Published:Updated:

திருஆரூரான் ஆலையின் கடன் மோசடி… - “வங்கி அதிகாரிகளையும் கைது செய்ய வேண்டும்!”

திருஆரூரான் ஆலையின் கடன் மோசடி… - “வங்கி அதிகாரிகளையும் கைது செய்ய வேண்டும்!”
பிரீமியம் ஸ்டோரி
திருஆரூரான் ஆலையின் கடன் மோசடி… - “வங்கி அதிகாரிகளையும் கைது செய்ய வேண்டும்!”

பிரச்னை

திருஆரூரான் ஆலையின் கடன் மோசடி… - “வங்கி அதிகாரிகளையும் கைது செய்ய வேண்டும்!”

பிரச்னை

Published:Updated:
திருஆரூரான் ஆலையின் கடன் மோசடி… - “வங்கி அதிகாரிகளையும் கைது செய்ய வேண்டும்!”
பிரீமியம் ஸ்டோரி
திருஆரூரான் ஆலையின் கடன் மோசடி… - “வங்கி அதிகாரிகளையும் கைது செய்ய வேண்டும்!”

ரும்பு விவசாயிகள் பெயரில் முறைகேடாக ஆவணங்கள் தயார் செய்து, வங்கிகளில் பல நூறு கோடி ரூபாய்க் கடன் பெற்றதாக, தஞ்சாவூர் மற்றும் கடலூர் மாவட்டங்களில் சர்க்கரை ஆலைகள் நடத்தி வரும் திருஆரூரான் குழுமத்தின் தலைவர் ராம் தியாகராஜன் மீது புகார் அளிக்கப்பட்டிருந்தது. அப்புகாரின் அடிப்படையில் கடந்த மே 8-ஆம் தேதி ராம் தியாகராஜனைக் கைது செய்து விசாரணை செய்துள்ளனர், கடலூர் மாவட்ட குற்றப்பிரிவு போலீஸார். திருஆரூரான் சர்க்கரை ஆலை, ‘கரும்புக்கான நிலுவைத்தொகையைச் செலுத்த, புதிதாக வங்கிக்கணக்கு தொடங்க வேண்டும்’ எனச் சொல்லிக் கரும்பு விவசாயிகளிடம், சில ஆவணங்களில் கையெழுத்து வாங்கியது. அடுத்தச் சில மாதங்களில் விவசாயிகளின் பெயர்களில் பல லட்சம் ரூபாய்க் கடன் பாக்கி இருப்பதாக வங்கிகளிலிருந்து வந்த வக்கீல் நோட்டீஸைக் கண்டு விவசாயிகள் அதிர்ச்சி அடைந்தனர். தங்களது பெயரில் கடன் வாங்கப்பட்டிருப்பதே அப்போதுதான் அவர்களுக்குத் தெரிந்தது.

இதைத்தொடர்ந்து, ‘விவசாயிகளை ஏமாற்றிய சர்க்கரை ஆலை நிர்வாகத்தின் மீது நடவடிக்கை எடுக்க வேண்டும்’ எனத் தஞ்சாவூர் மற்றும் கடலூர் மாவட்ட ஆட்சியர்களிடம் விவசாயச் சங்க நிர்வாகிகள் தொடர்ச்சியாக வலியுறுத்தி வந்தனர். இந்நிலையில், கடலூர் மாவட்டம், கச்சிமயிலூர் பகுதியைச் சேர்ந்த விவசாயி ஸ்டாலின் அளித்த புகாரின் பேரில் ராம் தியாகராஜன் கைது செய்யப்பட்டு, விசாரணைக்குப் பிறகு விடுவிக்கப்பட்டுள்ளார்.

திருஆரூரான் ஆலையின் கடன் மோசடி… - “வங்கி அதிகாரிகளையும் கைது செய்ய வேண்டும்!”

ராம் தியாகராஜன் மீது புகார் கொடுத்த ஸ்டாலினிடம் பேசினோம். “கார்ப்பரேஷன் வங்கியில், நான் 16 லட்சம் ரூபாய் கடன் வாங்கி இருப்பதாகவும், அந்தக்கடனை உடனடியாக வட்டியோடு செலுத்தணும்னு எனக்கு வக்கீல் நோட்டீஸ் வந்துச்சு. அதேமாதிரி பாரத ஸ்டேட் வங்கியில் திருஆரூரான் சர்க்கரை ஆலை 3 லட்சம் ரூபாய் கடன் வாங்கியிருப்பதாகவும் அதுக்கு நான் ஜாமீன் கையெழுத்துப் போட்டிருக்கிறதால, அந்தத் தொகையை யும் நான் செலுத்தணும்னு வக்கீல் நோட்டீஸ் வந்துச்சு. ஒன்றரை வருஷத்துக்கு முன்னாடி, ‘கரும்புக்கான பணத்தை உங்க பேங்க் அக்கவுன்ட்ல போடணும்னு சொல்லி, சில பேப்பர்ல கையெழுத்து வாங்கினாங்க. ரெண்டு மூணு நாள்ல என்னோட அக்கவுன்ட்ல 16 லட்சம் ரூபாய் வரவு வைக்கப்பட்டது. அந்தப்பணம், உடனடியாகச் சர்க்கரை ஆலை கணக்குக்கு மாற்றப்பட்டது. என்னோட அனுமதி இல்லாமலே வங்கி அதிகாரிகள் அதைச் செஞ்சுருந்தாங்க. அதுபத்தி கடலுர் மாவட்ட நிர்வாகத்திடம் பலமுறை புகார் கொடுத்தேன். ஆனா, இப்போதான் நடவடிக்கை எடுத்துருக்காங்க” என்றார்.

இதுகுறித்துச் சில விஷயங்களை நம்மிடம் சொன்னார், ‘தஞ்சை மாவட்டக் காவிரி விவசாயிகள் பாதுகாப்புச் சங்க’த்தின் செயலாளர் ‘சுவாமிமலை’ விமல்நாதன். “ராம் தியாகராஜன் செய்திருப்பது, மிகப்பெரிய கிரிமினல் குற்றம். ‘இவர்மீது சட்டப்படியான நடவடிக்கை எடுக்கப்பட வேண்டும்’ என மாவட்ட ஆட்சியர், வேளாண்மைத்துறை ஆணையர், சர்க்கரைத் துறை இயக்குநர், தலைமைச் செயலாளர் உள்ளிட்ட அதிகாரிகளுக்குப் பலமுறை புகார் அளித்தும் யாரும் கண்டுகொள்ளவே இல்லை. தற்போதைய கைது நடவடிக்கை, மிகவும் காலதாமதமானது. இதுவும்கூடக் கண் துடைப்புதான். இவ்வளவு பெரிய கிரிமினல் குற்றச்சாட்டுக்கு ஆளாகியுள்ள ராம் தியாகராஜனை, காவல்துறையினர் ரிமாண்ட் செய்யாமல் விட்டதற்குக் காரணம் தெரியவில்லை.

ஒட்டுமொத்த விகடனுக்கும் ஒரே ஷார்ட்கட்!

திருஆரூரான் ஆலையின் கடன் மோசடி… - “வங்கி அதிகாரிகளையும் கைது செய்ய வேண்டும்!”

ஆளுங்கட்சி, எதிர்க்கட்சி உள்பட அனைத்து அரசியல் கட்சியினரும் ராம் தியாகராஜனுக்கு ஆதரவாக உள்ளனர். விவசாயிகளை ஏமாற்றி அவர்களின் பெயரில் கடன் வாங்கியுள்ள திருஆரூரான் ஆலை நிர்வாகத்தைக் கண்டித்து, எந்த ஒரு அரசியல் கட்சியும் போராட்டம் நடத்தவில்லை. வங்கிகளில் ஒரு சாமான்யன் கடன் வாங்க வேண்டுமென்றால், சொத்து ஆவணங்களைக் கொடுத்தால்தான் கடன் கிடைக்கும். ஆனால், ஒரு சென்ட் நிலம்கூட இல்லாத விவசாயத் தொழிலாளர்கள் பெயரில் பல லட்சம் ரூபாய் கடன் கொடுக்கப்பட்டுள்ளது. இந்த மோசடியில் பாரத ஸ்டேட் வங்கி, கார்ப்பரேஷன் வங்கி, ஐ.சி.ஐ.சி.ஐ வங்கி, பஞ்சாப் நேஷனல் வங்கிகளின் அதிகாரிகளுக்கும் தொடர்பு உள்ளது.

‘விவரம் தெரியாமலா ஆவணங்களில் விவசாயிகள் கையெழுத்துப் போட்டார்கள்’ எனச் சிலர் கேள்வி எழுப்புகிறார்கள். விவசாயிகளின் அறியாமையையும் அப்பாவித்தனத்தையும் பயன்படுத்தி, அவர்களிடம் ஆசை வார்த்தை கூறி, ஆலை நிர்வாகமும், வங்கி அதிகாரிகளும் ஏமாற்றியுள்ளனர். தாங்கள் கொடுத்த கரும்புக்கான நிலுவைத்தொகை வரப்போகிறது என்ற நம்பிக்கையில்தான் பூர்த்திச் செய்யப்படாத விண்ணப்பங்கள் மற்றும் ஆவணங்களில் கையெழுத்துப் போட்டுள்ளனர், விவசாயிகள். பெரு விவசாயி போர்வையில் சில இடைத்தரகர்களும் இந்த மோசடியில் சம்பந்தப்பட்டுள்ளனர். இவ்விவகாரத்தில் முறையான விசாரணை மேற்கொண்டு வங்கி அதிகாரிகள் உட்பட மோசடியில் தொடர்புடைய அனைவரும் தண்டிக்கப்பட வேண்டும். இந்த மோசடி வழக்கை சி.பி.ஐ விசாரிக்க வேண்டும்” என்றார் விமல்நாதன்.

திருஆரூரான் ஆலையின் கடன் மோசடி… - “வங்கி அதிகாரிகளையும் கைது செய்ய வேண்டும்!”

இது தொடர்பான விளக்கம் பெறுவதற்காகத் திரு ஆரூரான் சர்க்கரை ஆலையின் பொது மேலாளரைப் பலமுறை தொடர்புகொண்டும் அவர், நமது அழைப்பை ஏற்கவில்லை. குறுஞ்செய்தி அனுப்பியும், அவர் பதில் அளிக்கவில்லை.கடலூர் மாவட்டக் குற்றப்பிரிவு டி.எஸ்.பி பழனியிடம் பேசினோம். “ராம் தியாகராஜனை முதல்கட்ட விசாரணைக்காகத்தான் அழைத்து வந்தோம். அதனால்தான் அவரை ரிமாண்ட் செய்யவில்லை. வங்கிகள் மற்றும் சர்க்கரைத்துறை இயக்குநர் அலுவலகம் போன்றவற்றில் சில ஆவணங்களைக் கேட்டிருக்கிறோம். அவை கிடைத்தவுடன் அடுத்தகட்ட நடவடிக்கைகள் எடுக்கப்படும்” என்றார்.

நடவடிக்கை எடுத்தால் சரிதான்!

-  கு.ராமகிருஷ்ணன் படங்கள்: ம.அரவிந்த்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism