Published:Updated:

முறைகேடான பதவி உயர்வுகள்... கோடிக்கணக்கில் வசூல்!

சிதம்பரம் அண்ணாமலைப் பல்கலைக்கழகம்
பிரீமியம் ஸ்டோரி
சிதம்பரம் அண்ணாமலைப் பல்கலைக்கழகம்

சர்ச்சை வளையத்தில் அண்ணாமலைப் பல்கலை துணைவேந்தர்...

முறைகேடான பதவி உயர்வுகள்... கோடிக்கணக்கில் வசூல்!

சர்ச்சை வளையத்தில் அண்ணாமலைப் பல்கலை துணைவேந்தர்...

Published:Updated:
சிதம்பரம் அண்ணாமலைப் பல்கலைக்கழகம்
பிரீமியம் ஸ்டோரி
சிதம்பரம் அண்ணாமலைப் பல்கலைக்கழகம்
சிதம்பரம் அண்ணாமலைப் பல்கலைக்கழகத்தை மையப்படுத்தி வெளிவரும் ஊழல் புகார்களுக்குப் பஞ்சமே இல்லை. அவற்றில் லேட்டஸ்ட், தகுதியில்லாத பேராசிரியர் களுக்குப் பதவி உயர்வு வழங்கிய குற்றச்சாட்டில் தற்போதைய பொறுப்பு துணைவேந்தரான வி.முருகேசன் சிக்கியிருப்பது.
வி.முருகேசன்
வி.முருகேசன்

சிதம்பரம் அண்ணாமலைப் பல்கலைக்கழகம், சுமார் 12,000 மாணவர்களுடன் நூற்றாண்டை நெருங்கிக்கொண்டிருக்கிறது. நிர்வாகச் சீர்கேட்டால் தள்ளாடிக்கொண்டிருந்த பல்கலைக்கழகத்தை, மாணவர்களின் நலனைக் கருத்தில்கொண்டு 2013-ம் ஆண்டு தமிழக அரசு கையகப்படுத்தியது. இந்தநிலையில்தான் தற்போது பொறுப்பு துணைவேந்தராக இருக்கும் முருகேசன், தகுதியில்லாத 300 பேராசிரியர்களுக்குப் பதவி உயர்வு கொடுத்து, சுமார் 50 கோடி ரூபாய் வரை வசூல் வேட்டை நடத்தியிருப்பதாகப் புகார் எழுப்புகிறார்கள் பேராசிரியர்கள்.

கிட்டத்தட்ட 300 பக்கங்களைக்கொண்ட ஆவணங்களை நம்மிடம் கொடுத்து இது தொடர்பாகப் பேசிய பேராசிரியர்கள் சிலர், ‘‘இங்கு பணிபுரியும் பேராசிரியர்களில் ஒரு தரப்பினர், அரசு கையகப்படுத்துவதற்கு முன்பு சிபாரிசின் அடிப்படையிலும், போலிச் சான்றிதழ்கள் கொடுத்தும் சேர்ந்தவர்கள்தான். அதைத் தெரிந்துகொண்ட தற்போதைய துணைவேந்தர் முருகேசன், அவர்களை மிரட்டி பணம் வசூலிக்கத் திட்டமிட்டார். அதற்காக முந்தைய துணைவேந்தரால் அனுமதி வாங்கி வைக்கப்பட்டிருந்த பேராசிரியர்களுக்குப் பதவி உயர்வு வழங்குவதற்கான குழுவை (CAS-Career Advancement Scheme) 2018, ஆகஸ்ட் மாதம் கூட்டினார். பல ஆண்டுகளுக்குப் பிறகு அறிவிப்பு வெளியானதால், பலரும் இரண்டுக்கும் மேற்பட்ட பிரிவுகளில் விண்ணப்பித்தார்கள். அதனால் விண்ணப்பங்களின் எண்ணிக்கை இரண்டாயிரத்தைத் தாண்டியது. விண்ணப்பித்த அனைவருக்கும் 2019-ம் ஆண்டு, ஜனவரி முதல் ஏப்ரல் வரை நேர்காணல் நடத்தப்பட்டது.

அதன் பிறகு, தகிடுதத்தம் செய்து பணியில் சேர்ந்தவர்கள் மற்றும் போலிச் சான்றிதழ் கொடுத்தவர்களைக் குறிவைத்தார் துணைவேந்தர். இதற்காகவே சில துறைகளின் தலைவர்களையும் பேராசிரியர்களையும் ஏஜென்ட்டுகளாக நியமித்து, வசூல் வேட்டையைத் தொடங்கினார். ஒருவருக்கு அதிகபட்சம் 5 லட்சம் ரூபாய் வரை பணத்தைப் பெற்றுக்கொண்டு பதவி உயர்வு விண்ணப்பத்தில் டிக் அடித்தார். ஆய்வுக் கட்டுரைகள் இல்லாதவர் களுக்கு வேறு ஒருவரின் கட்டுரைகளைத் திருடி, போட்டோ ஷாப் மூலம் தலைப்பையும் பெயரையும் போலியாக மாற்றித் தருவதற்கு தனி டீம் வேலை செய்தது. அதற்கான சில இன்டர்நெட் சென்டர்கள் மூலம் தனியாக 50,000 ரூபாய் வசூலிக்கப்பட்டது.

போலிச் சான்றிதழ்கள் மூலம் பணியில் சேர்ந்தவர்களிடம் பணத்தைப் பெற்றுக்கொண்டு பதவி உயர்வை வழங்கிய முருகேசன், பணம் கொடுக்கவில்லை என்ற ஒரே காரணத்துக்காக அனைத்துத் தகுதிகளுடனும் இருந்த 200 பேராசிரியர்களுக்குப் பதவி உயர்வை வழங்கவில்லை. அவர்கள் அது பற்றிக் கேட்டபோது ‘உங்களிடம் முக்கியமான பேப்பர் இல்லை’ என்று கூறிவிட்டார். அவர் கூறிய முக்கிய பேப்பர் பணம்தான் என்று எங்களுக்குப் புரிந்ததும் நாங்களே விசாரணையில் இறங்கினோம்.

அப்போதுதான் போலிச் சான்றிதழ், போலிக் கட்டுரை வெளியீடுகள் மற்றும் அகில இந்திய தொழில்நுட்பக் கல்வி கவுன்சிலின் (AICTE) விதிகளுக்குள் வராதவர்கள் என 300-க்கும் மேற்பட்டவர்களிடம் சுமார் 50 கோடி ரூபாய் வரை பெற்றுக்கொண்டு, அவர்களுக்கு முறைகேடாகப் பதவி உயர்வை வழங்கியிருக்கிறார் என்பது தெரியவந்தது. முதற்கட்டமாக முறை கேடாகப் பதவி உயர்வைப் பெற்ற 112 நபர்களின் விவரங்களையும், அதற்கான ஆதாரங்களையும் நீதிமன்றத்தில் சமர்ப்பித்திருக்கிறோம். அந்த வழக்கு சென்னை உயர் நீதிமன்றத்தில் நிலுவையில் இருக்கிறது. இது ஒருபுறமிருக்க... இந்த முருகேசனே போலி ஆவணங்களைக் காட்டித்தான் பணியில் சேர்ந்திருக்கிறார். இவரது ஆய்வுக் கட்டுரைகளில் 14 கட்டுரைகள் திருடப்பட்டவை என்பதற்கான ஆதாரங்கள் எங்களிடம் இருக்கின்றன.

முறைகேடான பதவி உயர்வுகள்... கோடிக்கணக்கில் வசூல்!

வரும் ஜூன் 2-ம் தேதியுடன் முருகேசனின் பதவிக்காலம் முடிவடைகிறது. இப்படியான சூழலில் அவர் ஓய்வுபெற்றால், விசாரணையிலிருந்து தப்பித்துவிடுவார். அதனால், தமிழக அரசின் உயர்கல்வித்துறை இவர்மீதான விசாரணை முடியும் வரை பணி ஓய்வுக்கு அனுமதிக்கக் கூடாது என்று ஜனாதிபதி, பிரதமர், உள்துறை அமைச்சர், தமிழக ஆளுநர், பல்கலைக்கழக மானியக்குழு, முதல்வர் ஸ்டாலின் உள்ளிட்டோருக்கு விரிவாக மனு அனுப்பியிருக் கிறோம். முதல்வர் ஸ்டாலின் உரிய நடவடிக்கை எடுப்பார் என்று காத்திருக்கிறோம்’’ என்றார்கள்.

இது குறித்து விளக்கம் கேட்க துணைவேந்தர் முருகேசனைத் தொடர்புகொண்டோம். ‘‘ஸ்திரத்தன்மை இல்லாமலிருந்த பல்கலைக்கழகத்தை கடந்த மூன்று ஆண்டுகளாகச் சிறப்பாக நடத்திக்கொண்டிருக்கிறேன். 35 ஆண்டுகளாக அண்ணா பல்கலைக்கழகத்தில் பணியாற்றினேன். பணி ஓய்வுபெறும் கடைசி நேரத்தில் எனது பெயரை களங்கப்படுத்தும் நோக்கத்துடன் இந்தக் குற்றச்சாட்டை சுமத்துகிறார்கள். இவர்களின் புகாருக்கு எவ்வித முகாந்திரமும் இல்லை. ஏ.ஐ.சி.டி.இ மற்றும் யு.ஜி.சி விதிகளின் அடிப்படையில்தான் பதவி உயர்வுகள் வழங்கப்பட்டன. எனது ஆய்வுக் கட்டுரை விவகாரத்தைப் பொறுத்தவரை, அண்ணா பல்கலைக்கழகத்தில் ஒன்றிரண்டு திருத்தங்கள் செய்யப்பட்டு முடிந்துவிட்டது. அதற்கும் அண்ணாமலைப் பல்கலைக்கழகத்துக்கும் எந்தத் தொடர்பும் கிடையாது’’ என்றார்.

உயர்கல்வித்துறை அமைச்சர் பொன்முடியிடம் இதுதொடர்பாக பேசியபோது, ‘‘முந்தைய ஆட்சியில் நடந்துதானே? இதுவரை அந்தப் புகார் என் கவனத்துக்கு வரவில்லை. வந்தால் கண்டிப்பாக நடவடிக்கை எடுப்பேன்’’ என்றார்.

சமூகக் கட்டமைப்பில் முக்கியமான பங்கை வகிக்கும் பல்கலைக்கழகங்கள், இப்படியான தொடர் குற்றச்சாட்டுகளில் சிக்குவது நல்லதல்ல. இந்த விவகாரத்தில் தமிழக அரசு உடனே தலையிட்டு பல்கலைக்கழகத்தின் நம்பகத்தன்மையை உறுதிசெய்ய வேண்டும்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism