Published:Updated:

மெடிக்கல் சீட்... கவர்னர் நடத்திய கவுன்சிலிங்!

ஒட்டுமொத்த விகடனுக்கும் ஒரே ஷார்ட்கட்

Use App
மெடிக்கல் சீட்... கவர்னர் நடத்திய கவுன்சிலிங்!
மெடிக்கல் சீட்... கவர்னர் நடத்திய கவுன்சிலிங்!

மெடிக்கல் சீட்... கவர்னர் நடத்திய கவுன்சிலிங்!

பிரீமியம் ஸ்டோரி

நீட் தேர்வின் நன்மையாக, புதுச்சேரியில் இருக்கும் தனியார் மருத்துவக் கல்லூரிகளில் அரசு ஒதுக்கீட்டில் முதுநிலை மருத்துவப் படிப்புகளுக்கு மாணவர்களைச் சேர்க்கும் வாய்ப்பு முதல்முறையாக வந்தது. ஆனால், புதுச்சேரி மாணவர்களுக்கு நியாயமாகச் சேர வேண்டிய இந்த இடங்களைத்  தனியார் மருத்துவக் கல்லூரிகளுக்குத் தாரை வார்க்க அரசே துணை போன அவலம் அரங்கேறியுள்ளது. கவர்னர் கிரண் பேடியின் தலையீட்டால், இந்த முறைகேடு வெளிச்சத்துக்கு வந்திருக்கிறது. 

புதுச்சேரி மாநிலத்தில், பொறியியல் மற்றும் மருத்துவக் கல்லூரிகளில் உள்ள அரசு ஒதுக்கீட்டு இடங்களை நிரப்புவதற்காக ‘சென்டாக்’ (Centralised Admission Committee) என்ற அமைப்பு இயங்குகிறது. அதில் நடைபெறும் குளறுபடிகளைப் பற்றி கடந்த 2016 ஜூன் 29 தேதியிட்ட ஜூ.வி இதழில் ‘முறைகேடுகளின் மொத்த உருவம் சென்டாக்’ என்ற தலைப்பில் கட்டுரை வெளியிட்டிருந்தோம். சென்டாக் மூலம் தேர்வாகிச் செல்லும் மாணவர்களிடம், அரசு நிர்ணயித்த தொகையைவிட பத்து மடங்கு கூடுதலாக வசூல் செய்வதைத் தனியார் மருத்துவக் கல்லூரிகள் வாடிக்கையாக வைத்துள்ளன.

மெடிக்கல் சீட்... கவர்னர் நடத்திய கவுன்சிலிங்!

உச்ச நீதிமன்றத்தின் உத்தரவுப்படி, இந்த வருடம் மருத்துவப் படிப்புகளில் சேர ‘நீட்’ தேர்வைக் கொண்டுவந்த மத்திய அரசு, மருத்துவ உயர் படிப்புகளில் 50 சதவிகித இடங்களை மாநில அரசின் ஒதுக்கீட்டில் நிரப்ப வேண்டும் என்று உத்தரவிட்டிருந்தது. அதன்படி, புதுவையில் உள்ள ஏழு தனியார் மருத்துவக் கல்லூரிகளில் உள்ள மருத்துவ உயர் படிப்புக்கான 315 இடங்களில், 159 இடங்கள் புதுச்சேரி அரசுக்கு வழங்கப்பட்டன. இதற்காக, சென்டாக் நடத்திய கலந்தாய்வில் 88 மாணவர்கள் தேர்ந்தெடுக்கப் பட்டனர். அரசு ஒதுக்கீட்டு இடங்களுக்கு ரூ. 5.5 லட்சம், நிர்வாக ஒதுக்கீட்டு இடங்களுக்கு ரூ. 14 லட்சம் எனக் கட்டணங்களைக் கட்டணக் குழு நிர்ணயித்தது.

ஆனால், தனியார் கல்லூரிகள் கூடுதல் கட்டணம் கேட்டு தங்களைச் சேர்த்துக்கொள்ள மறுப்பதாகவும், அதை அரசு கண்டுகொள்ளவில்லை என்றும் பாதிக்கப்பட்ட மாணவர்கள் கவர்னர் கிரண் பேடியிடம் புகார் அளித்தனர். இதையடுத்து அதிரடியாகக் களமிறங்கிய கவர்னர், மே 30-ம் தேதி காலையில் சென்டாக் அலுவலகத்துக்குச் சென்று ஆய்வு செய்தார். அப்போதுதான் அவருக்கு இன்னொரு உண்மை தெரிந்தது... அரசு ஒதுக்கீட்டில் 71 இடங்கள் நிரம்பாமல் இருந்ததைக் கணக்கில் காட்டாமல், அதைத் தனியார் கல்லூரிகளின் நிர்வாக ஒதுக்கீட்டில் சேர்த்து மாணவர்களைத் தேர்வு செய்து வைத்திருந்ததைக் கண்டு அதிர்ந்துபோனார்.

மெடிக்கல் சீட்... கவர்னர் நடத்திய கவுன்சிலிங்!

“நீங்கள் முறைகேடு செய்திருக்கிறீர்கள். சென்டாக் ஏழை மாணவர்களுக்காகச் செயல்படுகிறதா, அல்லது வசதி படைத்தவர்களின் பிள்ளைகள் குறுக்கு வழியில் மருத்துவப் படிப்பில் சேர்வதற்குச் செயல்படுகிறதா?” என்று அங்கிருந்த அதிகாரிகளைக் கேள்விகளால் துளைத்தெடுத்தார் கிரண் பேடி. அப்போது, சென்டாக் கன்வீனர் கோவிந்தராஜிடம் அமைச்சர் ஒருவர் செல்போனில் ஏதோ கட்டளையிட, “அமைச்சரை இங்கே வரச்சொல்லுங்கள்” என்று கவர்னர் அதிரடி காட்டினார். இதில் அரண்டு போனார் அந்த அதிகாரி. பிறகு, விதிமுறைகளை மீறி நிர்வாக ஒதுக்கீட்டில் நிரப்பப்பட்ட 71 இடங்களை ரத்து செய்து மறுகலந்தாய்வுக்கு கவர்னர் உத்தரவிட்டார். மறுநாளே புதிதாகக் கலந்தாய்வு நடந்தது.

பாதிக்கப்பட்ட மாணவர்களின் பெற்றோர்களிடம் பேசினோம். “ஒரு முதுநிலை மருத்துவ சீட்டை, கல்விக்கட்டணம் தவிர்த்து, இரண்டு முதல் நான்கு கோடி ரூபாய் அளவுக்குத் தனியார் மருத்துவக் கல்லூரிகள் விற்கின்றன. கிருமாம்பாக்கத்தில் அரசு வாய்க்காலை ஆக்கிரமித்துக் கட்டடம் கட்டிய தனியார் மருத்துவக் கல்லூரி, சென்டாக்கில் தேர்வாகிச் சென்ற மாணவனிடம், ‘உங்கள் அரசு எங்கள் கட்டடத்துக்கு வைத்துள்ள சீலை முதலில் நீக்க வேண்டும்’ என்று தைரியமாகக் கடிதம் கொடுத்து அனுப்பியுள்ளது. இந்த விவகாரத்தில் பல கோடிகள் கைமாறியுள்ளன. இது குறித்து ஆதாரங்களோடு சி.பி.ஐ-க்குப் புகார் அளித்துள்ளோம். தற்போதுள்ள சென்டாக் கமிட்டியை உடனடியாகக் கலைத்துவிட்டு, ஒரு ஐ.ஏ.எஸ் அதிகாரி தலைமையில் புதிதாக கமிட்டியை ஏற்படுத்த வேண்டும்” என்றனர்.

மெடிக்கல் சீட்... கவர்னர் நடத்திய கவுன்சிலிங்!

அரசு நிர்ணயித்த கட்டணத்தில் மாணவர்களைச் சேர்க்க மறுத்த தனியார் கல்லூரிகளுக்கு விசிட் அடித்தார் கிரண் பேடி. அப்போது, அவசர அவசரமாகப் பத்திரிகையாளர்களைச் சந்தித்த சுகாதாரத் துறை அமைச்சர் மல்லாடி கிருஷ்ணராவ், “மூன்று கல்லூரிகள் அரசுக் கட்டணத்தில் மாணவர்களைச் சேர்க்க சம்மதித்துள்ளன” என்றார். ஆனால், கவர்னரே நேரில் சென்றும் ஒரு கல்லூரியைத் தவிர மற்ற கல்லூரிகள் மாணவர்களைச் சேர்க்க மறுத்துவிட்டன.

இதுகுறித்து விளக்கம் கேட்க சுகாதாரத் துறை அமைச்சர் மல்லாடி கிருஷ்ணராவைத் தொடர்பு கொண்டோம், “மாலையில் கூப்பிடுகிறேன்’’ என்றவர், அதன்பின் நம் அழைப்பை ஏற்கவில்லை.

கவர்னர் கிரண் பேடியின் அதிரடி நடவடிக்கையால் தனியார் மருத்துவக் கல்லூரிகள் - ஆட்சியாளர்களின் கூட்டு வெளிச்சத்திற்கு வந்திருக்கின்றது. தவறு செய்தவர்கள், ‘சி.பி.ஐ களம் இறங்குமோ’ என்று கலக்கத்தில் உள்ளனர்.

- ஜெ.முருகன்
படங்கள்: அ.குரூஸ்தனம், எஸ்.தேவராஜன்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு