வெளியிடப்பட்ட நேரம்: 15:41 (28/03/2017)

கடைசி தொடர்பு:15:10 (29/03/2017)

நாளை ஆனந்த விகடன் நம்பிக்கை விருதுகள் விழா..! விழா நாயகர்களின் அணிவரிசை - 2 #AnandaVikatanNambikkaiAwards #VikatanAwards

 

 

சிறந்த டிவி சேனல்

சன் மியூஸிக்

சையும் இளமையும் கலந்த காக்டெய்ல். இளைஞர்களைக் கவரும் மேஷ்அப்கள், இண்டிபெண்டன்ட் இசையமைப்பாளர்களின் ஆல்பங்களுக்கான  அங்கீகாரம், மெலடி, கானா, ராப் என எல்லாமே உண்டு... எப்போதுமே உண்டு சன் மியூஸிக்கில். போரடிக்கும்போது எல்லாம் தமிழ் இளைஞர்களின் முதல் சாய்ஸாக இருப்பது சன் மியூஸிக்தான். காரணம், இங்கே உற்சாகம் அன்லிமிடெட். `செந்தமிழ்ப் பெண்ணே’, `இங்க என்ன சொல்லுது?’, `ஃப்ரீயா விடு’, `காபி டீ ஏரியா’ என வித்தியாச நிகழ்ச்சிகள் அனைத்தும் புத்தம் புதிய கான்செப்ட்டுகள். அவை ஆடலும் பாடலும், ரியாலிட்டி ஷோ தொல்லைகளுக்கு நடுவில் பாலைவனசோலையாக இனிமை சேர்த்தன. பார்வையாளர்களோடு எந்நேரமும் கலாய்த்தலும் கலக்கலுமாக உரையாடி மகிழும் துடிப்பான காம்பியர்கள் சன் மியூஸிக்கின் பெரிய பலம்.


சிறந்த டிவி நிகழ்ச்சி

ஒரு வார்த்தை ஒரு லட்சம்

விஜய் டிவி

மிங்கிலீஷ் ஆக்கிரமித்துவிட்ட தொலைக்காட்சிகளில், இன்னமும் அழகுத் தமிழில் அரங்கேறும் அட்டகாச நிகழ்ச்சி இது ஒன்றுதான். வெறும் வார்த்தை விளையாட்டாக மட்டும் அல்லாமல், தமிழ் மொழியின் சிறப்பை அடுத்த தலைமுறைக்குக் கொண்டுசெல்கிறது `ஒரு வார்த்தை ஒரு லட்சம்’ நிகழ்ச்சி. ஐந்து ஆண்டுகளுக்கும் மேலாக விஜய் டி.வி-யில் ஒளிபரப்பாகும் இந்த நிகழ்ச்சிக்கு, உலகம் முழுவதும் ரசிகர்கள் உண்டு. தமிழ்நாட்டில் உள்ள பல பள்ளிகளும், இந்த நிகழ்ச்சியில் தங்கள் மாணவர்களையும் பங்குபெறவைக்க போட்டிபோட்டுக்கொண்டு தயாராகின்றன. முழுமையான திறமையும் தமிழில் நல்ல தேர்ச்சியும் இருந்தால் மட்டுமே இதில் வெல்ல முடியும் என்பதுதான் இந்த நிகழ்ச்சியின் அடிப்படை. தமிழ் மொழிக்குப் பெருமை சேர்க்கும் `ஒரு வார்த்தை ஒரு லட்சம்’ நிகழ்ச்சி, இன்னும் பல ஆயிரம் எபிசோடுகளைத் தாண்ட வாழ்த்துகள்.


சிறந்த நெடுந்தொடர்

தெய்வமகள், சன் டிவி

வள், தமிழ்க் குடும்பங்களின் தலைமகள். சன் டி.வி-யில் ஒளிபரப்பாகும் `தெய்வமகள்’ தொடருக்கு, உலகெங்கும் ரசிகர்கள். ஒவ்வொரு வீட்டிலும் தங்கள் மகளாக, சகோதரியாக நாயகி சத்யாவை நேசிக்கிறார்கள். தனக்கு வரும் அத்தனை இன்னல்களையும் அநாயாசமாக எதிர்த்துப் போராடும் சத்யாவின் கதாபாத்திரம், இன்றைய பெண்களுக்கு இன்ஸ்பிரேஷன். தனி ஒருத்தியாக, மொழி தெரியாத ஹைதராபாத் நகரில் கணவனுக்காகப் போராடிய எபிசோடு, யூ-டியூப் வரை வைரல் ஹிட் அடித்தது. யூகிக்கமுடியாத திருப்பங்கள், உணர்வுகளைக் கடத்தும் வசனங்கள், விறுவிறுப்பான திரைக்கதை என, தெய்வமகளை எல்லோருக்கும் பிடிக்க எண்ணற்ற காரணங்கள் உண்டு. அதற்குப் பின்னால் இருப்பது இயக்குநர் எஸ்.குமரனின் உழைப்பு.


சிறந்த நிகழ்ச்சித் தொகுப்பாளர்

கார்த்திகைச் செல்வன்

நேர்படப் பேசு, புதிய தலைமுறை

ன்பின் நெறியாளன். மக்களின் நேரடிப் பிரச்னைகளைப் பற்றி நேர்படப் பேசும் நேர்மை முகம். கார்த்திகைச் செல்வனின் விவாத நிகழ்ச்சிகள், சண்டைகளாக மாறாது. பேட்டிகள், தனிநபர் தாக்குதலுக்கு ஒருபோதும் இடம் கொடுக்காது. ஏ.சி அறை விவாதங்களைத் தாண்டி, களத்தில் இறங்கி செய்திகளை அனைத்துக் கோணங்களிலும் அலசுவதில் தனித்து நிற்பவர். பத்திரிகையாளராக இதழியல் துறைக்குள் நுழைந்தவர், இணையதளம், தினசரி, தொலைக்காட்சி நெறியாளர் என அனைத்துத் திசைகளிலும் பயணித்து, தமிழ் ஊடகத் துறையின் தனி அடையாளமாகத் திகழ்கிறார். வாழ்த்துகள் கார்த்தி.


சிறந்த நிகழ்ச்சித் தொகுப்பாளினி

ஜாக்குலின்

கலக்கப்போவது யாரு?, விஜய் டிவி

டாக்டர் ஆகணும், ஏர்ஹோஸ்டஸ் ஆகணும் என்ற கனவுகளைத் தள்ளிவைத்துவிட்டு, `கலக்கப்போவது யாரு?’ செட்டில் கலகலவெனக் கலக்கிக்கொண்டிருக்கும் காமெடிப் பொண்ணு. கலாய்த்தலும் கலாய்த்தலின் நிமித்தமுமாகவே மட்டும் நடத்தப்படும் நிகழ்ச்சியில், பங்கேற்பாளர்களையும் நடுவர்களையும் பேலன்ஸ் செய்வதில் ஜாக்குலின் கில்லாடி. தன்னைக் கலாய்க்கும் கமென்ட்டுகளை அதிர்ச்சிப் பார்வைகளாலும் ஜாலிப் புன்னகைகளாலும் கடந்துசெல்லும் சூப்பர் தொகுப்பாளினி. நிகழ்ச்சியை நடத்துவதோடு மட்டும் அல்லாமல், தேவைப்படும்போது பெர்ஃபாமராகவும் மாறிக் கலக்கும் தோழி. லயோலாவில் விஷுவல் கம்யூனிகேஷன் படிக்கும் ஜாக்குலினுக்கு, `கலக்கப்போவது யாரு?’ கொடுத்திருப்பது கலர்ஃபுல் முகவரி.


சிறந்த பண்பலை

ரேடியோ சிட்டி

`நாடி நரம்பு எல்லாம் ரேடியோ சிட்டி... எஃப்.எம்-னா சென்னை சிட்டி’ என, சென்னையின் கலகல எஃப்.எம்-மாகத் தெறிக்கவிடுகிறது ரேடியோ சிட்டி. `91.1 கண்ணா... நான் உங்க முன்னா’ என, காலையில் தொடங்கும் பிரேக்ஃபாஸ்ட் ஷோ முதல் இரவு ஹஸ்க்கி வாய்ஸில் காதல் பேசும் ‘லவ் குரு’ வரை எல்லாமே வெரைட்டி வெடிகள்தான். கச்சிதமான பாடல் தேர்வு, அட்வைஸ்களை மட்டும் வழங்காமல் களத்தில் இறங்கி வேலைசெய்வது, ஜாலி கேலிகளுக்குக் குறைவு இல்லை எனக் கச்சித காம்போவாக இருக்கிறது ரேடியோ சிட்டி. சென்னையைத் தாண்டி, கோவையிலும் ரேடியோ சிட்டிக்குத்தான் செம லைக்ஸ். `சந்தேகம் இருந்தா சக்திகிட்ட கேளுங்க’வும், சென்னையின் ஸ்பெஷல் உணவுகளையும் உணவகங்களையும் அலசும் அஞ்சனாவின் நிகழ்ச்சியும் ரொம்பவே ஸ்பெஷல். வர்தா புயலில் மரங்கள் எல்லாம் கொத்துக் கொத்தாகச் சாய, மக்களோடு களத்தில் இறங்கி மரக்கன்றுகளை நட்டும் நெகிழ்த்தியது இந்த நகரத்துப் பண்பலை.


சிறந்த பண்பலைத் தொகுப்பாளர்

சுரேஷ்

ஹலோ எஃப்.எம்

மிழ்ப் பண்பலைகளில் சொல்லி அடிக்கும் கில்லி, ஆர்.ஜே சுரேஷ். ஹலோ எஃப்.எம்-மின் எட்டு பண்பலை நிலையங்களுக்கும் தலைமை நிகழ்ச்சித் தயாரிப்பாளர் இவர்தான். கிரிக்கெட் போட்டிகளில் இந்தியா ஆடுகிறது என்றால், டிவி வால்யூமை ம்யூட்டில் வைத்துவிட்டு, ஹலோ எஃப்.எம்-மில் `சொல்லி அடி’ நிகழ்ச்சியின் வால்யூமைக் கூட்டுகிறார்கள் சென்னைவாசிகள். அந்த அளவுக்கு சுரேஷின் கமென்ட்ரிகள் களைகட்டுகின்றன. மேட்ச்சின் சூழலுக்கு ஏற்ப பாடல்கள் ஒலிபரப்புவது, கலாய் காமெடி வசனங்களை ஓடவிடுவது, கூடவே போட்டிகள் வைத்துப் பரிசுகள் கொடுப்பது எனப் பரபரப்பாகப் பாய்கிறது சுரேஷின் ஸ்டாமினா. மாலை நேரங்களில் ஒலிபரப்பாகும் `சினிமாயணா’ நிகழ்ச்சியிலும் செவிகளுக்கு விருந்து படைக்கும் சுரேஷின் குரலில் எப்போதும் இளமை துள்ளும்.


சிறந்த பண்பலைத் தொகுப்பாளினி

மிருதுளா

பிக் எஃப்.எம்

ந்நேரமும் புன்னகையோடு ஒலிக்கும் மகிழ்ச்சிக் குரல் மிருதுளாவுக்குச் சொந்தம். ஆரவாரமான அடுக்குமொழிகளில் பேசி எரிச்சலை ஏற்படுத்தாமல், போரடிக்கும் கதைகள் சொல்லிக் கடுப்பேற்றாமல்,  எளிமையும் இனிமையுமாகப் பேசும் பொறுப்புள்ள ஆர்.ஜே. தினமும் ஒலிபரப்பாகும் மிருதுளாவின் `உள்ளே வெளியே’, தமிழ்ப் பண்பலைகளில் அவசியமான நிகழ்ச்சி. நீங்க சாப்பிடுறது பிளாஸ்டிக் முட்டையா?, ஸ்டெம் செல் ஆராய்ச்சினா என்ன?, சாதனை இளைஞர்கள் மற்றும் பிரபலங்களின் கலாய் பேட்டிகள் என நிறையவே மாற்றி யோசிப்பவர் மிருதுளா. இவருடைய சமீபத்திய சாதனை, 4 நாட்கள், 48 மணி நேரம் எனத் தொடர்ந்து இரவுகளில் தெருத்தெருவாக அலைந்து திரிந்து தொடர்ச்சியாகக் கண்விழித்து மாரத்தான் ஷோ நடத்தி சாதனை படைத்திருக்கிறார் இந்த பிக் மனுஷி.


சிறந்த நாவல்

சூல் - சோ.தர்மன்

அடையாளம்

டித்தட்டு மக்களின் வாழ்க்கைப்பாடுகளைப் பிரதானப் புனைவுலகாகக்கொண்ட சோ.தர்மனின் மூன்றாவது நாவல் `சூல்’. வேளாண்மையோடு பின்னிப்பிணைந்த தென் தமிழக மக்களின் வாழ்க்கை, அவர்களின் இயற்கை சார்ந்த அறிவு, அறம் சார்ந்த நம்பிக்கைகள், கொண்டாட்டங்கள் நவீன அறிவியல் மற்றும் அரசியலால் அவை காணும் வீழ்ச்சி... ஆகியவற்றை அந்த நிலத்தின் பச்சையத்துடன் பதிவுசெய்கிறது `சூல்’ நாவல். கண்மாயும் நீரும் வேளாண்மையுமே நாவலின் முக்கியப் பேசுபொருட்கள். ஒரே வாசிப்பில் முடித்துவிடும் அளவுக்கான எளிய மொழிநடை, நாவலின் பெரும் பலம். நாவல் எங்கும் கண்மாய் பலமுறை சூலியின் வயிற்றோடு உவமை செய்யப்பட்டுக்கொண்டே வருகிறது. சோ.தர்மன் அழுத்தமாகச் சொல்ல விரும்புவதும் அதைத்தான். `நீர்நிலைகளே இந்த உலகின் உயிர்சுமக்கும் சூல்’.


சிறந்த சிறுகதைத் தொகுப்பு

நறுமணம் - இமையம்

க்ரியா

விளிம்பு நிலை வாழ்வை, மறுக்கப்பட்ட பெண்ணுலகை தன் எழுத்துக்களில் தொடர்ந்து முன்வைப்பவர் எழுத்தாளர் இமையம். கல்வியின் பெயரால், நுகர்வுக் கலாசாரத்தால் சிதைக்கப்படும் மனித மனதின் வலிகளை அர்த்தத்தோடு பதிவுசெய்யும் கதைத் தொகுப்பு. அரசாங்க வேலையில் இருக்கும் பெண்களுக்குக்கூட இன்னும் கிடைக்காத பொருளாதாரச் சுதந்திரம் பற்றி கேள்வி எழுப்பும் `வீடும் கதவும்’, அட்மிஷன்களுக்கு பிள்ளைபிடிப்பவர்களாக மாற்றப்படும் தனியார் பள்ளி ஆசிரியைகளின் வலியைச் சொல்லும் `ஆஃபர்’ போன்ற சிறுகதைகள் தற்காலச் சமூக அவலத்தின் உணர்வுப் பதிவுகள். இமையத்தின் மொழி எளிமையாலும் பேசுபொருளாலும் `நறுமணம்’ தொகுப்பு வாசகர்களை ஈர்க்கிறது.


சிறந்த கட்டுரைத் தொகுப்பு

சந்நியாசமும் தீண்டாமையும்

ராமாநுஜம், புலம் பதிப்பகம்

ந்நியாசம், தீண்டாமை, சாதி ஆகியவற்றுக்கு இடையேயான உறவுகளை, முரண்களை ஒப்பிட்டு விவாதிக்கிறது `சந்நியாசமும் தீண்டாமையும்’ கட்டுரை நூல். இந்தியவியலின் முக்கிய ஆய்வாளர்கள் பேட்ரிக் ஓலிவல், வீணா தாஸ், சுந்தர் சருக்காய் ஆகியோரின் கருத்துக்களின் வெளிச்சத்தில் சாதியம் சார்ந்த சில புதிய கருத்துக்களைக் கண்டடைகிறார் ஆசிரியர் ராமாநுஜம். இது, சாதியம் சார்ந்த உரையாடல்களில் தனித்தன்மை வாய்ந்த குரல். இது நம் காலத்தின் எரியும் சிக்கல் ஒன்றைக் குறித்து அதன் தத்துவார்த்தத் தளத்தில் உரையாடுகிறது. சமூக விஞ்ஞான தளத்தில் எழுதப்பட்டு, தமிழில் வெளியான மிக முக்கியமான நூல்.


சிறந்த கவிதைத் தொகுப்பு

கொஞ்சம் மனதுவையுங்கள் தோழர் ஃப்ராய்ட்

வெய்யில், மணல்வீடு வெளியீடு

டுக்கப்பட்ட மக்களின் அரசியலை, கண்டுகொள்ளப்படாத மாற்று அழகியலை முன்வைக்கிறது கவிஞர் வெய்யிலின் கவிதைகள். தொழிற்சாலையில் உழைக்கும் தொழிலாளர்களின் மாசடைந்த நுரையீரலை, மேகத்துக்கு அருகே பறக்கும் காக்கைகளாகச் சொல்லும் உவமை மூலமும், நீர்நிலைகளைச் சுரண்டும் தண்ணீர்க் கொள்ளையை நீர்க்காக்கைகள் மூலமும், இடதுசாரி அரசியலை நவீன மொழியில் சொல்கின்றன `கொஞ்சம் மனதுவையுங்கள் தோழர் ஃப்ராய்ட்’ தொகுப்பின் கவிதைகள். துயர், வலி, போராட்டம், இயற்கைச் சீரழிவு, கலாசாரத்துக்கு வெளியே தள்ளப்படும் மீறல்கள், பெண்களுக்கான தனித்துவம், இசை போன்ற நம் வாழ்க்கைக்கு உள்ளேயும் வெளியேயும் நிறைந்திருக்கும் உலகை, அடர்த்தியான மொழியில் சொல்லும் முக்கியமான கவிதைத் தொகுப்பு.


சிறந்த சிறார் இலக்கியம்

மாயக்கண்ணாடி 

உதயசங்கர், நூல்வனம் வெளியீடு

‘ஒரு ஊர்ல ஒரு ராஜா...’ என ஆரம்பிக்கும் எளிய நீதிக்கதைகள்தான். ஆனால், வித்தியாசமான கற்பனைகளால், சிறார்களை பல புதிய அனுபவங்களுக்கு அழைத்துச் செல்கின்றன இந்தத் தொகுப்புக் கதைகள். பெரும்பாலான கதைகளின் மையப்பாத்திரம் ராஜாதான். ஆனால், அவை ராஜாவைப் பற்றி பெருமை பேசுபவை அல்ல. அவரின் அதிகாரத்தைக் கேலிசெய்பவை. சிறார்களுக்குப் புரியும் வார்த்தைகளில் எளிய கதைகளாகச் சொல்லும் உதயசங்கர், தனது சுவாரஸ்யமான சொல்முறையால் பெரியோர்களையும் ஈர்க்கிறார். சிறார்களின் மனதில் அவர்களும் அறியாதவாறு அதிகாரத்துக்கு எதிரான விமர்சனத்தை உருவாக்க முயலும் இந்த `மாயக்கண்ணாடி’, சமூகத்துக்குத் தேவையான தற்கால அவசியம்!


சிறந்த நாவல் (மொழிபெயர்ப்பு)

ஊதாநிறச் செம்பருத்தி - சிமாமந்தா எங்கோசி அடிச்சி

தமிழில்: பிரேம், அணங்கு பெண்ணியப் பதிப்பகம்

றுப்பின ஆப்பிரிக்க அரசியல் மற்றும் அழகியல் குறியீடாகக் கொண்டாடப்படுபவர் எழுத்தாளர் சிமாமந்தா எங்கோசி அடிச்சி. நைஜீரியப் பல்கலைக்கழகத்தில் இவர் படித்தபோது எழுதிய நாவல் `ஊதாநிறச் செம்பருத்தி’. இது 2005-ம் ஆண்டு காமன் வெல்த் எழுத்தாளர் விருது பெற்றது. ஆண் மையச் சிந்தனைகளாலும் வெள்ளை நிற மயக்கத்தாலும் இயக்கப்படும் உலகை, பொதுவெளியில் இழுத்துவந்து பெண்ணியக் கேள்விகளுக்கு முன்பு அப்பட்டமாக நிறுத்துகிறது இந்த நாவல். நேரடி தமிழ் நாவலைப் படிக்கும் உணர்வைத் தரும் அளவுக்கு மொழிபெயர்த்திருக்கிறார் எழுத்தாளர் பிரேம். இவர், டெல்லி பல்கலைக்கழகத்தின் இந்திய இலக்கியம் மற்றும் ஒப்பிலக்கியப் பேராசிரியர்.


சிறந்த சிறுகதைத் தொகுப்பு (மொழிபெயர்ப்பு)

மேன்கஸ்பியஸ்

- தமிழில்: செ.ஜார்ஜ் சாமுவேல், புது எழுத்து வெளியீடு

ல உலக நாடுகளைச் சேர்ந்த தனித்துவமான எழுத்தாளர்களின் கதைகள் அடங்கிய தொகுப்பு `மேன்கஸ்பியஸ்’. யூலியோ கொர்த்தஸாரின் மொழியை தமிழில் மாற்றம்செய்வது, புலியை மேய்க்கும் சாகசம். அதை ஜார்ஜ் சாமுவேல் சிறப்பாகச் செய்திருக்கிறார். தனிமையின் குறியீடாக எளிதில் சமைக்கக்கூடிய ஸ்பெஹெட்டி உணவை முன்னிறுத்தும் `ஸ்பெஹெட்டி ஆண்டு', பல அடுக்கு விவரணைகளுடன்கூடிய `புலனாகா மரம், உறங்கும் பெண்'... ஆகிய ஹாருகி முரகாமியின் கதைகள், குரானியச் சட்டகத்தினுள் இருந்து பெண்ணிய மொழியில் பேசும் அலிஃபா ரிஃபாத்தின் `மினாரின் தொலைதூரக் காட்சி' போன்ற தனித்துவமான கதைகளின் நிறைவான மொழிபெயர்ப்புடன்கூடிய சிறுகதைத் தொகுப்பு `மேன்கஸ்பியஸ்’.


சிறந்த கட்டுரைத் தொகுப்பு (மொழிபெயர்ப்பு)

இந்துக்கள் ஒரு மாற்று வரலாறு - வெண்டி டோனிகர்

தமிழில்: க.பூரணச்சந்திரன், எதிர் வெளியீடு

ந்து மதம் மீதும் `இந்துக்கள்' எனப்படும் மக்கள் மீதும் விருப்பு வெறுப்பற்ற ஒரு மாற்றுப்பார்வையை முன்வைக்கிறார் வெண்டி டோனிகர். வேதங்கள், உபநிடதங்கள், புராணங்கள், தொல்பொருள் ஆய்வுகள், வரலாற்றுக் குறிப்புகள், வாய்மொழித் தரவுகள், நாட்டார் நம்பிக்கைகள், பக்தி இலக்கியங்கள், கலைவழிச் சான்றுகள் போன்ற பல்வேறு ஆதாரங்களோடு இந்து மதத்தை அதற்குத் தேவையான உயரத்துக்குச் சென்று ஒரு பறவைப் பார்வை பார்க்கிறார். இந்து மதத்தின் சுதந்திரக் கலப்புத்தன்மை, சகிப்புத்தன்மை போன்ற அதன் இளகிய குணாம்சங்களோடு, வரலாற்றில் பெண்கள் மற்றும் ஒடுக்கப்பட்ட மக்களுக்கு அது செய்த கொடுமைகளையும் விமர்சனபூர்வமாக ஆராய்கிறது இந்த நூல். மூலநூலின் எளிமையும் ஆழமும் வெளிப்பட மொழிபெயர்த்திருக்கும் க.பூரணச்சந்திரன், பாராட்டுக்கு உரியவர்.


சிறந்த கவிதைத் தொகுப்பு (மொழிபெயர்ப்பு)

துயிலின் இரு நிலங்கள்

- தமிழாக்கம்: எஸ்.சண்முகம், தோழமை வெளியீடு.

ல்வேறு வண்ணங்களால் ஆன ஓவியம் போல, பல நூறு கருவிகளால் வாசிக்கப்படும் இசைக் குறிப்புகள் போல உள்ளது `துயிலின் இரு நிலங்கள்’ மொழிபெயர்ப்புக் கவிதை நூல். 1,000 வருடங்களுக்கு முந்தைய கீழைத்தேயக் கவிஞர்களின் கவிதைகள் முதல் 21-ம் நூற்றாண்டைச் சேர்ந்த ஐரோப்பியக் கவிஞர்களின் கவிதைகள் வரை இந்தத் தொகுப்பில் இடம்பெற்றுள்ளன. ஆன்மிகம், மரணம், துயரம், சமூகம் சார்ந்த கவிதைகள் எனப் பல்வேறு களங்கள் இருந்தாலும், காதலே இந்தத் தொகுப்பின் பிரதானமான பாடுபொருள். செவ்வியல் கவிதைகள் என்பதால், நல்ல தமிழ்ச் சொற்கள் பலவற்றையும் மீட்டுருவாக்கம் செய்திருக்கிறார் மொழிபெயர்ப்பாளர். காதல் கவிதைகளை அந்தந்த நிலத்தின் ஆன்மாவுடன் தமிழாக்கம் செய்திருக்கிறார். சமகாலக் கவிதைகளுக்கு எஸ்.சண்முகத்தின் மிகச்சிறந்த பங்களிப்பு, இந்த மொழிபெயர்ப்புக் கவிதைகள்.


சிறந்த சிறார் இலக்கியம் (மொழிபெயர்ப்பு)

இடிதெய்வத்தின் பரிசு

தமிழில்: ஜெயந்தி சங்கர், புக்ஸ் ஃபார் சில்ரன்

42 சிறார் சீனக் கதைகளின் தொகுப்பு `இடிதெய்வத்தின் பரிசு’. சீனாவுக்கே உரிய நம்பிக்கைகள், கற்பனைகள் வெளிப்படும் கதைகள் இவை. பெரும்பாலும் இயற்கை சார்ந்த சீன நிலத்தின் பிரத்யேக விலங்குகள், தாவரங்கள், பறவைகள், தேவதைகள், புராண உயிரினங்கள் தோன்றி உலாவும் கதைகளாக இருக்கின்றன. சிறார்களுக்கு எப்போதும் விருப்பமான கனவு உலகங்கள், மாயாஜாலங்கள் போன்ற மகிழ்வான அனுபவம் தரும் கதைகளைத் தேடித் தொகுத்து மொழிபெயர்த்திருக்கிறார் ஜெயந்தி சங்கர். இவர் சிங்கப்பூரில் வாழும் தமிழ் எழுத்தாளர். ஒவ்வொரு கதையின் முடிவிலும் நீதியை, மனிதநேயத்தைப் பகிரும் சிறந்த சிறார் கதைகளின் தொகுப்பு.


சிறந்த சிற்றிதழ்

காடு

மிழில் சூழலியல் சார்ந்த மிக முக்கியமான முயற்சி ‘காடு’ சிற்றிதழ். இருமாத இதழாக வெளிவருகிறது. நீர் உயிர்கள், தாவரங்கள், பறவைகள், விலங்குகள், பூச்சிகள், பருவகாலப் பிரச்னைகள், பண்பாட்டுப் போக்குகள் என பக்கத்துக்குப் பக்கம் விரிவான தளத்தில் பேசுகிறது இதழ். நக்கீரனின் ‘எறும்புகள் - ஆறுகால் மனிதர்கள்’, கு.வி.கிருஷ்ணமூர்த்தியின் ‘உலகை மாற்றிய தாவரங்கள்’, அ.பகத்சிங்கின் ‘வாழும் மூதாதையர்கள்’ போன்ற முக்கியமான தொடர்கள் அதிகக் கவனம் பெற்றவை. இதழின் பேசுபொருள் கருதி முழுமையாக வண்ணப்பக்கங்களுடன் வெளிவருகிறது. முக்கியமான பல சூழலியல் ஆர்வலர்கள், இதழின் ஆசிரியர் குழுவில் இருக்கிறார்கள் என்பது குறிப்பிடத்தக்கது. பல சிரமங்களுக்கு மத்தியில் இதழைத் தொடர்ந்து கொண்டுவரும் ஏ.சண்முகானந்தம், பா.அமுதரசன் இருவரும் பாராட்டுக்கு உரியவர்கள்.


சிறந்த வெளியீடு

ஏ.கே.செட்டியார் படைப்புகள்

பதிப்பாசிரியர்: கடற்கரய் மத்தவிலாச அங்கதம் சந்தியா பதிப்பகம்

.கே.செட்டியார், மூன்று முறை உலகம் சுற்றிய தமிழர்; இந்திய ஆவணப்பட இயக்க முன்னோடி; பல தமிழ் நூல்களின் பதிப்பாளர்; தனது உலகப் பயண அனுபவங்களை எழுத்தாக்கியவர்; இலக்கிய ஆய்வாளர்... எனப் பல முதல் பங்களிப்புகளை உலகுக்குத் தந்தவர். ஆவணப்படுத்துதலின் முக்கியத்துவம் உணர்ந்து செயல்பட்ட செட்டியார் பற்றிய ஆவணங்களே தமிழில் பெரிதும் இல்லை. அப்படிப்பட்ட சூழலில், அவரது முழுப் படைப்புகளையும் தாங்கி வந்திருக்கின்றன `ஏ.கே.செட்டியார் படைப்புகள்’ என்ற நூலின் இரு பாகங்கள். பாரதிதாசனின் படைப்புகளைப் பதிப்பித்தது, தாம் பயணித்த பல்வேறு நாடுகள் குறித்த கலாசார, அரசியல் அவதானிப்புகள், தடைசெய்யப்பட்ட அவரது ‘ஜப்பான்’ எனும் நூல் ஆகியவை பற்றி பல சுவாரஸ்யங்களைக் கொண்டிருக்கின்றன இந்த நூல்கள். இந்த ஆவணப் பெட்டகத்தைத் தொகுத்த பதிப்பாசிரியர் கடற்கரய் மத்தவிலாச அங்கதம், சிறப்பாக உருவாக்கியிருக்கும் சந்தியா பதிப்பகம் இருவரும் பாராட்டுக்கு உரியவர்கள்.


சிறந்த சிறார் இதழ்

தும்பி

குழந்தைகளின் கனவு உலகை மேலும் வண்ணமயமாக உயிர்ப்பிக்கிறது `தும்பி’ சிறார் மாத இதழ். `உயிர் தரும் மரம்', `ஆர்தர் நாய்', `கட்டெறும்பு', `எல்மர் யானை' என `தும்பி’ இதழ், ஒவ்வொரு மாதமும் சிருஷ்டிக்கும் `புதிய ஜீவன்கள்' வெள்ளந்திக் குழந்தைகளின் குட்டி இதயத்தில் சிறகடிக்கின்றன. நறுக்கென ஈர்க்கும் சதுர வடிவம், பளபளப்பான காகிதம், ஒவ்வொரு பக்கத்திலும் அள்ளித் தெளிக்கப்பட்ட வண்ணங்கள் என, குழந்தைகள் மனதுக்கு மிக நெருக்கமாக `தும்பி’களைப் பறக்கவிடுகிறார் இதழ் ஆசிரியர் சிவராஜ். தும்பி இதழின் இயல்பான மொழிநடை, நவீனக் குழந்தைகளிடம் மிஞ்சியிருக்கும் பால்யத்தைக் கொண்டாடவைக்கிறது. குழந்தைகளின் உலகை, இயல்பை அதன் அழகோடு மீட்பதற்கான பல களங்களை உருவாக்கித் தரும் `தும்பி’, முக்கியமான சிறார் இதழ்.


சிறந்த விளையாட்டு வீரர்

மாரியப்பன், தடகளம்

ன்னம்பிக்கை நாயகன் மாரியப்பன். 2016-ம் ஆண்டு ரியோ பாராலிம்பிக்கில் இந்தியாவுக்காக பதக்கம் வென்ற தங்கமகன். இளம்பிராயத்திலேயே விபத்தில் ஒரு கால் பாதிக்கப்பட்டாலும், விடாப்பிடியாகப் பயிற்சிகள் செய்து சிகரம் தொட்ட திறமைசாலி. எதிர்பார்ப்புகள் ஏதுமின்றி, கடைக்கோடிக் கிராமத்தில் தன் பயிற்சிகளை அர்ப்பணிப்போடு செய்துகொண்டி ருந்த விளையாட்டு வீரர். காய்கறி விற்கும் அம்மாவின் வறுமை, பயிலவோ பயிற்றுவிக்கவோ இல்லாத வசதிகளும் மாரியப்பனுக்குத் தடையாக இல்லை. பெங்களூரு பயிற்சியாளர் சத்யநாராயணாவின் பார்வையில் படும் வரை, மாரியப்பன் இந்த உலகம் அறியாத ஒளிக்கீற்று. இன்றோ, எதை இழந்தாலும் வலிமையோடு போராடினால் நிச்சயம் வெல்ல முடியும் என்ற நம்பிக்கையைப் பரப்பும் பெருஞ்சூரியன்.


சிறந்த விளையாட்டு வீராங்கனை

சூர்யா, தடகளம்

பெண்களுக்கான டிஸ்டன்ஸ் ரன்னிங்கில், இந்திய அளவில் சூர்யாவை வெல்ல சூர்யாவால்தான் முடியும். 12-வது வயதிலேயே சீனியர் பிரிவில் விளையாடி தங்கம் வென்ற சூர்யா, தடகள விளையாட்டில் இந்தியாவின் நம்பிக்கை. புதுக்கோட்டையைச் சேர்ந்த சூர்யா, 5,000 மற்றும் 10,000 மீட்டர் ஓட்டப் பிரிவுகளில் கில்லி. மேற்படிப்புக்கும் நல்ல வேலைக்கும் பல வாய்ப்புகள் வந்தும், அவற்றை எல்லாம் தன்னுடைய ஒலிம்பிக் கனவுக்காகத் தூக்கி எறிந்துவிட்டு, தொடர்ந்து பயிற்சி எடுத்து வருகிறார். ரியோ ஒலிம்பிக்கில் கலந்துகொள்ளும் வாய்ப்பை மிகச் சில விநாடிகள் வித்தியாசத்தில் தவறவிட்டாலும், டோக்கியோ ஒலிம்பிக்கில் தங்கம் வென்று தமிழ்நாட்டைத் தலைநிமிரச் செய்வதே சூர்யாவின் இலக்கு!


சிறந்த பயிற்சியாளர்

லோகநாதன், தடகளம்

டகளப் பயிற்சி கொடுத்து, பல நூறு இளைஞர்களை பதக்கங்கள் வெல்லவைத்தவர் புதுக்கோட்டை லோகநாதன். 10-ம் வகுப்பு படிக்கும்போது தொடங்கிய ஓட்டம், தேசிய அளவில் சாதித்த பிறகு பயிற்சியாளராக உயர்த்தியிருக்கிறது. புதுக்கோட்டை மாவட்டத்தில் இருந்து இதுவரை 700-க்கும் மேற்பட்டோரை தொலைதூர ஓட்டத்துக்குத் தயார்படுத்தி உள்ளார் லோகநாதன். இதில் பலர், தேசிய சாம்பியன்கள். இன்று பெண்களுக்கான 5,000, 10,000 மீட்டர் ஓட்டத்தில் இந்தியாவின் நம்பர்-1 வீராங்கனையாக இருக்கும் சூர்யா, இவரது மகள். நேஷனல் சாம்பியன்களான ஜி.லட்சுமண், லோகநாதன், நசீர், பொற்பனையான், கவிதா என இவர் பாசறையில் பாடம் பயின்றவர்கள் ஏராளம். இப்போது சங்கீதா, ஐஸ்வர்யா, வனிதா, முருகானந்தம் என அடுத்த தலைமுறையினரையும் உருவாக்கிக்கொண்டிருக்கிறார் லோகநாதன்!


சிறந்த விளம்பரம்

என்ன தெரிகிறது?

ராஜஸ்தான் டூரிசம் மற்றும் Ogilvy & Mather

பார்வையாளனுக்குக் கடத்தவேண்டிய  அனைத்தையும் மிகக் குறைந்த நொடிகளில் கடத்தும் விளம்பரங்களில், ராஜஸ்தான் டூரிசம் விளம்பரங்கள் இந்த வருடத்தின் டாப் ஹிட். ராஜஸ்தானுக்குப் பயணம் செல்பவர்களுக்கு, பாலைவனங்களைத் தாண்டி புதிதாகக் காண என்னென்ன கிடைக்கும் என்பதை அட்டகாசமான விஷுவல்ஸும், எமோஷனல் கனெக்ட்டுமாகக் காட்டி அசரவைத்த விளம்பரங்கள். கொலுசு அணிந்திருக்கும் பூமி, வளையல் அணிந்திருக்கும் வானம் என்ற பொருளில் வரும் நான்கு வரிப் பாடலை ஒவ்வொரு விளம்பரத்திலும் ஒவ்வொரு ட்யூனில் கொடுத்தது யுனீக் டச். பயணிகள் பெயரோடு ராஜஸ்தானைச் சேர்த்து `மீராஸ்தான்', `ஆர்யாஸ்தான்' எனக் காண்பித்தது தோனியின் ஹெலிகாப்டர் ஷாட் லெவல்.


சிறந்த கார்

டியாகோ (டாடா)

‘வாவ்... இது டாடா காரா?!’ என ஆச்சர்யப்படுத்தும் டிசைன்தான் டியாகோவின் முதல் வெற்றி. இண்டிகா கார்களைத் தயாரித்த நிறுவனத்தில் இருந்து ஐரோப்பிய, ஜெர்மானிய கார்களுடன் போட்டிபோட வந்திருக்கும் `மேட் இன் இந்தியா’ கார். ஸ்டைலில் மட்டும் அல்ல, உள்பக்க இடவசதி, இன்ஜின் தரம், பெர்ஃபாமன்ஸ், மைலேஜ் என அனைத்திலுமே டிஸ்டிங்ஷன் வாங்குகிறது டியாகோ. இந்த காரின் மிகப்பெரிய பலம் விலை. 5 லட்சம் ரூபாய்க்குள் பெட்ரோல், 6.5 லட்சம் ரூபாய்க்குள் டீசல் என விலையிலும் வின்னராக இருக்கிறது டியாகோ. சர்வதேசத் தரம் வாய்ந்த மியூஸிக் சிஸ்டம், விபத்தில் இருந்து காப்பாற்றும் காற்றுப் பைகள் என வசதிக்கும் பாதுகாப்புக்கும் முக்கியத்துவம் கொடுக்கும் காராக இருக்கிறது டியாகோ. இன்றைய ஹேட்ச்பேக் கார் மார்க்கெட்டில் டியாகோவின் விலைக்கும், வசதிகளுக்கும், மைலேஜுக்கும் போட்டிபோடக்கூடிய கார் வேறு இல்லை!


சிறந்த பைக்

பஜாஜ் V15

ஜாஜின் சென்டிமென்ட் பைக் V15. இந்தியாவின் போர்க் கப்பலான விக்ராந்தைக் கெளரவிக்கும் வகையில் `V15' என பைக்குக்குப் பெயரிட்டிருப்பதோடு, போர்க் கப்பலின் மெட்டல் பாகங்களைப் பயன்படுத்தி இந்த பைக்கின் பெட்ரோல் டேங்க்கைத் தயாரித்திருக்கிறது பஜாஜ். க்ரூஸர், டூரர் எனக் கலந்துகட்டி டிசைன் செய்யப்பட்டிருக்கும் இது, 150சிசி பைக். பஜாஜ் என்றாலே பட்ஜெட் பைக்குகள் என்பதை நிரூபிக்கும் வகையில், 75,000 ரூபாய்க்குள் இந்த 150சிசி பைக்கை விற்பனைக்குக் கொண்டுவந்து ஹிட் அடித்திருக்கிறார்கள். கிளாஸிக் டிசைன், துடிப்பான இன்ஜின், அடக்கமான விலை என 150சிசி செக்மென்ட்டில் தனக்கெனத் தனி மார்க்கெட்டை உருவாக்கியிருக்கிறது V15.


டிரெண்டிங் @ விகடன்