Published:Updated:

உறுப்பு தான முறைகேடுகள் உண்மைதான்! - மோசடியை உறுதிப்படுத்திய அரசுக் குழு...

உறுப்பு தான முறைகேடுகள் உண்மைதான்! - மோசடியை உறுதிப்படுத்திய அரசுக் குழு...
பிரீமியம் ஸ்டோரி
உறுப்பு தான முறைகேடுகள் உண்மைதான்! - மோசடியை உறுதிப்படுத்திய அரசுக் குழு...

உறுப்பு தான முறைகேடுகள் உண்மைதான்! - மோசடியை உறுதிப்படுத்திய அரசுக் குழு...

உறுப்பு தான முறைகேடுகள் உண்மைதான்! - மோசடியை உறுதிப்படுத்திய அரசுக் குழு...

உறுப்பு தான முறைகேடுகள் உண்மைதான்! - மோசடியை உறுதிப்படுத்திய அரசுக் குழு...

Published:Updated:
உறுப்பு தான முறைகேடுகள் உண்மைதான்! - மோசடியை உறுதிப்படுத்திய அரசுக் குழு...
பிரீமியம் ஸ்டோரி
உறுப்பு தான முறைகேடுகள் உண்மைதான்! - மோசடியை உறுதிப்படுத்திய அரசுக் குழு...

டல் உறுப்பு தானம் என்கிற பெயரில் தமிழகத்தில் நடக்கும் பகீர் முறைகேடுகளை அம்பலப்படுத்தியிருக்கிறது தமிழக அரசு நியமித்த நான்கு பேர் கொண்ட குழு. இவர்கள் நடத்திய விசாரணையில், கோவை மற்றும் மதுரையில் உள்ள தனியார் மருத்துவமனைகளில் நடக்கும் முறைகேடுகள் 245 பக்கங்கள் கொண்ட அறிக்கையில் தெளிவாகச் சொல்லப்பட்டும், அரசுத் தரப்பில் இதுவரை எந்த நடவடிக்கையும் இல்லை.

“சிறுநீரகம் ரூ.10 லட்சம்... இதயம் ரூ.40 லட்சம்... கல்லீரல் ரூ.60 லட்சம்!” என்ற தலைப்பில் 24.01.2018 தேதியிட்ட ஜூனியர் விகடன் இதழில் உடல் உறுப்பு தான மோசடி குறித்து எழுதியிருந்தோம். தமிழக அரசால் அமைக்கப்பட்ட விசாரணைக் குழுவும் இதையே இப்போது உறுதிசெய்துள்ளது. கேரள முதல்வர் பினராயி விஜயன், தமிழக முதல்வருக்கு கடந்த மே மாதம் எழுதியக் கடிதத்தில், ‘பாலக்காடு மாவட்டம், நெல்லிமேடு சித்தூரைச் சேர்ந்த மணிகண்டன், விபத்தில் காயமடைந்து சேலம் விநாயகா மிஷன் மருத்துவமனையில் அனுமதிக்கப்பட்டார். சிகிச்சை பலனின்றி, 21.5.2018-ம் தேதி, ‘மணிகண்டன் மூளைச்சாவால் இறந்துவிட்டார். அவரது உறுப்புகளைத் தானம் கொடுங்கள். இல்லாவிடில், சிகிச்சை அளித்ததற்கு கட்டணம் செலுத்துங்கள்’ என்று மணிகண்டனின் உறவினர்களிடம் மிரட்டியிருக்கிறது மருத்துவமனை நிர்வாகம். அவர்களது இயலாமையைப் பயன்படுத்தி மிரட்டி, உறுப்பு தானத்துக்குச் சம்மதிக்க வைத்து, உறுப்புகளைத் திருடியிருக்கிறார்கள் மருத்துவர்கள். அவர்கள்மீது நடவடிக்கை எடுக்க வேண்டும்’ என்று கேட்டிருந்தார்.

உடனடியாக, காவல்துறை துணை ஆணையர் தாமஸ் பிரபாகரன் தலைமையில் தமிழக சுகாதாரத்துறை உயர் அதிகாரிகள் உள்ளடக்கிய நால்வர் குழுவை தமிழக அரசு அமைத்தது. இந்த குழு 19 நாள்கள் விசாரணை நடத்தி, அந்தச் சம்பவம் உண்மை என உறுதிப்படுத்தியிருக்கிறது. மேலும் இந்த சம்பவங்கள் மட்டுமின்றி, இதற்கு முன் தமிழகத்தில் நடந்த உடல் உறுப்பு தானம் தொடர்பான முறைகேடுகளையும் கண்டுபிடித்து, 245 பக்கங்களில் தமிழக அரசிடம் அறிக்கை சமர்ப்பித்திருக்கிறது அந்தக் குழு.

உறுப்பு தான முறைகேடுகள் உண்மைதான்! - மோசடியை உறுதிப்படுத்திய அரசுக் குழு...

அறிக்கையில், “கோவையில் இயங்கிவரும் முத்து மருத்துவமனையில், 2016-ம் ஆண்டு நவம்பர் மாதம், மூளைச்சாவு அடைந்த தனபால் என்பவரிடமிருந்து முறைகேடாக உறுப்புகளைத் திருடி, சென்னையில் இயங்கிவரும் ‘ஃபோர்டிஸ் மலர் மருத்துவமனை’யில் சிகிச்சை பெற்ற ஒரு வெளிநாட்டு நோயாளிக்குப் பொருத்தியுள்ளனர். இந்த முத்து மருத்துவமனை, உறுப்பு மாற்று அறுவை சிகிச்சைக்கு, அங்கீகாரம் பெறவில்லை. மேலும், இந்தச் சிகிச்சைக்குத் தகுதியில்லாத மருத்துவர்கள் மூலம் உறுப்புகள் எடுக்கப்பட்டுள்ளன. உறுப்பு மாற்று ஆணையத்தின் மூலம் பதிவுசெய்து காத்திருப்போருக்குத் தகவல் தெரிவிக்கும் விதிமுறை பின்பற்றப்படாமல், இந்த உறுப்புத் திருட்டு நடந்துள்ளது. இந்த விஷயம் தெரிந்தும், தமிழக சுகாதாரத் துறை கண்டுகொள்ளவில்லை. மதுரையில் உள்ள ஒரு பிரபலமான தனியார் மருத்துவமனையில், கடந்த மார்ச் 13-ம் தேதி மூளைச்சாவு அடைந்த ஒரு நோயாளியிடமிருந்து உறுப்புகள் திருடப்பட்டன. அவை, ஒரு வெளிநாட்டு நோயாளிக்குப் பொருத்தப்பட்டுள்ளன. மதுரை ராஜாஜி அரசு மருத்துவமனையில், ‘இதயம் மற்றும் நுரையீரல் தேவை’ என்று பதிவுசெய்து அறுவை சிகிச்சைக்குத் தயார் நிலையில் இருந்த ஒரு நோயாளிக்கு உடல் உறுப்புகளைத் தானம் தருவதற்கு முன்னுரிமை அளிக்காமல், தனியார் மருத்துவமனைக்குக் கொண்டுசென்று, அங்கிருந்த நோயாளிக்குப் பொருத்தப்பட்டன” என்று நால்வர் குழு பகீர் தகவல்களை வெளிக்கொண்டு வந்திருக்கிறது.

தமிழகத்தில் 2008-ம் ஆண்டிலிருந்து, உறுப்பு மாற்று அறுவை சிகிச்சை சட்டப்பூர்வமாக்கப் பட்டுள்ளது. இதற்காக, உறுப்பு மாற்று ஆணையமும் உருவாக்கப்பட்டுள்ளது. இந்த ஆணையத்தில் உடல் உறுப்பு தானம் கேட்டு நோயாளிகள் சார்பில் மருத்துவமனைகள் பதிவுசெய்ய வேண்டும். இதன்படி, பல அரசு மருத்துவமனைகளும், தனியார் மருத்துவமனைகளும் உடல் உறுப்புகள் கேட்டு இந்த ஆணையத்தில் பதிவுசெய்துள்ளன. அதேபோல, மூளைச்சாவு அடைந்தவர்களிடம் இருந்து உறுப்புகளைப் பெறுவதற்குப் பல்வேறு விதிமுறைகள் உள்ளன. சம்பந்தப்பட்ட நபர் மூளைச்சாவு அடைந்திருக்கிறார் என்பதை மருத்துவக் குழு உறுதிசெய்ய வேண்டும். உறுப்பு தான ஆணையத்தில், உடல் உறுப்புகள் கேட்டு பதிவு செய்துள்ளவர்களில் முன்னுரிமை அடிப்படையில்தான் உறுப்புகள் தானமாக வழங்கப்பட வேண்டும். உறுப்புகள் தானமாக கொடுப்பது, பெறுவது என இரண்டு தரப்பிலும் பேரமோ, பணப்பரிமாற்றமோ செய்துகொள்ளக் கூடாது.

ஆனால், இந்த விதிமுறைகளுக்கு மாறாகத்தான் உடல் உறுப்பு தானத்தில் பல்வேறு முறைகேடுகள் நடைபெறுகின்றன. இது குறித்து மருத்துவத் துறையில் இருக்கும் சிலரிடம் பேசினோம். “புரோக்கர்கள் கையில் பல தனியார் மருத்துவமனைகள், மருத்துவர்கள் உள்ளனர். இவர்கள் வெளிநாட்டு நோயாளிகளை ‘மருத்துவச் சுற்றுலா’ என்கிற பெயரில் தமிழகத்துக்கு வரவழைத்து, தனியார் மருத்துவமனைகளில் தங்க வைப்பார்கள். எந்த மருத்துவமனையிலாவது ஒரு நோயாளிக்கு மூளைச்சாவு ஏற்பட்டால் அங்குள்ள நபர்கள் மூலம் புரோக்கர்களுக்கு தகவல் வந்துவிடும். அதன்பின்பு மூளைச்சாவு அடைந்தவரின் குடும்பத்துடன் பேச்சுவார்த்தை நடத்துவார்கள். ‘அதுவரை ஆன மருத்துவச்செலவு, உடலைக் கொண்டுபோவதற்கான ஆம்புலன்ஸ் கட்டணம் எல்லாவற்றையும் நாங்களே பார்த்துக்கொள்கிறோம்’ என்று சொல்லி, உறவினர்களை வழிக்குக் கொண்டுவருவார்கள். வசதியில்லாத நோயாளிகள்தான், இந்த மாஃபியா கும்பலின் இலக்கு. இதற்கு, சம்பந்தப்பட்ட தனியார் மருத்துவமனைகளும் உடந்தை. இப்படித்தான் மணிகண்டனிடம் இருந்தும் புரோக்கர்கள் மூலம் உடல் உறுப்புகள் திருடப்பட்டுள்ளன” என்றனர்.

மேலும், ‘உடல் உறுப்பு தான முறைகேட்டில் உறுப்பு மாற்ற ஆணையத்துக்கும் தொடர்பு இருக்கிறது’ என்கிறார்கள் விஷயம் அறிந்தவர்கள். “உறுப்பு மாற்று ஆணையத்தின் மாநில ஒருங்கிணைப்பாளர் மற்றும் நிர்வாக அதிகாரியாக, 2014-ம் ஆண்டு, குமார் என்பவர் நியமிக்கப்பட்டார். இவருக்கு மருத்துவத்துறை குறித்த எந்த அனுபவமும் கிடையாது. இவர், கப்பலில் வேலை செய்தவர். இவர் பணியில் இருந்த காலகட்டத்தில்தான், முறைகேடான பல உறுப்பு மாற்று அறுவை சிகிச்சைகள் நடந்தன. இவரது பதவிக் காலத்தில்தான், தனியார் மருத்துவமனைகள் ‘சிண்டிகேட்’ அமைத்து உடல் உறுப்பு தான மோசடியில் ஈடுபட்டனர். அதன்பின்னர் டாக்டர் பாலாஜி இந்தப் பொறுப்புக்கு வந்தார். தமிழகத்தில் உள்ள அரசு மருத்துவமனைகளில் கல்லீரல், நுரையீரல், இதயம், சிறுநீரகம் பாதிக்கப்பட்டு, உறுப்புகள் தேவையென்று பதிவுசெய்து ஆயிரக்கணக்கான நோயாளிகள் உயிருக்குப் போராடி வருகிறார்கள். உரிய நேரத்தில் உடல் உறுப்புகள் கிடைக்காமல் பலர் உயிரிழந்துள்ளனர். ஆனால், விதிமுறைகளுக்கு மாறாக, கடந்த நான்கு ஆண்டுகளில் தமிழகத்தில் மட்டும் 174 வெளிநாட்டு நோயாளிகளுக்கு இதயம் மற்றும் நுரையீரல் போன்ற முக்கிய உறுப்புகள்  வழங்கப்பட்டுள்ளன” என்று சொல்லி அதிரவைத்தனர்.

மதுரையைச் சேர்ந்த சமூக ஆர்வலர் ஆனந்தராஜ், ‘மூளைச்சாவு அடைந்தவர்களிடம் இருந்து தானமாகப் பெறப்படும் உடல் உறுப்புகள், அரசு மருத்துவமனைகளில் சிகிச்சை பெறும் ஏழை நோயாளிகளுக்குக் கிடைப்பதை உறுதிசெய்ய வேண்டும்’ என்று சென்னை உயர் நீதிமன்ற மதுரைக் கிளையில் 2014-ம் ஆண்டு பொதுநல வழக்கு தொடர்ந்தார். அந்த வழக்கில், ‘இன்னும் ஓராண்டுக்குள் தமிழகத்தில் உள்ள அனைத்து அரசு மருத்துவமனைகளிலும் உறுப்பு மாற்று அறுவை சிகிச்சைக்கான வசதிகளை ஏற்படுத்தி, ஏழை நோயாளிகள் இலவசமாகப் பெற வழிவகை செய்ய வேண்டும்’ என்று 2017 ஜனவரியில் நீதிமன்றம் உத்தரவிட்டது.  ஆனால், தமிழக அரசு இன்னமும் அந்த உத்தரவை முழுமையாக நடைமுறைப்படுத்தவில்லை.

உறுப்பு தான முறைகேடுகள் உண்மைதான்! - மோசடியை உறுதிப்படுத்திய அரசுக் குழு...

இதுகுறித்து தமிழக சுகாதாரத் துறை செயலர் ராதாகிருஷ்ணனிடம் கேட்டோம். அவர், “உடல் உறுப்பு தான நடைமுறைகளைக் கண்காணிக்க தனி ஆணையம் இருக்கிறது. அதிகாரிகள் இருக்கிறார்கள். அவர்கள் அனைத்து விவரங்களையும் இணையதளத்தில் பதிவேற்றி வருகிறார்கள். ஆனால், தனியார் மருத்துவமனைகளுக்கு இடையே நிலவும் போட்டியின் காரணமாக, தவறான கருத்துகள் பரப்பப்படுவதாகவும் கூறப்படுகிறது. இருந்தாலும், முறைகேடுகள் நடந்தாகக் கூறப்பட்டதால், அதை விசாரிக்க ஒரு குழு அமைக்கப்பட்டது. அவர்கள் விசாரணை செய்து அறிக்கை சமர்ப்பித்துள்ளனர். அந்த அறிக்கையின் தகவல்களில் பிழைகள் இருப்பதால், அதைச் சரிபார்க்கும் பணி நடக்கிறது. முறையான விசாரணை முடிந்த பிறகே இது குறித்து விரிவாகக் கூற முடியும்” என்றார்.

இதுதொடர்பாக விளக்கம் பெற முத்து மருத்துவமனையைத் தொடர்புகொண்டோம்.  நாம் சொன்ன விவரங்களைக் கேட்டுக்கொண்டவர்கள், இரு தொடர்பு எண்களை அளித்து, ‘மருத்துவமனை உரிமையாளரிடம் பேசுங்கள்’ என்றார்கள். அந்த எண்களில் அழைத்தபோது பேசிய ஓர் ஊழியர், ‘நாங்களே கூப்பிடுகிறோம்’ என்றார். ஆனால், இந்த இதழ் முடிக்கும்வரை எந்த அழைப்பும் வரவில்லை. விளக்கம் அளித்தால் வெளியிடத் தயாராக இருக்கிறோம்.

இதேபோல, ஃபோர்டிஸ் மலர் மருத்துவமனையையும் தொடர்புகொண்டோம். இரண்டு மக்கள் தொடர்பு அதிகாரிகளின் எண்களை அளித்தனர். அவற்றில் ஒரு எண்ணுக்குத் தொடர்புகொண்டு விவரங்களைத் தெரிவித்தோம். பிறகு அவர் நம்மைத் தொடர்புகொண்டு, “தலைமை அதிகாரிக்குத் தொடர்புகொண்டேன். அவர் போனை எடுக்கவில்லை. அவர் போனை எடுத்ததும் விவரத்தைச் சொல்லி உங்களிடம் பேசுகிறேன். மேலும், அவர் டெல்லிக்குச் சென்றுள்ளார் அடுத்த மாதம் 6-ம் தேதிதான் வருவார்” என்று முடித்துக்கொண்டார். இவர்கள் தரப்பில் விளக்கம் அளித்தால் வெளியிடத் தயாராக இருக்கிறோம்.

- ஜூ.வி டீம்