Published:Updated:

`பெண் விவகாரம்; நில அபகரிப்பு; 9 பிரிவுகளில் வழக்கு!’ -போலீஸ் பிடியில் வாணியம்பாடி தி.மு.க பிரமுகர்

தி.மு.க பிரமுகர் சாரதி குமார்
தி.மு.க பிரமுகர் சாரதி குமார்

பெண் விவகாரத்தில் சிக்கிய வாணியம்பாடி தி.மு.க பிரமுகர் சாரதி குமார் மேலும் ஒரு சர்ச்சையில் சிக்கியுள்ளார். அவர் மீது இதுவரை 9 பிரிவுகளின் கீழ் இரண்டு வழக்குகள் பதிவு செய்யப்பட்டுள்ளன.

திருப்பத்தூர் மாவட்டம், வாணியம்பாடி நகர தி.மு.க பொறுப்பாளர் சாரதி குமார் மீது அவரின் மனைவி ரம்யா சமீபத்தில் சென்னை பெருநகரக் காவல்துறை ஆணையர் மற்றும் திருப்பத்தூர் எஸ்.பி-யிடம் புகார் அளித்திருந்தார். அவர் கொடுத்திருந்த மனுவில், `சாரதி குமார் சேலத்தைச் சேர்ந்த வயதான பெண்ணுடன் நெருக்கமான உறவு வைத்துள்ளார். அந்தப் பெண்ணின் அண்ணன் முதலமைச்சரின் தனிப் பிரிவில் காவல்துறை உயரதிகாரியாக பணியாற்றிவருகிறார். குடும்ப கௌரவம் கருதி இத்தனை நாள்களாக சகித்துக்கொண்டேன்.

திருமணக் கோலத்தில் சாரதி குமார்
திருமணக் கோலத்தில் சாரதி குமார்

ஆனால், சாரதி குமார் என்னுடைய 140 பவுன் நகை, ரூ.20 லட்சம் ரொக்கப் பணத்தைப் பறித்து அந்தப் பெண்ணிடம் கொடுத்துள்ளார். இதுபற்றி கேட்டதற்கு, தன் அரசியல் செல்வாக்கைப் பயன்படுத்தி எனக்கும் என் குடும்பத்தினருக்கும் கொலை மிரட்டல் விடுக்கிறார். என் உயிருக்குப் பாதுகாப்பு வழங்கி கணவன் சாரதி குமாரை கைதுசெய்ய வேண்டும்’ என்று கூறியிருந்தார் . சாரதி குமார் சேலம் பெண்ணுடன் நெருக்கமாக இருந்த போட்டோ, வீடியோ, ஆடியோ உரையாடல் போன்ற ஆதாரங்களையும் ரம்யா காவல்துறை அதிகாரிகளிடம் ஒப்படைத்தார்.

அதையடுத்து, வாணியம்பாடி நகரப் பொறுப்பிலிருந்து சாரதி குமார் அதிரடியாக நீக்கப்பட்டார். இதுதொடர்பாக, சாரதி குமாரிடம் கேட்டதற்கு, ``அது, என் குடும்ப விவகாரம். சிலர் வேண்டுமென்றே என்னைப் பழிவாங்கும் நோக்கத்தில் செயல்படுகிறார்கள். என் மீதான புகாரில் உண்மையில்லை என்பதை நிரூபிக்கத்தான் பொறுப்பிலிருந்து விலகினேன். என் மனைவி ஒரு கோடி ரூபாய் கேட்கிறார். அவ்வளவு பெரிய தொகையை என்னால் கொடுக்க முடியாது என்று நீதிமன்றத்தில் கூறியுள்ளேன்’’ என்று விளக்கம் கொடுத்திருந்தார்.

இந்தப் புகாரின் அடிப்படையில், தி.மு.க பிரமுகர் சாரதி குமார் மற்றும் அவரின் தாய் மீது வாணியம்பாடி அனைத்து மகளிர் காவல்துறையினர் 3 பிரிவுகளின் கீழ் வழக்கு பதிவுசெய்துள்ளனர்.

மனைவி ரம்யா
மனைவி ரம்யா

இந்த நிலையில், மனநலம் பாதிக்கப்பட்ட பெண்ணுக்குச் சொந்தமான கோடிக்கணக்கான ரூபாய் மதிப்பிலான நிலத்தை அபகரித்த புகாரிலும் சிக்கியுள்ளார் சாரதி குமார். இதுதொடர்பாக வாணியம்பாடியைச் சேர்ந்த சௌந்தரராஜன் என்பவர் திருப்பத்தூர் எஸ்.பி அலுவலகத்தில் கொடுத்துள்ள புகார் மனுவில், `என் உறவினர் ரத்தினசாமியின் மகள் யோகம்மாள் (42), மனநலம் பாதிக்கப்பட்டவர். அவருக்குப் பெற்றோர் இல்லை. தங்கை தில்லை நாயகியின் பராமரிப்பில் இருந்தார். தில்லை நாயகியும் 2015-ல் மாரடைப்பால் இறந்துவிட்டார்.

தனித்துவிடப்பட்ட யோகம்மாள் சென்னை பள்ளிக்கரணையில் உள்ள விடுதியில் தங்க வைக்கப்பட்டார். பிறகு என் வீட்டுக்கு அழைத்து வந்து தங்க வைத்துள்ளேன். யோகம்மாளுக்கு செட்டியப்பனூரில் பல கோடி ரூபாய் மதிப்புள்ள நிலம் உள்ளது. இந்த நிலத்தை, வாணியம்பாடி நகர தி.மு.க பொறுப்பாளராக இருந்த சாரதி குமார் மற்றும் அவரின் கூட்டாளிகள் சேர்ந்து அபகரித்துக்கொண்டனர். இதுதொடர்பாக கடந்தாண்டு டிசம்பர் மாதம் 16-ம் தேதி, மாவட்ட கலெக்டரிடம் நான் புகார் அளித்தேன். இதனால், எனக்குக் கொலை மிரட்டல் விடுக்கிறார்கள். அவர்கள் மீது நடவடிக்கை எடுக்க வேண்டும்’’ என்று கூறியிருந்தார்.

மனைவி ரம்யாவுடன் சாரதி குமார்
மனைவி ரம்யாவுடன் சாரதி குமார்

இந்தப் புகாரின் அடிப்படையிலும், வாணியம்பாடி தாலுகா போலீஸார் விசாரணை நடத்தி தி.மு.க பிரமுகர் சாரதி குமார் மற்றும் அவரின் கூட்டாளிகள் தட்சிணாமூர்த்தி, ஜோசப் செல்வகுமார், சரவண பாபு ஆகியோர் மீது கொலை மிரட்டல் உட்படப் 6 பிரிவுகளின் கீழ் வழக்கு பதிவுசெய்துள்ளனர். இந்த வழக்கு தொடர்பாக குற்றம்சாட்டப்பட்டவர்களிடம் வாணியம்பாடி டி.எஸ்.பி தீவிர விசாரணை மேற்கொண்டுவருகிறார்.

அடுத்த கட்டுரைக்கு