Published:Updated:

ரயில் நிலையத்தில் உருது நீக்கம்... சம்ஸ்கிருதம் சேர்ப்பு... உத்தரகாண்ட் சர்ச்சை!

சம்ஸ்கிருதம் மொழியில் பெயர்ப்பலகை
சம்ஸ்கிருதம் மொழியில் பெயர்ப்பலகை

டேராடூன் ரயில் நிலையம் மீண்டும் மக்கள் பயன்பாட்டுக்காகத் திறக்கப்பட்டபோது, பெயர்ப்பலகையில் இந்தி, ஆங்கிலத்துடன் சம்ஸ்கிருதத்தில் 'டேராடூனாம்' என்று எழுதப்பட்டிருந்தது.

உத்தரகாண்ட் ரயில் நிலையத்தில், உருது மொழியை நீக்கிவிட்டு அதற்குப் பதிலாக சம்ஸ்கிருத மொழியில் ஊர் பெயர் எழுதப்பட்டதற்கு, கடும் எதிர்ப்புக் கிளம்பியுள்ளது. மேலும், டேராடூன் சம்ஸ்கிருதத்தில் டோராடூனாம் என்றும் ரிஷிகேஷ் பெயரை ரிஷிகேஷா என்றும் பெயர் மாற்றம் செய்யப்பட்டதும் சர்ச்சையைக் கிளப்பியுள்ளது.

உத்தரகாண்ட் மாநிலத்தைச் சேர்ந்த பாரதிய ஜனதா கட்சித் தலைவர் ஒருவர் ரயில்வே அமைச்சகத்துக்கு எழுதியுள்ள கடிதத்தில், ''உத்தரகாண்ட் மாநிலத்தில் சம்ஸ்கிருதம் இரண்டாவது அலுவல் மொழியாக உள்ளது. இதனால், ரயில் நிலையங்களில் சம்ஸ்கிருதத்தில் ஊர் பெயர் எழுதப்பட வேண்டும் '' என்று கோரிக்கை விடுத்திருந்தார்.

சம்ஸ்கிருத மொழி
சம்ஸ்கிருத மொழி

கடந்த மூன்று மாதங்களாக டேராடூன் ரயில் நிலையத்தில் பழுது பார்ப்புப் பணிகள் நடைபெற்று வந்தன. இந்த நிலையில், ரயில் நிலையம் மீண்டும் மக்கள் பயன்பாட்டுக்காகத் திறக்கப்பட்டபோது, பெயர்ப்பலகையில் இந்தி, ஆங்கிலத்துடன் சம்ஸ்கிருதத்தில் 'டேராடூனாம்' என்று எழுதப்பட்டிருந்தது. வழக்கமாக இடம்பெறும் உருது மொழி நீக்கப்பட்டிருந்தது. அதேபோல, ரிஷிகேஷில் கட்டப்பபட்டுள்ள புதிய ரயில் நிலையத்தில் 'யோக் நகரி ரிஷிகேஷா' என்று பெயர் பலகையில் சம்ஸ்கிருத மொழியில் எழுதப்பட்டுள்ளது.

இது குறித்து ரயில்வே உயரதிகாரிகள் கூறுகையில்,''மத்திய ரயில்வே அமைச்சகத்திடம் இருந்து சம்ஸ்கிருதத்தில் பெயர் எழுத வேண்டுமென்ற எந்த அறிவிப்பும் வரவில்லை. டேராடூன் ரயில் நிலையத்தில் பழுது பார்ப்பு பணிகள் நடைபெற்றன. அந்தப் பணிகளை, மேற்கொண்ட நிறுவனத்தினர் தவறுதலாக சம்ஸ்கிருத மொழியில் ஊர்ப் பெயரை எழுதி வைத்துள்ளனர். எங்களுக்கு இந்தத் தகவல் தெரிய வந்ததும் உடனடியாக அந்த பெயர்ப்பலகைகளை அகற்றி விட்டோம். அதேவேளையில், மாநில அரசு பரிந்துரைத்ததால், ரிஷிகேஷ் பெயரை யோக் நகரி ரிஷிகேஷ் என்று மாற்றினோம். எனினும், விரைவில் அனைத்து ரயில் நிலையங்களின் பெயர்ப்பலகைகளிலும் சம்ஸ்கிருதம் இடம்பெறும் வகையில், ரயில்வே அமைச்சகத்தின் அறிவிப்பு வெளியாகும்'' என்கின்றனர்.

ரிஷிகேஷ் ரயில் நிலையம்
ரிஷிகேஷ் ரயில் நிலையம்

இதற்கிடையே, டேராடூன் ரயில் நிலையத்தில் இருந்து சம்ஸ்கிருத பெயர்ப்பலகை நீக்கப்பட்டதைக் கண்டித்து சம்ஸ்கிருத பேராசிரியர்கள், சம்ஸ்கிருதம் படிக்கும் மாணவர்கள் போராட்டம் நடத்தினர். ''சம்ஸ்கிருதம் உத்தரகாண்ட் மாநிலத்தின் இரண்டாவது அலுவல் மொழி. மாநிலத்தின் முக்கிய ரயில் நிலையத்தில் சம்ஸ்கிருதத்தில் பெயர்ப்பலகை எழுதப்பட்டது மொழிக்கு மரியாதை கொடுக்கும் செயலாகப் பார்த்தோம்.

ஆனால், எதிர்ப்பு எழுந்ததையடுத்து 24 மணி நேரத்துக்குள் பெயர்ப்பலகை அகற்றப்பட்டு, உருது மொழி இடம் பெற்றுள்ளது. இதன் பின்னணியில் ஏதோ சதி உள்ளது. ரயில்வே விதிமுறைகளின்படி, ரயில் நிலையங்களில் மாநிலத்தின் இரண்டாவது அலுவல் மொழியில் பெயர்ப்பலகை எழுதப்பட வேண்டுமென்பது விதி'' என்று குற்றம் சாட்டியுள்ளனர்.

`மக்கள் கொடுத்த வரவேற்பு எதிர்பாராதது!' - உசேன் போல்டுக்கு டஃப் கொடுக்கும் கர்நாடக இளைஞர்

இந்த விவகாரம் குறித்து உத்தரகாண்ட் மாநில அமைச்சர் மதன் கௌசிக் கூறுகையில், ''உத்தரகாண்ட் தேவர்களின் பூமி. பண்டைய காலத்தில் இருந்தே இங்கு சம்ஸ்கிருத மொழி பேசப்பட்டுள்ளது. காலப் போக்கில் வழக்கொழிந்தாலும் சம்ஸ்கிருதத்துக்கு நாங்கள் கொடுக்கும் முக்கியத்துவம் குறையவில்லை. இப்போது, பள்ளிகளில் சம்ஸ்கிருதத்தை அறிமுகப்படுத்தியுள்ளோம். கிராம மக்களிடையே சம்ஸ்கிருதத்தைப் பேச வைக்க நடவடிக்கை எடுக்கப்பட்டு வருகிறது. விரைவில், சம்ஸ்கிருத மொழியும் பரவலாக எல்லா இடங்களிலும் பேசப்படும்'' என்கிறார்.

அழகிய உத்தரகாண்ட் மாநிலம்
அழகிய உத்தரகாண்ட் மாநிலம்

உத்தரகாண்டில் சம்ஸ்கிருத மொழியை உயிர்ப்புடன் வைக்க கார்வால், குமான் ஆகிய கிராமங்கள் தத்தெடுக்கப்பட்டு அங்குள்ள மக்கள் முழுமையாக சம்ஸ்கிருதத்தில் பேச வைக்க நடவடிக்கை எடுக்கப்பட்டுள்ளது. தினமும் குறிப்பிட்ட நேரம் சம்ஸ்கிருதத்தில் மக்கள் உரையாட வைக்க சம்ஸ்கிருத பேராசியர்கள் நியமிக்கப்பட்டுள்ளனர். தற்போது, இந்தக் கிராமங்களில் 70 சதவிகித மக்களுக்கு சம்ஸ்கிருதம் பேசத் தெரியும்.

பத்திரிநாத், கேதர்நாத் உள்ளிட்ட பல்வேறு வரலாற்றுச் சிறப்பு வாய்ந்த கோயில்கள் அமைந்துள்ளன. உத்தரகாண்டில் பாரதிய ஜனதா கட்சியின் திரிவேந்திர சிங் ராவத் முதல் அமைச்சராக உள்ளார் என்பது கவனத்தில் கொள்ளத்தக்கது.

அடுத்த கட்டுரைக்கு