Published:Updated:

சென்னை: பாலியல் தொழில் நடப்பதாக வீட்டுக்குள் நுழைந்த போலீஸ்! - பெண் பகீர் புகார்

ஒட்டுமொத்த விகடனுக்கும் ஒரே ஷார்ட்கட்

Use App
பாதிக்கப்பட்ட பெண்ணுடன் வழக்கறிஞர் ஸ்ரீதர்
பாதிக்கப்பட்ட பெண்ணுடன் வழக்கறிஞர் ஸ்ரீதர்

சென்னையில் பாலியல் தொழில் நடப்பதாக வீட்டில் ரெய்டு நடத்திய விபசார தடுப்புப் பிரிவு போலீஸார்மீது சட்டப்படி நடவடிக்கை எடுக்க வேண்டும் என பெண் ஒருவர் புகாரளித்திருக்கிறார்.

சென்னை மாங்காடு காவல் நிலைய எல்லைக்குட்பட்ட அடுக்குமாடிக் குடியிருப்பில் குடியிருக்கும் பெண்ணின் வீட்டில் பாலியல் தொழில் நடப்பதாக விபசார தடுப்பு போலீஸார் அதிரடியாக சோதனை நடத்தியுள்ளனர். இந்தச் சோதனையால் தனக்கும் தன் குடும்பத்தினருக்கும் அவமானம் ஏற்பட்டதாக சம்பந்தப்பட்ட பெண், காவல்துறையிடமும் முதல்வரின் தனிப்பிரிவிலும் மனுக்கள் மீது மனுக்கள் அளித்துவருகிறார்.

இது குறித்து பெண்ணின் வழக்கறிஞர் ஸ்ரீதர் நிருபர்களிடம் பேசுகையில், ``பாதிக்கப்பட்ட பெண் வெளிநாட்டில் குடும்பத்தோடு தங்கியிருந்து சட்டம் படித்தவர். கடந்த 2015-ம் ஆண்டு அவர், தன்னுடைய குழந்தைகளோடு சென்னை வந்தார். தற்போது அந்தப் பெண் சென்னையில் குழந்தைகளோடு குடியிருந்துவருகிறார். எம்என்சி கம்பெனி ஒன்றில் வேலை பார்த்துவருகிறார். இந்தச் சூழலில் 11.5.2021-ம் தேதி மாலை 5 மணியளவில் சென்னை மாநகர கமிஷனரின் சிறப்புப் படை எனக் கூறி இன்ஸ்பெக்டர் ஒருவரும், அவரின் கார் டிரைவரும் அந்தப் பெண் குடியிருக்கும் அடுக்குமாடிக் குடியிருப்புக்கு வந்தனர். பின்னர் செக்யூரிட்டியிடம் தகவலைக் கூறிவிட்டு அந்தப் பெண் குடியிருக்கும் 8-வது மாடிக்கு இன்ஸ்பெக்டரும் டிரைவரும் சென்றனர்.

ஸ்ரீதர்
ஸ்ரீதர்

வீட்டுக்குச் சென்ற அவர்கள், `பாலியல் தொழில் நடப்பதாக எங்களுக்குத் தகவல் வந்திருக்கிறது. அதனால் வீட்டைச் சோதனை போட வந்திருக்கிறோம்’ என்று கூறியிருக்கின்றனர். பின்னர் அவர்கள் இருவரும் வீட்டின் மூன்று படுக்கை அறைகளிலும் அத்துமீறி நுழைந்து சோதனை நடத்தியிருக்கின்றனர். மெத்தையின் கீழே ஆணுறை இருக்கிறதா என்றும் பார்த்திருக்கின்றனர். இந்த திடீர் சோதனையால் அந்தப் பெண்ணுக்கும் அவரின் குழந்தைகளுக்கும் அவமானம் ஏற்பட்டுள்ளது. எந்த ஆதாரமும் கிடைக்காததால் போலீஸார் ஏமாற்றத்துடன் திரும்பிச் சென்றுவிட்டனர். இதையடுத்து அந்தப் பெண், மாங்காடு காவல் நிலையத்தில் புகாரளித்தார். போலீஸார் விசாரித்தபோதுதான் பெண்ணின் வீட்டுக்கு வந்தது விபசார தடுப்புப் பிரிவு போலீஸ் இன்ஸ்பெக்டர், அவரின் டிரைவர் எனத் தெரியவந்தது.

அத்துமீறி வீட்டுக்குள் நுழைந்து அடுக்குமாடிக் குடியிருப்பு முழுவதும் தங்களை அவமானப்படுத்திவிட்டுச் சென்ற விபசார தடுப்புப் பிரிவு போலீஸார்மீது நடவடிக்கை எடுக்கும்படி அந்தப் பெண், முதல்வர் தனிப்பிரிவுக்கும் கமிஷனருக்கும் புகார் அனுப்பினார். ஆனால் எந்தவித நடவடிக்கையும் எடுக்கப்படவில்லை. இதையடுத்து ஆர்டிஐ மூலம் தகவல்களை நீண்ட சட்ட போராட்டத்துக்குப் பிறகு பெற்றியிருக்கிறார். அப்போதுதான் அதே அடுக்குமாடிக் குடியிருப்பில் இருக்கும் ஒருவரின் தூண்டுதலின்பேரில்தான் போலீஸார் வீட்டுக்கு வந்து சோதனை நடத்தியது தெரியவந்தது. அது தொடர்பாக விபசார தடுப்புப் பிரிவு பெண் போலீஸ் அதிகாரியிடமும், போலீஸ் கமிஷனரிடமும் முறையிட்டபோது எந்தவித நடவடிக்கையும் எடுக்கப்படவில்லை. பெண்ணின் வீட்டுக்கு வந்து சோதனை நடத்திய இன்ஸ்பெக்டர் விபசார தடுப்புப் பிரிவிலிருந்து இடமாறுதலாகிவிட்டார். ஆனால் அவரை போலீஸ் உயரதிகாரிகள் காப்பாற்ற முயன்றுவருகிறார்கள். தேசிய பெண்கள் ஆணையம், தற்போது சம்பந்தப்பட்ட போலீஸார் மீது நடவடிக்கை எடுக்கும்படி உத்தரவிட்டிருக்கிறது. அதற்கு நடவடிக்கை எடுக்கவில்லையென்றால் நீதிமன்றத்தில் வழக்கு தொடரவிருக்கிறோம்" என்றார்.

`லஞ்சப்புகார்; 3 ஆண்டுகளுக்குப் பிறகு 2 இன்ஸ்பெக்டர்கள் வீடுகளில் விஜிலென்ஸ் ரெய்டு!'
வழக்கறிஞர் ஸ்ரீதர் பேட்டி
வழக்கறிஞர் ஸ்ரீதர் பேட்டி

தன்னுடைய விவரங்களை வெளியிட வேண்டாம் என்று கூறியபடி பேசத் தொடங்கினார் பாதிக்கப்பட்ட பெண். ``சம்பவத்தன்று போலீஸார் 50 நிமிடங்கள் வரை வீட்டில் சோதனை என்ற பெயரில் அநாகரிகமாக நடந்துகொண்டனர். இது தொடர்பாக விபசார தடுப்புப் பிரிவின் பெண் உதவி கமிஷனரிடம் புகாரளித்தபோது அவரும் நடவடிக்கை எடுக்கவில்லை. அதனால்தான் ஆர்டிஐ மூலம் தகவல்களைப் பெற்றேன். அப்போதுதான் விபசார தடுப்புப் பிரிவு போலீஸார் மூலம் என்னை அவமானப்படுத்தியது அதே குடியிருப்பில் குடியிருக்கும் ஒருவர் எனத் தெரியவந்தது. அவர்மீது புகாரளித்தும் நடவடிக்கை எடுக்கவில்லை. மாறாக என்னை போலீஸார் மிரட்டிவருகின்றனர். எனக்கு நீதி கிடைக்கும் வரை சட்டப்படி போராடுவேன். என்னைப்போல இனிமேல் எந்தப் பெண்ணும் பாதிக்கப்படக் கூடாது" என்றார்.

இந்தக் குற்றச்சாட்டுகள் குறித்து விபசார தடுப்புப் பிரிவு போலீஸாரிடம் கேட்டதற்கு, ``இந்தக் குற்றச்சாட்டுகள் தொடர்பாக உயரதிகாரிகள் விசாரணை நடத்திவருகிறார்கள்" என்று சுருக்கமாக முடித்துக்கொண்டனர்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு