Published:Updated:

வெளிவருமா தஞ்சாவூர் தமிழ்ப் பல்கலைக்கழக முறைகேடு?

தஞ்சை தமிழ்ப் பல்கலைக்கழகம்
பிரீமியம் ஸ்டோரி
தஞ்சை தமிழ்ப் பல்கலைக்கழகம்

முடிவுக்கு வந்தது ஒன்றரை ஆண்டு இழுத்தடிப்பு...

வெளிவருமா தஞ்சாவூர் தமிழ்ப் பல்கலைக்கழக முறைகேடு?

முடிவுக்கு வந்தது ஒன்றரை ஆண்டு இழுத்தடிப்பு...

Published:Updated:
தஞ்சை தமிழ்ப் பல்கலைக்கழகம்
பிரீமியம் ஸ்டோரி
தஞ்சை தமிழ்ப் பல்கலைக்கழகம்

தஞ்சை தமிழ்ப் பல்கலைக்கழகத்தில் 2017 - 2018 காலகட்டத்தில் நடந்த பணி நியமனங்களில் முறைகேடு நடந்ததாக பதிவுசெய்யப்பட்ட வழக்கில், லஞ்ச ஒழிப்புத்துறை விசாரணை நடத்த நீண்ட இழுபறிக்குப் பிறகு பல்கலைக்கழக சிண்டிகேட் அனுமதி கொடுத்துள்ளது. இதனால், முறைகேட்டில் தொடர்புடையோர் நடுங்கிக் கிடக்கின்றனர்.

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

தமிழ் வளர்ச்சிக்காகவும் ஆராய்ச்சிக்காகவும் தொடங்கப் பட்டது, தஞ்சை தமிழ்ப் பல்கலைக்கழகம். 40 பேராசிரியர்கள் மற்றும் 100-க்கும் மேற்பட்ட பணியாளர்கள் நியமனத்தில் அப்போதைய துணைவேந்தர் க.பாஸ்கரன் உள்ளிட்டோர் லட்சக்கணக்கில் லஞ்சம் பெற்றதாக, ஆய்வுச்சிறகுகள் மற்றும் ஆய்வு மாணாக்கர் கூட்டமைப்பினர் குற்றம்சாட்டினார்கள்.

வெளிவருமா தஞ்சாவூர் தமிழ்ப் பல்கலைக்கழக முறைகேடு?

இந்தப் புகாரின் பேரில் லஞ்ச ஒழிப்புத்துறை விசாரணையில் இறங்கியது. அடுத்தகட்ட நடவடிக்கைக்குத் தமிழ் வளர்ச்சித் துறையிடம் அனுமதி கோரப்பட்டது. இதுதொடர்பான கடிதம், தமிழ்ப் பல்கலைக்கழக சிண்டிகேட் குழுவின் பரிசீலனைக்கு அனுப்பப்பட்டது. ஆனால், விசாரணைக்கு அனுமதி வழங்காமல், ஒன்றரை ஆண்டுகளுக்கு மேலாக இழுத்தடித்தது சிண்டிகேட் குழு. இதற்குப் பல தரப்பில் இருந்தும் கண்டனங்கள் கிளம்பின.

இந்நிலையில்தான், விரைவான விசாரணைக்கு உத்தரவிடக்கோரி, தஞ்சையைச் சேர்ந்த வழக்கறிஞர் நெடுஞ்செழியனும், தமிழ்ப் பல்கலைக் கழக முன்னாள் பேராசிரியர் முருகேசனும் மதுரை உயர் நீதிமன்றக் கிளையை அணுகினர். இதனை விசாரித்த நீதிமன்றம், ‘‘ஊழல் தடுப்புக் கண்காணிப்பு ஆணையத்தின் விசாரணைக்கு அனுமதி கோரும் கடிதத்தின்மீது, 15 நாள்களுக்குள் நடவடிக்கை எடுத்து அறிக்கை தாக்கல் செய்யவேண்டும்’’ என அதிரடியாக உத்தரவிட்டது. இதையடுத்தே அக்டோபர் 9-ம் தேதியும், 12-ம் தேதியும் அடுத்தடுத்து கூட்டம் நடத்திய சிண்டிகேட், ஒருவழியாக விசாரணைக்கு அனுமதி அளித்திருக்கிறது.

இதுகுறித்து வழக்கறிஞர் நெடுஞ்செழியனிடம் பேசினோம். ‘‘பணி நியமன முறைகேட்டில் அப்போதைய துணைவேந்தர் க.பாஸ்கரன், பதிவாளராக இருந்த முத்துக்குமரன், அவரின் நேர்முக உதவியாளராக இருந்த சக்தி சரவணன், தொலைநிலைக்கல்வி இயக்குநர் ந.பாஸ்கரன் ஆகியோர்மீது குற்றம்சாட்டப்பட்டுள்ளது. முத்துக்குமரனும் சக்தி சரவணனும் தற்போது அரசுப்பணியில் தொடர்வதால், இவர்களிடம் அடுத்தகட்ட விசாரணை செய்ய சிண்டிகேட் குழுவிடம் லஞ்ச ஒழிப்புத்துறை அனுமதி கோரியது. அவர்கள் உள்நோக்கத்துடன் தாமதப்படுத்தவே, நீதிமன்றத்தை நாடினோம். நீதிமன்றத்தின் உத்தரவுக்குப் பிறகாவது, விசாரணை முறையாக நடக்கும் என்று நம்புகிறோம்” என்றார்.

தஞ்சை தமிழ்ப் பல்கலைக்கழகம்
தஞ்சை தமிழ்ப் பல்கலைக்கழகம்

முன்னாள் துணைவேந்தர் பாஸ்கரனிடம் பேசினோம். ‘‘நான் எந்தத் தவறும் செய்யவில்லை. விசாரணைக்கு முழு ஒத்துழைப்பு வழங்கத் தயார். பணி நியமனங்களில் அனைத்து விதிமுறைகளும் கடைப்பிடிக்கப்பட்டுள்ளன. ஒரு சிலரின் விருப்பு வெறுப்புக்கு நான் பலிகடா ஆக்கப்படுகிறேன்’’ என்றார்.

ஊழல் செய்வதும் ‘பல்கலை’களில் ஒன்றாகி விட்டதோ?