Published:Updated:

கனிமங்களைக் கொண்டுசெல்ல குறுக்கு வழியா?

கனிமங்களைக் கொண்டுசெல்ல குறுக்கு வழியா?
பிரீமியம் ஸ்டோரி
கனிமங்களைக் கொண்டுசெல்ல குறுக்கு வழியா?

மதுரை - சென்னை சாலை சர்ச்சை

கனிமங்களைக் கொண்டுசெல்ல குறுக்கு வழியா?

மதுரை - சென்னை சாலை சர்ச்சை

Published:Updated:
கனிமங்களைக் கொண்டுசெல்ல குறுக்கு வழியா?
பிரீமியம் ஸ்டோரி
கனிமங்களைக் கொண்டுசெல்ல குறுக்கு வழியா?

சென்னை - சேலம் எட்டுவழிச் சாலைப் பிரச்னை இன்னும் தீரவில்லை. இந்த நிலையில், மதுரையிலிருந்து தஞ்சாவூர் வழியாக சென்னைக்கு மற்றொரு சாலைத் திட்டத்துக்கு தயாராகிவருகிறது மத்திய அரசு. டெல்டா பகுதியின் ஹைட்ரோ கார்பன் உள்ளிட்டவற்றைக் கொண்டு செல்லவே இந்த சாலை போடப்படுவதாகக் குற்றம்சாட்டுகின்றனர் விவசாயிகள் மற்றும் சுற்றுச்சூழல் செயல்பாட்டாளர்கள்.

‘மதுரையிலிருந்து மேலூர், காரைக்குடி, புதுக்கோட்டை வழியாக தஞ்சாவூருக்கு சுமார் 2,500 கோடி ரூபாயில் சாலை அமைக்கப்படும்’ என மத்திய அரசு அறிவிப்பு வெளியிட்டிருந்தது. ‘சென்னை-மதுரை தேசிய நெடுஞ்சாலையில் போக்குவரத்து நெரிசலைக் குறைக்கும் முயற்சியாக பாரத்மாலா பரியோஜனா திட்டத்தில் இந்த சாலை அமையும். இதன்பின் மதுரையிலிருந்து தஞ்சை வழியாக சென்னை செல்லலாம்’ என்கிறது மத்திய சாலைப் போக்குவரத்து அமைச்சகம்.

கனிமங்களைக் கொண்டுசெல்ல குறுக்கு வழியா?

இந்த அறிவிப்பைத் தொடர்ந்தே, இந்தப் பகுதி விவசாயிகள் கலக்கம் அடைந்துள்ளனர். இதுகுறித்து மேலூர் தனியாமங்கலத்தைச் சேர்ந்த விவசாயி மாதவன், ‘‘இந்தத் திட்டம் செயல்படுத்தப்பட்டால், மேலூர் பகுதியில் சுமார் 11 கி.மீ தூரத்துக்கு விளைநிலங்கள் பாதிக்கப்படும். தவிர, கண்மாய்களும் கிணறுகளும் இந்தத் திட்டத்தால் அழிக்கப்படுகின்றன” என்றார் கவலையோடு. வடக்கு வலையபட்டியைச் சேர்ந்த விவசாயி சின்னையா, “எனக்கு விவசாயத்தை விட்டால் வேறு எதுவும் தெரியாது. போர்வெல், கிணறு, பம்பு செட்டுகள் வைத்து விவசாயம் செய்துவருகிறேன். போதிய வருமானம் இல்லை என்றாலும் விவசாய நிலம்தான் எங்களுக்குச் சோறு போடுகிறது. இந்த நிலத்தைப் பறித்துவிட்டு என்னதான் இழப்பீடு கொடுத்தாலும் அது எங்களுக்கு ஈடாகாது. ஏற்கெனவே காரைக்குடி செல்வதற்காக உள்ள சாலையைத் தற்போது விரிவுசெய்து வருகிறார்கள். அந்தச் சாலையைப் பயன்படுத்திக்கொண்டு இந்தத் திட்டத்தை அரசு கைவிடவேண்டும்’’ என்றார்.

மேலூரில் சட்டத்துக்குப் புறம்பாக செயல்பட்ட கிரானைட் குவாரிகளுக்கு எதிராக வழக்குகள் தொடர்ந்த வழக்கறிஞர் ஸ்டாலின், “விவசாய நிலங்கள்மீது கைவைக்கத் தயங்காத அரசு, கிரானைட் குவாரிகளுக்கு எந்த பாதிப்பும் ஏற்படாத வகையில் திட்டத்தைத் தீட்டியுள்ளது. இதிலிருந்தே இந்தத் திட்டம் பெரும் முதலாளிகளுக்கானது என்பது தெளிவாகிறது. குறிப்பாக, தஞ்சாவூர் டெல்டா பகுதிகளின் ஹைட்ரோ கார்பன் உள்ளிட்ட பெட்ரோலியக் கனிமங்களை சென்னைக்கு கொண்டுசெல்லும் நோக்கத்திலேயே இந்த புதிய சாலைத் திட்டத்தை மத்திய அரசு செயல்படுத்தத் துடிக்கிறது. ஏற்கெனவே இருக்கும் மேலூர் - திருப்பத்தூர் சாலையை விரிவுபடுத்தி, முக்கிய கிராமங்களில் மேம்பாலங்கள் அமைத்தாலே சாலை வசதி மேம்படும். தவிர, இப்பகுதி மக்களின் நீண்ட நாள் கோரிக்கையான மேலூர் - காரைக்குடி ரயில் சேவையை நிறைவேற்றினால் போக்குவரத்து மேலும் சீராகும்’’ என்றார்.

ஒட்டுமொத்த விகடனுக்கும் ஒரே ஷார்ட்கட்!

கனிமங்களைக் கொண்டுசெல்ல குறுக்கு வழியா?

இந்தத் திட்டத்தை செயல்படுத்தும் நெடுஞ்சாலை ஆணைய திட்ட மேலாளர் சரவணனிடம் பேசினோம். ‘‘மேலூர், பிள்ளையார்பட்டி, காரைக்குடி, புதுக்கோட்டை, தஞ்சாவூர் சாலைத் திட்டம் சென்னை ஈ.சி.ஆரில் இணைகிறது. கிழக்கு - மேற்கு திசையிலான போக்குவரத்துச் சாலை இது. இதனால் தென்மாவட்டங்களில் சுற்றுலாத் துறை மேம்படும். கிரானைட் குவாரிகளுக்காகத் திட்டங்களை எதுவும் மாற்றவில்லை. மேலும் விவசாயம் செய்யாத பகுதிகளையே இந்தத் திட்டத்துக்காகக் கையகப்படுத்த உள்ளோம். விளைநிலங்கள் குறைந்த அளவே பாதிப்படையும்’’ என்றார்.

– அருண் சின்னதுரை
படங்கள்: ஈ.ஜெ.நந்தகுமார்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism