Published:Updated:

105 சிம் கார்டுகள், 154 டெபிட் கார்டுகள்... `சிம் ஸ்வாப்' கொள்ளையர்கள் சிக்கியது எப்படி? | Alert

கைதுசெய்யப்பட்ட சிம் ஸ்வாப் கொள்ளையர்கள்
News
கைதுசெய்யப்பட்ட சிம் ஸ்வாப் கொள்ளையர்கள்

தனியார் கண் மருத்துவமனையின் சிம் கார்டை அந்த நிர்வாகத்துக்கே தெரியாமல் டிஆக்டிவேட் செய்து அதன் மூலம் லட்சக்கணக்கில் பணத்தை எடுத்த சிம் ஸ்வாப் கொள்ளையர்களை போலீஸார் கைதுசெய்திருக்கின்றனர்.

சென்னை ஆழ்வார்பேட்டையில் செயல்படும் பிரபல தனியார் கண் மருத்துவமனை சார்பில், தேனாம்பேட்டை காவல் நிலையத்தில் நவம்பர் மாதத்தில் புகாரளிக்கப்பட்டது. அதில் தங்களின் மருத்துவமனை வங்கிக் கணக்கிலிருந்து 24 லட்சம் ரூபாய் நூதன முறையில் திருடப்பட்டிருப்பதாக குறிப்பிடப்பட்டிருந்தது. பின்னர் அந்தப் புகார் சென்னை மத்திய குற்றப்பிரிவில் செயல்படும் சைபர் க்ரைம் பிரிவுக்கு மாற்றப்பட்டது. சென்னை போலீஸ் கமிஷனர் சங்கர் ஜிவால் உத்தரவின்பேரில், கூடுதல் கமிஷனர் தேன்மொழி, துணை கமிஷனர் நாகஜோதி ஆகியோர் மேற்பார்வையில் உதவி கமிஷனர் வேல்முருகன், இன்ஸ்பெக்டர் வினோத் குமார் தலைமையில் தனிப்படை அமைக்கப்பட்டது. இதையடுத்து இந்த வழக்கை கையில் எடுத்த சைபர் க்ரைம் போலீஸார், மருத்துவமனை வங்கிக் கணக்கிலிருந்து எந்த வங்கிக் கணக்குக்கு பணம் மாற்றப்பட்டது என்பதை ஆய்வு செய்தனர். அப்போது அவை மேற்கு வங்காளத்திலுள்ள 16 வங்கிக் கணக்குகளுக்கு சென்றிருப்பது தெரியவந்தது. அதனால் சம்பந்தப்பட்ட வங்கிக் கணக்கு விவரங்களை போலீஸார் சேகரித்து விசாரித்தபோது போலி முகவரி, ஆவணங்கள் கொடுத்து வங்கிக் கணக்கு தொடங்கியிருப்பது தெரியவந்தது.

சயந்தன் முகர்ஜி
சயந்தன் முகர்ஜி

இந்தச் சமயத்தில்தான் பணம் மாற்றப்பட்ட வங்கிக் கணக்கின் ஏ.டி.எம்-மை பயன்படுத்தி மோசடி நபர்கள் பணம் எடுத்த விவரம் சைபர் க்ரைம் போலீஸாருக்குக் கிடைத்தது. உடனடியாக மேற்கு வங்காளத்துக்குச் சென்ற சைபர் க்ரைம் போலீஸார், அந்த மாநில போலீஸாரின் உதவியோடு இந்த மோசடியில் ஈடுபட்டவர்களைத் தேடிவந்தனர். ஏடிஎம் மைய சிசிடிவி-யில் பதிவாகியிருந்த காட்சிகள் அடிப்படையில் விசாரித்தபோது சயந்தன் முகர்ஜி (25), ராகுல் ராய் (24), ரோகன் அலிசனா (27), ராகேஷ்குமார் சிங் (33) ஆகிய நான்கு பேருக்கு இந்த வழக்கில் தொடர்பு இருப்பது தெரியவந்தது. பின்னர் அவர்களைக் கைதுசெய்த போலீஸார் சென்னைக்கு அழைத்துவந்து விசாரித்தனர். அப்போதுதான் சிம் ஸ்வாப் (Sim Swap) என்ற முறையில் இந்த நூதன மோசடி நடந்தது தெரியவந்தது. கைதுசெய்யப்பட்டவர்களிடமிருந்து 14 செல்போன்கள், 105 சிம் கார்டுகள், 154 டெபிட் கார்டுகள், 22 போலி பான் கார்டுகள், 128 ஆதார் கார்டுகள் ஆகியவற்றை போலீஸார் பறிமுதல் செய்திருக்கின்றளர்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

இது குறித்து சென்னை மத்திய குற்றப் பிரிவு சைபர் க்ரைம் போலீஸாரிடம் பேசினோம். ``வங்கி தொடர்பான சேவைக்காக ஒவ்வொரு வாடிக்கையாளரும் தங்களின் செல்போன் நம்பரை வங்கிக் கணக்கில் இணைத்திருப்பார். அப்படித்தான் எங்களிடம் புகார் கொடுத்த தனியார் மருத்துவமனை நிர்வாகமும் தங்களின் வங்கிக் கணக்கில் ஒரு குறிப்பிட்ட செல்போன் நம்பரை இணைத்திருக்கின்றனர். இந்த செல்போன் நம்பரை தனியார் மருத்துவமனையின் நிர்வாகத்துக்கே தெரியாமல் டிஆக்டிவேட் செய்த சிம் ஸ்வாப் கும்பல், அதன் மூலம் 24 லட்சம் ரூபாயை எடுத்திருக்கிறது. அதற்காகச் சம்பந்தப்பட்ட கண் மருத்துவமனையின் பெயரில் போலி இமெயில், அடையாள அட்டைகள், ஆவணங்களை மோசடி கும்பல் தயாரித்திருக்கிறது.

ராகுல் ராய்
ராகுல் ராய்

பின்னர் அந்தப் பணத்தை 16 போலி வங்கிக் கணக்குகளுக்கு மாற்றிவிட்டு சுதந்திரமாக சுற்றித்திரிந்து வந்திருக்கின்றனர். தமிழகத்தில் முதன்முறையாக `சிம் ஸ்வாப்’ என்று அழைக்கப்படும் இந்த நூதன மோசடியில் நான்கு பேரைக் கைது செய்திருக்கிறோம். இந்த மோசடிக்கு மூளையாகச் செயல்பட்டவனைத் தேடிவருகிறோம். இந்த வழக்கில் சம்பந்தப்பட்ட செல்போன் நெட்வொர்க் நிறுவனத்தின் அதிகாரிகள், ஊழியர்களிடம் விசாரணை நடத்தப்பட்டுவருகிறது" என்றனர்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

சிம் ஸ்வாப் மோசடியிலிருந்து தப்பிப்பது எப்படி என சைபர் க்ரைம் வழக்குகளை நடத்திவரும் வழக்கறிஞர் கார்த்திகேயனிடம் பேசினோம்.

``ஒருவர் பயன்படுத்திவரும் சிம் கார்டை அவருக்கே தெரியாமல் டிஆக்டிவேட் செய்து, பின்னர் அதே செல்போன் நம்பரில் புதிய சிம் கார்டை வாங்கி குற்றச் செயலில் ஈடுபவதுதான் சிம் ஸ்வாப். இது, சம்பந்தப்பட்டவர்களுக்கே தெரியாது. கடந்த 2016, 17-ம் ஆண்டு காலகட்டத்தில்தான் சிம் ஸ்வாப் மோசடிச் சம்பவங்கள் அதிக அளவில் நடந்தன. இது தொடர்பாக 40-க்கும் மேற்பட்ட வழக்குகளை நடத்தியிருக்கிறேன். டிராய் விதி முறைப்படி புதிய சிம் கார்டுகளை வழங்கும் நெட்வொர்க் நிறுவனம், வாடிக்கையாளர்களின் ஒரிஜினல் ஆவணங்களை ஆய்வு செய்த பிறகே சிம் கார்டை ஆக்டிவ் செய்ய வேண்டும். ஆனால் பெரும்பாலான நெட்வொர்க் நிறுவனங்கள் அதைச் செய்வதில்லை. டார்க்கெட்டுக்காக சாலை ஓரங்களிலேயே சிம் கார்டுகளை கூவிக் கூவி இலவசமாகக் கொடுத்துவருகின்றனர். அப்போது வாடிக்கையாளர்கள் சமர்ப்பிக்கும் ஆவணங்கள்கூட ஆய்வு செய்யப்படுவதில்லை. அதுதான் சைபர் க்ரைம் குற்றங்களுக்கான பிள்ளையார்சுழி.

வழக்கறிஞர் கார்த்திகேயன்
வழக்கறிஞர் கார்த்திகேயன்

அடுத்து இந்தப் பண மோசடிக்கு பொறுப்பு ஏற்கவேண்டியது சம்பந்தப்பட்ட வங்கிகள். ஏனெனில், வங்கி ஊழியர்களும் ஆவணங்களை ஆய்வு செய்யாமல் வங்கிக் கணக்கைத் தொடங்குகிறார்கள். பெரும்பாலும் மேற்கு வங்காளம், ராஜஸ்தான் மாநிலங்களில்தான் போலி ஆவணங்களைக் கொடுத்து வங்கிக் கணக்குகள் தொடங்கப்படுகின்றன. அதனால் மோசடிக் கும்பல், போலி வங்கி கணக்குக்குப் பணத்தை அனுப்பி தப்பித்துக்கொள்கிறது. இந்த வழக்கில்கூட 16 வங்கிக் கணக்குகளுக்குப் பணம் மாற்றப்பட்டுள்ளது. ஆனால், அவை அனைத்தும் போலி எனத் தெரியவந்திருக்கிறது. இந்தியாவில்தான் ஆன்லைன் வங்கி பணப் பரிவர்த்தனையின்போது ஓடிபி என்று அழைக்கப்படும் ஒன் டைம் பாஸ்வேர்டு என்ற பாதுகாப்பு முறை பயன்படுத்தப்பட்டுவருகிறது. இதில் போதிய அளவு பாதுகாப்பில்லை எனக் கடந்த 2011-ம் ஆண்டு நீதிபதி கோபாலகிருஷ்ணன் தலைமையிலான கமிட்டி தெரிவித்துள்ளது. அதன் பிறகும் அதே நடைமுறையை வங்கிகள் பயன்படுத்திவருகின்றன.

இந்தியாவில் நடக்கும் சைபர் குற்றங்களுக்கு கம்ப்யூட்டர் சார்ந்த தொழில்நுட்ப அறிவு தேவையில்லை. எப்படி மோசடி செய்ய வேண்டும் என்ற அடிப்படை அறிவு தெரிந்திருந்தால் போதும். அதனால்தான் பள்ளி படிப்பைக்கூட முடிக்காத வடமாநில இளைஞர்கள் சைபர் குற்றங்களில் அதிக அளவில் ஈடுபட்டுவருகின்றனர். வங்கிக் கணக்கோடு இணைக்கப்பட்டிருக்கும் செல்போன் நம்பருக்கு இரண்டு மணி நேரத்துக்கு மேல் எந்தவித அழைப்பும், மெசேஜும் வரவில்லையென்றால் உடனடியாக உஷாராகவேண்டியது ஒவ்வொருவரின் கடமை. ஏனெனில், உங்களுக்கே தெரியாமல் உங்களின் சிம் கார்டை இன்னொருவர் பயன்படுத்தி சைபர் குற்றங்களில் ஈடுபட வாய்ப்புகள் உள்ளன.

 சிம் கார்டுகள்
சிம் கார்டுகள்

எனவே, செல்போன் நம்பர் உங்களுக்கே தெரியாமல் டி-ஆக்டிவேட் செய்யப்பட்டால் உடனடியாக அந்த நம்பரைப் பயன்படுத்தி பெறும் சேவைகளை நிறுத்த நடவடிக்கை எடுங்கள். அப்படிச் செய்துவிட்டால் இழப்புகளைத் தவிர்க்கலாம். வெளிநாடுகளில்தான் ஹேக் செய்து சைபர் குற்றங்கள் நடக்கின்றன. இந்தியாவைப் பொறுத்தவரை டிரிக் செய்து இந்தக் குற்றங்கள் நடைபெறுகின்றன. சைபர் குற்றங்கள் மூலம் பணத்தை இழந்தவர்கள் சென்னை தலைமைச் செயலகத்தில் செயல்படும் Adjudication என்ற சிறப்பு நீதிமன்றத்தை அணுகினால் சம்பந்தப்பட்ட வங்கிகளிடமிருந்து இழந்த பணத்தைப் பெறலாம்" என்றார்.