Published:Updated:

சென்னை: `ரூ.2,000தான் டார்கெட்; ஏ.டி.எம் கார்டுகள் மோசடி!' - முன்னாள் வங்கி ஊழியர் சிக்கிய பின்னணி

முன்னாள் வங்கி ஊழியர் சரவணன்
முன்னாள் வங்கி ஊழியர் சரவணன்

சென்னையில் ஏ.டி.எம் மையங்களில் தவறவிடப்படும் கார்டுகளைப் பயன்படுத்தி 2,000 ரூபாய் ஸ்வைப்பிங் செய்து, லட்சக்கணக்கில் மோசடி செய்த முன்னாள் வங்கி ஊழியரை போலீஸார் கைதுசெய்திருக்கிறார்கள்.

சென்னை போரூர், ராமசாமி மூன்றாவது தெருவைச் சேர்ந்தவர் சுப்பிரமணி. இவரின் மகன் ஹரி விஸ்வநாதன் (28). இவர், தனியார் வங்கி ஒன்றில் கணக்கு வைத்திருக்கிறார். இவரின் வங்கி கணக்கிலிருந்து 31.7.2020-ல் `எஸ்.கே.மோட்டோ’ என்ற பெயரில் தொடங்கப்பட்ட வங்கிக் கணக்குக்கு எட்டு முறை 1,990 ரூபாய் வீதம் 15,920 ரூபாய் பணப் பரிமாற்றம் செய்யப்பட்டிருக்கிறது. பரிமாற்றம் நடந்தவுடன் ஹரிவிஸ்வநாதன் செல்போனுக்கு வங்கியிலிருந்து பணம் எடுக்கப்பட்டதாக எஸ்.எம்.எஸ் வந்திருக்கிறது. அதனால், அதிர்ச்சியடைந்த ஹரிவிஸ்வநாதன், தான் ஏ.டி.எம் கார்டைப் பயன்படுத்தாத சூழலில் வங்கிக் கணக்கில் பணம் எடுக்கப்பட்டிருப்பதால், யாரோ முறைகேடு செய்கிறார்கள் என்பதை உணர்ந்தார். உடனடியாக அவர் வங்கிக்குச் சென்று விவரத்தைக் கூறினார். இதையடுத்து வங்கி ஊழியர்கள் ஹரிவிஸ்வநாதனின் வங்கிக் கணக்கை முடக்கம் செய்தனர்.

மோசடி
மோசடி
Representational Image

அப்போதுதான் ஹரி விஸ்வநாதனுக்கு இன்னோர் உண்மையும் தெரியவந்தது. 29.7.2020-ம் தேதி ஏ.டி.எம் மையத்துக்குச் சென்று பணம் எடுத்த ஹரிவிஸ்வநாதன், கார்டை அங்கேயே தவறவிட்டு வந்திருக்கிறார் என்பது. இதையடுத்து 1.8.2020-ல் மதுரவாயல் காவல் நிலையத்தில் ஹரிவிஸ்வநாதன் ஏ.டி.எம் கார்டு தொலைந்துபோனதாகவும், அதிலிருந்து யாரோ பணம் எடுத்த விவரத்தையும் கூறிப் புகாரளித்தார். அதன்பேரில் 406, 420, 66 சி மற்றும் 660 ஐடி சட்டம் 2008 ஆகிய பிரிவுகளின் கீழ் இன்ஸ்பெக்டர் ரவீந்திரன் வழக்கு பதிவு செய்து விசாரித்தார்.

இந்த வழக்கில், சைபர் க்ரைம் போலீஸாரின் உதவியை மதுரவாயல் போலீஸார் நாடினர். இதையடுத்து சைபர் க்ரைம் போலீஸார், வங்கிக் கணக்கு விவரங்களை ஆய்வு செய்தனர். அப்போது ஹரிவிஸ்வநாதனின் டெபிட் கார்டிலிருந்து எடுக்கப்பட்ட பணம், சென்னை காட்டுப்பாக்கத்தைச் சேர்ந்த சரவணன் என்பவரின் வங்கிக் கணக்குக்கு மாற்றப்பட்ட தகவல் கிடைத்தது. உடனடியாக சரவணனைப் பிடித்து போலீஸார் விசாரித்தனர். விசாரணையில் திடுக்கிடும் தகவல்கள் வெளியாகின.

மோசடி
மோசடி
representational image

இது குறித்து மதுரவாயல் போலீஸார் கூறுகையில், `` காதல் திருமணம் செய்துகொண்டு தனது மனைவி மற்றும் 4 வயது குழந்தையுடன் சரவணன் வசித்துவருகிறார். இவரின் குழந்தைக்கு பிறக்கும்போதே இதயநோய் இருந்தது. அதற்கு அறுவை சிகிச்சை நடந்திருக்கிறது. அதனால் சரவணன், மருத்துவச் செலவுக்காக கையில் வைத்திருந்த பணத்தைச் செலவழித்தார்.

மேலும் அவர், நான்கு ஆண்டுகளாக பார்த்துவந்த வங்கி வேலையும் பறிபோனது. அதனால் வருமானமின்றி அவர் தவித்தார். இந்தநிலையில்தான், வங்கி தொடர்பான மோசடியில் ஈடுபடலாம் என சரவணன் முடிவு செய்திருக்கிறார். இதற்காக போலி ஆவணங்களைத் தயாரித்து, `சிவக்குமார்’ என்ற பெயரில் வங்கிக் கணக்கையும் `எஸ்.கே.மோட்டார்ஸ்’ என்ற பெயரில் போலி நிறுவனத்தையும் சரவணன் தொடங்கியிருக்கிறார். அந்த நிறுவனத்துக்கு `பாயின்ட் ஆஃப் சேல்ஸ்' என்ற இயந்திரத்தை வங்கியிலிருந்து பெற்றிருக்கிறார்.

பறிமுதல் செய்யப்பட்ட கார்டுகள்
பறிமுதல் செய்யப்பட்ட கார்டுகள்
3 மாதங்களில் ₹19,964 கோடி, அதிகரிக்கும் வங்கி மோசடி... எந்தெந்த வங்கியில் எவ்வளவு தெரியுமா?

அந்த இயந்திரத்தின் மூலம்தான் மோசடி வேலையில் ஈடுபட்டுவந்திருக்கிறார். ஏ.டி.எம் மையங்களில் மறந்து தவறவிடப்படும் ஏ.டி.எம் கார்டுகளைச் சேகரிக்கும் சரவணன், அந்த ஏ.டி.எம் கார்டுகளைவைத்து, ஸ்வைப்பிங் இயந்திரங்கள் மூலம் பணத்தை எடுத்திருக்கிறார். தற்போது வங்கிகள் வழங்கும் டெபிட், கிரெடிட் கார்டுகளில் 2,000 ரூபாய் வரை பின்நம்பர் இல்லாமல் வைஃபை மூலம் பணம் எடுக்கும் வசதிகள் இருக்கின்றன. அந்த கார்டுகள் மூலம்தான் ஒரு கார்டுக்கு 2,000 ரூபாய் என ஸ்வைப்பிங் செய்து சரவணன் மோசடி செய்துவந்திருக்கிறார். அந்த வகையில் கடந்த சில மாதங்களாக அவர், சில லட்சம் ரூபாயை மோசடி செய்தது தெரியவந்திருக்கிறது. ஹரிவிஸ்வநாதன் கொடுத்த புகாரில் சரவணனைக் கைதுசெய்து, அவரிடமிருந்து பாயின்ட் ஆஃப் சேல்ஸ் மெஷின், 13 ஏ.டி.எம் கார்டுகளைப் பறிமுதல் செய்திருக்கிறோம். தொடர்ந்து அவரிடம் விசாரித்துவருகிறோம்" என்றனர்.

அடுத்த கட்டுரைக்கு