Published:Updated:

முதியோர் இல்லமா முதல்வர் அலுவலகம்?

புலம்பும் கோட்டை அதிகாரிகள்

பிரீமியம் ஸ்டோரி

'பதவி நீட்டிப்பு’ என்கிற பரிதாபம் காட்டி வேண்டப்பட்ட அதிகாரிகளை பக்கத்தில் வைத்துக் கொள்வதால் ரிட்டையர்மென்ட் வயதைத் தாண்டியவர்களால் நிரம்பி வழிகிறது கோட்டை. 'முதியோர் இல்லமா முதல்வர் அலுவலகம்?’ என்று அதிகாரிகள் மட்டத்தில் பேச்சு எழுந்துள்ளது.

''கடந்த ஆட்சியில் கருணாநிதி முதல்வராக இருந்தபோதும் தனக்கு வேண்டிய அதிகாரிகள் என்று டி.ஆர்.ராமசாமி, ராஜரெத்தினம், ராஜமாணிக்கம் போன்ற ஓய்வுபெற்ற அதிகாரிகளை வைத்துக்கொண்டு

முதியோர் இல்லமா முதல்வர் அலுவலகம்?

நிர்வாகத்தை கவனித்தார். அதேபோல் ஜெயலலிதாவும் நடந்துகொள்ளலாமா?'' என்றும் இந்த அதிகாரிகள் கேட்கிறார்கள்!

ஷீலா பாலகிருஷ்ணன்: தேபேந்திரநாத் சாரங்கிக்குப் பிறகு புதிய தலைமைச் செயலாளராகப் பொறுப்புக்கு வந்து இப்போது ஓய்வுபெற்ற நிலையிலும் 'அரசின் ஆலோசகர்’ என்று புதுப்பெயர் கொண்ட பதவியில் அமர வைக்கப்பட்டிருக்கிறார். 1976-ம் ஆண்டு ஐ.ஏ.எஸ் அதிகாரியாக பணியைத் தொடங்கிய ஷீலா பாலகிருஷ்ணன், முந்தைய அ.தி.மு.க ஆட்சியில் ஜெயலலிதாவின் செயலாளராக அமர்த்தப்பட்டார். அரசின் திட்டங்கள், முக்கியப் பிரச்னைகள் தெரிந்து வைத்திருப்பார்; சொன்ன வேலையை செய்வார் என்பதாலேயே அவர் மீது ஜெயலலிதாவுக்கு கனிவான பார்வை உண்டு. சரியாக 15 மாதங்கள் தலைமைச் செயலாளராக இருந்த இவருக்கு அடுத்த ஜாக்பாட் அடித்தது. ஓய்வுக்குப் பிறகும் 'அரசின் ஆலோசகர்’ என்ற பதவியில் உட்கார வைக்கப்பட்டிருக்கிறார். முன்பு ஓய்வுபெற்ற தேபேந்திரநாத் சாரங்கியைத்தான் முதன்முதலில் 'அரசின் ஆலோசகர்’ பதவியில் அமர்த்தினார் ஜெயலலிதா. இப்போது அந்தப் பதவி ஷீலா பாலகிருஷ்ணன் வசமாகியிருக்கிறது. ஆலோசகர் என்றாலும் முதல்வரின் எல்லா நிகழ்ச்சிகளிலும் தலை காட்டுகிறார். 'சூப்பர் தலைமைச் செயலாளர்’ என்பதுபோல வலம் வருகிறார்.

ஷீலா ப்ரியா: முதல்வர் ஜெயலலிதாவுக்கு நான்கு செயலாளர்கள். இதில் முதல் செயலாளர் அந்தஸ்தில் இருப்பவர் ஷீலா ப்ரியா. கவர்னர் சென்னா ரெட்டி தொடங்கி பர்னாலா வரை தொடர்ந்து கவர்னரின் செயலாளராக பல ஆண்டுகள் ராஜ்பவனிலேயே வாசம் செய்தவர். ஆட்சி மாற்றம் நடந்தபோது ஷீலா ப்ரியாவுக்கு முதல்வரின் செயலாளர் போஸ்ட் கிடைத்தது. அப்பாயின்ட்மென்ட் உட்பட முதல்வரின் முக்கிய விஷயங்கள் அனைத்தையும் பார்ப்பது ஷீலா ப்ரியாதான். இவரது பதவிக் காலம் மே மாதம் முடிந்தபோது இரண்டாவது செயலாளராக இருந்த ராம்மோகன் ராவ்தான் முதல் செயலாளர் ஆவார் என பலர் நினைத்தனர். ஆனால் எதிர்பாராதவிதமாக ஷீலா ப்ரியாவுக்கே பதவி நீட்டிப்பு கொடுத்து பக்கத்தில் வைத்துக்கொண்டார் ஜெயலலிதா.

முதியோர் இல்லமா முதல்வர் அலுவலகம்?

வெங்கட்ரமணன்: 2011 சட்டசபைத் தேர்தலின் வாக்குகள் எண்ணப்பட்டு அ.தி.மு.க வெற்றி என்ற செய்தி வெளியாகிக்கொண்டிருந்தபோது போயஸ் கார்டன் வீட்டுக்கு ஐ.ஏ.எஸ், ஐ.பி.எஸ் அதிகாரிகள் படையெடுத்தார்கள். போர்ட்டிகோவில் பலரும் காத்திருக்க.. உள்ளே அழைக்கப்பட்டார் வெங்கட்ரமணன். ஜெயலலிதா அமைச்சரவை பதவியேற்றபோது முதல்வரின் செயலாளர் என்கிற பதவி வழங்கப்படாத நிலையிலும், மேடையில் இருந்து எல்லா ஏற்பாடுகளையும் பார்த்தவர் வெங்கட்ரமணன். முதல்வரின் மூன்றாவது செயலாளர் என்ற பதவியில் அமர்த்தப்பட்டாலும், இவர்தான் அம்மாவுக்கு ஆல் இன் ஆல். ஜெயலலிதா, வெங்கட்ரமணனின் சஷ்டியப்த பூர்த்தி விழாவுக்கு நேரில் போய் பூக்கள் தூவி வாழ்த்தினார். பணி ஓய்வுக்குப் பிறகு இவருக்கும் பதவி நீட்டிப்பு தரப்பட்டுள்ளது.

ராமானுஜம்: ஜெயலலிதாவின் 'காக்கி பாசம்’ ஊரறிந்தது. அந்தத் துறையின் உச்சபட்ச அதிகாரி ராமானுஜத்தை அவ்வளவு எளிதில் விட்டுத் தருவாரா என்ன? இவர், 1978 பேட்ச் அதிகாரி. பூர்வீகம் சேலம். உளவுத் தகவல்களைத் திரட்டுவதில் ராமானுஜம் கில்லாடி. அதனால்தான் முதலில் அவர் உளவுப் பிரிவு டி.ஜி.பி-யாக நியமிக்கப்பட்டு, சட்டம் மற்றும் ஒழுங்கு டி.ஜி.பி பதவியை கூடுதல் பொறுப்பாக கவனித்து வந்தார். ஒருகட்டத்தில், மத்திய அரசின் எதிர்ப்பையும் மீறி, 2 ஆண்டுகள் பதவி நீட்டிப்பு வழங்கி அந்தப் பதவியில் அமரவைத்தார் ஜெயலலிதா. ஆனால், எதிர்ப்பு கிளம்பி விவகாரம் நீதிமன்றம் வரை போனது. மத்திய அரசு விட்டுக்கொடுக்காததால், அதிகாரப்பூர்வமாக சம்பளம் வாங்காத டி.ஜி.பி-யாகவே தொடர்கிறார் என்கிறார்கள் காக்கிகள்.

ராமனுஜத்தின் பதவி நீட்டிப்புக் காலம் நவம்பர் மாதத்தோடு முடிகிறது. ஆனாலும் 'ராமானுஜத்தின் சேவை தமிழக அரசுக்குத் தேவை!’ எனச் சொல்லி அவரை தமிழக அரசின் செக்யூரிட்டி அட்வைஸர் பதவி ஒன்றில் அமர்த்தி ஜெயலலிதா நிச்சயம் அழகு பார்ப்பார் என்றும் சொல்லப்படுகிறது!

''இவர்கள் தகுதியானவர்களாக இருக்கலாம். அதற்காக இன்னொரு தகுதியானவர்களுக்கு கிடைக்க வேண்டிய வாய்ப்பை மறுத்து இவர்களுக்கு பதவி நீட்டிப்பு தர வேண்டுமா?'' என்பது கோட்டை அதிகாரிகளின் கவலை!

-எம்.பரக்கத் அலி

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு