Published:Updated:

1,500 கோடி ரூபாய் மாயம்? - ஏழை மாணவிகளுக்கான திட்டத்தில் முறைகேடு

ஒட்டுமொத்த விகடனுக்கும் ஒரே ஷார்ட்கட்

Use App
1,500 கோடி ரூபாய் மாயம்? - ஏழை மாணவிகளுக்கான திட்டத்தில் முறைகேடு
1,500 கோடி ரூபாய் மாயம்? - ஏழை மாணவிகளுக்கான திட்டத்தில் முறைகேடு

1,500 கோடி ரூபாய் மாயம்? - ஏழை மாணவிகளுக்கான திட்டத்தில் முறைகேடு

பிரீமியம் ஸ்டோரி

கிராமப்புற ஏழை மாணவிகள்... குறிப்பாக தலித் மாணவிகள் பள்ளிப்படிப்பை இடையில் கைவிடுவதைத் தடுப்பதற்காக மத்திய அரசு கொண்டு வந்த ஒரு திட்டத்தில், சுமார் 1,500 கோடி ரூபாய் முறைகேடு நடந்திருப்பதாக பகீர் குற்றச்சாட்டு கிளம்பியுள்ளது.

காங்கிரஸ் தலைமையிலான ஐக்கிய முற்போக்குக் கூட்டணி ஆட்சி, கடந்த 2004-ம் ஆண்டு, National Scheme of Incentives to Girls for Secondary Education (NSIGSE) என்ற திட்டத்தைத் தொடங்கியது. தேசியப் பெண் கல்வி ஊக்குவிப்புத் திட்டம் என்பதுதான் இதன் சுருக்கம். கிராமப்புற தாழ்த்தப்பட்ட மற்றும் பழங்குடி மாணவிகள் தங்கள் படிப்பைப் பாதியில் இடைநிறுத்தம் செய்யாமல் மேல்நிலைப் படிப்பைத் தொடர வேண்டும் என்பதுதான் இந்தத் திட்டத்தின் நோக்கம். இந்தத் திட்டத்தின்படி, அரசுப் பள்ளியில் 9-ம் வகுப்பு படிக்கும் தலித் மற்றும் பழங்குடி மாணவிகளுக்குத் தலா 3,000 ரூபாய் ஒரு முறை வழங்கப்படும். சம்பந்தப்பட்ட அரசுப் பள்ளிகள், இந்தத் திட்டத்துக்குத் தகுதியான மாணவிகளைத் தேர்வுசெய்து வங்கியிலோ, அஞ்சலகத்திலோ சேமிப்புக் கணக்குகளை ஆரம்பிக்க வேண்டும். அந்த வங்கிக் கணக்குகளில் ஒவ்வொரு மாணவிக்கும் பணம் செலுத்தப்படும். அந்தத் தொகையை, பத்தாம் வகுப்பு தேர்வில் பாஸ் செய்துவிட்டு, பதினெட்டு வயது பூர்த்தி அடைந்தபிறகு அந்த மாணவிகள் தங்கள் கணக்கில் இருந்து எடுத்துக்கொள்ளலாம்.

1,500 கோடி ரூபாய் மாயம்? - ஏழை மாணவிகளுக்கான திட்டத்தில் முறைகேடு

2006-07-ம் ஆண்டு பட்ஜெட் கூட்டத் தொடரின்போது, சுமார் 1,500 கோடி ரூபாயை மனிதவள மேம்பாட்டுத் துறை மூலம் ஒதுக்கீடு செய்து, அதற்கான அரசாணையை வெளியிட்டது மத்திய அரசு. ஆனால், 2008-09-ம் நிதியாண்டில்தான் இந்தத் திட்டம் தமிழகத்தில் நடைமுறைக்கு வந்தது. இதில்தான் முறைகேடுகள் நடந்திருப்பதாகச் சொல்கிறார், தலித் விடுதலை இயக்கத்தின் இணைப் பொதுச்செயலாளர் கருப்பையா.

கருப்பையாவிடம் பேசினோம். “தேசியப் பெண் கல்வி ஊக்குவிப்புத் திட்டத்தில், ‘தமிழ்நாடு முழுவதும் 2008 முதல் 2012 வரை ஒவ்வொரு மாவட்டத்திலும் எத்தனை மாணவிகளுக்கு நிதி ஒதுக்கீடு செய்யப்பட்டுள்ளது. இந்தத் திட்டத்துக்காக ஒதுக்கப்பட்ட பணம் எங்கே?’ என்று தகவல் அறியும் உரிமைச் சட்டத்தில் கேட்டிருந்தேன். ஒவ்வொரு கல்வி மாவட்டத்தில் இருந்தும் பயனாளிகளின் பட்டியலை அனுப்பினார்கள்.

லால்குடி கல்வி மாவட்டத்தில் மட்டும் 359 மாணவிகளில் 118 மாணவிகளுக்குப் பணம் வழங்கியுள்ளனர். சிவகங்கை மாவட்டத்தில் 1,776 மாணவிகள் பயனாளிகளாகத் தேர்ந்தெடுக்கப்பட்டுள்ளனர். புதுக்கோட்டை மாவட்டத்தில் அப்படியொரு பட்டியலே இல்லை. திண்டுக்கல்லில் 2,731 மாணவிகள், கரூரில் 1,430 மாணவிகள், தஞ்சாவூரில் 1,266 மாணவிகள், ஸ்ரீவில்லிபுத்தூரில் 1,082 மாணவிகள், விருதுநகரில் 811 மாணவிகள், மதுரையில் 2,165 மாணவிகள், ராமநாதபுரத்தில் 1,066 மாணவிகள், கிருஷ்ணகிரியில் 2,260 மாணவிகள் என தமிழகத்தின் 32 மாவட்டங்களில் மொத்தம் 74,232 மாணவிகள் தேர்வு செய்யப்பட்டுள்ளனர். இந்தத் திட்டத்துக்காக நடப்பு ஆண்டு வரை ஒதுக்கப்பட்ட தொகை 178 கோடி ரூபாய்.

ஆனால், தற்போதுவரை எந்த மாணவியின் கணக்கிலும் தொகை செலுத்தப்படவில்லை. அந்தத் தொகையை தமிழக அரசு வைத்திருக்கிறதா அல்லது திருப்பி அனுப்பிவிட்டதா என்கிற சந்தேகமும் உள்ளது. தமிழக அரசிடம் இருந்து எந்தக் கேள்விக்கும் பதில் இல்லை.

இந்த ஆண்டுவரைக்கும் மாணவிகளின் பெயர்ப் பட்டியல் எடுக்கப்பட்டுள்ளதா, இல்லையா என்பது குறித்த விவரங்களைக் கொடுக்கவும் பள்ளிக் கல்வித்துறை மறுக்கிறது. அரசாணைப்படி, இந்த ஆண்டு வரை மாணவிகளின் கணக்குகளில் தொகை செலுத்தப்பட்டிருக்க வேண்டும். இதுவரை, 178 கோடி ரூபாய் நிலுவைத் தொகையாக இருக்கிறது. இந்தத் தொகையை உரிய பயனாளிகளான மாணவிகளின் வங்கிக் கணக்குகளில் காலதாமதத்துக்கான வட்டியுடன் சேர்த்து வரவு வைக்கவேண்டும். மத்திய அரசு, இந்தத் திட்டத்தில் 1,500 கோடி ரூபாய் பணத்தை மோசடி செய்திருக்கிறது என்றே நான் கருதுகிறேன். இதுதொடர்பாக வழக்கும் போட்டிருக்கிறேன்” என்றார் அவர்.

1,500 கோடி ரூபாய் மாயம்? - ஏழை மாணவிகளுக்கான திட்டத்தில் முறைகேடு

திருவண்ணாமலை மாவட்டத்தில் உள்ள காட்டாம்பூண்டி அரசு மேல்நிலைப் பள்ளியில் 2008-2009-ம் ஆண்டில் கல்வி பயின்ற மீனா, ‘‘எங்கள் பள்ளியில் என்னைப் பற்றிய விவரங்களைச் சேகரித்து, எனக்கு வங்கிக் கணக்குத் தொடங்கினர். ஆனால், இன்று வரை அந்தக் கணக்கில் பணம் செலுத்தப்படவில்லை” என்றார்.

கடந்த எட்டு ஆண்டுகளாக இந்தத் தொகை மாணவிகளுக்கு வழங்கப்படவில்லை என்றால், பணம் எங்கே போனது?

‘‘குறித்த காலத்துக்குள் மாநில அரசிடமிருந்து பட்டியல் வரவில்லை என்றாலோ, மாநில அரசு கோரிக்கையே தரவில்லை என்றாலோ, தகவல்கள் முழுமையாக இல்லை என்றாலோ, பணம் வழங்கப்படாது. இதுவரை தமிழக அரசு பயன்படுத்தாமல் வைத்திருந்த 123.6 கோடி ரூபாயை கடந்த ஜனவரி மாதம்தான் திரும்பப் பெற்றுக்கொண்டோம்’’ என்கிறார்கள், மத்திய அரசின் மனிதவள மேம்பாட்டு அமைச்சக அதிகாரிகள்.

தமிழக அரசுக்கு இதையெல்லாம் வாங்கித்தர நேரமில்லை போலிருக்கிறது.

- தெ.பாலமுருகன்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு