இந்தியாவை உலுக்கிய ஊழலின் கதை! பிரதமர் மன்மோகன் சிங்குக்கும் அது தெரியும்! 2ஜி தீர்ப்பு: பூதமா புஸ்வாணமா? - பகுதி 2

2ஜி ஊழல்

2ஜி அலைக்கற்றை ஏலம், ‘முதலில் வருபவருக்கே முன்னுரிமை’ என்ற புதிய விதிப்படி நடந்து முடிந்தது. 2008 ஜனவரி 10-ம் தேதி அந்த ஏலத்தை நடத்தி முடித்திருந்தார் தொலைத் தொடர்புத் துறை அமைச்சர் ஆ.ராசா. அதோடு அவருடைய இன்னிங்ஸ் முடிவுக்கு வந்தது; அதன்பிறகு ஆட ஆரம்பித்த, எதிர்கட்சிகள் அரசியல் களத்தை ரணகளமாக்கின. எதிர்க் கட்சிகளின் அதிரடி ஆட்டத்தில், மத்தியிலும், மாநிலத்திலும் கூட்டணி போட்டு ஆட்சி நடத்திய காங்கிரஸ்-தி.மு.கவின் ‘இமேஜ்’ சரசரவென சரியத் தொடங்கியது. அலைக்கற்றை விவகாரத்தில், ‘எதுவுமே சரியாக நடக்கவில்லை’ என எதிர் கட்சிகள் புகார் கிளப்பின; அவசர அவசரமாக வாங்கப்பட்ட விண்ணப்பங்கள், விண்ணப்பிக்கும் தேதியிலும், நேரத்திலும் செய்யப்பட்ட குளறுபடிகள், விதிமுறைகளைத் தளர்த்தியதில் வில்லங்கம் என அத்தனை விவகாரங்களையும் எதிர் கட்சிகள் கேள்விக்கு உட்படுத்தின. பொது ஏலம் நடத்தி இருந்தால், கூடுதல் விலைக்கு விற்பனை செய்திருக்கலாம் என யூகக் கணக்குகள் போடப்பட்டன; தொலைத் தொடர்புத்துறை அமைச்சரின் இந்த முடிவு பிரதமருக்கும், நிதியமைச்சருக்கும் தெரியுமா? என்ற கேள்விகள் நாடாளுமன்ற அவைகளை அதிர வைத்தன. எதிர்க் கட்சிகளின் எந்தக் கேள்விக்கும்... யாரிடமும் பதில் இல்லை. ஆனால்,  அத்தனை கேள்விகளுக்கும் ஆ.ராசா பதில் சொல்லிக் கொண்டிருந்தார். 

பிரதமருக்குத் தெரியும்!

2 நவம்பர் 2007-ம் ஆண்டு பிரதமர் மன்மோகன் சிங், 2ஜி அலைக்கற்றை விற்பனை தொடர்பாக ஆ.ராசாவுக்குக் கடிதம் எழுதுகிறார். அதில், ‘2ஜி அலைக்கற்றையை ஏலத்தில் விடுங்கள்’ என்று குறிப்பிடுகிறார். அதற்கு பதில் எழுதிய ராசா, “ ‘முதலில் வருபவருக்கே முன்னுரிமை’ என்ற அடிப்படையில் 2ஜி-யை விற்பனை செய்ய உள்ளேன்” எனக் குறிப்பிடுகிறார். முதலில் அதற்கு அனுமதி அளிக்காத பிரதமர் மன்மோகன் சிங், 3 ஜனவரி 2008-ல் ஆ.ராசாவுக்கு எழுதிய கடிதத்தில் அனுமதி அளிக்கிறார். அதன்பிறகுதான் 122 வட்டங்களுக்கான 2ஜி லைசென்ஸ் விற்பனை செய்யப்படுகிறது. 

ப.சிதம்பரம் அனுமதித்தார்!

ப.சிதம்பரம் 2ஜி ஏலம் நடந்தபோது மத்திய நிதியமைச்சராக இருந்தார். 2ஜி அலைக்கற்றைக்கான தொகை, நிதித்துறை மூலம்தான் வசூலிக்கப்படும். அதனால், 2ஜி விற்பனை கொள்கையில் தொலைத் தொடர்புத்துறை செய்த மாற்றம் குறித்து நிதித்துறை ஆலோசனை நடத்துகிறது. ஆரம்பத்தில் தொலைத் தொடர்புத் துறை அமைச்சர் ராசாவின் முடிவை நிதித்துறை நிராகரித்தது. அதன்பிறகு என்ன நடந்ததோ... 2008-காலகட்டத்தில் தொலைத் தொடர்புத்துறை அமைச்சர் ஆ.ராசாவுக்கு, நிதியமைச்சர் ப.சிதம்பரம் எழுதிய கடிதத்தில், ‘‘இந்த முறை உங்கள் யோசனைப்படியே செய்யுங்கள்; ஆனால், அடுத்தமுறை ஏலத்தில் விற்பனை செய்யுங்கள்” என்று பட்டும்படாமலும் ஒப்புதல் அளித்துள்ளார். 

உடனடி கொள்முதல்... உடனடி விற்பனை... கொள்ளை லாபம்!

2ஜி அலைக்கற்றையை வாங்கிய நிறுவனங்களில் பெரும்பாலான நிறுவனங்கள், தொலைத் தொடர்புத்துறையில் எந்த அனுபவமும் இல்லாதவை. ஆனால், அந்த நிறுவனங்கள்தான் 2ஜி அலைக்கற்றையை வாங்கிக் குவித்தன. வாங்கிய கையோடு, அதை அப்படியே வெளிநாட்டு நிறுவனங்களுக்கு கைமாற்றிவிட்டன. ஆயிரத்து 537 கோடிக்கு ரூபாய்க்கு 2ஜி அலைக்கற்றையை வாங்கிய ஸ்வான் டெலிகாம் நிறுவனம், அதில் பாதியை அரபு நாட்டு நிறுவனமான ஈடிசாலட்டுக்கு, 4 ஆயிரத்து 200 கோடி ரூபாய்க்கு விற்றது. ‘ஜஸ்ட் லைக்தட்’ இந்தப்பக்கம் வாங்கி, அந்தப் பக்கம் கொடுத்ததில் அந்த நிறுவனத்துக்கு லாபம் மட்டும் 2 ஆயிரத்து 600 கோடி ரூபாய். 

செல்போன் டவர்

ஷியாம் டெலிகாம் நிறுவனம் ரஷ்யாவைச் சேர்ந்த எம்.டி.எஸ் பிராண்ட் நிறுவனத்துக்கு 74 சதவிகிதப் பங்குகளை விற்றது. யுனிடெக் நிறுவனம் நார்வேயைச் சேர்ந்த யுனிநார் நிறுவனத்துக்கு 67 சதவிகிதப் பங்குகளை விற்றது. டாடா டெலிசர்வீஸ் நிறுவனம் ஜப்பானைச் சேர்ந்த டோகோமோ நிறுவனத்துக்கு அதன் 26 சதவிகிதப் பங்குகளை விற்றன. ஆயிரம் கோடி ரூபாய்க்குள் 2ஜி அலைக்கற்றையைப் பெற்ற நிறுவனங்கள், அவற்றில் பாதியை மட்டும் பல ஆயிரம் கோடி ரூபாய்க்கு வெளிநாட்டு நிறுவனங்களுக்கு விற்று கொள்ளை லாபம் அடித்தன. அரசாங்கம் ஏன் இதைச் செய்யவில்லை என்பதுதான் 2ஜி அலைக்கற்றை ஊழலுக்கு அடிப்படையான கேள்வியாக அமைந்தது. 

கலைஞர் தொலைக்காட்சிக்கு 200 கோடி!

2ஜி ஏலம் முடிந்த அதே நேரத்தில்... கலைஞர் தொலைக்காட்சியின் அக்கவுண்டில் 200 கோடி ரூபாய் கொத்தாக வந்து விழுகிறது. அதுவும் யாரிடம் இருந்து? எந்த நிறுவனங்கள் 2ஜி அலைக்கற்றையை ஏலம் எடுத்ததோ... அந்த நிறுவனங்களிடம் இருந்து வருகிறது. எந்தவிதமான வியாபார ஒப்பந்தமும் இல்லாமல் 200 கோடி ரூபாய் பணத்தை 23 டிசம்பர் 2008-ல் கலைஞர் தொலைக்காட்சியில் சினியூக் நிறுவனம் முதலீடு செய்கிறது. கலைஞர் தொலைக்காட்சியின் முதலீடு செய்த சினியூக் நிறுவனத்துக்கு அவ்வளவு பணம் எங்கிருந்து வந்தது என தேடிப்பார்த்தால்... டைனமிக்ஸ் ரியலிட்டி, குஷேகான் புருட்ஸ் என்ற நிறுவனங்களிடம் இருந்து வந்தது தெரிந்தது. டைனமிக்ஸ் ரியாலிட்டிக்கு அவ்வளவு பணம் எங்கிருந்து வந்தது என்று தேடிப்பார்த்தால்... அந்த நிறுவனத்துக்கு டி.பி ரியாலிட்டி என்ற நிறுவனத்திடம் இருந்து வந்தது தெரிந்தது. டி.பி.ரியாலிட்டி யாருடைய நிறுவனம் என்று பார்த்தால், அது ஸ்வான் டெலிகாம் நிறுவத்தினத்தின் ஒரு அங்கம் என்பது புரிந்தது. ஸ்வான் டெலிகாம் நிறுவனம் யாரென்று பார்த்தால்... மத்திய அமைச்சர் ராசா மூலம், 2ஜி அலைக்கற்றையை வாங்கி, வெளிநாட்டு நிறுவனத்துக்கு கைமாற்றிவிட்டதில் லம்ப்பாக சம்பாதித்த நிறுவனம்தான் அது. ஆக, ஸ்வான் டெலிகாம் நிறுவனம், 2ஜி விற்பனையில் கிடைத்த லாபத்தில், 200 கோடி ரூபாயை கலைஞர் தொலைக்காட்சிக்கு கொடுத்துள்ளது; அலைக்கற்றையை தங்களுக்கே கிடைக்கும்படி செய்த மத்திய அமைச்சர் ஆ.ராசாவுக்கு சகாயம் செய்வதற்காக அந்த நிறுவனம் இந்தப் பரிவர்த்தனையை நடத்தி உள்ளது என்று குற்றம்சாட்டப்பட்டது. 

ஆ.ராசா, கனிமொழி

புகார்... புகார்... புகார்!

2ஜி விவகாரத்தில் முறைகேடுகள் நடந்துள்ளன என்று உள்ளுக்குள் புகைந்து கொண்டிருந்தது. பலமுறை எதிர் கட்சிகள் நாடாளுமன்றத்தில் அரசல் புரசலாக குற்றம்சாட்டின. மார்க்சிஸ்ட் கம்யூனிட் கட்சி சார்பில் சீத்தாராம் யெச்சூரி, 2ஜி வியாபாரத்தில் நடந்த ஊழல்கள் குறித்து புத்தகம் எழுதி, அதை நாடாளுமன்றத்தில் எல்லா எம்.பி-களுக்கும் கொடுத்தார். டெல்லியைச் சேர்ந்த டெலிகாம் வாட்ச்டாக், பத்திரிகையாளர் பிரஞ்சாய் குகா உள்ளிட்டவர்கள் புகார் அளித்தனர். 

நீரா ராடியா அமைச்சரவை! 

2ஜி விவகாரம் மெல்ல மெல்ல சூடுபிடித்துக் கொண்டிருந்த நேரத்தில், கார்ப்பரேட் தரகர் நீரா ராடியா விவகாரம் வெளியானது. கருணாநிதியின் மனைவி ராஜாத்தி அம்மாள், மகள் கனிமொழி, மத்திய அமைச்சர் ராசாவுடன் நீரா ராடியா தொலைபேசியில் பேசும் ஆடியோக்கள் வெளியானதுதான் ‘நீரா ராடியா டெலிபோன் டேப்’ என இந்தியா முழுவதும் பரவலாக அதிர்வைக் கிளப்பின. அந்த தொலைபேசி உரையாடல்களில், “யாருக்கு என்ன அமைச்சரவை கிடைக்கும், கிடைக்க வேண்டும்” என நீரா ராடியா அமைச்சர் ராசா, கனிமொழியுடன் விவாதிக்கிறார். ராசாவுக்கு கண்டிப்பாக தொலைத் தொடர்புத்துறையை ஒதுக்க வேண்டும் என்பதில் கனிமொழி, நீரா ராடியா என இருவரும் உறுதியாக இருப்பதை அந்த தொலைபேசி உரையாடல் போட்டு உடைத்தன. ராசாவுக்கு தொலைத் தொடர்புத் துறை கிடைக்க வேண்டும் என நீரா ராடியா ஏன் போராட வேண்டும்? ஏனென்றால், அந்த நீரா ராடியா, டாடா டெலிசர்வீஸ் உள்ளிட்ட நிறுவனங்களின் ஆலோசகராக இருந்தவர். அதனால், தான் ஆலோசகராக இருந்த நிறுவனத்துக்கு தகுந்த ஆளை அமைச்சராகப் போட வேண்டும் என்பதுதான் நீரா ராடியாவின் பிரயத்தனம். ‘நீரா ராடியா டெலிபோன்’ டெப் வெளியானபிறகு, மந்திரி சபை அமைப்பது, நாடாளுமன்றத்தில் கேட்கப்படும் கேள்விகளைத் தீர்மானிப்பது என அனைத்திலும் அரசியல் கட்சித் தலைமைகளின் கைகளில் மட்டுமில்லை... கார்ப்பரேட் நிறுவனங்களின் கைகளிலும் இருக்கிறது என்பது அம்பலமானது. 

ரத்தன் டாடா, நீரா ராடியா

நொந்துகொண்ட கருணாநிதி!

நீராராடியா-கனிமொழி டேப் விவகாரம் வெளியான போது, டெல்லியில் யாருக்கு அமைச்சர் பதவி, எந்தத் துறைக்கு யாரை அமைச்சராகப் போடுவது என டெல்லி தமிழ்நாடு ஹவுஸில் அமர்ந்து கருணாநிதி மண்டையை உடைத்துக் கொண்டிருந்தார். அப்போது வெளியான நீரா ராடியா டேப்பில், ‘ஆ.ராசாதான் தொலைத்தொடர்புத் துறை அமைச்சர்’ என்று உறுதிபட போனில் தகவல் சொல்கிறது நீரா ராடியாவின் குரல்! தயாநிதி மாறன் கைக்கு அந்தத் துறை வந்துவிடக்கூடாது என்று நீரா ராடியாவும் துடிக்கிறார். ஒன்றரை மணி நேர டேப்பில் நீரா ராடியா, ஆ.ராசா மற்றும் கனிமொழி ஆகியோரின் தொலைபேசிப் பேச்சுக்களை கேட்ட கருணாநிதி  நொந்து போனார். அவர் கனிமொழியிடம், “யாராம்மா அந்தப் பெண்... அவர் நினைத்தால் அமைச்சரவையில் எந்தப் பதவியை வேண்டுமானாலும் வாங்கிக் கொடுத்துவிடுவாரா? அப்படியானால், நீங்கள் எல்லாம் என்னை நம்பவில்லை... யாரோ ஒரு பெண்ணை நம்பித்தான் கட்சிக்கு வந்தீர்களா..?” என்று கேட்டு நொந்து கொண்டார். 

கனிமொழி, கருணாநிதி

17,60,00,00,00,000 கோடி நட்டம்!

2ஜி அலைக்கற்றையை ஒதுக்கியதில் மிகப்பெரிய ஊழல் நடந்துள்ளது என்பது 2009-10 காலகட்டத்திலேயே வெளிவந்துவிட்டது. ஆனால், ஊழலின் ரூபாய் மதிப்பு எவ்வளவு என்பதில் யாருக்கும் அப்போது தெளிவு ஏற்படவில்லை. அந்த நேரத்தில், சி.ஏ.ஜி(Comptroller Auditor General Of India) அறிக்கை வெளியானது. 8 நவம்பர் 2010-ல் வெளியான அறிக்கை, 2ஜி அலைக்கற்றை விற்பனையால் நாட்டுக்கு ஒரு லட்சத்து 76 ஆயிரம் கோடி ரூபாய் நட்டம் என்று அறிவித்தது. இந்தியாவின் ஊழல் திறமையைப் பார்த்து உலகம் அதிர்ந்தது!

இந்தியாவை உலுக்கிய ஊழலின் கதை! 2ஜி தீர்ப்பு: பூதமா புஸ்வாணமா? - பகுதி 1

தொடரும்...

Do you like the story?

Please Appreciate the Author by clapping!