வாவ்... தமிழில் கோடிங் படித்தால் இவ்வளவு பலனா? - தாய்மொழிக் கல்வியில் அசத்தும் குவி #Guvi

தாய்மொழியில் கல்வி கற்பதால் மட்டும் மாற்றங்கள் நிகழ்ந்துவிடுமா? இதோ, ஜெயித்தவர்களே சொல்கிறார்கள்!

வாவ்... தமிழில் கோடிங் படித்தால் இவ்வளவு பலனா? - தாய்மொழிக் கல்வியில் அசத்தும் குவி #Guvi

ன்னாட்டுக் கம்பெனி ஒன்றிற்கான நேர்காணல் அது. பொறியியல் மாணவர் ஒருவர் அந்த அறைக்குள் நுழைகிறார்; நேர்காணல் தொடங்குகிறது. நேர்காணல் செய்பவருக்கும், அந்த மாணவருக்கும் இடையே நடக்கிறது, இப்படி ஓர் உரையாடல்.

``C-ல பாய்ன்ட்டர்ஸ் பத்தி தெரியுமா?"

``யெஸ் சார்...தெரியும்."

``அத எங்கெல்லாம் அப்ளை பண்ணலாம்?"

``புரோகிராம்ல எங்கெல்லாம் வேணுமோ, அங்கெல்லாம் யூஸ் பண்ணலாம் சார்..."

(நேர்காணல் செய்பவர் சிரிக்கிறார்)

``சரி...அதை எங்கெல்லாம் அப்ளை பண்ணக் கூடாது?"

``தேவையில்லாத இடத்துல எல்லாம் அப்ளை பண்ண வேண்டாம்" (சின்னப் புன்முறுவலுடன் நேர்காணல் செய்பவரைப் பார்க்கிறார் மாணவர்)

``ஹ்ம்ம்...பாய்ன்ட்டர்ஸ் வெச்சு புரோகிராம்ஸ் எல்லாம் போட்ருக்கீங்கல்ல?"

``ம்ம்ம்... பண்ணிருக்கேன் சார்"

``அப்புறம் ஏன் என் கேள்விக்குப் பதில் தெரியல?"

``புரோகிராம் கேட்டா சொல்லிடுவேன்... இதெல்லாம் தெரியாதே?"

``இந்த விஷயம் தெரியாம, எப்படி புரோகிராம் மட்டும் போடுவீங்க?"

``அதுதான் மனப்பாடமா தெரியுமே சார்?"

அந்த மாணவரை அனுப்பிவிட்டு அடுத்த மாணவரை அழைக்கிறார் நேர்காணல் செய்பவர்; இதேபோன்ற கேள்விகள்; இதேபோன்ற பதில்கள். மாணவர்கள் மாறுகிறார்கள்; கல்லூரிகள் மாறுகின்றன. ஆனால், இந்தக் கேள்விகளுக்கு மாணவர்களின் பதில்கள் மட்டும் இப்படியேதான் இருக்கின்றன. ஒரு சில மாணவர்கள் மட்டும்தான் இதற்கு விதிவிலக்காக இருக்கிறார்கள். இத்தனைக்கும் இந்த மாணவர்கள் அனைவருமே கணினி அறிவியல் துறையைச் சார்ந்த பொறியியல் மாணவர்கள். ஆனால், சி புரோகிராமில் பாடத்தைத் தாண்டி ஏதேனும் சின்ன விஷயம் கேட்டாலே திணறுகிறார்கள். நேர்காணல் செய்பவருக்கு இவர்களின் பிரச்னை புரிகிறது. 
மாணவர்கள் படிக்கிறார்கள்; ஆனால், பாடங்களைப் புரிந்து படிப்பதில்லை; பரீட்சைக்கு ஏற்றவகையில் படிக்கிறார்கள்; ஆனால், பணிக்கேற்றபடி படிப்பதில்லை. 

நேர்காணல் செய்த அந்த நபர், தன்னுடன் பணிபுரியும் தன் நண்பர்களிடம் இதுகுறித்து கேட்கவே, அவர்களும் இதே பிரச்னையைக் குறிப்பிடுகிறார்கள். கல்லூரியில் இருக்கும் பாடத்திற்கும், பணியில் இணைவதற்கான தகுதிக்கும் இடையே ஏன் இவ்வளவு இடைவெளி? மீண்டும் நண்பர்கள் யோசிக்கிறார்கள்; ஒரு விஷயம் மட்டும் தெளிவாகப் புரிகிறது அவர்களுக்கு; இவர்கள் சந்தித்த மாணவர்கள் அனைவருமே பொறியியல் படிப்பை ஆங்கிலவழியில் படிப்பவர்கள்; ஒருவேளை இதுதான் பிரச்னையா? தமிழில் கற்றுக்கொடுத்தால் இவர்களால் எளிதில் புரிந்து படிக்கமுடியுமா? சரி, இவர்களுக்கு நாம் உதவினால் என்ன? புரோகிராமிங் தொடர்பாக ஒரு வீடியோவை உருவாக்கி உடனே யூ-டியூபில் வெளியிடுகிறார்கள். சில நாள்களில் மில்லியன் வியூஸைத் தாண்டுகிறது வீடியோ. இதைத்தான் நாங்கள் இவ்வளவு நாள் தேடிக்கொண்டிருந்தோம் என்கின்றன வந்துவிழுகின்றன நூற்றுக்கணக்கான கமென்ட்டுகள். அந்த நண்பர்களின் கேள்விக்குப் பதில் கிடைத்துவிடுகிறது. 

``ஆம்...பாடங்களை மாணவர்கள் தாய்மொழியில் கற்றுக்கொள்ளும்போது எளிதில் புரிந்துகொள்கிறார்கள்"

பாலமுருகன், அருண் பிரகாஷ், ஸ்ரீதேவி ஆகிய மூவரும்தான் அந்த நண்பர்கள்; பேபால் நிறுவனத்திற்காக மாணவர்களை நேர்காணல் செய்தபோது நடந்ததுதான் மேலே பார்த்த சம்பவம். அன்று ஒரு வீடியோவில் தொடங்கிய இவர்களின் பயணம், இன்று தாய்மொழிக் கல்வியில் தொழில்நுட்பக் கல்வியை அளிப்பதற்காகத் தனிநிறுவனம் நடத்தும் அளவுக்கு வளர்ந்திருக்கிறது. ஜாவா, C, C++, ஆண்ட்ராய்டு, பைத்தான் எனக் காலத்திற்கேற்ற தகவல் தொழில்நுட்ப வகுப்புகளை, தகுதிவாய்ந்த நிபுணர்களைக் கொண்டு எளியதமிழில் ஆன்லைனில் பயிற்சியளித்துவருகிறது இவர்களின் குவி (Guvi) நிறுவனம். 

பாலமுருகன், அருண் பிரகாஷ், ஸ்ரீதேவி

ஆன்லைன் மூலம் பாடம் நடத்துவது என்பது மாணவர்களுக்குப் புதிதல்ல; உடெமி, உடாசிட்டி, கோர்ஸ்எரா என எத்தனையோ நிறுவனங்கள் இதற்குமுன்பே ஆன்லைன் வகுப்புகளை வெற்றிகரமாக நடத்திவருகின்றன. ஆனால், தகவல் தொழில்நுட்பக் கல்வியைத் துல்லியமாகத் தமிழில் வழங்குவது குவி மட்டும்தான். நிறைய யூ-டியூப் சானல்கள் சின்னச் சின்ன அளவில் தமிழில் தொழில்நுட்பக் கல்வி அளித்தாலும், மாணவர்களுக்கு ஏற்றபடி பாடங்களை ஒருங்கிணைத்து, அவர்கள் பயில்வதற்கும், பயிற்சி செய்வதற்கும் ஒரு முழுமையான பிளாட்ஃபார்மை உருவாக்கியிருக்கிறது குவி. 

``இன்று பொறியியல் படிக்கும் மாணவர்கள் அனைவரும் ஆங்கிலம் மட்டுமே நன்கு பேசத்தெரிந்தால் போதும்; நிறுவனங்களில் வேலை கிடைத்துவிடும் என நினைக்கின்றனர். இதுதவறு. தொழில்நுட்ப நிறுவனங்களில் பணிபுரிய இதுமட்டுமே போதாது. டெக்னிக்கல் விஷயங்களிலும் மாணவர்கள் கில்லியாக இருக்க வேண்டும். அதிலும் புராடக்ட் கம்பெனிகள் டெக்னிக்கல் விஷயங்களில் அனுபவமுள்ளவர்களை மட்டும்தான் வேலைக்கே எடுப்பார்கள். அப்படியெனில் மாணவர்கள் எந்தளவுக்கு டெக்னிக்கலாக வலுவாக இருக்கவேண்டும்? ஆனால், நம் கல்விமுறையில் இருக்கும் சிக்கல்களால் மாணவர்கள் போதுமான அளவுக்குத் தொழில்நுட்ப அறிவைப் பெறுவதில்லை. இதற்குக் காரணம் மாணவர்கள் பாடங்களைப் புரிந்துகொண்டு படிக்காததுதான். அவர்கள் புரிந்துகொள்ளாமலும், நன்கு உள்வாங்கிக்கொள்ள முடியாமலும் போகக்காரணம் தங்கள் தாய்மொழியில் பாடங்களைப் படிக்காததுதான்" என்கிறார் குவியின் சி.இ.ஓ. பாலமுருகன்.

குவியின் இணையதளம்

``ஆரம்பத்தில் பேபால் நிறுவனத்தில் பணிபுரிந்தபோது நிறைய மாணவர்களிடம் இந்தப் பிரச்னையைப் பார்த்தோம். அப்போதுதான் இவர்களுக்கு உதவுவதற்காக நாமே ஏன் எளிமையாக வீடியோக்களை உருவாக்கக் கூடாது எனத்தோன்றியது. நாங்களே தகவல் தொழில்நுட்பத்துறையில் நன்கு அனுபவம் வாய்ந்தவர்கள் என்பதால், மாணவர்களுக்கு எளிதாகப் பாடம் சொல்லிக்கொடுக்க முடியும் என நம்பினோம். பின்னர் எங்கள் பணி நேரம் தவிர்த்து, மற்ற நேரத்தில் வீடியோக்களை ஷூட் செய்தோம். அவற்றை யூ-டியூபில் வெளியிட்டபோது நல்ல வரவேற்பு கிடைத்தது. பின்னர் தொடர்ந்து நிறைய வீடியோக்களை உருவாக்கினோம். அப்போதுதான் இதையே ஏன் முழுநேரமாக ஒரு பிசினஸாகச் செய்யக் கூடாது என யோசித்தோம். அதன்மூலம் இன்னும் தீவிரமாக இந்தப் பணியைச் செய்யலாம் என நினைத்தோம். முதலில் ஸ்ரீதேவி மட்டும் நிறுவனத்தை விட்டு வெளியேவந்து வீடியோவுக்கான பணிகளைப் பார்த்துக்கொண்டார். பின்னர், யூ-டியூபில் மட்டுமே வீடியோக்களை வெளியிட்டால் பத்தாது என முடிவுசெய்து, இதற்காகத் தனி இணையதளம் ஒன்றைத் தொடங்கினோம்.

யூ-டியூப் மூலமாக வீடியோக்களை எளிதில் அனைவரிடமும் கொண்டுசென்று சேர்க்க முடிந்தாலும், அதில் நிறைய குறைகளும் இருந்தன. ஒரு மாணவர் அந்த வீடியோவை எத்தனை முறை பார்க்கிறார், எந்த இடத்தில் குழம்புகிறார், அவருக்கு அந்த வீடியோ தெளிவாக இருக்கிறதா போன்ற விஷயங்களை எல்லாம் அதில் பார்க்கமுடியாது. எனவே அதற்காக AI, மெஷின் லேர்னிங் உதவியுடன் செயல்படும் ஓர் இணையதளத்தை வடிவமைத்தோம். அதில் எங்களது பாடங்களைத் தொகுத்தோம். அந்த முயற்சி வெற்றியடையவே நானும் அருண்பிரகாஷும்  பேபாலிலிருந்து வெளியேவந்து முழுமையாக இந்த பிசினஸில் கவனம் செலுத்தத் தொடங்கினோம். 2014-ல் Guvi-யைத் தொடங்கினோம். ‘Grab Ur Vernacular Identity’ என்பதன் சுருக்கம்தான் Guvi. அதாவது, `தாய்மொழியையே உன் அடையாளமாக்கு.' இந்தத் துறையில் நன்கு அனுபவம் இருந்ததால் எங்கள் நண்பர்களையும் பாடம் நடத்தச்சொல்லி வீடியோக்களை உருவாக்கினோம். இதில் பாடம் நடத்துபவர்கள் எல்லோருமே அந்தந்தத்துறையில் நிபுணத்துவம் பெற்றவர்கள். எனவே இவர்கள் நடத்துவதற்கும், ஆசிரியர்கள் நடத்துவதற்கும் நிறைய வித்தியாசம் உண்டு. 

இப்படி எங்களின் வீடியோக்கள் ஆரம்பத்தில் பெரும் வரவேற்பைப் பெறவே சென்னை ஐ.ஐ.டி.யிலிருந்து இதேபோல வீடியோக்களை உருவாக்குவதற்கான வாய்ப்பு வந்தது. அவர்களுக்கு உதவி செய்தோம். பின்னர் நிறைய மாணவர்களைச் சென்றுசேர வேண்டும் என்பதால் கல்லூரிகளிடம் எங்கள் சேவையை எடுத்துச்சென்றோம். எங்களுடைய வழிமுறை பிடித்துப்போகவே சென்னையில் இருக்கும் நிறைய பொறியியல் கல்லூரிகள் எங்களுடன் இணைந்தன. 2015-ம் ஆண்டே 15 கல்லூரிகள் எங்களுடன் இணைந்தன. பொதுவாக ஆன்லைன் தளங்களில் கோர்ஸ்களைப் படிப்பவர்கள் அதனை முழுமையாக முடிக்க மாட்டார்கள்; ஆனால், எங்கள் பயிற்சியில் அந்த விகிதம் 75 சதவிகிதத்துக்கும் மேல் காரணம் எளிதாகப் புரிந்துகொள்ளும் வகையிலும், கற்றுக்கொள்வதை ஊக்குவிக்கும் வகையிலும் எங்களின் பாடங்கள் இருப்பதால்தான் மற்ற கோர்ஸ்களைப்போல சான்றிதழ்கள் எதுவும் நாங்கள் கொடுப்பதில்லை. மாறாக எங்கள் தளத்தில் மாணவர் ஒருவர் கற்றுக்கொண்டவை, பயிற்சி செய்தவை என அனைத்தையும் ஒரு புரொஃபைலாக தருகிறோம். இதனை எங்கு வேண்டுமானாலும் அவர்கள் ஷேர் செய்துகொள்ள முடியும்" என்றவர் வேலைவாய்ப்புக்குக் குவி எப்படி உதவுகிறது என்பதையும் குறிப்பிட்டார்.

Guvi

``பொதுவாக ஒரு மாணவருக்கு சர்வீஸ் கம்பெனியில் வேலை கிடைப்பதற்கும், புராடெக்ட் கம்பெனியில் பணி கிடைப்பதற்கும் இடையே நிறைய வேறுபாடுகள் இருக்கின்றன. சர்வீஸ் கம்பெனிக்குத் தேர்ந்தெடுக்கப்படும் மாணவருக்கு ஓரிரு மாதங்கள் பயிற்சியளிக்கப்படும். பின்னர்தான் புராஜெக்ட்கள் தரப்படும். ஆனால், புராடெக்ட் கம்பெனியில் பணியில் இணைந்தவுடனேயே பணிகள் தொடங்கிவிடும். பயிற்சி என்பதே இருக்காது. எனவே அனுபவமிக்கவர்களுக்கு மட்டும்தான் புராடெக்ட் கம்பெனியில் வேலை கிடைக்கும். இதனால்தான் சர்வீஸ் கம்பெனியில் பனிபுரிபவருக்குக் குறைவான சம்பளமும், புராடெக்ட் கம்பெனியில் பணிபுரிபவருக்கு அதிகமான சம்பளமும் கிடைக்கிறது. பொதுவாக கோச்சிங் சென்டர்களிலோ அல்லது பிற ஆன்லைன் தளங்களிலோ படிப்பவர்கள், சர்வீஸ் கம்பெனிக்குப் பணிக்குச் செல்லத்தான் ஆசைப்படுவர். மேலும், புராடெக்ட் கம்பெனியில் வேலை கிடைப்பது கடினம். ஆனால், அங்கே பணிபுரிந்தவர்கள் சர்வீஸ் கம்பெனியில் மிக எளிதாகப் பணியில் சேர்ந்துவிடலாம். ஆனால், நாங்கள் எல்லோரும் புராடெக்ட் கம்பெனியிலேயே பணிபுரிந்தவர்கள் என்பதால், அவர்களின் தேவையை உணர்ந்துதான் பாடங்களை உருவாக்கியிருக்கிறோம். எனவே, எங்களிடம் பயின்ற நிறைய மாணவர்கள் புராடெக்ட் கம்பெனிகளில் பணிக்குச் சேர்ந்திருக்கின்றனர்.

மேலும், ஒரு மாணவனின் கற்றல் அறிவை எங்கள் பிளாட்ஃபார்மிலேயே சோதனை செய்யமுடியும். எனவே, நிறைய நிறுவனங்கள் குவியின் இணையதளத்திலேயே கேம்பஸ் இன்டர்வியூக்களை நடத்தியிருக்கின்றன. பேபால், ஃப்ரெஷ்டெஸ்க், சார்ஜ்பீ, ரெட்பஸ் போன்ற பிரபல நிறுவனங்கள்கூட எங்கள் மூலம் பணிக்கு ஆள் எடுத்திருக்கின்றன. கல்லூரியில் அரியர் வைத்த மாணவர்கள்கூட எங்கள் பிளாட்ஃபார்ம் மூலம் பணி பெற்றுள்ளனர். அதற்கு காரணம், குறிப்பிட்ட துறையில் அவரின் அறிவும், பயிற்சியும்தான்." என்கிறார் உற்சாகமாக.

பாலமுருகன்

குவி நிறுவனத்தோடு இவர்களின் சாதனை முடிந்துவிடவில்லை. மெஷின்லேர்னிங், AI குறித்து நிறைய பல்கலைக்கழகங்களில் தொடர்ந்து உரையாற்றியும் வருகிறார் பாலமுருகன். கடந்த வருடம் வரை முதலாம் ஆண்டு இன்ஜினீயரிங் சிலபஸில் C, C++ புரோகிராம்கள் மட்டுமே கற்றுக்கொடுக்கப்பட்டு வந்தன. அதனை இந்த ஆண்டு பைத்தான் மொழியாக மாற்றியது அண்ணா பல்கலைக்கழகம். காலத்திற்கேற்ப எடுக்கப்பட்ட இந்த முடிவை பலரும் பாராட்டினார்கள். இந்த மாற்றத்தில் பாலமுருகனுக்கும் பங்குண்டு. அண்ணா பல்கலைக்கழகத்தின் சிலபஸ் கமிட்டியில் பாலமுருகனும் ஓர் உறுப்பினர். மேலும், இதற்காக அண்ணா பல்கலைக்கழகத்தின் கீழ் இயங்கும் பொறியியல் கல்லூரி ஆசிரியர்களுக்கும் `குவி' மூலமே பயிற்சியும் அளித்திருக்கிறார்.  

``தற்போது தமிழில் மட்டுமன்றி பிறமொழிகளிலும் எங்கள் பாடங்களை மாற்றுவதற்காகக் கேட்டிருக்கிறார்கள். இதுவரைக்கும் ஒரு லட்சத்திற்கும் மேற்பட்ட யூசர்கள் குவியில் ரெஜிஸ்டர் செய்திருக்கிறார்கள். ஒரு பிசினஸாகவும் நாங்கள் வெற்றியடைந்துவிட்டோம். எங்களின் நோக்கம் ஆன்லைன் கோர்ஸ்களைச் சொல்லித்தருவது மட்டுமல்ல; தமிழகப் பொறியியல் மாணவர்களை, தற்போதைய சவால்களுக்கு ஏற்ப தயார் செய்வதுதான். அந்தப் பாதையில் தொடர்ந்து பயணிப்பதுதான் எங்களின் இலக்கு" என்றபடி விடைகொடுத்தார் பாலமுருகன்.

பிறநாட்டு நல்லறிஞர் சாத்திரங்களை, தமிழ்மொழியில் பெயர்த்தல் மட்டுமல்ல; இப்படிக் காலத்திற்கேற்ற மாற்றவேண்டியதும் தற்போதைய தேவையாக இருக்கிறது; இந்தப் பயணத்தில் புதியவர்கள் நிறையபேர் இன்னும் இணையவேண்டும்; தாய்மொழிக்கல்வியின் சிறப்பை அனைவருமே உணரவேண்டும்!

Do you like the story?

Please Appreciate the Author by clapping!