Published:Updated:

''82 மதிப்பெண்ணும் 118 மதிப்பெண்ணும் ஒன்றா?''

ஆசிரியர் தகுதித் தேர்வில் சிக்கல் மேல் சிக்கல்

''82 மதிப்பெண்ணும் 118 மதிப்பெண்ணும் ஒன்றா?''

ஆசிரியர் தகுதித் தேர்வில் சிக்கல் மேல் சிக்கல்

Published:Updated:

'ஆசிரியர்கள் தேர்வில் வெயிட்​டேஜ் முறையை ரத்து செய்ய வேண்டும்’ உள்ளிட்ட கோரிக்கைகளை  வலியுறுத்தி கிட்டத்தட்ட ஒரு மாத காலமாக தொடர் போராட்டங்களில் ஈடுபட்டு வருகின்றனர் கடந்த ஆண்டு ஆசிரியர் தகுதித் தேர்வில் தேர்வான பட்டதாரி ஆசிரியர்கள். ஆசிரியர் தகுதித் தேர்வில் தேர்ச்சி பெற்று பணி நியமனத்தை எதிர்பார்த்துக் கொண்டிருந்த நிலையில், வெயிட்டேஜ் என்ற முறையை தமிழக அரசு அறிவித்து, பணி நியமனத்தில் பல முடிச்சுகளைப் போட்டு சிக்கலை ஏற்படுத்திவிட்டது. அதனை அடுத்துதான் இந்தப் போராட்டங்கள்.

''82 மதிப்பெண்ணும் 118 மதிப்பெண்ணும் ஒன்றா?''

ஆசிரியர் தினத்தன்று தங்களின் வாக்​காளர் அடையாள அட்டை மற்றும் குடும்ப அட்டையை மாநில தேர்தல் ஆணையத்திடம் திருப்பித் தந்து போராட்டம், 14-ம் தேதி பள்ளிக் கல்வி இயக்குநர் சபீதா வீட்டை முற்றுகையிட்டுப் போராட்டம், 15-ம் தேதி பள்ளிக் கல்வித் துறை இயக்குநரகம் முன்பு நெற்றியில் நாமம் போட்டு போராட்டம்... என கடந்த ஆகஸ்ட் மாதம் 18-ம் தேதி முதல் வெவ்வேறு முறையில் தொடர் போராட்டங்கள், ஆர்ப்பாட்டங்களை நடத்தி வருகின்றனர். இவர்கள் இவ்வளவு போராட்டங்களை நடத்தியும், அரசு இயந்திரம் என்னவோ பாராமுகமாகவே இருக்கிறது.

ஒட்டுமொத்த விகடனுக்கும் ஒரே ஷார்ட்கட்!

பாதிக்கப்பட்ட இடைநிலை மற்றும் பட்டதாரி ஆசிரியர்களில் ஒருவரான சுதா, ''கடந்த ஆண்டு ஆகஸ்ட் 18-ம் தேதி நடத்தப்பட்ட ஆசிரியர் தகுதித் தேர்வில், ஆறு லட்சம் பேர் தேர்வு எழுதினார்கள். அதில், 150 மதிப்பெண்களுக்கு 90 மதிப்பெண்களுக்கு மேல் பெற்று 18 ஆயிரத்துக்கும் மேற்பட்ட ஆசிரியர்கள் தேர்வானார்கள். இந்த நிலையில், இட ஒதுக்கீடு அடிப்படையில் 82 மதிப்பெண்கள் பெற்றாலே தேர்ச்சி என்று அறிவித்தார்கள். இதனால், தேர்ச்சி பெற்றவர்களின் எண்ணிக்கை இருமடங்காக அதிகரித்தது. தேர்ச்சி பெற்றவர்களுக்கு இந்த ஆண்டு ஜனவரி மாத இறுதியில் மூன்று நாட்கள் சான்றிதழ்கள் சரிபார்க்கப்பட்டன.

''82 மதிப்பெண்ணும் 118 மதிப்பெண்ணும் ஒன்றா?''

பணி நியமனத்தை நாங்கள் எதிர்பார்த்துக் கொண்டிருந்த வேளையில், தமிழக அரசாங்கம் ஒரு புதிய ஜி.ஓ-வைப் பிறப்பித்து எங்கள் வாழ்க்கையில் விளையாட ஆரம்பித்தது.

அந்த ஜி.ஓ-வின்படி, ஆசிரியர்கள் தேர்வில் வெயிட்டேஜ் முறையை அமல்படுத்துகிறார்கள். இதனால், தகுதித் தேர்வில் தேர்ச்சி பெற்றவர்கள் பணி நியமனம் பாதிக்கப்படுகிறது. ஆசிரியர் தகுதித் தேர்வின் மதிப்பெண் அடிப்படையில் 60 சதவிகிதமும், ப்ளஸ் டூ மதிப்பெண் அடிப்படையில் 10 சதவிகிதமும், இளநிலை பட்டப்படிப்பின் மதிப்பெண் அடிப்படையில் 15 சதவிகிதமும், பி.எட் மதிப்பெண் அடிப்படையில் 15 சதவிகிதமுமாக மொத்தம் 100 சதவிகிதம் கணக்கிட்டு, பணி நியமனம் வழங்கப்படும் என அறிவித்தனர். இதனால், குழப்பம் ஏற்பட்டது.

அண்மைக் காலமாக ப்ளஸ் டூ தேர்வில் இருபது, முப்பது பேர் மாநிலத்தில் முதல் மூன்று இடங்களைப் பிடிக்கிறார்கள். ஆனால், நாங்கள் படிக்கும்போது ஆயிரம் மார்க் பெற்றவர்களே சொற்பமான எண்ணிக்கையில்தான் இருந்தனர். இந்த வெயிட்டேஜ் முறையில் அதிகம் பாதிக்கப்படுவது, 30 வயதுக்கும் மேற்பட்டவர்கள்தான். இப்போதைய பட்டதாரிகள் 82 மதிப்பெண்கள் பெற்று வெயிட்டேஜ் முறையில் எளிதாகத் தேர்வாகிவிடுவார்கள். ஆனால்,  பல ஆண்டுகளுக்கு முன் பட்டம் பெற்றவர்கள் இந்தத் தேர்வில் 118  மதிப்பெண்கள் பெற்றிருந்தாலும் வெயிட்டேஜ் முறையில் பாதிக்கப்படுகிறார்கள்.  82 மதிப்பெண்கள் பெற்றவர்களோடு 118 மதிப்பெண்கள் பெற்றவர்கள் ஒன்றாக முடியவில்லையே... இது எப்படி நியாயமாகும்?

சான்றிதழ் சரிபார்த்து, பணி நியமனத்துக்காகக் காத்திருந்தபோது இந்த அறிவிப்பு வர, எங்கள் எதிர்காலமே தலைகீழாக மாறிவிட்டது. இதனால், மொத்தம் 62,500 ஆசிரியர்களும் அவர்களின் குடும்பத்தினரும் பாதிக்கப்பட்டு இருக்கிறார்கள். இது தொடர்பாக யாரும் எங்களை அழைத்துக்கூடப் பேசவில்லை.

மூன்று கோரிக்கைகளை முன்வைத்து தொடர் போராட்டம் நடத்தி வருகிறோம். முதலில் வெயிட்டேஜ் முறையை நீக்க வேண்டும். இரண்டாவதாக, தகுதித் தேர்வில் பெற்ற மதிப்பெண் அடிப்படையில் பணி நியமனம் வழங்க வேண்டும். மூன்றாவதாக, தேர்ச்சி பெற்ற அனைத்து ஆசிரியர்களுக்கும் பணி நியமனம் வழங்கும் வரை தகுதித் தேர்வை ஒத்திவைக்க வேண்டும்'' என்று கொந்தளித்தார்.

நாமம் போட்டுக்கொண்டு போராட்டத்தில் சோர்வான நிலையில் இருந்த பூங்கொடி நம்மிடம், ''நான் சேலம் மாவட்டத்தில் இருந்து வந்திருக்கிறேன். என்னைப்போன்று 32 மாவட்டங்களில் இருந்தும் போராட்டத்தில் கலந்துகொள்ள பல ஆசிரியர்கள் வந்திருக்கிறார்கள். சென்னையில் தங்கும் அளவுக்கு பணவசதி இல்லாததால், கோயம்பேடு பேருந்து நிலைய பிளாட்பாரத்தில் தங்கிக்கொண்டு 25 நாட்களுக்கும் மேலாக போராட்டத்தில் கலந்துகொண்டு வருகிறோம். இங்கேயும் காவல் துறையினர் எங்களைக் கண்காணித்து வருகிறார்கள். இப்போது என் ஆசிரியர் கனவே கேள்விக்குறியாகிவிட்டது'' என்றார் பரிதாபமாக.

இந்தப் பிரச்னை குறித்து கல்வியாளர்களிடம் கேட்டபோது, ''தமிழக அரசு வேலைக்கு டி.என்.பி.எஸ்.சி மூலம் தேர்வு நடத்தப்பட்டு, அதில் பெறுகிற மதிப்பெண்கள் அடிப்படையிலேயே பணிநியமனம் வழங்கப்படுகிறது. திறமையான ஆசிரியர்களுக்காக அரசு தகுதித் தேர்வு நடத்துவதில் எந்தத் தவறும் இல்லை. அதே நேரத்தில் வெயிட்டேஜ் முறை என்று மதிப்பெண்களை, பணி நியமனத்துக்குக் கணக்கிடுவது அறிவியல்பூர்வ​மான முறை கிடையாது'' என்றனர்.

இந்த அப்பாவி ஆசிரியர்களின்

கோரிக்கை​களை தமிழக அரசு நிறைவேற்றுமா?  

- நா.சிபிச்சக்கரவர்த்தி

படங்கள்: ப.சரவணகுமார்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism