Published:Updated:

'யாரோ பின்தொடர்கிறார்கள்' - பயத்தில் தன் கழுத்தைத் தானே அறுத்துக்கொண்ட ஆட்டோ டிரைவர்

சித்திரிப்பு படம்
சித்திரிப்பு படம்

சொத்துக்காக யாராவது தன்னைக் கொலை செய்துவிடுவார்கள் என்ற அச்சத்தில் ஆட்டோ டிரைவர் ஒருவர் மும்பையில் தன்னைத் தானே கழுத்தை அறுத்துக்கொண்டிருக்கிறார்.

மும்பையில் ஆட்டோ டிரைவராக இருப்பவர் லால்ஜி பால். இவர் இரண்டு நாள்களுக்கு முன்பு கழுத்து அறுபட்ட நிலையில், ரத்த வெள்ளத்தில் தெருவில் கிடந்தார். பொதுமக்கள் இது குறித்து போலீஸாருக்குத் தகவல் கொடுத்தனர். அவரை மீட்டு போலீஸார் சயான் மாநகராட்சி மருத்துவமனைக்கு சிகிச்சைக்கு அனுப்பிவைத்தனர். கழுத்து அறுபட்டிருந்ததால் அவரால் சரியாகப் பேச முடியவில்லை. இதையடுத்து போலீஸார் கொலை முயற்சி வழக்கு பதிவு செய்து சம்பவம் நடந்த இடத்திலிருந்த கண்காணிப்பு கேமரா பதிவுகளை ஆய்வு செய்தனர்.

சித்திரிப்பு படம்
சித்திரிப்பு படம்
கழுத்தை இறுக்கிய நைலான் கயிறு; காயத்தோடு தவித்த காட்டுமாடு; மீட்டு உதவிய வனத்துறை!

ஆனால் எந்தவிதத் துப்பும் துலங்கவில்லை. மயக்க நலையில் இருந்த லால்ஜி மயக்கம் தெளிந்து போலீஸாருக்கு எழுத்து மூலம் பதிலளித்தார். அதில் லால்ஜி தன்னைத் தானே கழுத்தை அறுத்துக்கொண்டது தெரியவந்தது. லால்ஜிக்கு மும்பையில் சில சொத்துகளும், ரொக்கப் பணமும் இருக்கின்றன. ஆனால் அவர் குடும்பத்தோடு வசிக்கவில்லை. இதனால் யாராவது தனது சொத்துக்காகத் தன்னைக் கொலை செய்துவிட்டு தனது சொத்துகளை அபகரித்துக்கொள்ளக்கூடும் என்ற அச்சத்தில் வாழ்ந்துவந்தார். இதற்காக எப்போதும் ஆட்டோவில் கத்தி வைத்திருப்பாராம். அதோடு ஆட்டோவின் இருக்கையில் தனது வாரிசு யார் என்பதையும் எழுதிவைத்திருக்கிறார். எப்போதும் இரவு நேரத்தில் பயத்தில் தனது ஆட்டோவில்தான் உறங்கி எழுந்திருக்கிறார். சம்பவத்தன்றும் லால்ஜி ஆட்டோ ஓட்டிக்கொண்டிருக்கும்போது யாரோ தன்னைப் பின்தொடர்வதாக நினைத்தார். எனவே யாராவது தன்னைக் கொலை செய்துவிடக்கூடும் என்ற அச்சத்தில் தன்னிடமிருந்த கத்தியை எடுத்து தனக்குத் தானே கழுத்தில் அறுத்துக்கொண்டிருக்கிறார். அவர் முழுமையாக குணமடைந்த பிறகு இது குறித்து மேற்கொண்டு விசாரணை நடத்த போலீஸார் திட்டமிட்டுள்ளனர்.

அடுத்த கட்டுரைக்கு