Published:Updated:

`சுற்றுலா செலவு; ரொக்கப் பணமாக ரூ.1,038 கோடி!'- சி.பி.ஐ-யை அதிரவைத்த சென்னை டூரிஸ்ட் நிறுவனங்கள்

ஹாங்காங்
ஹாங்காங்

சென்னையைச் சேர்ந்த நிறுவனங்கள் ரூ.1,038 கோடி முறைகேடு செய்தது கண்டுபிடிக்கப்பட்டுள்ளது.

ஹாங்காங் வெறும் சுற்றுலாத் தளம் மட்டும் கிடையாது. உலகின் முக்கியமான பொருளாதார மையமும்கூட. இந்த நகரத்தைச் சுற்றி ஏராளமான தொழில்கள் நடைபெற்றுவருகின்றன. இதற்கிடையே இதே நகரத்தை மையமாக வைத்து சென்னையைச் சேர்ந்த நிறுவனங்கள் 1,038 கோடி ரூபாய் முறைகேடு செய்திருப்பது கண்டுபிடிக்கப்பட்டுள்ளது.

Money
Money
Representational image

சிபிஐ வழக்கு பதிவு செய்யவே, இந்த விவரங்கள் தற்போது வெளிவந்துள்ளன. இந்த முறைகேட்டில் ஈடுபட்ட நிறுவனங்கள் அனைத்தும் டூரிஸ்ட் எனப்படும் தனியார் சுற்றுலா நிறுவனங்கள். சென்னை சேப்பாக்கம், திருவல்லிக்கேணி, எழும்பூர், பெரியமேடு ஆகிய பகுதிகளில் செயல்படும் தனியார் டூர் ஏற்பாட்டாளர்கள்தாம் இந்த மோசடியில் பெரும்பாலும் ஈடுபட்டுள்ளனர். மொத்தம் 48 நிறுவனங்கள் மீது வழக்குபதிவு செய்யப்பட்டுள்ளன.

முறைகேடு நடந்தது எப்படி?

இரண்டு ஆண்டுகளுக்கு முன்பு சென்னையில் பல இடங்களில் வருமான வரித்துறை சோதனை நடத்தியது. இதில் சிக்கிய ஆவணங்களில் 2014-15-ம் ஆண்டில் ரூ.1,038 கோடி அளவுக்கு ஹாங்காங்க்கு பணப் பரிமாற்றம் செய்யப்பட்டது தெரியவந்தது. இந்தப் பரிமாற்றம் பேங்க் ஆஃப் இந்தியா, ஸ்டேட் வங்கி, பஞ்சாப் நேஷனல் வங்கி ஆகியவை மூலமாக அனுப்பப்பட்டிருந்தது. இதுதொடர்பாக அந்த நிறுவனங்களிடம் விளக்கம் கேட்டபோது, தமிழகத்திலிருந்து சுற்றுலா பயணிகளை ஹாங்காங்குக்குப் அனுப்பியதாகவும், அவர்களுக்கான செலவுக்கு கோடிக்கணக்கில் பணம் அனுப்பியதாகவும் பதில் கொடுத்துள்ளன.

சிபிஐ
சிபிஐ

ஆனால், விசாரணையில் கணக்கில் காட்டியபடி ஹாங்காங்குக்கு சுற்றுலாப் பயணிகளை அனுப்பவில்லை என்பதை சிபிஐ அதிகாரிகள் கண்டுபிடித்தனர். சுற்றுலாப் பயணிகளை அனுப்புகிறோம் என்ற பெயரில் அவர்கள் பெயரில் நடப்பு வங்கிக் கணக்குகளை தொடங்கி கறுப்பு பணத்தை இங்கிருந்து ஹாங்காங் அனுப்பியுள்ளனர். 24 கணக்குகள் மூலம் ரூ.488.39 கோடியும் 27 வங்கிக் கணக்குகளிலிருந்து ரூ.549.95 கோடியும் ஹாங்காங்க்கு அனுப்பப்பட்டுள்ளது.

அதிலும், மத்திய ரிசர்வ் வங்கியின் அனுமதி பெறாமல் சுற்றுலா செலவு, இறக்குமதி என்ற பெயரில் ஹாங்காங்கில் உள்ள வங்கிக் கணக்குகளுக்கு ரொக்கமாகப் பணம் அனுப்பியுள்ளனர். ஆனால், 10 நிறுவனங்கள் மட்டுமே சிறிய அளவில் பொருள்களை இறக்குமதி செய்துள்ளன. நிறுவனங்கள் ஹாங்காங்குக்கு அனுப்பிய தொகைக்கும் பொருள்களின் மதிப்புக்கும் மிகப்பெரிய வித்தியாசம் இருப்பதும் சி.பி.ஐ விசாரணையில் தெரியவந்துள்ளது.

வங்கிக் கணக்குகள் தொடங்குவதிலும் போலி ஆதார் அட்டை, பான் கார்டுகள், வாடகை ஒப்பந்தம் ஆகியவற்றைக் கொடுத்து முறைகேடு செய்துள்ளனர். ஹாங்காங்குக்கு பணம் அனுப்பப்பட்ட மொத்த வங்கிக் கணக்குகளில் 51 கணக்குகள் போலியானவை. இதனால் வங்கி அதிகாரிகள் உதவியுடன் இந்த முறைகேடுகள் நடந்ததா என்கிற ரீதியில் விசாரணையைத் தொடங்கியுள்ளனர் சி.பி.ஐ அதிகாரிகள். வழக்கில் சிக்கியுள்ள 48 நிறுவனங்களில் 24 நிறுவனங்கள் போலியானவை.

முறைகேடு
முறைகேடு

இவற்றின் முகவரிகள் எழும்பூர், பெரியமேடு பகுதிகளில் செயல்படும் டூரிஸ்ட் நிறுவனங்களுக்குச் சொந்தமானவை. எனினும், இந்த முறைகேட்டில் யார் யார் ஈடுபட்டிருக்கிறார்கள், அந்தப் பணம் யாருடையது என்பன போன்ற விவரங்கள் தெரியவராத நிலையில், இதுதொடர்பாக சி.பி.ஐ அதிகாரிகள் விசாரணைத் தீவிரப்படுத்தியுள்ளனர். தற்போது 48 நிறுவனங்கள் மீதும் 3 முகவர்கள் மீதும் சி.பி.ஐ வழக்கு பதிவு செய்துள்ளது.

அடுத்த கட்டுரைக்கு