Published:Updated:

ரூ.10 கோடி மதிப்பிலான செக்; மூளையாகச் செயல்பட்ட போலீஸ் எஸ்.ஐ-சிக்கிய மோசடிக் கும்பல்; பகீர் பின்னணி

ஒட்டுமொத்த விகடனுக்கும் ஒரே ஷார்ட்கட்

Use App
செக் மோசடி வழக்கில் கைதான சாவித்திரி
செக் மோசடி வழக்கில் கைதான சாவித்திரி

போலி செக் கொடுத்து ஏமாற்ற திட்டமிட்ட கும்பலை கீழ்ப்பாக்கம் போலீஸார் கைதுசெய்துள்ளனர். இந்த வழக்கில் சிறப்பு சப் இன்ஸ்பெக்டர் ஒருவரும் சிக்கியிருக்கிறார்.

செய்திகளை உடனுக்குடன் தெரிந்துகொள்ள... இங்கே க்ளிக் செய்து இன்றே விகடன் ஆப் இன்ஸ்டால் செய்யுங்கள்!

சென்னை புரசைவாக்கத்திலுள்ள வங்கிக் கிளை மேலாளர் அமித்குமார் என்பவர் கீழ்பாக்கம் காவல் நிலையத்தில் புகார் மனு ஒன்றை கடந்த 22-ம் தேதி கொடுத்தார். அதில் கூறியிருப்பதாவது, `(22.9.2021) இன்று மதியம் 12 மணியளவில் பெண் உட்பட நான்கு பேர் வங்கிக்கு வந்திருந்தனர். அவர்கள், காசோலை (செக்) ஒன்றைக் கொடுத்தனர். அதில் 9,99,91,000 ரூபாய் நிரப்பட்டிருந்தது. பெரிய தொகை என்பதால் செக்கில் குறிப்பிட்டிருந்த மத்தியபிரதேசம், போபாலிலுள்ள நிறுவனத்தைத் தொடர்புகொண்டு விசாரித்தோம். அப்போது அந்த நிறுவனம் சார்பில் இவ்வளவு தொகைக்கான காசோலை கொடுக்கவில்லை என பதிலளிக்கப்பட்டது. இதையடுத்து சுமார் 10 கோடி ரூபாய்க்காக கொடுக்கப்பட்ட காசோலை போலி என்பது உறுதியானது. எனவே, போலி காசோலையைக் கொடுத்து ஏமாற்றத் திட்டமிட்டவர்கள்மீது நடவடிக்கை எடுக்க வேண்டும்’ எனக் குறிப்பிட்டிருந்தார்.

போலி செக்
போலி செக்

இதையடுத்து கீழ்பாக்கம் உதவி கமிஷனர் ரமேஷ் மேற்பார்வையில் இன்ஸ்பெக்டர் சாம் வின்சென்ட் தலைமையிலான போலீஸார் போலி காசோலையைக் கொடுத்து 10 கோடி ரூபாயை ஏமாற்றத் திட்டமிட்டவர்கள் குறித்து விசாரித்தனர். விசாரணையில் திடுக்கிடும் தகவல்கள் வெளியாகின. இது குறித்து கீழ்பாக்கம் போலீஸார் கூறுகையில், ``போலி காசோலையில், 9,99,91,000 ரூபாய் என நிரப்பப்பட்டு, மத்தியப்பிரதேச நிறுவனத்தின் கையெழுத்தும் போடப்பட்டிருந்தது. அந்தப் பணத்தை சென்னையில் ராம்சரண் அன்கோ என்ற பெயரில் நிறுவனத்தை மாற்ற வேண்டும் என அதன் உரிமையாளர் கௌசிக் வங்கியில் காசோலையைக் கொடுத்தார்.

காசோலையிலுள்ள கையெழுத்தில் சந்தேகம் வந்ததால் வங்கி ஊழியர், கிளை மேலாளருக்குத் தகவல் தெரிவித்தார். விசாரணையில் போலி செக்கைக் கொடுத்து ஏமாற்ற திட்டமிட்டது தெரியவந்தது. அதனால் போலி காசோலையை மாற்ற முயன்ற குற்றத்துக்காக ஜாபர் என்கிற இர்பான்கான், கேரளாவைச் சேர்ந்த பிரசாத் மேத்தீவ், கோவையைச் சேர்ந்த சாவித்திரி (40), கோவை துடியலூரைச் சேர்ந்த முருகன் (55), சென்னை விருகம்பாக்கத்தைச் சேர்ந்த பானுமதி (44), திருவண்ணாமலையைச் சேர்ந்த செந்தில்குமார் (39), நாராயணன், கோபிநாதன் ஆகியோர் மீது எட்டு பிரிவுகளின் கீழ் வழக்கு பதிவு செய்திருக்கிறோம். இதில் ஜாபர் தலைமறைவாகிவிட்டார். மற்ற ஒன்பது பேரைக் கைதுசெய்து சிறையில் அடைத்திருக்கிறோம்.

செக் மோசடி வழக்கில் சரத்குமார், ராதிகாவுக்கு சிறை - என்ன நடந்தது?
சிறப்பு சப் இன்ஸ்பெக்டர் முருகன்
சிறப்பு சப் இன்ஸ்பெக்டர் முருகன்

இந்த வழக்கில் கைதான முருகன் என்பவர், கோவை மாவட்டத்தில் சிறப்பு சப் இன்ஸ்பெக்டராகப் பணியாற்றிவருவது விசாரணையில் தெரியவந்தது. இவருக்கும் அறக்கட்டளை நடத்திவரும் சாவித்திரி என்பவருக்கும் பழக்கம் இருப்பதும் தெரிந்தது. தொடர்ந்து விசாரணை நடத்திவருகிறோம்" என்றனர். மோசடி குறித்து சிறப்பு சப் இன்ஸ்பெக்டர் முருகனிடம் போலீஸார் விசாரித்தபோது கமிஷனுக்கு ஆசைப்பட்டு இந்த மோசடியில் ஈடுபட்டதாகக் கூறியிருக்கிறார்.

இந்த மோசடி எப்படி நடந்தது என போலீஸ் உயரதிகாரி ஒருவர் நம்மிடம் கூறுகையில், ``சிறப்பு சப் இன்ஸ்பெக்டராகப் பணியாற்றும் முருகனுக்கும், டிரஸ்ட் நடத்திவரும் சாவித்திரிக்கும் பழக்கம் இருந்திருக்கிறது. சாவித்திரியிடம் டிரஸ்ட் மூலம் 9,99,91,000 ரூபாய்க்கான காசோலையை மாற்றிக் கொடுத்தால் குறிப்பிட்ட தொகை கமிஷனாகக் கிடைக்கும் என இந்த மோசடி கும்பல் கூறியிருக்கிறது. அதனால் முருகனும் சாவித்திரியும் கோவையிலிருந்து சென்னைக்கு வந்து தி.நகரில் உள்ள ஒரு ஹோட்டலில் தங்கியுள்ளனர். பின்னர் இந்த மோசடி கும்பலைச் சேர்ந்தவர்கள் ராம்சரண் அன்கோ நிறுவனத்தின் உரிமையாளர் கௌசிக் என்பவரைச் சந்தித்து 10 கோடி ரூபாயை மாற்றிக் கொடுத்தால் 5 கோடி ரூபாய் கமிஷன் எனப் பேரம் பேசியிருக்கின்றனர். இதையடுத்து சாவித்திரி, மோசடிக் கும்பலைச் சேர்ந்த பானுமதி, அக்கிம்ராஜா, பிரசாத் மாத்யூ ஆகியோர் சென்னை புரசைவாக்கத்திலுள்ள வங்கிக் கிளைக்குச் சென்று காசோலையை மாற்றும்போது சிக்கிக்கொண்டனர். இந்த மோசடிக்கு முருகனும் மூளையாகச் செயல்பட்டிருக்கிறார்" என்றார்.

இந்த மோசடியில் சிறப்பு சப் இன்ஸ்பெக்டர் ஒருவர் சிக்கியிருப்பது காவல்துறையில் பரபரப்பாகப் பேசப்பட்டுவருகிறது.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு