Published:Updated:

தேர்தல் ஆணையத்தின் அலட்சியம்... குட்டு வைத்த நீதிமன்றம்!

ஒட்டுமொத்த விகடனுக்கும் ஒரே ஷார்ட்கட்

Use App
தேர்தல் ஆணையத்தின் அலட்சியம்... குட்டு வைத்த நீதிமன்றம்!
தேர்தல் ஆணையத்தின் அலட்சியம்... குட்டு வைத்த நீதிமன்றம்!

தேர்தல் ஆணையத்தின் அலட்சியம்... குட்டு வைத்த நீதிமன்றம்!

பிரீமியம் ஸ்டோரி

துரையில் வாக்கு எண்ணும் மையத்துக்குள் தாசில்தார் ஒருவர் நுழைந்த விவகாரம் பெரும் சர்ச்சையைக் கிளப்பியது. சி.பி.எம், அ.ம.மு.க உட்பட எதிர்க்கட்சிகள் இந்த விவகாரத்தைக் கையிலெடுத்துப் போராட்டம் நடத்தியதால், தாசில்தார் சம்பூர்ணம் உட்பட நான்கு பேர் பணியிடை நீக்கம் செய்யப்பட்டார்கள். இதுகுறித்து தமிழகத் தேர்தல் ஆணையம் விசாரணை நடத்திவரும் நிலையில், கடந்த 26-ம் தேதி சென்னை உயர் நீதிமன்றத்தில் வழக்கு தாக்கல் செய்திருக்கிறார் மதுரை நாடாளுமன்ற சி.பி.எம் வேட்பாளர் சு.வெங்கடேசன்.

இவ்வழக்கை அவசர வழக்காக விசாரித்த சென்னை உயர் நீதிமன்ற நீதிபதிகள் மணிக்குமார், சுப்பிரமணிய பிரசாத் ஆகியோர் தமிழகத் தேர்தல் அதிகாரியின் அதிகாரம் பற்றி பல்வேறு கேள்விகளை எழுப்பியிருக்கிறார்கள். இதையடுத்து, கலெக்டர் நடராஜனை இடமாற்றம் செய்து நடவடிக்கை எடுத்துள்ளது தேர்தல் ஆணையம்.

தேர்தல் ஆணையத்தின் அலட்சியம்... குட்டு வைத்த நீதிமன்றம்!

சு.வெங்கடேசனிடம் பேசினோம். “மதுரை மருத்துவக் கல்லூரி வளாகத்துக்குள் வாக்குப்பதிவு எந்திரங்கள் வைக்கப்பட்டுள்ளன. கடந்த ஏப்ரல் 20-ம் தேதி, அந்த வளாகத்தின் ஓர் அறைக்குள் சென்ற தாசில்தார் சம்பூர்ணம் மற்றும் சில ஊழியர்கள், மூன்று மணி நேரம் உள்ளே இருந்து சில ஆவணங்களை எடுத்து வந்துள்ளனர். இதுபற்றி நாங்கள் புகார் எழுப்பியும் கலெக்டர், வாக்கும் எந்திரங்கள் வைத்திருக்கும் இடத்துக்கு வரவில்லை. நாங்கள் ஆர்ப்பாட்டத்தில் ஈடுபட்டதை அடுத்து தாசில்தார் உள்ளிட்ட ஊழியர்களை சஸ்பெண்டு செய்திருக்கிறார்கள். கீழ்நிலை அதிகாரிகள் மீதான நடவடிக்கையை நாங்கள் ஏற்றவில்லை. அவர்களுக்கு உத்தரவிட்ட அதிகாரிகள்மீது நடவடிக்கை எடுக்க வேண்டும் என்பதுதான் எங்கள் கோரிக்கை. தமிழகத் தேர்தல் அதிகாரியின் நடவடிக்கையில் எங்களுக்குத் திருப்தி இல்லை. இந்தச் சம்பவத்துக்கு கலெக்டரும், தேர்தல் அதிகாரியுமான நடராஜன்தான் பொறுப்பு. ஓட்டு எண்ணிக்கை மையத்தில் பாதுகாப்புக் குறைபாடு உள்ளது. அதிகாரிகள், ஆளும் கட்சிக்கு சாதகமாகச் செயல்படுகிறார்கள். அதனால்தான், ‘முதன்மைச் செயலாளர் அந்தஸ்திலுள்ள அதிகாரியின் தலைமையில் உயர்மட்ட சிறப்பு விசாரணைக்குழு அமைக்க வேண்டும். தபால் வாக்குகளை எண்ணும்போது ஐ.ஏ.எஸ் அதிகாரியைச் சிறப்புப் பார்வையாளராக நியமிக்க வேண்டும். கலெக்டர்மீது நடவடிக்கை எடுக்க வேண்டும்’ என்ற கோரிக்கைகளுடன், உயர் நீதிமன்றத்தை நாடினோம். எங்கள் கோரிக்கையின் நியாயத்தைப் புரிந்துகொண்ட நீதிபதிகள், சரியான உத்தரவுகளைப் பிறப்பித்துள்ளனர்’’ என்றார்.

சென்னை உயர் நீதிமன்றத்தில் தேர்தல் ஆணையம் சார்பில் வழக்கறிஞர் நிரஞ்சன் ராஜகோபாலும், சு.வெங்கடேசனுக்காக மூத்த வழக்கறிஞர் என்.ஆர்.இளங்கோவும் ஆஜராகி யுள்ளனர். வழக்கு விசாரணையின்போது, “கலெக்டரின் உதவியாளரும் உதவித் தேர்தல் அதிகாரியுமான குருசந்திரன் உத்தரவின் பேரில்தான் தாசில்தார் சம்பூர்ணம் அங்குச் சென்றுள்ளார். அங்குள்ள ஆவணங்களை எடுத்து வந்து நகல் எடுத்துள்ளார். மதுரை வாக்கு எண்ணிக்கை மையத்தில் பாதுகாப்பு குறைபாடு உள்ளது என்று கூடுதல் தேர்தல் அதிகாரி பாலாஜி நடத்திய விசாரணையில் தெரியவந்துள்ளது. இந்தப் பிரச்னை தொடர்பாகத் தேர்தல் ஆணையத்துக்குத் தமிழக தேர்தல் அதிகாரி அனுப்பிய அறிக்கை மூலம் இரண்டு நாள்களில் நடவடிக்கை எடுக்கப்படும்” என்று நிரஞ்சன் ராஜகோபால் சொன்னார்.

அப்போது குறுக்கிட்ட நீதிபதிகள், “கூடுதல் தேர்தல் அதிகாரி அளித்துள்ள விசாரணை அறிக்கை முழுமையாக இல்லை. தாசில்தாருடன் சென்றவர்கள் பற்றிய விவரங்கள் இல்லை. அவர்களிடம் விசாரணை நடத்திய விவரங்களும் இல்லை. கலெக்டர் இந்தப் பிரச்னையில் உடனே நடவடிக்கை எடுக்கவில்லை’’ என்றனர்.

உடனே, “தாசில்தார் பணியிடை நீக்கம் செய்யப்பட்டுள்ளார்’’ என்று ஆணையத்தின் வழக்கறிஞர் பதிலளிக்க, “இந்தச் சம்பவத்துக்கு யாரெல்லாம் பொறுப்பு, கலெக்டரின் உதவியாளர்மீது எடுக்கப்பட்ட நடவடிக்கை என்ன? தேர்தல் ஆணைய விதிப்படி கலெக்டர் தினமும் வாக்குப்பதிவு எந்திரங்கள் வைக்கப்பட்டுள்ள மையத்துக்குச் சென்று பார்வையிட வேண்டும். அப்படி இவர் பார்வையிட்டாரா?” என்று மீண்டும் நீதிபதிகள் கேள்வி எழுப்பினர்.

தேர்தல் ஆணையத்தின் அலட்சியம்... குட்டு வைத்த நீதிமன்றம்!

தொடர்ந்து ஆணையம் சார்பாக வாதிட்ட வழக்கறிஞரின் பதிலில் திருப்தி அடையாத நீதிபதிகள், “விசாரணை அறிக்கையில் எந்த விவரங்களும் இல்லாதபோது எந்த அடிப்படையில் நடவடிக்கை எடுக்கப் போகிறீர்கள்? நியாயமாகவும், நேர்மையாகவும் தேர்தல் நடத்துவதாகச் சொல்லும் ஆணையம், இந்தப் பிரச்னையில் சரியாகச் செயல்பட்டிருக்க வேண்டும். கலெக்டரின் உதவியாளர் எதற்காக தாசில்தாரை அனுப்பி வைத்தார், யாருக்காக நகல் எடுக்கப்பட்டது போன்ற விவரங்கள் இல்லை. வாக்கு எண்ணும் மையத்துக்குள் யார் வேண்டுமானாலும் செல்லலாம் என்றால் பாதுகாப்பு இல்லை என்றுதானே அர்த்தம்? இவர்களை அனுமதிக்கப் பாதுகாப்பு அதிகாரிகளுக்கு உத்தரவிட்டது யார்?” என்று சரமாரியாகக் கேள்விகள் எழுப்பியதுடன், உடனடியாக கலெக்டரை மாற்ற வேண்டும் என்றும் உத்தரவிட்டுள்ளனர்.

அதைத் தொடர்ந்து நடராஜன், குருசந்திரன் ஆகியோர் மாற்றப்பட்டு, மதுரை கலெக்டராக நாகராஜனும், உதவி தேர்தல் அதிகாரியாக சாந்தகுமாரும் நியமிக்கப்பட்டுள்ளனர்.

அவ்வப்போது நீதிமன்றங்கள் இப்படிக் குட்டு வைப்பதால்தான் ஜனநாயகம் கொஞ்சமாவது உயிர்ப்புடன் இருக்கிறது.

- செ.சல்மான்
படம்:  ஈ.ஜெ.நந்தகுமார்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு