Published:Updated:

ரத்தக் ‘கறை’! - கொலைகார அரசுத்துறை

ரத்தக் ‘கறை’! - கொலைகார அரசுத்துறை
பிரீமியம் ஸ்டோரி
ரத்தக் ‘கறை’! - கொலைகார அரசுத்துறை

ரத்தக் ‘கறை’! - கொலைகார அரசுத்துறை

ரத்தக் ‘கறை’! - கொலைகார அரசுத்துறை

ரத்தக் ‘கறை’! - கொலைகார அரசுத்துறை

Published:Updated:
ரத்தக் ‘கறை’! - கொலைகார அரசுத்துறை
பிரீமியம் ஸ்டோரி
ரத்தக் ‘கறை’! - கொலைகார அரசுத்துறை

ருத்துவ சேவைக்குப் பெயர் பெற்றிருந்த தமிழக சுகாதாரத் துறை வெட்கித் தலைகுனிய நேரிட்டிருக்கிறது. தமிழக அரசு மருத்துவமனையின் சேவையை நம்பி வந்த ஒரு சாமானியப் பெண்ணுக்கு மாபெரும் துரோகத்தை இழைத்திருக்கிறது இந்த அரசு நிர்வாகம். அந்த ஏழைக் கர்ப்பிணிப் பெண்ணுக்கு, தனது வாழ்நாளில் என்றைக்கும் குணப்படுத்த இயலாத ஹெச்.ஐ.வி பாதிப்பை உண்டாக்கி, துடைக்க முடியாத கறையை ஏற்படுத்தியிருக்கிறது கொலைகார  சுகாதாரத்துறை. சாத்தூர் அரசு மருத்துவமனையில் நடந்துள்ள இந்தக் கொடுமை, அலட்சியத்தின் உச்சத்தில் இந்த அரசுத்துறை இருப்பதை உலகுக்கு வெளிச்சம் போட்டுக் காட்டியுள்ளது.

தமிழகத்தில் ஆண்டுக்கு சுமார் எட்டு லட்சம் பேர் ரத்த தானம் செய்கின்றனர். இதன் மூலம் 12 லட்சம் நோயாளிகள் பயனடைகின்றனர். தேசிய அளவில் ரத்த தானத்தில் தமிழகம் முன்னோடியாகத் திகழ்கிறது. இப்படி ரத்த தானம் அளிப்பவரிடம் 60 கேள்விகள் அடங்கிய ஒரு விண்ணப்பத்தில் ஒப்புதல் வாங்கியிருக்க வேண்டும். அந்தக் கேள்விகளுக்கு அளிக்கப்பட்ட பதில்களை வைத்தே, அவர் ரத்த தானம் வழங்கத் தகுதியானவரா, இல்லையா என்று பெரும்பாலும் அறிந்துகொள்ள முடியும் என்கின்றனர் மருத்துவர்கள். ஆனால், சம்பந்தப்பட்ட விவகாரத்தில் சிவகாசி அரசு மருத்துவமனையில் ரத்த தானம் கொடுத்த அந்த இளைஞரிடம் அதுபோன்று ஒப்புதல் பெறப்பட்டதா என்பதே தெரியவில்லை.

ரத்தக் ‘கறை’! - கொலைகார அரசுத்துறை

அடுத்தபடியாக, ஒருவரிடமிருந்து ரத்தம் தானமாகப் பெறப்பட்டால், அதில் ஹெச்.ஐ.வி., பால்வினை நோய்கள், மலேரியா, ஹெப்படைட்டிஸ் பி மற்றும் சி போன்ற ஐந்து விதமான பாதிப்புகள் உள்ளனவா என்று சோதனை செய்ய வேண்டும். அந்தப் பரிசோதனைகளில் நெகட்டிவ் ரிசல்ட் இருந்தால் மட்டுமே, ரத்தத்தை நோயாளிகளுக்கு ஏற்ற வேண்டும். மருத்துவமனையில் இருந்தோ, ரத்த வங்கிகளிடம் இருந்தோ பெறப்பட்ட ரத்தம், மற்றொரு மருத்துவமனைக்கு அனுப்பி வைக்கப்படும்போதும், பரிசோதனைக்கு உட்படுத்தப்பட்டதா என்பதைத் தெளிவாகக் குறிப்பிட்டு அனுப்ப வேண்டும். அப்படிக் குறிப்பிடாமல் அனுப்பப்பட்டிருந்தால், தானமாகப் பெறப்பட்ட மருத்துவமனையில் அந்தப் பரிசோதனையைச் செய்ய வேண்டும். அதன் பிறகே ஒருவருக்கு ரத்தம் ஏற்ற வேண்டும். இதுதான் முறையான நடைமுறை.

“ஆனால், இங்கே என்ன நடந்திருக்கும்?” என்று அரசு மருத்துவமனை அதிகாரிகள் சிலரிடம் கேட்டோம். அவர்கள், “ரத்தத்தில் ஹெச்.ஐ.வி உள்ளிட்ட நோய்த் தொற்றுகளைப் பரிசோதனை செய்வதற்கு, குறிப்பிட்ட ஐந்து நடைமுறைகள் உள்ளன. அவற்றில் தாலுகா மருத்துவமனைகளில், ‘ரேப்பிட் டெஸ்ட்’ எனப்படும் பரிசோதனை வசதிகள் உள்ளன. மற்ற நான்கு பரிசோதனைகளின் முடிவுகள் அனைத்தும் கணினியில் சேமிக்கப்பட்டு, அதன் முடிவுகள் பிரின்ட் செய்யப்பட்டு அளிக்கப்படும். ஆனால், ரேப்பிட் டெஸ்ட் முடிவுகளை ஆய்வகப் பணியாளர்கள், கையில்தான் எழுதித் தரவேண்டும். இதில் கவனக்குறைவால் ஹெச்.ஐ.வி ‘பாஸிட்டிவ்’ என்பதை ‘நெகட்டிவ்’ என்று எழுதிக்கொடுத்திருக்கலாம். ரத்த தானம் பெறுவதற்கான பைகளையும் சரியான தட்பவெப்ப நிலையில் வைத்துப் பாதுகாக்கா விட்டால், அதில் சேமிக்கப்படும் ரத்தத்தைப் பரிசோதிக்கும்போது தவறான முடிவுதான் வரும். ரத்தப் பரிசோதனை முடிவுகளைச் சரிபார்க்க நிரந்தர மருத்துவ அலுவலர் இருப்பதில்லை. கூடுதல் பொறுப்பாக இதைப் பார்க்கும் மருத்துவர்கள், கண்துடைப்புக்காக ரத்த வங்கிக்கு வந்து தலையைக் காட்டிச் செல்வதாலும், இதுபோன்ற தவறுகள் நடக்கின்றன” என்றார்கள்.

இவர்கள் சொல்வதைப்போல, குறிப்பிட்ட அளவுக்கு மேல் ரத்த தானம் பெறும் மருத்துவமனைகளில், அவசரச் சிகிச்சைகளைக் கண்காணிக்கும் மருத்துவ அலுவலர்கள்தான், இவற்றையும் கண்காணிக்க வேண்டும். ஆனால் சென்னை, மதுரை, கோவை போன்ற நகரங்களில் உள்ள மாவட்ட அரசு மருத்துவமனை ரத்த வங்கிகளில் மட்டுமே ஆய்வகக் கண்காணிப்பாளர், மருத்துவ அலுவலர் பணியிடங்கள் நிரப்பப்பட்டுள்ளன. மற்ற இடங்களில் ஆய்வகக் கண்காணிப்பாளர்களே இல்லை.

அதனால், ஆய்வகத்தில் அவுட்சோர்ஸிங் முறையில் பணியாற்றும் தற்காலிக ஊழியர்கள்தான் அனைத்தையும் கையாள்கின்றனர். தற்காலிகப் பணியாளர்கள் தரமில்லாத, அங்கீகாரம் இல்லாத நிறுவனங்களில் படித்துவிட்டுப் பணிக்கு வருவதும் இதுபோன்ற தவறுகள் நிகழ்வதற்குக் காரணமாக அமைந்துவிடுகிறது. இந்தச் சம்பவத்தில் தொடர்புடைய மருத்துவமனை ஊழியர்கள் மூன்று பேர் பணி நீக்கம் செய்யப்பட்டுள்ளனர். அதாவது மருத்துவ அலுவலர், கண்காணிப்பு அதிகாரிகள் எல்லோரும் அலட்சியமாக இருந்துள்ள நிலையில், கடைநிலை ஊழியர்கள் மட்டும் பலிகடா ஆக்கப்பட்டுள்ளனர்.

“தாலுகா மருத்துவமனைகளில் கைகளால் எழுதித்தரப்படும் ஆய்வகப் பரிசோதனை முடிவுகளைக் கணினிமயமாக்கி, தானாகவே அந்தப் பரிசோதனை முடிவுகளைப் பதிவுசெய்யும் வகையில் மாற்ற வேண்டும். கைகளால் எழுதி வைப்பதால், தானம் அளித்தவரின் விவரங்களையும் முழுமையாகச் சேமிக்க இயலாது. தானம் அளிப்பவர்களின் விவரம், ரத்தப் பரிசோதனை முடிவுகளை செல்போனில் புகைப்படம் எடுத்துச் சேமிக்கும் வசதிகளையாவதுச் சுகாதாரத் துறை ஏற்படுத்த வேண்டும். அப்போதுதான், அலட்சியத்தினால் நிகழும் இதுபோன்ற சம்பவங்கள் ஏற்படாது” என்கிறார் தமிழ்நாடு ரத்த வங்கியின் முன்னாள் இயக்குநர் டாக்டர் செல்வராஜன்.

ரத்தக் ‘கறை’! - கொலைகார அரசுத்துறை

சாத்தூர் மருத்துவமனையில் பாதிக்கப்பட்ட பெண்ணுக்கு ஏற்றப்பட்ட ரத்தம், ராமநாதபுரம் மாவட்டத்தைச் சேர்ந்த ஓர் இளைஞருடையது. கமுதி அருகே உள்ள திருச்சிலுவையாபுரம் என்ற கிராமத்தைச் சேர்ந்த 20 வயதான அந்த இளைஞர், நான்கு ஆண்டுகளுக்கு முன்பு சிவகாசியில் உள்ள ஒரு பட்டாசு கம்பெனியில் வேலைக்குச் சேர்ந்துள்ளார். 2016-ல் அவர் சிவகாசி அரசு மருத்துவமனையில் ரத்த தானம் செய்துள்ளார். அப்போதே அவருக்கு ஹெச்.ஐ.வி தொற்று இருப்பது உறுதி செய்யப்பட்டுள்ளது. வழக்கமாக இந்த விஷயத்தைச் சம்பந்தப்பட்டவரிடம் நேரடியாகச் சொல்லமாட்டார்கள். மருத்துவமனையிலிருந்து தமிழ்நாடு எய்ட்ஸ் கட்டுப்பாடு சங்கத்தின் கீழ் இயங்கும் ‘நம்பிக்கை’ மையத்தில் தகவல் அளித்து, கவுன்சிலர் மூலமாக அந்த நபருக்கு கவுன்சிலிங் அளித்து, சிகிச்சையைத் தொடங்குவார்கள். ஆனால், இந்த விஷயத்தில் அன்றைய நாளில் இப்படியான நடைமுறைகளை யாரும் மேற்கொள்ளவில்லை.

அதன் பின்பு கடந்த நவம்பர் மாதம் 30-ம் தேதி, தன் அண்ணியின் சிகிச்சைக்காக சிவகாசி மருத்துவ மனையில் ரத்தம் கொடுத்துள்ளார் அவர். பின்பு வெளிநாடு போவதற்காக மதுரை மேலூரில் மருத்துவப் பரிசோதனை செய்தபோதுதான், ஹெச்.ஐ.வி இருப்பது அவருக்குத் தெரியவந்துள்ளது. உடனே அவர் பதறிப்போய் சிவகாசி ரத்த வங்கிக்கு வந்து விஷயத்தைக் கூறியுள்ளார். இதற்கிடையே அவரின் அண்ணிக்கு வேறொருவரது ரத்தம் ஏற்றப்பட்டிருக்கிறது. ஆனால், இவரது ரத்தம் பரிசோதனை எதுவும் செய்யப்படாமல் சாத்தூர் அரசு மருத்துவ மனைக்கு அனுப்பப்பட்டுவிட்டது. அதைத் தொடர்ந்துதான் இப்படி ஒரு விபரீதம். இந்த இரு ஆண்டுகள் இடைவெளியில் அவர் எத்தனை முறை ரத்த தானம் செய்தார், அந்த ரத்தம் யாருக்கெல்லாம் ஏற்றப்பட்டது என்கிற விவரங்கள் எதுவும் தெரியவில்லை.

தமிழகத்தில், அரசு மருத்துவமனைகளை நம்பிச் சிகிச்சைக்கு வரும் மக்களின் எண்ணிக்கை, பல கோடி. ஏழைகள் நம்பியுள்ள இந்த மருத்துவமனைகளில்தான், சிகிச்சையுடன் ஹெச்.ஐ.வி தொற்றும் வழங்கப்பட்டுள்ளது. இது சிவகாசியில் மட்டும்தான் நடந்துள்ளதா, வேறு எங்கேனும் நடந்து மறைக்கப்பட்டுள்ளதா என்ற சந்தேகமும் எழுகிறது. மக்களிடம் எழுந்துள்ள இந்த அவநம்பிக்கையையும், அச்சத்தையும் போக்குவது அரசின் அதி முக்கியப் பொறுப்பு.

- செ.சல்மான், இரா.மோகன், ஆனந்தராஜ், ஜெனி ஃப்ரீடா
ஓவியம்: ரமணன்

தனியார் மருத்துவமனை தகிடுதத்தம்!

ரசு மருத்துவமனையில்தான் அலட்சியம் என்றில்லை; லட்சங்களில் கறக்கும் தனியார் மருத்துவமனைகளிலும் இதுபோன்ற அலட்சியங்கள் நடக்கின்றன. இது, சில ஆண்டுகளுக்கு முன், கோவையில் நிகழ்ந்த சம்பவம்... கோவையின் மிகப்பெரிய தொழில் குடும்பத்தைச் சேர்ந்த 58 வயது பெண்மணி அவர். சாதாரணக் காய்ச்சலுக்காக மருத்துவமனைக்குச் சென்று மருந்து, மாத்திரைகளை வாங்கி உட்கொண்டார் அவர். ஆனால், பல நாள்களாகியும் காய்ச்சல் தீரவில்லை. பல்வேறு மருத்துவப் பரிசோதனைகள் செய்தும், மருந்துகளை மாற்றியும், பல ஸ்பெஷலிஸ்ட்களைப் பார்த்தும் பலனில்லை.இறுதியில், ஹெச்.ஐ.வி பரிசோதனை செய்யுமாறு சொல்கிறார் ஒரு டாக்டர். பாரம்பர்யமான ஒரு குடும்பத்தைச் சேர்ந்த வயது முதிர்ந்த பெண்ணைப் பார்த்து, இந்தப் பரிந்துரையைச் சொன்ன டாக்டரை, திட்டித் தீர்த்துவிட்டு வந்தது குடும்பம். அதன் பின்னும் காய்ச்சல் தீராததால், வேறுவழியின்றி ஹெச்.ஐ.வி பரிசோதனை செய்தார்கள். ஆனால், அதில் ‘பாசிட்டிவ்’ ரிசல்ட் வரவே அதிர்ந்துபோனது குடும்பம். பின்பு விசாரித்ததில் ஆறு மாதங்களுக்கு முன்பாக, பாத்ரூமில் வழுக்கி விழுந்த அந்தப் பெண்ணுக்கு, கோவையின் பிரபல மருத்துவமனை ஒன்றில், எலும்பு முறிவுக்கு சிகிச்சை மேற்கொண்டுள்ளனர். அறுவை சிகிச்சையின்போது, அவருக்கு ரத்தம் செலுத்தப்பட்டுள்ளது. அதில் வந்ததுதான், இந்த உயிர்க்கொல்லி வைரஸ் என்று தெரியவந்தது.

ஹெச்.ஐ.வி பாதித்த ரத்தம் எங்கிருந்து வந்தது என்று விசாரணையைத் தொடர்ந்தபோது, பல ‘பகீர்’ தகவல்கள் கிடைத்தன. கோவையில், தினமும் பல ஆயிரம் யூனிட் இரத்தம் தேவைப்படும் நிலையில், கிடைப்பது குறைவாகவே இருக்கிறது. அதனால், அவசரத்துக்குத் தெருவில் வசிக்கும் ஆதரவற்றோர், ரயில் நிலையங்களில் தங்கும் யாசகர்கள் உட்பட பலரையும் அள்ளிவந்து பணத்தைக் கொடுத்து ரத்தத்தை உறிஞ்சுகின்றனர். அதில் யாருக்கோ இருந்த ஹெச்.ஐ.வி., வைரஸ் முறையான பரிசோதனை யின்றி செலுத்தப்பட்டதில் அந்தப் பெண்ணுக்கு ஹெச்.ஐ.வி தொற்று பரப்பப்பட்டுள்ளது. இதைச் சரிக்கட்டுவதற்கு, பெரும் தொகையை அந்தக் குடும்பத்துக்கு மருத்துவமனை நிர்வாகம் கொடுத்தது.

- சே.செல்வக்குமார்

உபகரணங்களிலும் ஊழல்!

சா
மானிய மக்களிடம் பெரும் அச்சத்தை விளைவித்துள்ள இந்தச் சம்பவத்தின் பின்னணியில், அரசு மருத்துவமனை ஊழியர்களின் அலட்சியம் மட்டுமின்றி, அரசின் உயர் மட்டத்தில் நடக்கும் ஊழலும் இருக்குமென்ற சந்தேகமும் வலுத்துள்ளது. அதாவது, இந்தச் சம்பவத்துக்குக் காரணம் மனிதப்பிழை மட்டுமல்ல; உபகரணங்களும் தவறான முடிவைக் காண்பிப்பதாக ‘பகீர்’ குற்றச்சாட்டு எழுந்துள்ளது. இதுகுறித்து பேசும் சுகாதாரத் துறை அதிகாரிகள் சிலர், “அரசு மருத்துவ மனைகளுக்கு இத்தகைய பரிசோதனை உபகரணங்களை வாங்கி விநியோகிக்கும் தமிழ்நாடு மருத்துவப் பணிகள் கழகம் (TNMSC), இதுபோன்று தரமற்ற உபகரணங்களை வாங்கித் தருவதன் பின்னணியில், ஊழல் புகாரும் வாசிக்கப்படுகிறது. துறையின் வி.ஐ.பி-க்குச் சொந்தமான பினாமி நிறுவனங்கள், விலை மலிவான சீனாவின் தயாரிப்பு உபகரணங்களை வாங்கி, அரசு மருத்துவமனைகளுக்கு விநியோகித்துள்ளன. அவை தரமற்றவை என்பதுடன், துல்லியமான முடிவுகளையும் தராதவை. அத்தகைய உபகரணங்களே, இத்தகைய தவறுக்கு காரணம் என்கின்றனர்.   

ரத்தம் பரிசோதனை செய்வதற்கு, ‘ஐடியல்’ என்ற கம்பெனியிடமிருந்து கொள்முதல் செய்யப்பட்ட பரிசோதனைக் கருவிகளை, தமிழக அரசு மருத்துவமனை களுக்கு வழங்கியுள்ளனர். இந்தக் கருவியைக்கொண்டு எடுக்கப்பட்ட பரிசோதனை முடிவுகள், பல சமயங்களில் மாறி முரண்பாடாக வந்துள்ளன. இதை லேப் டெக்னீஷியன்கள் சிலர், அதிகாரிகளிடம் புகாராகத் தெரிவித்துள்ளனர். ஆனால், அதை உயர் அதிகாரிகள் கண்டுகொள்ளவில்லை. அதேவேளை, தேசிய எய்ட்ஸ் கட்டுப்பாடு அமைப்பின் (National Aids Control Organization-NACO) சார்பில் ஏ.ஆர்.டி மையங்கள் வாயிலாக வழங்கப்படும் பரிசோதனைக் கருவிகள், துல்லியமான முடிவுகளைக் காண்பிக்கின்றன என்று அரசு மருத்துவமனை லேப் டெக்னீஷியன்களே சான்றிதழ் கொடுக்கின்றனர். விவரம் அறிந்த லேப் டெக்னீஷியன்கள், எதற்கு வம்பு என ஒன்றுக்கு இரண்டு முறை இரு கருவிகளையும் பயன்படுத்தி ரிப்போர்ட் தயாரிக்கும் நிலைக்குத் தள்ளப்பட்டுள்ளனர்.

நடுக்கத்தில் கணவர்!

பா
திக்கப்பட்ட கர்ப்பிணிப் பெண் தற்போது மதுரை ராஜாஜி அரசு மருத்துவமனையில் சிகிச்சை பெற்றுவருகிறார். கிட்டத்தட்ட தனிமைப்படுத்தப்பட்டு, பலத்த பாதுகாப்புடன் அவருக்கு சிகிச்சை அளிக்கப்பட்டுவரும் நிலையில் ‘விகடன்’ சார்பில் அந்தப் பெண்ணைச் சந்தித்தோம். துயரத்தின் உச்சத்தில் இருந்த அவரால் நம்மிடம் பேசவே முடியவில்லை. பேச முற்பட்டாலும் வார்த்தைகள் வராமல் கதறி வெடித்து அழுதார் அவர். அவரை ஆசுவாசப்படுத்தினோம். பின்பு தெரிந்த மருத்துவர்கள் சிலரிடம் பேசினோம். “தமிழகத்தில் நடக்கும் சம்பவங்களையெல்லாம் பார்க்கும்போது, இதை எங்களால் சொல்லாமல் இருக்க முடியவில்லை. மிக உயர் மட்டத்திலிருந்தெல்லாம் பல தரப்புகளுக்கு இந்த விவகாரம் தொடர்பாக அழுத்தம் கொடுக்கப்பட்டுவருகிறது. இந்த விவகாரத்தில் அரசுக்குக் களங்கம் ஏற்படுவதைச் சிலரால் ஏற்றுக்கொள்ள முடியவில்லை. இதைச் சமாளிக்க, பாதிக்கப்பட்ட பெண்ணின் கணவருக்கு ரத்தப் பரிசோதனை செய்வதாகச் சொல்லி ஹெச்.ஐ.வி தொற்று ஏற்படுத்தி, அவர் மூலம் அவரின் மனைவிக்குப் பரவியது என்பதை நிறுவவும் சிலர் முயற்சி செய்யலாம். எனவே, ஜாக்கிரதையாக இருக்கச் சொல்லுங்கள்” என்றார்கள்.