வெளியிடப்பட்ட நேரம்: 14:45 (26/11/2017)

கடைசி தொடர்பு:12:27 (27/11/2017)

ஆர்.கே.நகர் அ.தி.மு.க. வேட்பாளர் யார் ? கட்சிக்குள் வெடிக்கும் பூகம்பம்... ! #RKNagarAtrocities

ணைந்த கரங்கள் மீண்டும் பிரியுமா என்ற எதிர்பார்ப்பை டன் கணக்கில் அறுவடை செய்து வைத்துள்ளது ஆர்.கே.நகர் தொகுதிக்கான இடைத்தேர்தல். ஆளுங்கட்சியின் அணிகளுக்குள் நடக்கும் கண்ணாமூச்சு ஆட்டம், டி.டி.வி. தினகரனின்  'ஸ்லீப்பர் செல்' வார்த்தைக்கு உயிரூட்டிக் கொண்டிருக்கிறது.

ஆர்.கே.நகர்

வட சென்னைக்கு உட்பட்ட சட்டமன்ற தொகுதிகளை, 1973 ஆம் ஆண்டு மறுசீரமைப்பு செய்தபோதுதான் டாக்டர் ராதாகிருஷ்ணன் நகர் (ஆர்.கே.நகர்) தொகுதி உருவானது. அதற்கு முன் இந்தத் தொகுதி மக்கள், மூன்று தொகுதிகளுக்குள் பிரித்து, மடக்கி வைக்கப்பட்டிருந்தார்கள்.

 அது 1977- ஆம் ஆண்டு தேர்தல். எம்.ஜி.ஆர். தலைமையிலான அ.தி.மு.க., கருணாநிதி தலைமையிலான தி.மு.க., மூப்பனார் தலைமையிலான காங்கிரஸ் என மூன்று கட்சிகளும் தனித்தனியாக களத்தில் நின்றன.  அ.தி.மு.க வேட்பாளரான நடிகர் ஐசரி வேலன், தி.மு.க வேட்பாளர் ஆர்.டி.சீதாபதியைவிட 1,488 வாக்குகள் அதிகம்பெற்று வெற்றி பெற்றார்.  ஆர்.கே.நகர் சந்தித்த முதல் தேர்தல், கூட்டணி வைக்காமல் நடந்த தேர்தலாகும்.

எடப்பாடி அண்ட் கோ

 அடுத்ததாக 1980- ஆம்  ஆண்டு தேர்தல். கூடவே, 'கூட்டணி' முறையும் வந்தது. தி.மு.க-வுடன் காங்கிரஸ் கூட்டணி வைத்தது.  அ.தி.மு.க-வோ, சி.பி.ஐ, சி.பி.ஐ (எம்) ஆகிய கட்சிகளோடு கூட்டணி வைத்தது. தி.மு.க கூட்டணியில் காங்கிரஸ் வேட்பாளர் ராஜசேகரன் 7, 188 வாக்குகள் அதிகம்பெற்று வெற்றிபெற்றார். அ.தி.மு.க-வின் ஐசரிவேலன் தோற்றார்.

அடுத்ததாக 1984- ஆம் ஆண்டு தேர்தல். அ.தி.மு.க - காங்கிரஸ் ஒரு பக்கமும், தி.மு.க. - கம்யூனிஸ்ட் கட்சிகள்  இன்னொரு பக்கமுமாக கூட்டணி அமைத்துப் போட்டியிட்டன.  அ.தி.மு.க கூட்டணியில் போட்டியிட்ட காங்கிரஸ் வேட்பாளர் வேணுகோபால், தி.மு.க வேட்பாளர் எஸ்.பி சற்குணத்தை  3,851 வாக்குகள் வித்தியாசத்தில் வென்றார்.

ஆர்.கே.நகர்

அடுத்ததாக, 1989- ஆம்  ஆண்டு  தேர்தல். அ.தி.மு.க-வின் நிறுவனர் எம்.ஜி.ஆர் மறைவுக்குப் பிறகு வந்த முதல் தேர்தல் அது. அ.தி.மு.க. இரண்டாகப் பிரிந்து  ஜானகி அணி, ஜெயலலிதா அணி  என்று  தனித்தனியாகத் தேர்தலைச் சந்தித்தன. இதில்,  'ஜா' அணிக்கு இரட்டைப்புறா சின்னமும், 'ஜெ' அணிக்கு சேவல் சின்னமும் கொடுக்கப்பட்டிருந்தது. முந்தைய தேர்தலில் தி.மு.க. கூட்டணிக்கு, ஆதரவு தந்த கம்யூனிஸ்ட் கட்சிகள் இந்தத் தேர்தலில், ஆதரவை இடம் மாற்றின. சி.பி.ஐ. (எம்) கட்சி தி.மு.க.வுக்கும், சி.பி.ஐ. கட்சி ஜெயலலிதாவின் தலைமையிலான அ.தி.மு.க-வுக்குமாக ஆதரவு கொடுத்தன.  முதல்முறையாக தேர்தலைச் சந்தித்த நடிகர் திலகம் சிவாஜிகணேசனின்  தமிழக முன்னேற்ற முன்னணி,  'ஜா' அணிக்கு ஆதரவு கொடுத்தது.  அ.தி.மு.க-வுடனும், தி.மு.க-வுடனும் மாறி, மாறி கூட்டணியில் கைகோத்துவந்த காங்கிரஸ் கட்சி, இந்தத் தேர்தலில் தனியாக நின்றது.

தி.மு.க. வேட்பாளரான எஸ்.பி.சற்குணம், 24,256 வாக்குகள் வித்தியாசத்தில் அ.தி.மு.க-வின்  'ஜெ' அணி வேட்பாளர் மதுசூதனனை தோற்கடித்தார். மதுசூதனன் பெற்ற மொத்த வாக்குகள்  29,960. நடிகர் திலகத்தின் அரசியல் வாழ்க்கையை முடிவு செய்ததும், இதே தேர்தல்தான்... 

அடுத்ததாக வந்த, 1991- ஆம் ஆண்டு  தேர்தல்தான், தமிழக அரசியலில் மாற்றத்தை உண்டு பண்ணிய தேர்தல் என்று கூட சொல்லலாம். தி.மு.க., ஜனதா தளம், கம்யூனிஸ்ட் கட்சிகள் ஓர் அணியாக நின்றதும், பா.ம.க. முதன்முதலாக தேர்தலில் போட்டியிட்டதும் இந்தத் தேர்தலில்தான். பிரிந்திருந்த 'ஜா'வும், 'ஜெ'வும் ஓரணியாக நின்று 'இரட்டை இலை' சின்னத்துடன் எம்.ஜி.ஆருக்குப் பின் களத்துக்கு வந்ததும் இந்தத் தேர்தலின் போதுதான். ராஜீவ்காந்தி படுகொலையில் தி.மு.க. மீது சந்தேகப் பார்வை விழுந்ததும் இதே காலகட்டத்தில்தான்.  இந்தத் தேர்தலில், இரட்டை இலை வேட்பாளரான அ.தி.மு.க-வின் மதுசூதனன், 24,952 வாக்குகள் வித்தியாசத்தில் வெற்றிபெற்றார்.

ஆர்.கே.நகர்

அடுத்ததாக, 1996-  ஆம் ஆண்டு  தேர்தல். ஜெ-வுக்கு எதிராகக் குரல் கொடுத்த ரஜினிகாந்தின் 'வாய்ஸ்' எடுபட்டது. காங்கிரசிலிருந்து வெளியேறி ஜி.கே. மூப்பனார் உருவாக்கியிருந்த, 'தமிழ் மாநில காங்கிரஸ்' கட்சி, தி.மு.க-விலிருந்து வெளியேறி வைகோ உருவாக்கியிருந்த ம.தி.மு.க. என்று பல கட்சிகளும் இந்தத் தேர்தலில் போட்டியிட்டன. 1996-ஆம் ஆண்டு பொதுத்தேர்தலை வரலாற்று சிறப்பு மிக்க தேர்தலாகவும் அது மாற்றியது.  தி.மு.க வேட்பாளரான எஸ்.பி.சற்குணம், 43,081 வாக்குகள் வித்தியாசத்தில் அ.தி.மு.க. வேட்பாளர் ஆர்.எம்.டி.ரவீந்திரனைத் தோற்கடித்தார். 

 அடுத்ததாக, 2001-  ஆம் ஆண்டு  தேர்தல். த.மா.கா, காங்கிரஸ், பா.ம.க, கம்யூனிஸ்ட்டுகள் என தமிழகத்தின் அத்தனை பிரதான கட்சிகளும்  அ. தி.மு.க. தலைமையை ஏற்று கூட்டணிக்குள் வந்த தேர்தல் இதுதான். பி.ஜே.பி. மற்றும் சிறு சிறு கட்சிகள் துணையுடன் தி.மு.க. அமைத்த  கூட்டணி, கடும் வீழ்ச்சியை  சந்தித்தது. அ.தி.மு.க. வேட்பாளர் பி.கே.சேகர்பாபு, தி.மு.க. வேட்பாளர் சற்குணபாண்டியனை  27,332 வாக்குகள் வித்தியாசத்தில் தோற்கடித்தார்.

அடுத்ததாக, 2006-  ஆம் ஆண்டு  தேர்தல். தி.மு.க, காங்கிரஸ், பா.ம.க, கம்யூனிஸ்ட் கட்சிகள்  கூட்டணி வைத்தன. ம.தி.மு.க. உள்ளிட்ட சில கட்சிகளுடன் அ.தி.மு.க. கூட்டு வைத்தது. ஆட்சியை தி.மு.க. கைப்பற்றியது. ஆர்.கே.நகர் தொகுதியோ அ.தி.மு.க-வுக்குப் போனது. தி.மு.க. கூட்டணியில் போட்டியிட்ட காங்கிரசின் மனோகர் என்கிற ராயபுரம் மனோ, அ.தி.மு.க. வேட்பாளரான, சேகர்பாபுவிடம் 18,063 வாக்குகள் வித்தியாசத்தில் தோற்றார்.

அடுத்ததாக, 2011- ஆம் ஆண்டுதேர்தல். 'கடவுளுடன் மட்டுமே கூட்டணி' என்று சொன்ன விஜயகாந்தை கார்டனுக்கு வரவழைத்து ஜெயலலிதா கூட்டணி பேசி முடித்த தேர்தல் இது.  தே.மு.தி.க. தவிர, கம்யூனிஸ்ட் கட்சிகளும் அ.தி.மு.க. கூட்டணிக்குள் அப்போது வந்தன.  காங்கிரஸ்,பா.ம.க, வி.சி.க. ஆகிய கட்சிகளுடன் கூட்டணி வைத்துப் போட்டியிட்ட தி.மு.க. தோல்வியைத் தழுவியது. அ.தி.மு.க. வேட்பாளரான வெற்றிவேல், தி.மு.க. வேட்பாளரான சேகர் பாபுவை, 31,255 வாக்குகள் வித்தியாசத்தில் தோற்கடித்தார்.  

அடுத்ததாக, 2015- ம் ஆண்டு வந்ததோ, இடைத்தேர்தல். முதல்வராக இருந்த ஜெயலலிதா, சொத்துக் குவிப்பு வழக்கில், பெங்களூரு தனி நீதிமன்றம் கொடுத்த தீர்ப்பால் தனது  பதவியை இழந்தார். மேல்முறையீட்டில்  ஜெயலலிதா விடுவிக்கப்பட்டதும் மீண்டும் தமிழக முதல்வராக தேர்தலில் நின்று ஜெயிக்கவேண்டியத் தேவை ஏற்பட்டது.  அதற்கு வசதியாக, ஆர்.கே.நகர்த் தொகுதி எம்.எல்.ஏ. வெற்றிவேல் தன் எம்.எல்.ஏ பதவியை ராஜினாமா செய்தார்.

ஆர்.கே.நகர்

 அடுத்ததாக, 2016- ஆம் ஆண்டு  பொதுத்தேர்தல் வந்தது. இதற்குப்பின் நடந்தது அத்தனையும் தமிழகத்துக்கு சோதனை காலமாகவே அமைந்து விட்டது.

தி.மு.க - காங்கிரஸ் ஓரணி, பா.ம.க. தனி அணி, ம.தி.மு.க., வி.சி.க, கம்யூனிஸ்ட் கட்சிகள், தே.மு.தி.க ஆகிய கட்சிகள் இணைந்து உருவாக்கிய, 'மக்கள் நலக் கூட்டணி' ஓரணி என்று களத்தில் நிற்க, ஆளுங்கட்சியாக இருந்த அ.தி.மு.க சிறுசிறு கட்சிகளை கூட்டணியில் சேர்த்துக்கொண்டு போட்டியிட்டது. இதில், தி.மு.க. வேட்பாளர் சிம்லா முத்துச் சோழனைவிட 39,545 வாக்குகள் கூடுதலாகப் பெற்று ஜெயலலிதா வெற்றி பெற்றார். இடைத்தேர்தல் போல 83 விழுக்காடு என்றில்லாமல் 22.73 விழுக்காடு வித்தியாசத்தில் மட்டுமே ஜெயலலிதாவால், வெற்றிபெற முடிந்தது.

 தேர்தலில் வெற்றி பெற்ற ஓரிரு மாதங்களிலேயே முதல்வர் ஜெயலலிதாவுக்கு உடல்நலக்குறைவு ஏற்பட்டது. 2016, செப்டம்பர் 22-ஆம் தேதி, சென்னை அப்போலோ தனியார் மருத்துவமனையில் சேர்க்கப்பட்டார். 75 நாட்களாக தொடர் சிகிச்சை பெற்றுவந்தவர் டிசம்பர், 5 ஆம் தேதி சிகிச்சை பலனின்றி இறந்துபோனதாக அறிவிக்கப்பட்டது. புதிய முதல்வராக ஓ.பன்னீர்செல்வம் பெயரை கட்சி தேர்வு செய்தது ஓ.பன்னீர்செல்வம் முதல்வரானார். அதன்பின்னர் நடந்த அரசியல் மாற்றங்களில், ஓ.பன்னீர்செல்வம் முதல்வர் பதவியை ராஜினாமா செய்தார், சொத்துக்குவிப்பு வழக்கில் சசிகலா சிறைத்தண்டனை பெற்றார், தமிழக முதல்வராக எடப்பாடி பழனிசாமி பதவிஏற்றார். இரட்டை இலைச் சின்னம் முடக்கப்பட்டது. இப்படி அ.தி.மு.க-வில் நிறைய அதிரடி மாற்றங்கள் நிகழ்ந்தன.

ஜெயலலிதா இறப்பால் காலியான ஆர்.கே.நகர்த் தொகுதிக்கு ஏப்ரல் 2017-ல் இடைத்தேர்தல் என்று தேர்தல் ஆணையத்தால் அறிவிக்கப்பட்டது. ஓ.பி.எஸ். அணியில் 'இரட்டை மின் விளக்கு' சின்னத்துடன் மதுசூதனன் போட்டியிட்டார். தி.மு.க. வேட்பாளராக வழக்கறிஞர் மருதுகணேஷ்  நிறுத்தப்பட்டார். சசிகலா தரப்பு அணியில் டி.டி.வி தினகரன் தொப்பி சின்னத்துடன் வேட்பாளராக களம் இறங்கினார். பி.ஜே.பி சார்பில் இசையமைப்பாளர் கங்கை அமரன் வேட்பாளராக நிறுத்தப்பட்டார். 

இன்றைய முதல்வர் எடப்பாடி பழனிசாமி முதல், அத்தனை மந்திரிகளும் டி.டி.வி. தினகரனுக்கு ஆதரவாக 'தொப்பி' சின்னத்துக்கு வாக்கு கேட்டு வீதிகளில் வலம் வந்தனர்.  தொகுதியில் பணப் பட்டுவாடா நடந்ததாக எழுந்த புகாரில் ரூ.89 கோடி பணப்பட்டுவாடா நடந்ததற்கான ஆதாரங்கள் சிக்கின. இதையடுத்து தேர்தல் ஆணையத்தால் இடைத்தேர்தல் நிறுத்தப்பட்டது.  

கால ஓட்டத்தில், முதல்வர் எடப்பாடி பழனிசாமி, சசிகலா அணியிலிருந்து விலகி தனி அணி கண்டார். இதையடுத்து எடப்பாடி தலைமையிலான அணியினருடன் பலகட்டப் பேச்சுவார்த்தைகள் நடத்தப்பட்டது. ஓ.பி.எஸ். - ஈ.பி.எஸ் அணிகள் ஒன்றிணைந்தன. முடக்கப்பட்டிருந்த "இரட்டை இலை சின்னமும், கட்சிக் கொடியும் எடப்பாடி-ஓ.பி.எஸ். தலைமையிலான அணிக்கே சொந்தம்" என்று தேர்தல் ஆணையம் அறிவித்தது. கூடவே, ஆர்.கே.நகர்த் தொகுதிக்கு 2017, டிசம்பர் 21-ஆம் தேதியன்று இடைத்தேர்தல் என்றும் அறிவித்தது.  இந்நிலையில், 'அணிகள் இணைந்தாலும் இன்னும் மனங்கள் இணையவில்லை' என்று ஓ.பி.எஸ். அணியைச் சேர்ந்த மைத்ரேயன் எம்.பி. ட்வீட் செய்தார். அது உண்மைதானோ என்கிற கேள்வி கட்சியினர் மத்தியில் எழுந்துள்ளது. 'தொகுதியின் வேட்பாளர் மதுசூதனன்தானே?' என்று கேட்டு வைக்கும் சந்தேக மனநிலை வலுவாகிக் கொண்டிருக்கிறது. ஓ.பி.எஸ். அணிக்கு முதல் ஆளாக வந்தவரும், கட்சிக்கு அவைத் தலைவராக இருப்பவருமான மதுசூதனனுக்கே 'சீட்'  மறுப்பு என்றால்... இன்னமும் இவர்கள் முழுமையாக ஒட்டவில்லையா? என்ற கேள்வி வலுப் பெறுகிறது. இன்னும் தாமதப்படுத்தி அ.தி.மு.க. வேட்பாளர் இவர்தான் என்று மதுசூதனன் பெயரை அறிவிப்பதும் ஆட்சியில் இருக்கும் கட்சிக்கு பலவீனம்தான். குடும்ப சண்டையை எதிரிக்கு காட்சிப்படுத்துவது போல்தான், இதுவும். இந்த பலவீனங்கள் எதிரணி வேட்பாளரான (தி.மு.க) மருதுகணேஷின் வெற்றிக்கு சிவப்புக் கம்பளம் விரித்துக் கொடுத்திருக்கிறது. 

சென்ற இடைத் தேர்தலுக்கும், இந்த இடைத் தேர்தலுக்கும் இருந்த இடைவெளியில் தொகுதியை சீரமைப்பு செய்திருக்கலாம்.  யாரும் எதுவும் செய்யவில்லை. ஆனால் மழை செய்யப் போகிறது. நவம்பர்-டிசம்பர் மாதங்களில் பெய்யக் கூடிய மழை கருணையே இல்லாமல் கடமையைச் செய்தால், வாக்குக் கேட்டுப் போவோரின் நிலைமை பரிதாபம்தான். 

வடசென்னை மக்களின் கோபத்தில் நியாயமும், வீரியமும் அதிகம் என்பதைக் காட்ட அப்படியொரு வாய்ப்பு அமையாதவரை வேட்பாளர்கள் கொடுத்து வைத்தவர்கள்தான்!


டிரெண்டிங் @ விகடன்