வெளியிடப்பட்ட நேரம்: 09:47 (02/03/2018)

கடைசி தொடர்பு:09:57 (02/03/2018)

மருந்துக்குழிகள், படுகைகள், சிற்பங்கள்! - தமிழகத்தில் 464 சமணத் தளங்கள்

சமணர்கள் ஆராய்ச்சியில் பிரெஞ்சு இன்ஸ்டியூட் புதுவை

மிழர்களின் இலக்கியம், கட்டடக்கலை ஆகியவற்றில் சமணர்களுக்கும் முக்கியப் பங்களிப்பு உண்டு. அவர்களின் வாழ்க்கை முறை குறித்தும், கட்டடக்கலையில், மருத்துவத்தில் அவர்கள் ஆற்றிய பங்கு குறித்தும் ஆழமான, நுணுக்கமான தகவல்கள் நமக்குக் கிடைக்கவில்லை. ஆனால், தற்போது புதுச்சேரி பிரெஞ்சு நிறுவனத்தால் தமிழ்நாட்டில் இதுவரை 464 சமணத் தளங்கள் ஆவணப்படுத்தப்பட்டு உள்ளன. இனித் தமிழ்நாட்டில் வாழ்ந்த சமணர்கள் குறித்த வரலாற்றாராய்ச்சிக்கும், அதன் மூலமாக இலக்கியம், மருத்துவம், கட்டடக்கலை ஆகியவற்றில் அவர்கள் மூலமாக நிகழ்ந்த மாற்றங்கள் குறித்தும் அறிந்துகொள்ள இம்முயற்சி மிகப்பெரிய உதவியாக இருக்கும். எப்படிச் சாத்தியமானது இந்தப் பயணம்? 

புகைப்படக் கலைஞர் ரமேஷ்குமார் தலைமைப் புகைப்படக் கலைஞர் ரமேஷ்குமாரைச் சந்திக்க புதுச்சேரி பிரெஞ்சு நிறுவனத்துக்குச் (Institute Français de Pondichéry) சென்றோம். 1956-ம் ஆண்டு பிரான்ஸ் நாட்டின் உடன்படிக்கையோடு கட்டமைக்கப்பட்டது இந்த ஆராய்ச்சி நிறுவனம். செயின்ட் லூயி வீதியில் இருந்த அந்தப் பிரமாண்டமான பிரெஞ்சுக் கட்டடத்துக்குள் நுழைந்தவுடன், “நாம இதைப் பார்க்குறதுக்கு முன்னாடி உங்களுக்கு இங்க நாங்க செய்ற வேற சில வேலைகளையும் காட்டுறோம்” என்றபடி நம்மை மேல்தளத்துக்கு அழைத்துச் சென்று ஓர் அறையைத் திறந்து காட்டினார், ரமேஷ்குமார். அறை முழுவதும் ஓலைச்சுவடிகள்!

“இதில் பெரும்பாலான ஓலைச்சுவடிகள் சைவ ஆகம விதிகள் குறித்து எழுதப்பட்டவையாக இருக்கின்றன. குறைந்த அளவில் மற்ற இதிகாசம், புராணங்கள் குறித்தும் ஓலைச்சுவடிகள் இருக்கின்றன. கிட்டத்தட்ட 8,000 ஓலைச்சுவடிகளை நாங்கள் இங்கு பாதுகாத்து வருகிறோம். அவற்றை முறையாக டிஜிட்டல் முறையிலும் சேமித்து வருகிறோம். தமிழ், கிரந்தம், ஒரியா மற்றும் தேவநாகரி ஆகிய மொழிகளிலும் ஓலைச்சுவடிகள் கிடைத்துள்ளன” என்றபடி மற்றோர் அறைக்கு அழைத்துச் சென்றார், ரமேஷ்குமார். அகர வரிசைப்படி அடுக்கப்பட்ட மரப்பெட்டிகள் முழுக்கப் புகைப்படங்கள். தென்னிந்தியாவின் முக்கியமான கலாசார சின்னங்கள் குறித்த 1,60,000 புகைப்படங்கள் அங்கு ஆவணப்படுத்தப்பட்டுள்ளன. சர்வதேச சிலைத் திருட்டு போன்ற சம்பவங்களிலும் இந்த ஆவணப் புகைப்படங்கள் முக்கிய ஆதாரமாகக் கைகொடுக்கப்பட்டு உதவியிருப்பதாகக் கூறினார், அவர். 

இது தவிர மொழி, வரலாறு, சமூகவியல் என்று பல தளங்களில் ஆராய்ச்சிகள் நிகழ்வதாகக் கூறிய அவர், சமண ஆராய்ச்சியைப் பற்றிக் கூறத் தொடங்கினார். 

பிரெஞ்சு இன்ஸ்டிடுய்ட்

“கடந்த 2008-ஆம் ஆண்டு பிரான்ஸ் நாட்டைச் சேர்ந்த பேராசிரியர் நலினி பல்பீர் மற்றும் முனைவர் கரீன் லாட்ரேஷ் ஆகியோருடன் இணைந்து ஆவணப்படுத்த முனைந்தோம். முதலில் செஞ்சி, வந்தவாசி போன்ற இடங்களில் மட்டுமே எங்கள் ஆராய்ச்சி இருந்தது. ஆனால், இன்னும் கொஞ்சம் நாங்கள் விரிவாக ஆராய்ந்தபோது, நிறைய இடங்கள் அழிவின் விளிம்பில் இருப்பது தெரியவந்தது. அனைத்து சமணப் படுகைளையும் இதுவரை முழுமையாக யாரும் ஆவணப்படுத்தவில்லை. தொல்லியல் ஆராய்ச்சி நிறுவனம் முழுமையாக மாநில அரசுடன் இணைந்து பாதுகாப்பு செய்து வந்தாலும், இதுவரை யாரும் அறிந்திடாத சில இடங்கள் அழிவின் விளிம்பில் இருக்கின்றன. காலப்போக்கில் வேற்று மதத்தினரால் சில சமயங்களில் மாற்றங்கள் நிகழ்வதும், குவாரிகளில் வெடிக்கப்படும் வெடிகுண்டுகளாலும் நிறைய இடங்கள் பாதிப்புக்குள்ளாகின. இவை அனைத்தையும் முழுமையாக ஆவணப்படுத்தத் தொடங்கினோம். முதலில் செவிவழிச் செய்தி அல்லது ஏதேனும் குறிப்புகளில் உள்ள செய்தி என்று தேடித்தேடிச் சென்றோம். 100 அல்லது 150 தளங்கள் இருக்கும் என்று நினைத்த எங்களுக்கு, இறுதியாக இந்தப் பத்தாண்டுகளில் காணக் கிடைத்தது 464 இடங்கள். இவற்றுள் குகைகள், படுகைகள், கோயில்கள், புடைப்புச் சிற்பங்கள், வடக்கிருந்து உயிர் துறந்தவர்கள் குறித்த கல்வெட்டுகள், சமணப்பள்ளிகள், குகைகளுக்குள் கண்டெடுக்கப்பட்ட மருந்துக்குழிகள், சமணப் பெண் துறவிகளுக்கென்று தனியாக இயங்கிய சமணப்பள்ளி (வெடால், செஞ்சி அருகில்), சிதிலமடைந்த சிற்பங்கள் என்று பல்வேறு வகையான ஆதாரங்கள் கிடைத்திருக்கின்றன. சில சமயம், நாம் ஏன் இவ்வளவு முயற்சி செய்கிறோம் என்ற கேள்விகூட எழலாம். ஆனால், இதுபோன்ற சமண மதத்தின் மிகத்தொன்மையான கல்வெட்டுக் குறிப்புகள் தமிழ்நாட்டில் மட்டுமே காணக்கிடைக்கின்றன எனும் பட்சத்தில், அதனை ஆவணப்படுத்துவது இன்றியமையாததாகிறது. எங்கள் நிறுவனத்தோடு இணைந்து, பிரான்ஸ் நாட்டின் அரசும், இரண்டு நிறுவனங்களும், மும்பையின் தீர்த்த ஷேத்திர கமிட்டியும் எங்களுக்கு உதவின. தொல்லியல் துறை மற்றும் மாநிலத் தொல்லியல் துறையும் எங்களுக்கு முழுமையான ஒத்துழைப்பு அளித்தார்கள். அவர்கள் இல்லை என்றால், இந்த ஆராய்ச்சி முழுமை அடைந்திருக்காது. 

தமிழ்நாட்டில் கிட்டத்தட்ட 150 தமிழ்ச் சமணர்கள் வாழும் கிராமங்கள் உள்ளன. அவர்கள் தமிழ்நாட்டில் சிறுபான்மைச் சமூகத்தினராக இருக்கிறார்கள். அவர்கள் வாழ்க்கை முறையையும், வழிபாட்டு முறைகளையும் நாங்கள் பதிவுசெய்தோம். 

இவை அனைத்தையும் தொகுத்து, மாவட்டவாரியாக அல்லது பெயர்வைத்துத் தேடும்படியாக, Gallery போலத் தொகுத்து அல்லது வெறும் Blind search என்று எம்முறையிலும் இந்தக் குறுந்தகட்டில் தேடலாம். இன்றும்கூடச் சில புதிய இடங்கள் கண்டுபிடிக்கப்பட்டு வருகின்றன. தற்போது பெரும்பாலான சமணத் தளங்கள் எங்களால் ஆவணப்படுத்தப்பட்டுள்ளதால், தமிழ்ச் சமணம் குறித்த ஆராய்ச்சி இனி எளிதாகும். இந்த இடங்களையும் இன்னும் அதிகமாகப் பராமரிக்கலாம்”  என்றவரிடம், “பத்து ஆண்டுகள் நீங்கள் சந்தித்த சவால்கள் குறித்து கூறுங்கள்?” என்று கேட்டோம். 

“பெரும்பாலான தளங்கள் இருக்கின்றன என்றாலும் ஆதாரம் கிடைப்பதில்லை. அப்படிக் கிடைத்தாலும், அது செவிவழிச் செய்தியாகவோ அல்லது இரண்டு மூன்று பேர் கடந்துவந்த ஆராய்ச்சிக் குறிப்பாகவோதான் இருந்தது. ஆதலால், நேரில் சென்று ஒவ்வோர் இடத்திலும் சோதனை நடத்தியே நாங்கள் அனைத்துத் தளங்களையும் உறுதி செய்தோம். 

திருச்செங்கோட்டுக்கு அருகில் ஒரு சமணப் படுகை இருப்பதாகத் தகவல் கிடைத்தது. தகவல் சேகரிக்கச் சென்றபோது, வயதான மூதாட்டி ஒருவர், ‘அந்த மலைக்குப் பிள்ளைதின்னிகரடு என்று பெயர். அது மனிதர்களை விழுங்கிவிடும், நீங்கள் செல்லாதீர்கள்’ என்றார். வெகு சில ஆண்டுகளுக்கு முன்பு அங்கு குழந்தை ஒன்று தொலைந்துபோனதால் அந்தப் பெயர் வந்ததாகச் சொல்லப்படுகிறது. ஆனால், அந்த மலைக்குச் சென்ற பின்புதான் அந்த மலை முழுக்க மிக உயரமான செங்குத்தான கற்கள் இருப்பது தெரியவந்தது. இருந்தாலும், நாங்கள் அந்த மலைமீது ஏறிச் சமணப்படுகைகளைப் புகைப்படம் எடுத்தோம். பலவிதமான உபகரணங்களைச் சுமந்துகொண்டு இடம் தெரியாமல் அலைய வேண்டும். சில சமயம், வன விலங்குகளின் தொல்லைகூட இருக்கும். இதுபோன்ற இடையூறுகள் ஒருபுறம் இருந்தாலும், மறுபுறம் வேறு மாதிரியான ஆட்கள் தொல்லை தந்தார்கள்.

மிகமிகப் பழைமையான இசைக்குறிப்புகள் எல்லாம் இந்தச் சமணக் கல்வெட்டுகளில் காணக் கிடைக்கின்றன. ஆனால், இவ்விடத்தில் போய் பெயின்ட் மூலம் பெயர்களை எழுதிக் கிறுக்குவதும், குடித்துவிட்டு  மதுப்பாட்டில்களை அங்கேயே உடைத்துவிட்டு வருவதுமாகச் சிலர் இருப்பதால் பெரும்பாலான படுகைகள் பாதிப்புக்குள்ளாகி வருகின்றன. நம் அரசு தன்னால் இயன்றவரை இந்த இடங்களைக் காக்கிறது. ஆதலால், இந்தச் சின்னங்களைப் பாதுகாக்க வேண்டியது நம் கடமை. இதன்மூலம் இன்னும் பல செய்திகளை நாம் அறிந்துகொள்ளலாமே” என்று முடித்தார் ஓர் ஆச்சர்யம் கலந்த பார்வையுடன்.


டிரெண்டிங் @ விகடன்