Published:Updated:

ஒரு நாளைக்கு ரூ.1.63 கோடி... ஓர் ஆண்டுக்கு ரூ.358 கோடி... - மிரட்டும் முட்டை முறைகேடு

ஒட்டுமொத்த விகடனுக்கும் ஒரே ஷார்ட்கட்

Use App
ஒரு நாளைக்கு ரூ.1.63 கோடி... ஓர் ஆண்டுக்கு ரூ.358 கோடி... - மிரட்டும் முட்டை முறைகேடு
ஒரு நாளைக்கு ரூ.1.63 கோடி... ஓர் ஆண்டுக்கு ரூ.358 கோடி... - மிரட்டும் முட்டை முறைகேடு

ஒரு நாளைக்கு ரூ.1.63 கோடி... ஓர் ஆண்டுக்கு ரூ.358 கோடி... - மிரட்டும் முட்டை முறைகேடு

பிரீமியம் ஸ்டோரி

மிழக அரசின் சத்துணவுத் திட்டத்திற்கு முட்டை சப்ளை செய்த திருச்செங்கோடு குமாரசாமியின் கிறிஸ்டி உள்ளிட்ட நிறுவனங்களில் வருமானவரித் துறை ஐந்து நாள்கள் ரெய்டு நடத்தி ரூ.1,350 கோடி ரூபாய்க்கு மேல் வரி ஏய்ப்பு செய்துள்ளதாகத் தெரிவித்துள்ளது. இந்த முறைகேட்டில் பல ஐ.ஏ.எஸ் அதிகாரிகளுக்கும், பல அரசியல்வாதிகளுக்கும் தொடர்பு இருப்பதாகவும், அவர்களுக்கு செக் வைப்பதற்காக ரெய்டு நடந்துள்ளது என்று பேசப்பட்டு வரும் நிலையில், கிறிஸ்டி நிறுவனத்தின்மீது சந்திரன் என்பவர் போட்ட வழக்கை அடுத்தே இந்த ரெய்டு நடந்துள்ளதாக பலர் தெரிவிக்கிறார்கள்.

ஒரு நாளைக்கு ரூ.1.63 கோடி... ஓர் ஆண்டுக்கு ரூ.358 கோடி... - மிரட்டும் முட்டை முறைகேடு

சந்திரனை ராசிபுரத்தில் உள்ள அவரது வீட்டில் சந்தித்தோம், ‘‘ஏழைக் குழந்தைகள் சாப்பிடும் முட்டையில் ஊழல் நடக்கிறது. இதை எப்படியாவது தடுக்க வேண்டுமென எண்ணிய பலரில் நானும் ஒருவன். கிறிஸ்டி நிறுவன ரெய்டுக்கு என் வழக்கும் ஒரு காரணமாக இருக்கலாம் எனக் கருதுகிறேன். இந்த ஊழலில் சம்மந்தப்பட்ட அனைவரும் தண்டிக்கப்பட்ட வேண்டும்’’ என்று பேசத் தொடங்கினார். 

ஒரு நாளைக்கு ரூ.1.63 கோடி... ஓர் ஆண்டுக்கு ரூ.358 கோடி... - மிரட்டும் முட்டை முறைகேடு

‘‘நுகர்வோர் பயன்படுத்தும் உணவுப் பொருள்களுக்கான விலையைத் தனி நபரோ, தனி அமைப்போ நிர்ணயம் செய்யக் கூடாது. அதனால்தான் பால், நெல் போன்ற விவசாயப் பொருள்களுக்கான விலையை அரசு நிர்ணயம் செய்கிறது. ஆனால், முட்டையின் விலையைப் பெரும் பண்ணை முதலாளிகள் அடங்கிய தனியார் அமைப்பான ‘தேசிய முட்டை ஒருங்கிணைப்புக் குழு’ (நெக்) நிர்ணயம் செய்கிறது. இது, வணிகச் சட்டத்துக்கும் எதிரானது. இந்தக் குழு நிர்ணயிக்கும் முட்டை விலை, நாளேடுகளில் ஒருவிதமாக வெளிவரும்; ஆனால், மறைமுக விலை வேறாக இருக்கும். உதாரணமாக, ‘ஒரு முட்டை விலை ரூ.4’ என்று நாளேடுகளுக்குச் செய்தி கொடுத்துவிட்டு, விற்பனைச் சந்தையில் 3 ரூபாய் 40 காசுகள் என்ற மறைமுக விலையில் விற்பனை செய்யப்படுகிறது.

தேசிய முட்டை ஒருங்கிணைப்புக் குழு நிர்ணயித்த கடைசி இரண்டு மாத விலைப் பட்டியல் என நாளேடுகளில் வரும் விலையைக் கணக்கில் கொண்டே, தமிழக அரசு சத்துணவுத் திட்டத்துக்கான முட்டைக் கொள்முதலை அரசு செய்கிறது. தமிழக அரசின் சத்துணவுத் திட்டத்துக்கான முட்டைக் கொள்முதல் டெண்டர் ஜூன் அல்லது ஜூலை மாதம் நடக்கும். இதைக் கருத்தில்கொண்டு ஏப்ரல், மே மாதங்களில் முட்டையின் விலையை அதிகப்படுத்துவார்கள். டெண்டர் முடிந்ததும், முட்டை விலையும் குறைந்துவிடும். நாளேடுகளில் அறிவிக்கும் விலையே குறையும் என்றால், மறைமுக விலை இன்னும் குறையும். 

ஒரு நாளைக்கு ரூ.1.63 கோடி... ஓர் ஆண்டுக்கு ரூ.358 கோடி... - மிரட்டும் முட்டை முறைகேடு

2016-2017-ம் ஆண்டு சத்துணவுத் திட்டத்துக்கு, கிறிஸ்டி மற்றும் அதன் துணை நிறுவனங்களி லிருந்து ‘ஒரு முட்டை 4 ரூபாய் 34 காசுகள்’ என்ற விலையின் அடிப்படையில், தினமும் 70 லட்சம் முட்டைகள் கொள்முதல் செய்யப்பட்டுள்ளன. 55 கிராம் முதல் 60 கிராம் வரையிலான எடையுள்ள முட்டைகளின் விலையையே நாளேடுகளுக்குக் கொடுக்கிறார்கள். ஆனால், சத்துணவுத் திட்டத்துக்கு இந்த முட்டைகளை வாங்குவதில்லை. 35 கிராம் முதல் 45 கிராம் எடை கொண்ட முட்டைகள் தலா 2 ரூபாய் விலையில் வாங்கி சப்ளை செய்யப்படுகின்றன. இதனால், ஒரு முட்டைக்கு 2 ரூபாய் 34 காசுகள் வீதம், 70 லட்சம் முட்டைகளுக்கு 1.63 கோடி ரூபாயைத் தினந்தோறும் கிறிஸ்டி நிறுவனம் கூடுதலாகச் சம்பாதித்துள்ளது. ஒரு வருடத்தில், 220 நாள்களுக்கு முட்டை சப்ளை செய்கிறார்கள். ஒரு நாளைக்கு 1.63 கோடி என்றால், 220 நாட்களுக்கு 358 கோடி ரூபாயைத் தாண்டுகிறது. இந்த வகையில், கடந்த ஏழு வருடங்களாக இதில் முறைகேடு செய்து பலரும் பெருமளவு சம்பாதித்திருக்கிறார்கள்.

எந்த ஒரு தொழிலிலும் ஆரோக்கியமான போட்டி இருந்தால்தான், தரமான பொருள் நியாயமான விலையில் மக்களுக்குக் கிடைக்கும். இதை உறுதி செய்வதற்காக காம்படிஷன் கமிஷன் ஆஃப் இந்தியா என்ற அமைப்பு இருக்கிறது. தமிழக அரசு சத்துணவுத் திட்டத்துக்கு வாங்கும் முட்டையும், நியாயமான விலையில் தரமாக வாங்கப்பட வேண்டும். இதற்குத் தேசிய முட்டை ஒருங்கிணைப்புக் குழு விலை நிர்ணயத்தை எதிர்த்தாக வேண்டும். எனவே, 22.3.2017 அன்று டெல்லியில் உள்ள காம்படிஷன் கமிஷன் அமைப்பில் வழக்கு போட்டேன். அந்த வழக்கு நிலுவையில் உள்ளது. இதற்கிடையே அந்த அமைப்பு 25.1.2018 அன்று ஓர் உத்தரவு போட்டது. அதில், ‘தமிழக அரசு சத்துணவுத் திட்டத்துக்கு முட்டை வாங்கியதில் குளறுபடி உள்ளது. அதுபற்றி புலனாய்வு செய்யப் படுகிறது’ என்று தெரிவித்திருந்தது. அதையடுத்துதான், இப்போது ரெய்டு நடந்திருக்கக் கூடும் என்று நினைக்கிறேன்’’ என்றார்.

ஒரு நாளைக்கு ரூ.1.63 கோடி... ஓர் ஆண்டுக்கு ரூ.358 கோடி... - மிரட்டும் முட்டை முறைகேடு

இந்த விவகாரம் குறித்துப் பேசிய ‘தேசிய முட்டை ஒருங்கிணைப்புக் குழு’வின் தலைவர் செல்வராஜ், ‘‘எங்கள் அமைப்புக்கும் சத்துணவுத் திட்டத்துக்கு முட்டை வாங்குவதற்கும் எந்தவிதச் சம்பந்தமும் இல்லை. சத்துணவு டெண்டரை மனதில் வைத்து விலையை நாங்கள் நிர்ணயம் செய்வதில்லை. எங்களின் அமைப்பில் பண்ணையாளர்களும் வியாபாரிகளும் இருக்கிறார்கள். ஏப்ரல், மே மாதங்களில் இயற்கையாகவே முட்டைத் தட்டுப்பாடு ஏற்படும். அதனால் விலை அதிகரிக்கும்’’ என்றார்.

- வீ.கே.ரமேஷ்
படங்கள்: எம்.விஜயகுமார்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு