Published:Updated:

தனியாருக்குத் தாரைவார்க்கப்பட்ட குளம்... கொதிக்கும் விவசாயிகள்!

ஒட்டுமொத்த விகடனுக்கும் ஒரே ஷார்ட்கட்

Use App
தனியாருக்குத் தாரைவார்க்கப்பட்ட குளம்... கொதிக்கும் விவசாயிகள்!
தனியாருக்குத் தாரைவார்க்கப்பட்ட குளம்... கொதிக்கும் விவசாயிகள்!

தனியாருக்குத் தாரைவார்க்கப்பட்ட குளம்... கொதிக்கும் விவசாயிகள்!

பிரீமியம் ஸ்டோரி

ன்னியாகுமரி மாவட்டத்தில் அரசுக்குச் சொந்தமான குளத்தில் பூங்கா அமைப்பதற்குத் தனியாருக்கு அனுமதி வழங்கி யிருக்கிறது, பொதுப்பணித் துறை. இதனால், கடும் அதிருப்தியில் இருக்கிறார்கள், விவசாயிகள் மற்றும் இயற்கை ஆர்வலர்கள்.

கன்னியாகுமரி பகுதியில் திருவிதாங்கூர் மன்னர் ஆட்சி செய்த சமயத்தில்… பாசனம் மற்றும் குடிநீர்த் தேவைகளுக்காக ஆயிரக்கணக்கான குளங்கள் அமைக்கப்பட்டன. மாவட்டத்தில் அணைமூலம் பாசனம்பெறும் நிலங்களைவிடக் குளங்களால் பாசனம்பெறும் நிலங்கள்தான் அதிகம். ஆனால், அரசே குளங்களை அழித்து, கட்டடங்கள் கட்டி வருவதாலும் பல்வேறு ஆக்கிரமிப்புகளாலும் குளங்களின் பாதுகாப்பு கேள்விக்குறியாகி வருகிறது.

தனியாருக்குத் தாரைவார்க்கப்பட்ட குளம்... கொதிக்கும் விவசாயிகள்!

நாகர்கோவில் - திருவனந்தபுரம் தேசிய நெடுஞ்சாலையில் தோட்டியோடு பகுதியில் சாலையின் இரண்டு பக்கங்களிலும் விரிந்துகிடக்கிறது, அக்கினியான் குளம். இந்தக் குளத்தில் கிட்டத்தட்ட ஓர் ஏக்கர் பரப்பளவில் பூங்கா அமைக்க, தனியார் உணவகத்துக்கு அனுமதி வழங்கப்பட்டிருப்பதுதான் சர்ச்சையைக் கிளப்பியிருக்கிறது.

இதுகுறித்து நம்மிடம் பேசினார், தமிழ்நாடு விவசாயிகள் சங்கத்தின் கன்னியாகுமரி மாவட்டத் துணைச் செயலாளர் எஸ்.விஜி. “ஆக்கிரமிப்பிலிருந்த அக்கினியான் குளத்தை அளந்து எல்லைகளைக் குறிப்பதற்காக நாங்கள் பல ஆண்டுகளாகப் போராடினோம். இன்னும் முழுமையாக ஆக்கிரமிப்புகள் அகற்றப்பட்டு குளம் தூர்வாரப்படவில்லை. குளத்தை, அருளானந்தா கிரானைட் உரிமையாளர் ஆன்றோ என்பவர் ஆக்கிரமித்து வைத்துள்ளார். அவர் நடத்திவரும் உணவகத்தைக் குளத்துக்குள் அமைப்பதற்கான வேலைகளைச் செய்துவருகிறார். அதற்கு, பூங்கா அமைத்தல் என்ற பெயரில் அனுமதி வழங்கி இருக்கிறது, பொதுப்பணித் துறை. இதனால், உணவகத்துக்குச் சாப்பிடச் செல்பவர்கள் மட்டும்தான் பூங்காவுக்குவர முடியும் என்ற நிலை உருவாகிவிடும்” என்று வருத்தப்பட்டார்.

பி.ஜே.பி-யின் முன்னாள் எம்.எல்.ஏ. வேலாயுதன், “அரசு அதிகாரிகளே வளர்ச்சித் திட்டம் என்ற பெயரில் குளங்களை அழிக்கிறார்கள். மாவட்டத்தில் உள்ள ஒவ்வொரு குளத்துக்கும் ஒரு வரலாற்றுப் பின்னணி உண்டு. குளங்களில் உள்ள ஆக்கிரமிப்புகளை அகற்றி அவற்றைப் பாதுகாத்து நிலத்தடிநீர் மட்டத்தை உயர்த்த பொதுப்பணித் துறை முன்வர வேண்டும்” என்றார்.

தனியாருக்குத் தாரைவார்க்கப்பட்ட குளம்... கொதிக்கும் விவசாயிகள்!

ஆன்றோவிடம் பேசினோம். “அரசிடம் முறையாக அனுமதி வாங்கி, குளத்தின் நடுவில் பறவைகளுக்காக மரங்கள் நடுகிறோம். குளத்தில் மீன்களை வளர்க்க இருக்கிறோம். மக்கள் அமர்ந்து இயற்கையை ரசிக்கும் விதமாகப் பூங்காதான் அமைக்கிறோம். நிலத்தை ஆக்கிரமிக்கவில்லை” என்றார்.

பொதுப்பணித் துறை செயற்பொறியாளர் வேத அருள்சேகர், “குளத்தை யாரும் ஆக்கிரமிக்கக்கூடாது என்பதற்காகத்தான், பராமரிப்பதற்குத் தனியாருக்கு அனுமதி அளித்துள்ளோம். தவறுகள் நடந்தால், அனுமதியை ரத்து செய்துவிடுவோம்” என்றார்.

- ஆர்.சிந்து
படங்கள்: ரா.ராம்குமார்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு