ஒரு நிமிஷம் ப்ளீஸ்விகடனின் புதிய தளம் பற்றிய உங்கள் கருத்துக்களைப் பகிர வேண்டுகிறோம்!

vikatan-logo

9/11 தாக்குதலை நடத்தியது ஒசாமா... ஆனால், விதைத்தது ரீகன்! - ட்வின் டவர் முதல் ட்ரம்ப் வரை பாகம்-4

9 11

21ம் நூற்றாண்டின் மிக மோசமான தாக்குதல் செப்டம்பர் 11 நியூயார்க் இரட்டை கோபுர தாக்குதல்(9/11) என்றது ஒரு ஆங்கில செய்தித்தாள். மூன்று மணி நேரத்தில் சரிந்தது அமெரிக்கா என்றது இன்னோரு பத்திரிக்கை. சாத்தான்களுக்கு எதிரான போர் துவங்கிவிட்டது என்றார் அதிபர் ஜார்ஜ் டபிள்யூ புஷ். 2001-ம் ஆண்டு செப்டம்பர் மாதம் 11-ம் தேதி, அமெரிக்காவின் நியூயார்க்கில் உள்ள இரட்டை கோபுரத்தை இடித்துத் தரைமட்டமாக்கியது ஆப்கானில் இருந்து செயல்படும் அமைப்பின் தீவிரவாதி ஒசாமா பின்லேடன் என்று அறிந்ததும், ஒட்டுமொத்த உலக நாடுகளும் தீவிரவாதத்துக்கு எதிரான போர் முழக்கத்தை தீவிரமாக முன்னெடுத்தன. 

இரட்டை கோபுரத்தைத் தகர்த்தது என்னவோ பின்லேடன்தான். ஆனால் அதற்கான விதை போட்டது அமெரிக்காதான் என்பது அப்போது பலருக்குத் தெரியாத உண்மை. ஒசாமாதான் இந்தத் தாக்குதலுக்கு காரணம் என்றால் ஜிம்மி கார்ட்டர், ரீகன், ஜார்ஜ் புஷ் உள்ளிட்ட அமெரிக்க அதிபர்களுக்கும் இந்தத் தாக்குதலில் மறைமுகப் பங்குண்டு என்பது மறுக்க முடியாததே...

அமெரிக்காவின் தூங்கா நகரம் என்றழைக்கப்படும் நியூயார்க்கில் இருந்த உலக வர்த்தக மையக் கட்டடம், காலை 8:45 மணிக்கு மிகவும் பரபரப்பாகக் காணப்படும். அப்படித்தான் இருந்தது செப்டம்பர் 11, 2001 அன்றும். காலை 8:45 மணிக்கு 104 தளங்களுக்கும் பணிக்குச் சென்று கொண்டிருந்தார்கள் ஊழியர்கள். 'காலை உணவுக்கு காதலியோடு செல்லலாம்' என்ற திட்டத்தில் சிலர் இருந்திருக்கலாம். 'இன்றைய நாளின் டார்கெட்டை எட்டிவிடலாம்; இந்தமுறை நமக்குப் பதவி உயர்வு கிடைத்துவிடும்' என விவரிக்க முடியாத பல கனவுகளோடு பலரும் அன்றைய தினம் இருந்திருக்கலாம். ஏன், 'இன்னும் சில மாதங்களில் நான் இந்த உலகத்தை பார்த்துவிடுவேன்' என்று தாயின் கருவறையில் இருந்த அந்த 17 குழந்தைகளும்கூட நினைத்திருக்கலாம். ஆனால், அவையெல்லாம் 8:46-க்கு தொடங்கி 3 மணி நேரத்திற்குள் மண்ணோடு மண்ணாகிவிட்டது.

911 தாக்குதல்

(9/11 தாக்குதலால் உருவான தூசு எவ்வளவு தூரம் பரவி சென்றது என்பதை விளக்கும் நாசா புகைப்படம்)

அமெரிக்கத் தாக்குதலுக்கு பின்லேடன் தயாரானதைப் பற்றி சென்ற பகுதியில் பார்த்தோம். எப்போதுமே பின்லேடனுக்குத் தனது திட்டங்களை, சரியாக ஸ்கெட்ச் போட்டு செய்வதுதான் பழக்கம். இந்தத் தாக்குதலும் அப்படிப்பட்டதுதான். இந்தத் தாக்குதலுக்கு ஒசாமா பயன்படுத்த நினைத்தது ராக்கெட் லாஞ்சர்களையோ,நவீனரக துப்பாக்கிகளையோ அல்ல. மாறாக விமானங்களைக் கொண்டு மோதி தாக்குதல் நடத்துவது என்று திட்டமிட்டிருந்தார். 'இதுபோன்றதொரு தாக்குதல் முறையை அதற்கு முன்னர் அமெரிக்கா உள்ளிட்ட எந்த நாடுகளும் உணர்ந்திருக்க வாய்ப்பில்லை' என்பதைப் போன்ற தாக்குதல்கள் அவை. தாக்குதலுக்கான ஆயுதங்களாக மொத்தம் நான்கு விமானங்கள் பயன்படுத்தப்பட்டன. நான்குமே உள்நாட்டு விமானங்கள். பாஸ்டன் நகரில் இருந்து லாஸ்ஏஞ்சல்ஸ் சென்ற விமானங்கள் இரண்டு, நியூயார்க் - சான் ஃப்ரான்ஸிஸ்கோ, டல்லாஸ் - லாஸ்எஞ்சல்ஸ் விமானங்கள் இத்தாக்குதலுக்காகப் பயன்படுத்தப்பட்டன.

நான்கு விமானங்களிலும் தாக்குதலுக்கு அனுப்பப்பட்ட தீவிரவாதிகள், நன்கு விமானம் ஓட்டும் பயிற்சி பெற்றவர்கள். இவர்கள் பயிற்சி பெற்றது அமெரிக்க விமானப் பயிற்சி பள்ளிகளில்தான். விமானம் கிளம்பியதும் விமானி அறைக்குச் சென்று விமானத்தை கட்டுப்பாட்டுக்குள் கொண்டு வந்தார்கள். இரண்டு விமானங்கள் வர்த்தக மையத்துக்கு, ஒரு விமானம் பென்டகனுக்கு, மற்றொரு விமானத்தின் இலக்கு என்ன என்று தெரிவதற்கு முன்பே அது வெடித்துச் சிதறியது.

'பாஸ்டனில் இருந்து கிளம்பிய விமானம் என்ன ஆனது என தெரியவில்லை' என்று எஃபி.பி.ஐ அலுவலகம் பதற்றப்படும் அதேவேளையில் இரட்டை கோபுரத்தின் மீது முதல் விமானம் பயங்கரச் சத்தத்துடன் மோதியது. 'அந்த சம்பவத்தை பார்த்தவர்களால் மட்டும்தான், அதன் உண்மையான பயங்கரத்தை உணர முடியும்' என்கிறார்கள் நேரில் கண்டவர்கள். பரபரப்பான மீட்டிங்குகள், காஃபி ஷாப் அரட்டைகள் எல்லாம் கணநேரத்தில் தகர்த்தெறியப்பட்டது. இந்தச் சம்பவம் நடந்த அடுத்த சில நிமிடங்களில் மேலும் ஒரு விமானம் மோதியதும் உலக வர்த்தக மைய இரட்டைக் கோபுரக் கட்டடம், தரை மட்டமானது.

911 தாக்குதல்

இந்தத் தாக்குதலால் வெளிப்பட்ட புழுதித் துகள்கள் மட்டும் நியூயார்க் மற்றும் அருகில் உள்ள மாகாணத்தில் பல மைல் தொலைவுக்குப் பரவி நின்றதைக் காண முடிந்தது. இரட்டைக் கோபுரங்களில் இருந்த அலுவலகங்களில் 50 ஆயிரத்துக்கும் அதிகமானோர் பணியில் இருந்தனர். உலக வர்த்தக மையத்துக்கு தினமும் வந்து செல்வோர் எண்ணிக்கை சராசரியாக 1.4 லட்சம் பேர். இந்தத் தாக்குதலுக்குப் பின் அந்தப் பகுதியின் இடிபாடுகளில் இருந்து 144 திருமண மோதிரங்கள் கண்டெடுக்கப்பட்டன. கர்ப்பிணிப் பெண்கள் 17 பேர் வயிற்றில் தங்களின் குழந்தைகளைச் சுமந்தபடியே உயிரிழந்தது கணக்கெடுப்பில் தெரியவந்தது. விமானம் மோதி நிகழ்த்தப்பட்ட தாக்குதலைத் தொடர்ந்து, அந்தக் கட்டடத்தில் பரவிய தீயை அணைக்க 100 நாள்கள் பிடித்தது. இது, அமெரிக்க வரலாற்றில் மிகப்பெரிய சோகமாகப் பதிவானது. அந்தத் தருணத்தில் அமெரிக்க ராணுவத் தலைமையகமான பென்டகனும் தாக்கப்பட்டது. தாக்குதல் நடைபெற்ற அடுத்தநாள் விமானத்தின் கறுப்புப்பெட்டி கண்டெடுக்கப்பட்டது. ஆனால், அதில் எந்த ஒரு தகவலும் பதிவாகவில்லை என்பதுதான் அதிர்ச்சி.

தாக்குதல் நடத்தப்பட்ட நாளன்று வானில் பறந்த விமானங்களையெல்லாம் கண்டு மக்கள் அஞ்சினார்கள். இதன் உச்சம் என்னெவென்றால், விமான சேவைகளை நிறுத்துவது மட்டுமல்லாமல், மொத்த தொலைத்தொடர்பு சேவையையும் அமெரிக்கா நிறுத்தி வைத்திருந்தது. வெளிநாட்டிலிருந்து பலரும் தங்கள் உறவுகளைத் தொடர்புகொள்ள முடியாமல் பரிதவித்தனர்.

தாக்குதல் பற்றிய தகவல், அப்போதைய அமெரிக்க அதிபராக இருந்த புஷ் கவனத்துக்கு வருகிறது. 'அவர்கள் போரைத் தொடங்கிவிட்டார்கள்' என்று அவசர. அவசரமாக குழுக்களை விசாரிக்க உத்தரவிடுகிறார். அதற்கெல்லாம் முன் மனைவி மற்றும் குழந்தைகளைப் பாதுகாப்பான இடத்தில் இருக்கிறார்களா என விசாரிக்கிறார். பத்திரிகையாளர் சந்திப்பில் அந்த வார்த்தை முதன்முதலாக உச்சரிக்கப்படுகிறது. ''அல் - கொய்தா'' தீவிரவாத அமைப்பு. அமெரிக்காவுக்கு தலைவலி கொடுத்த இந்த அமைப்பின் ஆதி யார் என்றால், சுற்றிவந்து ரீகன் என முடியும் என்பது அப்போது யாருக்கும் புலப்படாத உண்மை. 

இறந்தவர்கள் 2,996 பேர் என்ற புள்ளிவிவரம் வெளியிடப்பட்டது. ஆப்கானிஸ்தானில் ஒசாமா பின்லேடன் தங்கி இருப்பது கண்டறியப்பட்டு அமெரிக்கா - ஆப்கான் போருக்குத் தயாரானது. 1981-ம் ஆண்டு ரீகன் நினைத்தது ஆப்கானிஸ்தானை அமெரிக்காவுக்குச் சொந்தமானதாக்க வேண்டும் என்று. அதற்கு அப்போது சரியான காரணம் இல்லை; ஆனால், இப்போது வலுவான காரணம் இருக்கிறது. போர் என்ற ஆயுதத்தோடு ஆப்கானை நோக்கி விரைந்தது அமெரிக்கப் படைகள். 

ஆப்கான் போரில் அமெரிக்காவின் செயல்பாடுகள், பின்லேடனுக்காக ஏன் ஆப்கான் அழ வேண்டும் என்ற குரல்கள், பின்லேடனின் வீடியோக்கள், புஷ் தோல்வி போன்றவை குறித்து அடுத்த பகுதியில் பார்ப்போம்...

தொடரின் முந்தைய பகுதிகளுக்கு க்ளிக் செய்க | பாகம் 1 | பாகம் 2 பாகம் 3 | 

Do you like the story?

Please Appreciate the Author by clapping!