Published:Updated:

மரக்காணம் கலவரம்: சட்டசபையில் பிரச்னை எழுப்ப அனுமதி மறுப்பு!

Vikatan Correspondent
மரக்காணம் கலவரம்: சட்டசபையில் பிரச்னை எழுப்ப அனுமதி மறுப்பு!
மரக்காணம் கலவரம்: சட்டசபையில் பிரச்னை எழுப்ப அனுமதி மறுப்பு!
மரக்காணம் கலவரம்: சட்டசபையில் பிரச்னை எழுப்ப அனுமதி மறுப்பு!

சென்னை: மரக்காணம் கலவரம் தொடர்பாக தமிழக சட்டசபையில் இன்று பல்வேறு கட்சிகள், பிரச்னை எழுப்ப முயன்றபோது சபாநாயகர் அதற்கு அனுமதி மறுத்துவிட்டார்.

தமிழக சட்டசபையில் இன்று கேள்வி நேரம் முடிந்ததும், மரக்காணத்தில் நேற்று நடைபெற்ற கலவரம் தொடர்பாக மார்க்சிஸ்ட் கம்யூனிஸ்ட், இந்திய கம்யூனிஸ்ட், தே.மு.தி.க. மற்றும் புதிய தமிழகம் ஆகிய கட்சிகளை சேர்ந்த எம்.எல்.ஏ.க்கள் பிரச்னையை எழுப்பி  பேச முற்பட்டனர்.

மார்க்சிஸ்ட் கம்யூனிஸ்டு எம்.எல்.ஏ. பாலகிருஷ்ணன் பிரச்னை குறித்து முதலில் பேச எழுந்தார்.ஆனால் அதற்கு சபாநாயகர் தனபால் அனுமதி மறுத்தார்.

இதுகுறித்து அவர் கூறும்போது,"நீங்கள் 10.15 மணிக்குத்தான் கடிதம் கொடுத்து இருக்கிறீர்கள். அதை அரசுக்கு அனுப்பி வைத்து இருக்கிறேன். பதில் வந்ததும் எடுத்துக் கொள்கிறேன்" என்றார். ஆனாலும் பாலகிருஷ்ணன் உள்பட எதிர்க்கட்சி எம்.எல்.ஏ.க்கள் ஒட்டுமொத்தமாக எழுந்து சென்று இப்பிரச்னை குறித்து விவாதிக்க வேண்டும் என வலியுறுத்தினார்கள்.

##~~##
ஆனால் சபாநாயகர்," நான் முன்பே சொல்லி விட்டேன். அதன்பிறகும் பிடிவாதமாக நீங்கள் இப்படி எழுந்து நின்றால் என்ன அர்த்தம். 10.15 மணிக்கு கடிதம் கொடுத்து விட்டு 11.15 மணிக்கு அதை விவாதத்துக்கு எடுத்துக் கொள்ளுங்கள் என்றால் எப்படி உடனே முடியும். அரசிடம் இருந்து பதில் வரவேண்டும் அல்லவா? அனைவரும் உட்காருங்கள். சபையை நடத்த ஒத்துழைப்பு தாருங்கள்" என்று கேட்டுக்கொண்டார்.
அப்போது குறுக்கிட்டுப் பேசிய அமைச்சர் ஓ.பன்னீர் செல்வம்,"உறுப்பினர்கள் இன்று கவனஈர்ப்பு தீர்மானம் பற்றி கடிதம் கொடுத்துள்ளார்கள். இக்கடிதத்தை 10 மணிக்கு பிறகு சட்டசபை ஆரம்பித்த பின் கொடுத்திருக்கிறார்கள். அரசிடம் இருந்து பதில் வந்ததும் எடுத்துக் கொள்ளப்படும். முதல் கடிதம் 10.03 மணிக்கு தரப்பட்டுள்ளது. 2-வது கடிதம் 10.16 மணிக்கும், 3-வது கடிதம் 10.19 மணிக்கும்தான் தந்திருக்கிறீர்கள். எனவே அரசிடம் இருந்து பதில் வந்ததும் முறைப்படி கடிதம் எடுத்துக் கொள்ளப்படும்" என்றார்.
அப்போது சபாநாயகர்,"நீங்கள் எல்லோரும் திரும்ப திரும்ப உடனே பேச வேண்டும் என வற்புறுத்துகிறீர்கள். எதுவாக இருந்தாலும் ஒரு மணி நேரத்துக்கு முன்பே கடிதம் தரவேண்டும்" என்றார்.
உடனே புதிய தமிழகம் கட்சித் தலைவர் கிருஷ்ணசாமி பேச முற்பட்டார். அவரிடம் சபாநாயகர், நீங்கள் 10.30 மணிக்குதான் கடிதம் கொடுத்து இருக்கிறீர்கள். உட்காருங்கள் என்றார்.

பின்னர் அமைச்சர் கே.பி.முனுசாமி எழுந்து அவையை நடத்த அனைவரும் ஒத்துழைப்பு கொடுங்கள் என கேட்டுக் கொண்டார். அதைத் தொடர்ந்து எதிர்க் கட்சி எம்.எல்.ஏ.க்கள் அனைவரும் அமர்ந்தனர்.