீதிமன்றம் உத்தரவிட்டுள்ளது.  

மேலாண்மை ஆணையம்... தமிழ்நாட்டுக்குக் கைகொடுக்குமா, கைவிரிக்குமா?

காவிரி பாயக்கூடிய கர்நாடகா, தமிழ்நாடு, கேரளா, புதுச்சேரி ஆகிய நான்கு மாநிலங்களுக்குமான தண்ணீர் பகிர்வை, இனி காவிரி மேலாண்மை ஆணையமே மேற்கொள்ளும் என வரைவுத் திட்டத்தில் குறிப்பிடப்பட்டுள்ளது. காவிரி மேலாண்மை ஆணையம் அமைக்கப்பட்டுவிட்டால் தமிழ்நாட்டுக்குரிய காவிரி நீர் முழுமையாகக் கிடைத்துவிடுமா..? இது தமிழக மக்களுக்கு எந்தளவுக்குக் கை கொடுக்கும் என்பது குறித்துக் காவிரி உரிமைக்காகத் தொடர்ந்து குரல் கொடுத்துவரும் சிலரிடம் பேசினோம். அதன் தொகுப்பு இங்கே...

ஆறுபாதி கல்யாணம், பொதுச்செயலாளர், டெல்டா மாவட்ட விவசாயச் சங்கங்களின் கூட்டமைப்பு: “தற்போதைய நிலையில் காவிரிப் பிரச்னை முடிவுக்கு வந்து விட்டதாகவே நம்புகிறோம். காவிரி மேலாண்மை ஆணையத்தின் தலைவராகப் பொறுப்பேற்கக் கூடியவர் நேர்மையானவராகவும், உறுதியான நடவடிக்கைகள் எடுக்கக்கூடிய துணிச்சல் மிக்கவராகவும் இருந்தால், தமிழ்நாட்டுக்குரிய தண்ணீர் இனி முழுமையாகக் கிடைத்துவிடும்.  

மேலாண்மை ஆணையம்... தமிழ்நாட்டுக்குக் கைகொடுக்குமா, கைவிரிக்குமா?

நான்கு மாநிலங்களுக்கு உரியத் தண்ணீர் பகிர்வு மற்றும் அணைத் திறப்பு குறித்த முடிவுகளை இனி காவிரி மேலாண்மை ஆணையமே எடுக்கும் என்பதால், ‘தண்ணீர் தர மாட்டோம்’ எனக் கர்நாடகா இனி சண்டித்தனம் செய்ய முடியாது. இதுநாள் வரை கர்நாடகாவில் உள்ள கிருஷ்ணராஜ சாகர், கபினி, ஹேமாவதி, ஹேரங்கி ஆகிய அணைகளுக்குக் கர்நாடக மாநிலக் காவல்துறையினர்தான் பாதுகாப்புப் பணி மேற்கொண்டு வருகிறார்கள். இனி, அந்த அணைகளைத் திறக்கும்போதும், மற்ற காலங்களிலும் அங்குள்ளவர்கள் கலவரங்களில் ஈடுபடாமல் தடுக்க, மத்தியத் தொழில் பாதுகாப்புப் படையினர் பாதுகாப்புப் பணிகளை மேற்கொள்ள வேண்டும்.”

கி. வெங்கட்ராமன், தமிழக உழவர் முன்னணியின் ஆலோசகர்:
“காவிரி நடுவர் மன்றம் வழங்கிய இறுதித்தீர்ப்பில் ‘தன்னாட்சி அதிகாரம் கொண்ட காவிரி மேலாண்மை வாரியம் அமைக்க வேண்டும்’ என உத்தரவிடப்பட்டது. அதற்காகத்தான் கடந்த பத்தாண்டுகளாகத் தொடர் போராட்டங்களை நடத்தினோம். ஆனால், மத்திய அரசு தன்னாட்சி அதிகாரம் இல்லாத காவிரி மேலாண்மை ஆணையம் அமைக்க முடிவு செய்துள்ளது. 

மேலாண்மை ஆணையம்... தமிழ்நாட்டுக்குக் கைகொடுக்குமா, கைவிரிக்குமா?

தன்னாட்சி அதிகாரம் இருந்தால்தான் நான்கு மாநிலங்களிலும் உள்ள அணைகள் காவிரி மேலாண்மை ஆணையத்தின் கட்டுப்பாட்டின்கீழ் கொண்டு வரப்படும். புதிய அணைகள் கட்டுவதும் தடுக்கப்படும். தன்னாட்சி அதிகாரம் என்பது ஆணையத்தின் உயிர் போன்றது. காவிரி மேலாண்மை ஆணையத்தின் அனுமதி இல்லாமல் புதிய அணைகள் கட்டக்கூடாது என உச்சநீதிமன்றத் தலைமை நீதிபதி தீபக் மிஸ்ரா தெரிவித்துள்ளார். ஆனால், இது உத்தரவாகப் பிறப்பிக்கப் படவில்லை. காவிரி மேலாண்மை ஆணையத்தின் அதிகாரங்களிலும் இது இடம்பெறவில்லை. புதிய அணைகள் கட்டுவதை ஆணையம் தடுப்பதற்கான சாத்தியக்கூறுகள் இல்லை. காவிரி மேலாண்மை ஆணையத்தின் உத்தரவுகளை ஏற்றுக் கர்நாடகா தமிழ்நாட்டுக்குரிய தண்ணீரைக் கொடுக்கும் என்பதற்கும் உத்தரவாதம் இல்லை.”

மருத்துவர் பாரதிச்செல்வன், மீத்தேன் திட்ட எதிர்ப்புக் கூட்டமைப்பின் தலைமை ஆலோசகர்:
“மத்திய அரசு நயவஞ்சகமான உள்நோக்கத்தோடுதான் ‘காவிரி மேலாண்மை ஆணையம்’ எனக் குறிப்பிட்டுள்ளது.

நாம் கேட்டது, ‘காவிரி மேலாண்மை வாரியம்’. இதனைத் திட்டமிட்டே தவிர்த்திருக்கிறார்களோ எனச் சந்தேகம் எழுகிறது. இந்தியாவில் தற்போது செயல்பட்டு வரக்கூடிய தேசிய நெடுஞ்சாலைகள் ஆணையம், தொலைத்தொடர்பு ஆணையம், பெட்ரோல்-டீசல் விலை நிர்ணய ஆணையம் போன்றவை நேரடியாக மத்திய அரசின் கட்டுப்பாட்டில் வராவிட்டாலும்... அவற்றில் மத்திய அரசு மறைமுகமாக ஆதிக்கம் செலுத்துகிறது. மத்திய அரசின் ஆணைக்கு இணங்கவே இந்த ஆணையங்கள் முடிவெடுக்கின்றன. சர்வதேச அளவில் கச்சா எண்ணெய் விலை அதிகரித்தபோது, கர்நாடகா மாநிலத் தேர்தலை மனதில்கொண்டு இந்தியாவில் பெட்ரோல்-டீசல் விலையை மத்திய அரசு உயர்த்தாமலே இருந்தது. தேர்தல் முடிந்தவுடனேயே, ஒரு லிட்டருக்கு 4 ரூபாய் விலை உயர்த்தப்பட்டுள்ளது. மற்ற ஆணையங்கள்போலவே காவிரி மேலாண்மை ஆணையத்திலும் மத்திய அரசு ஆதிக்கம் செலுத்தி, கர்நாடகாவுக்குத் துணைபோக வாய்ப்புகள் அதிகம். இதையெல்லாம் கடந்து தமிழ்நாட்டுக்குக் காவிரி தண்ணீர் கிடைத்தால் ஆச்சர்யம்தான்.”

பெ.மணியரசன், காவிரி உரிமை மீட்புக்குழு ஒருங்கிணைப்பாளர் மற்றும் தமிழ்த்தேசிய பேரியக்கத்தின் தலைவர்: “காவிரி மேலாண்மை ஆணையத்தில் இரு ஊனங்கள் உள்ளன. ‘அணைகளின் கதவுகளைத் திறந்து மூடும் அதிகாரம், காவிரி மேலாண்மை ஆணையத்துக்கு மட்டுமே உண்டு’ என நேரடியாகச் சொல்லப்படவில்லை. கர்நாடகா மாநில அணைகளின் கதவுகளைத் திறந்துவிடும்படி கர்நாடகா மாநில நீர்ப்பாசனத்துறைக்குக் காவிரி மேலாண்மை ஆணையம் உத்தரவிட்டுத்தான் செயல்படுத்த முடியும் என்ற நிலை இருந்தால், மிகப்பெரிய பின்னடைவு ஏற்படும். ‘அணைகளைத் திறக்கக்கூடாது’ எனத் தங்களது மாநில அதிகாரிகளுக்குக் கர்நாடகா அரசு கட்டுப்பாடு விதிக்கக்கூடிய பேராபத்து உள்ளது.

தண்ணீர் திறந்துவிடும்படி உச்ச நீதிமன்றம் ஆணையிட்ட உத்தரவுகள் அனைத்தையும் கர்நாடகா அரசு இதுவரையில் மறுத்து வந்துள்ளது. உச்ச நீதிமன்ற உத்தரவுகளை மீறியதற்காகக் கர்நாடகா அரசு மீது ஒரு முறைகூட நடவடிக்கை எடுக்கப்பட்டதில்லை. அதே நிலைதான் இனியும் உருவாகும்.

அதேபோல, ‘ஆணையத்தின் முடிவுகளுக்கு ஏதாவது ஒரு மாநிலம் மறுப்பு தெரிவித்தால்... ஆணையத்தில் அங்கம் வகிக்கும் உறுப்பினர்களின் பெரும்பான்மை கருத்துபடி முடிவெடுக்கப்படும் எனச் சொல்லப்பட்டுள்ளது. இதில் தலைவர் உள்பட 9 உறுப்பினர்களுக்கு வாக்களிக்கும் உரிமை உள்ளது. இவர்களில் 5 பேர் மத்திய அரசின் அதிகாரிகள். தமிழ்நாடு உள்ளிட்ட நான்கு மாநிலங்களுக்கும் தலா ஒருவர் வீதம் நான்கு பேர் இடம்பெறுவார்கள். தமிழ்நாட்டுக்குத் தண்ணீர் தர கர்நாடகச் சார்பு உறுப்பினர் மறுப்பு தெரிவித்தால், அவருக்குச் சாதகமாக மத்திய அரசின் 5 அதிகாரிகளும் வாக்களிக்க வாய்ப்புள்ளது.

அவர்கள் வாக்கெடுப்பில் கலந்து கொள்ளாமல் ஒதுங்கிக் கொண்டாலும்கூட, தமிழ்நாட்டுக்குச் சிக்கல்தான். காங்கிரஸ், பா.ஜ.க யார் ஆட்சி செய்தாலும் காவிரிப் பிரச்னையில், அந்தக்கட்சிகள் கர்நாடகா மாநிலத்துக்குச் சாதகமாகத்தான் இதுவரை நடந்துள்ளன. தலைமை நீதிபதி தீபக் மிஸ்ரா தலைமையிலான அமர்வு, அளித்த தீர்ப்பே அரசியலமைப்புச் சட்ட விதிகளுக்கு எதிராக உள்ளது. அதனால், காவிரி வழக்கை 7 நீதிபதிகள் கொண்ட அரசியல் சாசன அமர்வுக்கு மாற்ற வேண்டும்.”

மத்திய அரசு, காவிரி வரைவுச் செயல் திட்டத்தைத் தாக்கல் செய்திருப்பதால், துளிர் விட்டுள்ள நம்பிக்கை விரைவில் கிள்ளியெறியப்பட்டு விடுமோ என்ற அச்சம் தமிழக மக்கள் மனதில் நிலை கொண்டுள்ளது. இந்த அச்சத்தைப் போக்க வேண்டியது, உச்ச நீதிமன்றம் மற்றும் மத்திய அரசு ஆகியவற்றின் கடமை.