Published:Updated:

களைக்கொல்லிக்கு எதிரான வழக்கு… கலிபோர்னியா நீதிமன்றம் அதிரடி!

களைக்கொல்லிக்கு எதிரான வழக்கு… கலிபோர்னியா நீதிமன்றம் அதிரடி!
பிரீமியம் ஸ்டோரி
News
களைக்கொல்லிக்கு எதிரான வழக்கு… கலிபோர்னியா நீதிமன்றம் அதிரடி!

என்ன செய்யப்போகிறது இந்தியா?சூழல்

“கிளைஃபாஸேட் (Glyphosate) எனும் வேதிப்பொருள் கலந்திருக்கும் ‘ரவுண்டு அப்’ ரசாயனக் களைக்கொல்லியைப் பயன்படுத்தியதால், தங்களுக்குப் புற்றுநோய் வந்தது” என்று அமெரிக்காவைச் சேர்ந்த டிவெய்ன் ஜான்சனும் அவரது மனைவியும் மான்சான்டோ நிறுவனம் மீது தொடர்ந்த வழக்கில்… ‘பாதிக்கப்பட்ட தம்பதிக்கு, மான்சான்டோ நிறுவனம் 289 மில்லியன் டாலர் இழப்பீடு வழங்க வேண்டும்’ என உத்தரவிட்டிருக்கிறது, கலிஃபோர்னியா மாகாண நீதிமன்றம்.

களைக்கொல்லிக்கு எதிரான வழக்கு… கலிபோர்னியா நீதிமன்றம் அதிரடி!

இந்தத் தீர்ப்பு விவசாயிகளுக்கான ஓர் எச்சரிக்கை மணி. ரசாயன உரங்கள், பூச்சிக்கொல்லிகள், களைக்கொல்லிகள் என விவசாயத்தில் பயன்படுத்தப்படும் நஞ்சுகள்… நிலம், நீர், காற்று என அனைத்தையும் மாசுபடுத்துவதோடு, விவசாயியைக் கொல்லும் எமனாகவும் இருக்கிறது என இத்தீர்ப்பு உறுதிப்படுத்தியுள்ளது. கைவசமிருக்கும் காணி நிலத்தையும் அடமானம் வைத்து விவசாயம் செய்யும் ஏழை விவசாயிகளுக்கு, புற்றுநோய்க்கு மருத்துவம் பார்க்க எத்தனை லட்சம் செலவாகும் என்பது தெரிந்திருக்க வாய்ப்பில்லை. ஆனால், மான்சான்டோ நிறுவனத்துக்கு அது நன்றாகத் தெரியும். இந்த வழக்கின் விசாரணையில், மான்சான்டோ நிறுவனம் தெரிந்தேதான் நச்சுகளை விற்பனை செய்து வருகிறது என்பதைக் கண்டுபிடித்திருக்கிறது, நீதிமன்றம். ஆனால், அந்தக் களைக்கொல்லி பாக்கெட்டில் எந்த எச்சரிக்கையையும் செய்யவில்லை, மான்சான்டோ. அதனால்தான் அதிகபட்ச அபராதத் தொகையை விதித்திருக்கிறது, நீதிமன்றம். ஆனால், ‘இந்தக் களைக்கொல்லியால் புற்றுநோய் வராது’ என மறுத்துள்ளது, மான்சான்டோ. அதை நீதிமன்றம் ஏற்கவில்லை.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
களைக்கொல்லிக்கு எதிரான வழக்கு… கலிபோர்னியா நீதிமன்றம் அதிரடி!

ஜான்சன் வழக்குத் தொடர்ந்ததையடுத்து மான்சான்டோ நிறுவனத்தின் மீது 4,000 வழக்குகள் தொடுக்கப்பட்டுள்ளன. கடந்த மார்ச் மாதத்தில், இதே காரணத்துக்காக, கலிஃபோர்னியாவைச் சேர்ந்த எட்வின் ஹார்ட்மான் என்பவருக்கு 80 மில்லியன் டாலர் இழப்பீடு வழங்க வேண்டும் என மான்சான்டோ நிறுவனத்துக்கு உத்தரவிட்டுள்ளது, சான்ஃப்ரான்ஸிஸ்கோ மாவட்ட நீதிமன்றம்.

கடந்த 2015-ம் ஆண்டில், ‘கிளைஃபாஸேட் மனிதர்களுக்குப் புற்றுநோயை உருவாக்கக்கூடும்’ என்று உலகச் சுகாதார நிறுவனத்தின் புற்றுநோய் முகமை எச்சரித்தது. ‘நோய் எதிர்ப்பு சக்தி குறைவதற்கும், குடல் மற்றும் கல்லீரலில் ஏற்படும் கோளாறுகளுக்கும் கிளைஃபாஸேட் காரணமாக இருக்கிறது’ என்று பல ஆய்வுகள் சுட்டிக்காட்டியுள்ளன. ஆனால், அமெரிக்கச் சுற்றுச்சூழல் பாதுகாப்பு முகமை (US Environmental Protection Agency), ‘கிளைஃபாஸேட்டைப் பாதுகாப்பாகப் பயன்படுத்தினால் பொது சுகாதாரத்துக்கு ஆபத்து இல்லை. அதில் புற்றுநோய் உருவாக்கும் காரணிகள் இல்லை’ எனச் சான்றளித்துள்ளது.

தொடர்ந்து, ‘அமெரிக்கக் குழந்தைகள் அதிகமாக விரும்பி உண்ணும் ஓட்ஸ் உள்படச் சில காலை உணவுப்பொருள்களில் கிளைஃபாஸேட்டின் எச்சம் இருக்கிறது’ என்று ஓர் ஆய்வு முடிவு வெளியிடப்பட்டதும் அதிர்ச்சி அடைந்தது, அமெரிக்கா.

களைக்கொல்லிக்கு எதிரான வழக்கு… கலிபோர்னியா நீதிமன்றம் அதிரடி!

ஆனால், அதற்கு முன்பே பல நாடுகள், புற்றுநோய் அபாயம் இருப்பதாகக் கூறி, இந்தக் களைக்கொல்லிக்குத் தடை விதிக்க ஆரம்பித்தன. கடந்த ஆண்டு, தேயிலைத் தோட்டம் உள்பட, எந்த விவசாய நிலத்திலும் கிளைஃபாஸேட் பயன்படுத்தக் கூடாது எனத் தடை விதித்தது, இலங்கை. போர்ச்சுகல், எல்சால்வடார் ஆகிய நாடுகளும் பயன்பாட்டுக்குத் தடை விதித்தன. பெல்ஜியம், நெதர்லாந்து, நியூசிலாந்து ஆகிய நாடுகள் அதன் பயன்பாட்டுக்குக் கடும் கட்டுப்பாடுகளை விதித்துள்ளன. கொலம்பியா, வான்வழி களைக்கொல்லித் தெளித்தலை முற்றிலுமாகத் தடை செய்துவிட்டது. அர்ஜென்டினா நாட்டில் பாதிப்புகள் கண்டுபிடிக்கப்பட்ட பிறகும் சில அரசியல் காரணங்களால் முழுமையாகத் தடைவிதிக்க முடியவில்லை. ‘கிளைஃபாஸேட், நிலத்தைப் பாழாக்கி, உணவுப்பொருளை விஷமாக்கும்’ எனப் பிரிட்டனின் ‘மண் சங்கம்’ எச்சரித்துள்ளது.

கிளைஃபாஸேட் ரசாயனத்தின் எச்சம் கோதுமையில் இருக்கிறது என அமெரிக்க கோதுமையை இறக்குமதி செய்வதற்குத் தடை விதித்தன, ஜப்பான் மற்றும் தென்கொரியா நாடுகள். ஆனால், நமது நாட்டில் உணவுப்பொருள்களில் ரசாயன எச்சம் இருக்க வேண்டிய அளவுகள் குறித்த வரைமுறைகள் சரியாகப் பின்பற்றப்படுவதில்லை. அதனால், உடனடியாக இறக்குமதியைத் தடை செய்ய முடியவில்லை.

களைக்கொல்லிக்கு எதிரான வழக்கு… கலிபோர்னியா நீதிமன்றம் அதிரடி!

நம்நாட்டில், தேயிலைத் தோட்டங்களிலும் பயிரில்லாத நிலங்களிலும் கிளைஃபாஸேட் கொண்ட களைக்கொல்லியைப் பயன்படுத்தலாம் என அனுமதி வழங்கப்பட்டுள்ளது. ஆனால், இக்களைக்கொல்லி குறைந்த விலையில் சந்தையில் கிடைப்பதால், அதன் பயன்பாடு அதிகளவில் உள்ளது. அதற்கு இன்னொரு காரணம், விவசாயத்தொழிலாளர் தட்டுப்பாடு. களையெடுக்க ஆகும் செலவு மற்றும் நேரம் ஆகியவை கணிசமாகக் குறைவதால், விவசாயிகள் அதிகளவில் இதைப் பயன்படுத்துகிறார்கள். விவசாய நிலங்கள், காடுகள், தோட்டங்கள், புல் பரப்புகள் என அனைத்து இடங்களிலும், அதன் பயன்பாடு பரவிக் கிடக்கிறது. நெல் அறுவடையைச் சுலபமாக்க அறுவடைக்குச் சில நாள்கள் முன்னர் இதை வயலில் தெளிப்பது தெரியவந்துள்ளது. அன்னாசி மற்றும் வாழைத்தோப்புகளில் பயன்படுத்துவதும் தெரிய வந்துள்ளது. வீட்டு வாசலில் வளரும் புற்களை அழிக்கக்கூட, மக்கள் இதைப் பயன்படுத்த தொடங்கியதுதான் அபாயத்தின் உச்சம்.

கேரளா, மஹாராஷ்டிரா ஆகிய மாநிலங்கள் ரவுண்டு அப் களைக்கொல்லியின் ஆபத்தை உணர்ந்து அதற்குத் தடை விதித்துள்ளன. ஆந்திரா, தெலங்கானா, பஞ்சாப் ஆகிய மாநிலங்கள் கடும் கட்டுப்பாடுகளை விதித்துள்ளன. மாநில அரசுகள் சுதாரித்தாலும் இந்த நடவடிக்கைகள் தற்காலிகமானவையே. ஏனெனில், பூச்சிக்கொல்லிகள், களைக்கொல்லிகளைத் தடைசெய்யும் அதிகாரம் நம்நாட்டில் வேளாண்துறைக்கு இல்லை. மாநில அரசுகளுக்கும் தடை செய்யப் போதிய அதிகாரம் கிடையாது. மாநில அரசுகள் 60 நாள்களுக்கு மேல் பூச்சிக்கொல்லிக்கோ களைக்கொல்லிக்கோ தடை விதிக்க முடியாது. தேவைப்பட்டால் மேலும் 30 நாள்களுக்குத் தடையை நீட்டிக்கலாம். முழுவதுமாகத் தடைசெய்யும் அதிகாரம், ‘சென்ட்ரல் இன்செக்டிசைடு போர்டு மற்றும் ரிஜிஸ்ட்ரேஷன் கமிட்டி’க்கு மட்டுமே உண்டு.

மத்திய அரசின் இரட்டை நிலைப்பாட்டால், இத்தகைய களைக்கொல்லிகளின் பயன்பாட்டைத் தடுக்கவோ குறைக்கவோ, இந்தக் கமிட்டியால் இயலவில்லை. நம் நாட்டில் பாதிப்பு ஏற்படுத்தக்கூடும் என்ற சந்தேகத்தின் அடிப்படையில் ஆய்வுக்கு எடுத்துக் கொள்ளப்பட்ட பூச்சிக்கொல்லிகளின் பட்டியலில்கூட கிளைஃபாஸேட் இல்லை என்பது வேதனையான விஷயம். கிளைஃபாஸேட் உலகளவில் தடை செய்யப்படாததால் அதை ஆய்வுக்கு உட்படுத்தவேண்டிய அவசியம் ஏற்படவில்லை என்று நாடாளுமன்றத்தில் கடந்த ஆண்டுத் தெரிவிக்கப்பட்டது.

உடனடியாகத் தடுப்பு நடவடிக்கைகளை எடுக்கத்தவறினால், அதன் பாதிப்புகள் கற்பனைக்கு எட்டாததாக இருக்கும். நம் விவசாயிகளில் பலருக்குத் தாங்கள் பாதிக்கப்பட்டிருக்கிறோம் என்பதே தெரியாது. அது தெரிய நீண்ட காலம் ஆகலாம். அப்படியே தெரியவந்தாலும், அதை அமெரிக்கர்களைப்போல நிரூபிக்க முடியுமா என்பது மிகப்பெரிய சந்தேகம். எண்டோசல்ஃபான் கேரளாவில் தடை செய்யப்பட்டு 11 ஆண்டுகள் கழித்துத்தான் நாடு முழுவதும் தடைசெய்ய முடிந்தது. அதுவும் உச்ச நீதிமன்றத்தின் உத்தரவுக்குப் பிறகுதான் நனவானது. ரசாயனப் பூச்சிக்கொல்லிகள், களைக்கொல்லிகளுக்குப் பதில், சூழலுக்கு உகந்த ஒரு மாற்றுப்பொருளைப் பயன்படுத்த வேண்டிய கட்டாயம் ஏற்பட்டுள்ளதால்… உலகம் முழுவதும் அதற்கான ஆராய்ச்சிகள் வேகமெடுத்துள்ளன. பல நாடுகள் ரசாயனமில்லாத களைக்கொல்லிகள், எந்திரங்கள் ஆகியவற்றை இணைத்துப் பயன்படுத்திக் களைகளை அழித்து வருகிறார்கள். கொதிநீரைத் தெளித்துக் களைகளை அழிக்கும் முயற்சியில் இறங்கியுள்ளது, ஆஸ்திரேலியா.

உண்மையில், இந்தப்பூச்சிகள் மற்றும் களைக்கொல்லிகள் சமீபத்திய கண்டுபிடிப்புகள்தான். இவை எதுவும் இல்லாமலேயே ஆயிரம் ஆண்டுகளுக்கு மேல் நம் முன்னோர் விவசாயம் செய்திருக்கிறார்கள். நல்ல விளைச்சலும் எடுத்திருக்கிறார்கள். கை அல்லது சிறிய உபகரணங்கள்மூலம் களைகளை அப்புறப்படுத்துவது மிகவும் எளிமையான வழி. ஒற்றைப் பயிர் முறைக்குப் பதில், பலபயிர்ச் சாகுபடி - ஐந்து அல்லது ஆறு பயிர்களை ஒரே நேரத்தில் வயலில் விளைவித்தல் ஆகிய முறைகள் களைகளைக் கணிசமாகக் கட்டுப்படுத்தும்.

ஏற்கெனவே விதை உற்பத்தி மற்றும் விளைபொருள் விற்பனைமீது காலங்காலமாக இருந்த உரிமையைக் கொஞ்சம் கொஞ்சமாக விவசாயிகளிடமிருந்து, பன்னாட்டு வர்த்தக நிறுவனங்கள் பறித்து வருகின்றன. அவை கோடிக்கணக்கில் லாபம் ஈட்ட, தற்போது விவசாயிகளின் உயிரும் பணயம் வைக்கப்பட்டுள்ளது. இதை இனிமேலும் அனுமதிக்கக் கூடாது. இதைத் தடுக்கவேண்டியது அனைவரின் கடமை. இதற்கான முதல் அடி எடுத்து வைக்க வேண்டியது விவசாயிகள்தான்.

கே.ராஜு

கிளைஃபாஸேட்

டந்த 1973-ம் ஆண்டில் விற்பனைக்கு வந்தது, கிளைஃபாஸேட் ரசாயனம் கொண்ட களைக்கொல்லி. இது பிரிட்டன், அமெரிக்கா ஆகிய நாடுகளில் மிகவும் பிரபலம். ஜெர்மனி, போலந்து ஆகிய நாடுகளும் இதை ஆதரிக்கின்றன. களைக்கொல்லி எதிர்ப்பு (Herbicide Tolerant) கொண்ட பயிர்களில் இதைப் பரவலாகப் பயன்படுத்தலாம் எனக் கூறப்பட்டதால், இதன் பயன்பாடு பல நாடுகளில் அதிகரித்தது. 1995-ம் ஆண்டில் 51 மில்லியன் கிலோவாக இருந்த கி்ளைஃபாஸேட்டின் பயன்பாடு, 2014-ம் ஆண்டில் 750 மில்லியன் கிலோவாக உயர்ந்துள்ளது. அதாவது 15 மடங்கு அதிகரித்துள்ளது. விற்பனை தொடங்கப்பட்ட நாளிலிருந்து இன்று வரை உலக நாடுகள் 8.6 பில்லியன் கிலோ கி்ளைஃபாஸேட்டைப் பயன்படுத்தியுள்ளன.