கண்காணிக்கப்படும் 'வானவில்' நபர்கள்!

##~## . ச ட்ட விரோதமாக குவாரிக்கு அனுமதி கொடுத்த புகாரில் கைது செய்யப்பட்டு திருச்சி மத்தியச் சிறையில் அடைக்கப்பட்டு இருக்கும் தி.மு.க. முன்னாள் அமைச்சர் ஐ.பெரியசாமி மீது, சொத்துக் குவிப்பு வழக்கு போட்டுவிட வேண்டும் என்று துடிக் கிறது, விஜிலென்ஸ் போலீஸ்!

. சமீபத்தில், ஐ.பெரியசாமி வீட்டில் விஜிலென்ஸ் போலீஸ் நடத்திய சோதனையில் உருப்படியான எந்த ஆவணமும் சிக்கவில்லை. காரணம்... பெரியசாமி குடியிருந்ததே வாடகை வீடு. ஆனால் இப்போது, பத்திரப்பதிவுத் துறையில் உள்ள அ.தி.மு.க. ஆதரவு அதிகாரிகள் மூலம் சில தகவல்கள் விஜிலென்ஸ் அதி காரிகளுக்குக் கிடைத்துள்ளது. அதன்படி, நத்தத்தில் இருந்து சிறுமலை செல்லும் வழியில் 70 ஏக்கர் நிலம் கைமாறிய ஆவணம் ஆராயப்படுகிறது. திண்டுக்கல் மாவட்டத்தில் பழைய தொழிற்சாலைகள், தோட்டம், தென்னந்தோப்புகள் யார் யார் பெயரில் கடந்த ஐந்து வருடங்களில் பதிவாகி இருக்கின்றன? அவர்களுக்கு அந்த அளவுக்கு வசதி இருக்கிறதா என்று விசாரணை நடக்கிறது.

. வத்தலக்குண்டு ஏரியாவில் நிலம் இல்லாத ஏழைகளுக்கு இரண்டு ஏக்கர் நிலம் வழங்கப்பட்ட திட்டத்தில் பெரும் மோசடி நடந்திருக்கிறதாம். விவசாயிகளுக்குத் தெரியாமலேயே அவர்களின் பெயரில் நிலத்தைக் கொடுத்ததாக, 100 ஏக்கர் நிலத்தைக் கணக்குக் காட்டி, தனியார் தொழிற்சாலைக்கு விலை பேசி இருக்கிறார்கள்.

. அடுத்து, வீட்டுவசதி வாரியத்தை விஜிலென்ஸ் அதிகாரிகள் முற்றுகை இட்டனர். காலி இடம், வீடு என்று கடந்த ஆட்சியில் ஐ.பெரியசாமி சிபாரிசு செய்த பிரமுகர்கள் யார் யார் என்று விசாரித்தனர். உள்ளூர் கட்சிப்பிரமுகர் ஒருவருக்கு கோவை அருகில் ஐந்து இடங்கள் வெவ்வேறு பெயர்களில் தரப்பட்டு இருக்கிறதாம். இதுபோல, விதியை மீறி யாருக்கெல்லாம் சலுகை காட்டப்பட்டுள்ளது என்று துருவி வருகிறார்கள்.

. அடுத்து, திண்டுக்கல் பகுதியில் இருந்து அடிக்கடி விமானப்பயணம் செய்தவர்களின் பட்டியல் தயாரித்து இருக்கின்றனர். 100 முறைக்கு மேல் டிரிப் அடித்த சானார்பட்டிக்காரர் பற்றி சில விவரங்கள் கிடைத்துள்ளதாம். என்ன காரணத்துக்காக இவர் அடிக்கடி பயணித்தார் என்ற விசாரணையில் தீவிரமாக இருக்கிறது விஜிலென்ஸ்.

. வத்தலக்குண்டு அருகே தொழிற்சாலை ஒன்றின் பூர்வீகம், தொழிலாளர் நலத்துறை அதிகாரிகளின் உதவியுடன் விசாரிக்கப்படுகிறது. சின்ன லெவலில் ஆரம்பித்த இந்தத் தொழிற்சாலை, மிக பிரமாண்டமாக உருவெடுத்து நிற்கிறதாம். அங்கு அடிக்கடி வந்து போகும் ஐ.பெரியசாமியின் குடும்பத்து நபர் ஒருவருக்கும் தொழிற்சாலைக்கும் என்ன தொடர்பு என்ற விசாரணையும் நடக்கிறது.

. திண்டுக்கல் ஏரியாவில் உள்ள பிரபல தொழில் அதிபருக்கு சொந்தமான கல்லூரி கைமாறியதாக சொல்லப்படும் விவகாரத்தில் ஐ.பெரியசாமிக்குத் தொடர்பு உண்டா என்ற ரீதியிலும் விசாரணை நடக்கிறது. உயர்கல்வித் துறை, பத்திரப் பதிவுத் துறைகளில் உள்ள ஆவணங்களில சில பெயர்கள் நீக்கப்பட்டு, புதிய பெயர்கள் சேர்க்கப்பட்டுள்ளதன் பின்னணியை விசாரிக்கிறார்கள்.

. 'தி.மு.க. பிரமுகர்கள் சிலர், கட்சிக்கு அப்பாற்பட்ட பிரமுகர்கள், தொழில் அதிபர்கள் என்று ஏழு பேரை (வானவில் பிரமுகர்கள் என்கின்றனர்) பிடித்து விசாரியுங்கள். தி.மு.க. ஆட்சிக்கு வருவதற்கு முன்னும் பின்னும், கடந்த ஐந்து வருடங்களில் இவர்களின் பொருளாதார நிலவரம் பற்றி சர்வே செய்யுங்கள். பல திடுக்கிடும் உண்மைகள் தெரியவரும்' என்று பெயர் சொல்லாத தி.மு.க. பிரமுகர்களே தகவல்களைத் தட்டிவிட... அவர்களுக்கும் பெரியசாமிக்கும் பண ரீதியான தொடர்பு இருந்ததா என்பது பற்றியும் ரகசிய விசாரணை நடக்கிறது. இந்த ஏழு பேரின் வீட்டு விசேஷங்கள், புதுக் கட்டட திறப்பு விழா போன்ற நிகழ்ச்சிகளின் வீடியோ பிரதிகள் சேகரிக்கப்பட்டு வருகின்றன.

. யார் அந்த வானவில் பிரமுகர்கள்?

. முதலாவது நபர் - திண்டுக்கல்லின் பிரபல தொழில்அதிபர். வி.ஐ.பி-க்கள் கறுப்புப் பணத்தை கொடுத்தால், தனது பிசினஸில் போட்டு, அதை பக்காவாக வெள்ளை ஆக்கிக் கொடுப்பாராம்.

. இரண்டாமவர் - அளவு எடுக்கும் அடை மொழியைக் கொண்டவர். திண்டுக்கல் மாவட்டத்தில் யார் முக்கிய வி.ஐ.பி. என்றாலும், இவர்தான் நில புரோக்கராக செயல்படுவார். பல ஆயிரம் ஏக்கர் நிலம், பிரம்மாண்ட பங்களா என்று குறுகிய காலத்தில் வளர்ந்திருப்பவர்.

. மூன்றாமவர் - தென் மாவட்டத்து ஊர் ஒன்றை அடைமொழியாகக் கொண்டவர். சட்டவிரோதமான முறையில் மணல் அள்ளுவதில் கில்லாடி. முல்லை பெரியாறு அணைக்கட்டு பக்கம் மணலை அள்ளி கேரளாவில் கொண்டுபோய் அதிக லாபத்துக்கு விற்பாராம்.

. நான்காவது நபர் - டிரைவர். இவருக்கு திண்டுக் கல்லில் பல வீடுகள், கார்கள் என்று ஜெகஜ்ஜோதியாய் வலம் வருகிறாராம்.

. ஐந்தாவது நபர் - மாவட்டப் போக்குவரத்துத் துறை அமைச்சர் என்று வர்ணிக்கப்படுகிறவர். கடந்த ஆட்சியில் போக்குவரத்துத் துறையே, இவர் கண் அசைவில்தான் இயங்கியதாம். இவருக்கும் அசையாச் சொத்துக்களின் மதிப்பு ஏராளம்.

. ஆறாவது நபர் - சொந்த ஊர்ப்பெயரை அடை மொழியாகக் கொண்டவர். திண்டுக்கல்லில் உள்ள அ.தி.மு.க. புள்ளிக்கும் ஐ. பெரியசாமிக்கும் தூதுவராக செயல்பட்டவராம்.

. ஏழாவது நபர் - இன்ஷூரன்ஸ் நிறுவனப் பெயரை முன்னே வைத்திருப்பாராம். பெட்டி தூக்குவது, சப்ளை அண்ட் சர்வீஸில் கில்லாடியாம். இப்போது பிரபல ரியல் எஸ்டேட் அதிபராக மாறிவிட்டாராம்.

. இவர்களைப் பற்றி முழுமையான முதல் கட்டத் தகவல்கள் சேகரிக்கப்பட்டு, சென்னையில் உள்ள விஜிலென்ஸ் தலைமை அலுவலக அதிகாரிகளின் பார்வைக்கு வைக்கப்பட்டுள்ளதாம். அரசு அனுமதி கொடுத்ததும்... ரெய்டு, விசாரணை, கைதுப்படலம் தொடங்குமாம்!

. வானவில்கள் எப்போது வளைக்கப்படுகிறார்கள் என்று பார்ப்போம்!

. - கனிஷ்கா

கண்காணிக்கப்படும் 'வானவில்' நபர்கள்!

Vikatan Correspondent