Published:Updated:

கலைச்செல்விக்கு முன்னால் 15 பாலியல் பலாத்காரங்கள்!

கலைச்செல்விக்கு முன்னால் 15 பாலியல் பலாத்காரங்கள்!
பிரீமியம் ஸ்டோரி
கலைச்செல்விக்கு முன்னால் 15 பாலியல் பலாத்காரங்கள்!

தஞ்சாவூரில் போலிஸ் இருக்கிறதா?கொடூரம்

கலைச்செல்விக்கு முன்னால் 15 பாலியல் பலாத்காரங்கள்!

தஞ்சாவூரில் போலிஸ் இருக்கிறதா?கொடூரம்

Published:Updated:
கலைச்செல்விக்கு முன்னால் 15 பாலியல் பலாத்காரங்கள்!
பிரீமியம் ஸ்டோரி
கலைச்செல்விக்கு முன்னால் 15 பாலியல் பலாத்காரங்கள்!
கலைச்செல்விக்கு முன்னால் 15 பாலியல் பலாத்காரங்கள்!

"கலைச்செல்வியோட அம்மா இறந்து போயிட்டாள். நான்தான் கலைச்செல்வியை வளர்த்தேன். யாரோ அவளைத் தூக்கிட்டுப் போய் நாசப்படுத்தி, கல்லால அடிச்சு கொலை செஞ்சு, ஜட்டியை வாயில் திணிச்சிருக்கானுங்க. உடம்புல ஒட்டுத் துணிகூட இல்லாம போட்டுட்டுப் பேயிருக்கானுங்க. அவங்க அக்கா தங்கச்சியா இருந்தா இப்படிச் செய்வானுங்களா, அந்தப் பாவிங்க?” என்று கதறுகிறார் கலைச்செல்வியின் பெரியம்மாவான பாப்பம்மாள்.

இப்படி, ஒரு கொடூரம் அல்ல... பல கொடூரங்கள் நடக்கும் இடமாக தஞ்சை மாவட்டம் மாறிக்கொண்டு இருக்கிறது. இதற்கு முற்றுப்புள்ளி எப்போது? 

தஞ்சாவூர் மாவட்டம் அம்மாப்பேட்டை ஒன்றியம் சாலியமங்கலத்தைச் சேர்ந்தவர், துப்புரவுத் தொழிலாளியான பாப்பம்மாள். இவரது தங்கை மகள்தான் கலைச்செல்வி. 20 வயது இளம்பெண்ணான கலைச்செல்வி, கடந்த ஜூலை 31-ம் தேதி இரவு, டாய்லெட் போவதற்காக வீட்டின் பின்புறமுள்ள கருவேலங்காட்டுக்குச் சென்றவர், வீடு திரும்பவில்லை. பல இடங்களில் தேடியும் கலைச்செல்வி கிடைக்கவில்லை. மறுநாள் ஆகஸ்ட் 1-ம் தேதி அதிகாலையில், அதே பகுதியைச் சேர்ந்த மற்றொரு பெண் கருவேலங்காட்டுக்கு டாய்லெட் போவதற்காகச் சென்றபோதுதான் கலைச்செல்வி சிதைக்கப்பட்டு கிடந்ததைக் கண்டு அதிர்ந்துள்ளார்.

அந்தப் பெண்ணிடம் பேசினோம். தன் பெயரை வெளியிட வேண்டாம் என்று கேட்டுக்கொண்டார். “நான் டாய்லெட் போனப்போ, நிர்வாணமா ஓர் உடல் கிடந்துச்சு. கிட்டேபோய் பார்த்தப்ப கலைச்செல்வி, உடம்புல துணியே இல்லாம கிடந்தாள். உயிர் இருக்குமான்னு தூக்கிப் பார்த்தேன். மூக்கில் இருந்து ரத்தம் கொட்டிச்சு. வாய்க்குள்ளே அவளோட ஜட்டியைத் திணிச்சிருந்தானுங்க படுபாவிங்க. சுடிதார் பேன்டைவைத்துக் கழுத்தை நெரிச்சிருக்கானுங்க. கல்லால் முகத்தில அடிச்சிருக்கானுங்கபோல. முகம் சிதைஞ்சு போயிருந்துச்சு. அதைப் பார்த்து நான் கதறி அழுதச் சத்தம் கேட்டு, ஆளுங்க எல்லாம் ஓடி வந்தாங்க. பக்கத்துல பாழடைந்த மில் இருக்கு. அங்க வெச்சுதான் கலைச்செல்வியைக் கெடுத்துருக்கானுங்க” என்றார் கண்ணீருடன்.

சாலியமங்கலம் வெள்ளாளர் தெருவைச் சேர்ந்த புரோட்டா மாஸ்டர் ராஜா, குமார் ஆகிய இரண்டு பேரை போலீஸார் கைது செய்துள்ளனர். ராஜாவுக்குத் திருமணமாகி 2 குழந்தைகள் உள்ளன. குமாருக்கு இன்னும் திருமணம் ஆகவில்லை. 

இந்தப் பகுதியைச் சேர்ந்த மக்களிடம் பேசியபோது, மேலும் பல அதிர்ச்சிக்குரிய தகவல்களைச் சொன்னார்கள். “இது முதல் சம்பவம் அல்ல... இதற்கு முன்பாக இந்தப் பகுதியில், 15-க்கும் மேற்பட்ட பெண்கள் பலாத்காரம் செய்யப்பட்டு இருக்கிறார்கள். இரண்டு ஆண்டுகளுக்கு முன்பு சாலியமங்கலம் தோப்புத் தெரு அருகே, ஒரு பள்ளி மாணவியைப் பாலியல் பலாத்காரம் செய்து கொலை செய்திருந்தனர். போலீஸில் புகார் செய்தும், குற்றவாளிகள் கண்டுபிடிக்கப் படவில்லை. நான்கு ஆண்டுகளுக்கு முன்பு சாலியமங்கலம் அருகே கொட்டகொல்லமேடு என்ற இடத்தில் ஒரு பெண் பாலியல் பலாத்காரம் செய்யப்பட்ட சம்பவம் நடந்தது. போலீஸில் புகார் செய்தும், எந்தவித நடவடிக்கையும் எடுக்கவில்லை. உத்தங்குடியில் டாய்லெட் போவதற்காகச் சென்ற ஒரு பெண் பாலியல் பலாத்காரம் செய்யப்பட்டு கொலை செய்யப்பட்டார். உக்கடை அருகே ஒரு பெண் பாலியல் பலாத்காரம் செய்யப்பட்டார். போலீஸில் புகார் செய்தும், நடவடிக்கை இல்லை. திருக்காட்டுப்பள்ளி அருகே கண்டமங்கலம் பகுதியில் ஒரு சிறுமி, கும்பல் வல்லுறவுக்கு ஆளானார். அதில், குற்றவாளிகள் கைது செய்யப்படவில்லை. செங்கிப்பட்டி அருகே மனையேறிப்பட்டியைச் சேர்ந்த ஒரு பள்ளி மாணவி, கும்பல் வல்லுறவுக்கு ஆளானார். அதில், குற்றவாளிகள் கைது செய்யப்படவில்லை. ஓர் ஆண்டுக்கு முன்பாக, அய்யனார் கோயில் அருகே ஒரு பெண்ணைப் பாலியல் வன்கொடுமை செய்து உடலை சிதைத்துப் போட்டிருந்தனர்” என்று கவலையோடு சொன்னார்கள்.

கலைச்செல்வியின் தந்தை ராஜேந்திரனிடம் பேசினோம். “நாங்கள் காலம் காலமாக இங்கு தோட்டி வேலை செய்கிறோம். எங்கள் குடியிருப்பில் டாய்லெட் வசதி கிடையாது. டாய்லெட் இருந்திருந்தா என் பொண்ணு செத்திருக்க மாட்டா...” என்று அழுது புலம்பினார்.

கலைச்செல்விக்கு முன்னால் 15 பாலியல் பலாத்காரங்கள்!

“பாதிக்கப்பட்ட எங்களுக்கு, ஊராட்சி மன்றத் தலைவர் ஓர் ஆறுதல்கூடச் சொல்லவில்லை. தலித் குடும்பத்தினர் மட்டுமே எங்களுக்கு ஆதரவாக இருக்கிறார்கள். மார்க்சிஸ்ட் கம்யூனிஸ்ட் கட்சியினர் எங்களுக்கு ஆறுதல் சொன்னதுடன், எங்களுக்காகப் போராட்டமும் நடத்தினார்கள். அதன்பிறகுதான், இதை வல்லுறவு மற்றும் கொலை வழக்காக போலீஸார் மாற்றினார்கள்” என்று குமுறினார்கள், கலைச்செல்வியின் உறவினர்கள்.

அனைத்திந்திய மாதர் சங்கத்தின் அகில இந்திய துணைத்தலைவர் உ.வாசுகி தலைமையில் மார்க்சிஸ்ட் கம்யூனிஸ்ட் கட்சி மற்றும் மாதர் சங்கத்தினர் சாலியமங்கலம் சென்று கலைச்செல்வியின் குடும்பத்தினருக்கு ஆறுதல் சொன்னதுடன், தஞ்சாவூரில் கண்டன ஆர்ப்பாட்டமும் நடத்தினர். வாசுகியிடம் பேசினோம். “கலைச்செல்வின் அப்பா, ‘நாய் செத்தாக்கூட வீடு தேடி வந்து ஆறுதல் சொல்றவங்க, என் மக செத்ததற்கு ஒரு வார்த்தைகூட கேட்கலை. நான் தலித் என்பதலா?’ என்று அழுதார். தலித் சமுதாயத்தைச் சேர்ந்தவர்கள் என்பதால் பிற சமுதாய மக்கள் துக்கம் விசாரிக்கக்கூடப் போகவில்லை என்பது வருத்தமாக இருந்தது. பிற சாதியினர் பகுதிகளுக்கும் சென்று, அங்குள்ள பெண்களிடமும் பேசினோம். ‘20 வயது இளம் பெண்ணை இரவு முழுவதும் வல்லுறவு செய்து, கல்லால் முகத்தைச் சிதைத்துக் கொலை செய்திருக்கிறார்கள். அந்தக் குடும்பத்தினரிடம் துக்கம்கூட நீங்கள் கேட்கவில்லை. இந்தப் பிரச்னையில் சாதி பார்க்கிறீர்களா?’ என்று கேட்டபோது, அந்தப் பெண்கள் அதிர்ந்து போனார்கள். ‘பயத்தால் போகவில்லை’ என்று சொன்னார்கள். ‘பாதிக்கப்பட்ட பெண்களுக்கு ஆதரவு கொடுக்கணும். எல்லோரும் ஒற்றுமையாக இருந்தால்தான், இந்தக் கொடுமைகளைத் தடுத்து நிறுத்த முடியும்’ என்று சொன்னோம். அவர்களும் அதை உணர்ந்தார்கள். இந்தப் பகுதியில் 15-க்கும் மேற்பட்ட பெண்கள், பாலியல் பலாத்காரம் செய்யப்பட்டு உள்ளனர். காவல் நிலையங்களில் எஃப்.ஐ.ஆர் போடுவதற்கே பல போராட்டங்களை நடத்த வேண்டியிருக்கிறது. இதுபோன்ற சம்பவங்களைத் தடுக்க வேண்டும் என்றால், பாதிக்கப்பட்ட மக்களுக்காகக் குரல் கொடுக்க வேண்டும். ஒருங்கிணைந்த கோபம் வரவேண்டும்” என்றார்.  

இதை ஒரு பாலியல் வன்கொடுமை வழக்காக மாற்றுவதற்குப் போராடியவர், எவிடன்ஸ் அமைப்பின் செயல் இயக்குநர் கதிர். அதற்காக, அவருக்கு கொலை மிரட்டல் விடுத்தும், இழிவான முறையிலும் முகநூலில் சிலர் பதிவுகளை வெளியிட்டனர். கதிர் நம்மிடம், “அந்தப் பகுதியில் ஒடுக்கப்பட்ட, தலித் சமுதாயத்தைச் சேர்ந்த பெண்கள் மீது தொடர்ச்சியாக பாலியல் வன்கொடுமைகள் நிகழ்த்தப்பட்டுள்ளன. அதற்கு பெரிய எதிர்ப்போ, கண்டிப்போ எழவில்லை என்பது வேதனையாக இருக்கிறது. அந்த ஊரில் எட்டு குடும்பங்களைச் சேர்ந்தவர்கள் துப்புரவுப் பணி செய்கிறார்கள். சமூக அமைப்புகள் அவர்களுக்கு ஆதரவாக இருந்திருக்காவிட்டால், வெறும் கொலை வழக்காக அதை முடித்திருப்பார்கள். குற்றவாளிகளைக் கைது செய்த பிறகும், நீதிமன்றத்தில் ஆஜர்படுத்தாமல், எஃப்.ஐ.ஆர் போடாமல் ஒரு நாள் முழுவதும் விசாரணை என்ற பெயரில் காவல் நிலையத்தில் வைத்திருந்தார்கள். தலித் பெண் பாலியல் பலாத்காரம் செய்யப்பட்டு இறந்துபோனால், பாதிக்கப்பட்டவர்களுக்கு அரசு 5 லட்சம் ரூபாய் கொடுத்திருக்க வேண்டும். அதுவே, அவர்களுக்கு இன்னும் கிடைக்கவில்லை. சாலியமங்கலத்தில் இரண்டு சுடுகாடுகள் இருந்தும், தலித் மக்கள் வேறொரு இடத்தில் பிணங்களை எரிக்கிறார்கள். கொல்லப்பட்ட கலைச்செல்வி பற்றி அவதூறான தகவல்களை சிலர் பரப்புவது, இன்னும் கொடுமையானது” என கோபமாகப் பேசி முடித்தார்.

தஞ்சாவூர் மாவட்ட கலெக்டர் அண்ணாதுரையிடம் பேசினோம். ‘‘டாய்லெட் வசதி கேட்டார்கள். அதை மூன்றே நாட்களில் கட்டச் சொல்லியிருக்கிறோம். பட்டா கேட்டார்கள். அதற்கும் ஏற்பாடு செய்து வருகிறோம். கருவக்காடு தனியாருக்குச் சொந்தமானதாக  இருப்பதால் அதை அழிப்பதற்குத் தேவையான முயற்சிகளைச் செய்து வருகிறோம்” என்றார்.

கழிவறை இல்லை. இன்று அவர் உயிருடனும் இல்லை. பாலியல் பலாத்காரம் செய்து கொலையும் செய்துவிட்டார்கள். அந்தப் பிரச்னையைப் பற்றி பேசவும் ஆள் இல்லை. அந்தப் பெண்ணைக் கொச்சைப்படுத்த ஒரு கூட்டமே திரள்கிறது.குற்றவாளிகள் கைதுடன் முடிவதா இந்தப் பிரச்னை? கருவக்காட்டில் வேலியை அப்புறப்படுத்திவிட்டால் இந்தக் குற்றங்களைத் தடுத்துவிட முடியுமா?

இத்தகைய கேள்விகளுடன் 15-க்கும் மேற்பட்ட கொலைகள் தஞ்சைப் பகுதியில் நடந்துவிட்டது. அடுத்து நடப்பதற்கு முன்பாவது சமூகம் விழிப்பு கொள்ளுமா?

-ஏ.ராம் படங்கள்: கே.குணசீலன்