Vikatan.com

www.vikatan.com would like to send you push notifications.

Notifications can be turned off anytime from browser settings.

முடிந்திருக்கும் முதல்கட்டப் பிரசாரம்... மக்களின் மனநிலை என்ன? - குஜராத் கள நிலவரம் பகுதி 6 #GujaratElections2017

Chennai: 

குஜராத்தில் முதல்கட்டத் தேர்தல் நடைபெறவுள்ள 89 தொகுதிகளில் பிரசாரம் முடிவடைந்துள்ள நிலையில், பிரதமர் நரேந்திர மோடி, சூரத்தில் இன்று பொதுக்கூட்டத்தில் உரையாற்றி பி.ஜே.பி. வேட்பாளர்களுக்கு வாக்குசேகரித்தார்.

நாட்டின் வளர்ச்சியே பி.ஜே.பி-யின் நோக்கம் என்று அப்போது அவர் கூறினார். சூரத்தில் ஏற்கெனவே பிரதமர் பிரசாரம் மேற்கொள்ளவிருந்த நிலையில், புயல் பாதிப்பால் இரு தினங்களுக்கு முன் அவர் தன் பிரசாரத்தை ஒத்திவைத்திருந்த நிலையில், டிசம்பர் 7-ம் தேதி பிரசாரக் கூட்டத்தில் பங்கேற்றுப் பேசினார்.

மத்தியில் தேசிய ஜனநாயகக் கூட்டணி அரசு ஆட்சிக்கு வந்ததும், சில கடுமையான முடிவுகளை எடுக்க வேண்டியிருந்தது என்றும், தன் முடிவுகள் மீது மக்கள் நம்பிக்கை வைத்திருந்தனர் என்றும் அவர் குறிப்பிட்டார். இந்தியா முழுவதும் உள்ள 125 கோடி மக்கள்தான் தன் எஜமானர்கள் என்று தெரிவித்த பிரதமர், அவர்களுக்குப் பதிலளிக்க நான் கடமைப்பட்டுள்ளேன் என்றார்.

சூரத் மக்களுக்கு ஏற்கெனவே தொடர்ச்சியாக மின்சார இணைப்பு கிடைக்காத நிலை இருந்தது என்றும், பி.ஜே.பி. ஆட்சியில்தான் மின் இணைப்பு உறுதிப்படுத்தப்பட்டது என்றும் பிரதமர் பெருமிதத்துடன் கூறினார்.

குஜராத் தேர்தல் - மோடி - ராகுல்

இதற்கிடையே காங்கிரஸ் வேட்பாளர்களை ஆதரித்து ராஜ்கோட்டில் நடைபெற்ற பொதுக்கூட்டத்தில் பேசிய முன்னாள் பிரதமர் மன்மோகன் சிங், குஜராத்தில் உள்ள உண்மையான பிரச்னைகளிலிருந்து மக்களை திசைதிருப்ப பி.ஜே.பி. முயற்சி செய்கிறது என்று குற்றம்சாட்டினார். பி.ஜே.பி. அளித்த அட்சய தின வாக்குறுதி நாட்டின் எந்தப் பகுதியிலும் காணப்படவில்லை என்றார் அவர். குஜராத்தின் மேம்பாட்டிற்காக காங்கிரஸ் கட்சி விரிவான திட்டத்தைக் கொண்டுள்ளது என்றும், இளைஞர்களுக்கு வேலைவாய்ப்புகளை வழங்க ஆக்கபூர்வமான தீர்வுகளை காங்கிரஸ் கட்சி தன்னகத்தே வைத்துள்ளது என்றும் மன்மோகன் சிங் தெரிவித்தார்.

முன்னாள், இந்நாள் பிரதமர்களின் பிரசாரத்திற்கு இடையே, குஜராத் தேர்தல் குறித்து, டைம்ஸ் நவ் - வி.எம்.ஆர். சர்வே நடத்தியுள்ள கருத்துக்கணிப்பில், மீண்டும் பி.ஜே.பி. ஆட்சியைப் பிடிக்கும் என்று தெரிவிக்கப்பட்டுள்ளது. என்றாலும், பிரதமரின் சொந்த மாநிலமான குஜராத்தில், பி.ஜே.பி. எதிர்பார்ப்பது போன்று 150 இடங்களைப் பிடிப்பது கடினம் என்று அந்தக் கணிப்பில் கூறப்பட்டுள்ளது.

தேர்தல் ஆணையம்குஜராத் மாநிலத்தில் மொத்தம் உள்ள 182 தொகுதிகளில் 106 முதல் 116 தொகுதிகள் வரை பி.ஜே.பி. கைப்பற்றும் என்றும், காங்கிரஸ் கட்சி தற்போதுள்ள எண்ணிக்கையை விடவும் சற்றே அதிகமாக, அதாவது 73 தொகுதிகள் வரை காங்கிரஸ் கட்சி கைப்பற்றும் என்று அந்தக் கருத்துக் கணிப்பு தெரிவித்துள்ளது. 

இந்தத் தகவல் பி.ஜே.பி-யினரை மகிழ்ச்சியில் ஆழ்த்தினாலும், எதிர்பார்த்த அளவு வெற்றி கிடைக்காது என்ற தகவல் அக்கட்சியினரை கலக்கத்தில் ஆழ்த்தியுள்ளது. 684 வாக்குச்சாவடிகள் அடங்கிய பகுதிகளில் ஆறாயிரம் பேரிடம் இந்தக் கருத்துக்கணிப்பு நடத்தப்பட்டுள்ளது.

இதற்கிடையே முதல்கட்டமாக தேர்தல் நடைபெறவுள்ள 89 தொகுதிகளில் வாக்குப்பதிவுக்குத் தேவையான அனைத்து ஏற்பாடுகளும் செய்யப்பட்டு வருகின்றன. பாதுகாப்புப் படையினரும் போதிய அளவில் பணியமர்த்தப்பட்டு, வாக்குச்சாவடிகளுக்கு உரிய பாதுகாப்பை வழங்கி வருகிறார்கள். 

தேர்தல் கருத்துக் கணிப்புகள் எதுவாக இருந்தாலும், வாக்காளர்கள் மனங்களில் என்ன இருக்கிறது என்பதை வாக்களிக்கவிருக்கும் அவர்கள் மட்டுமே அறிவர்.

உங்கள் கருத்தைப் பதிவு செய்யுங்கள்

Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement