Published:Updated:

``சாராயம் விக்கணும்... மாமூல் கட்டணும்" - போலீஸாரே கட்டாயப்படுத்துவதாக எஸ்.பி-யிடம் புகார்

எஸ்.பி-யிடம் புகார்

சாராயம் விற்பனை செய்யச் சொல்லி போலீஸாரே கட்டாயப்படுத்துவதாக முன்னாள் சாராய வியாபாரி ஒருவர் மயிலாடுதுறை மாவட்ட காவல் கண்காணிப்பாளர் அலுவலகத்தில் புகார் அளித்திருப்பது பெரும் பரபரப்பை ஏற்படுத்தியுள்ளது.

``சாராயம் விக்கணும்... மாமூல் கட்டணும்" - போலீஸாரே கட்டாயப்படுத்துவதாக எஸ்.பி-யிடம் புகார்

சாராயம் விற்பனை செய்யச் சொல்லி போலீஸாரே கட்டாயப்படுத்துவதாக முன்னாள் சாராய வியாபாரி ஒருவர் மயிலாடுதுறை மாவட்ட காவல் கண்காணிப்பாளர் அலுவலகத்தில் புகார் அளித்திருப்பது பெரும் பரபரப்பை ஏற்படுத்தியுள்ளது.

Published:Updated:
எஸ்.பி-யிடம் புகார்

மயிலாடுதுறை மாவட்டம், தரங்கம்பாடி தாலுகா, கிளியனூர் மேலத்தெருவைச் சேர்ந்த ராமச்சந்திரன் என்பவர் தன் மகன்களுடன் மயிலாடுதுறை மாவட்ட காவல் கண்காணிப்பாளர் அலுவலகத்துக்கு வந்து, பெரம்பூர் காவல் நிலைய போலீஸார் மீது புகார் மனு ஒன்றை அளித்துள்ளார்.

எஸ்.பி அலுவலகம்
எஸ்.பி அலுவலகம்

அந்த மனுவில், ``குடிப்பழக்கத்துக்கு அடிமையான நான் காரைக்கால் பகுதிக்குச் சென்று மது அருந்திவிட்டு விலை குறைவு என்பதால் மதுபாட்டில்கள் வாங்கிவருவேன். அதைத் தெரிந்தவர்கள் கேட்டால் கொடுத்துவிட்டு பணம் வாங்கிக்கொள்வேன். அப்படியிருந்தபோது மது கடத்தியதாக பெரம்பூர் போலீஸார் என்னைக் கைதுசெய்தனர்.

ஆனால் என்னிடம் `தொடர்ந்து சாராயம் விற்பனை செய்’ என்று போலீஸார் கூறினர். அதன்படி சாராய விற்பனை செய்து வாரந்தோறும் போலீஸாருக்கு ரூ.7 ஆயிரம் மாமூல் கொடுத்துவந்தேன். என் மனைவி இறந்தநிலையில் மகன்களுக்குத் திருமணமாகி, மருமகள்கள் வந்துவிட்டதால் சாராய விற்பனையை நிறுத்திவிட்டேன். மேலும் மாவட்ட காவல் கண்காணிப்பாளர் அலுவலகத்தில், `இனி சாராய விற்பனை செய்ய மாட்டேன். திருந்தி வாழ விரும்புகிறேன்’ என எழுதியும் கொடுத்துவிட்டேன்.

ஒட்டுமொத்த விகடனுக்கும் ஒரே ஷார்ட்கட்!

விகடனின் அதிரடி ஆஃபர்!
தற்பொழுது ரூ.750 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா999 மட்டுமே! மிஸ் பண்ணிடாதீங்க!Get Offer

ஆனால் பெரம்பூர் போலீஸார் சாராயம் விற்பனை செய்யவில்லையென்றாலும், எங்களுக்கு மாமூல் கொடுக்க வேண்டுமென்று கூறி மிரட்டி என்மீதும், என் பிள்ளைகள்மீதும் பொய்வழக்கு போட்டு மிரட்டுகின்றனர். சென்னையில் வேலை பார்த்துவந்த என் மகன் தீனா அரசன் ஊருக்கு வந்தபோது அவர்மீது சாராயம் விற்றதாக பொய்வழக்கு போட்டு என்னிடம் பணம் கேட்டு மிரட்டுகின்றனர். எங்கிருந்தோ சாராய பாக்கெட்டுகளைக் கொண்டுவந்து என்வீட்டு முன்பு போட்டு உடைத்து போலீஸார் வீடியோ எடுத்துச் செல்கின்றனர். இது குறித்து உரிய விசாரணை செய்து திருந்தி வாழ நினைக்கும் என்னையும், என் குடும்பத்தாரையும் நிம்மதியாக வாழ்வதற்கு நடவடிக்கை எடுக்க வேண்டும்’’ என்று அந்த மனுவில் குறிப்பிட்டுள்ளார்.

எஸ்.பி அலுவலகம்
எஸ்.பி அலுவலகம்

இது குறித்து மயிலாடுதுறை மாவட்ட காவல்துறை அதிகாரி ஒருவரிடம் விளக்கம் கேட்டோம். ``இது முற்றிலும் தவறான புகார். வழக்கறிஞர் ஒருவருக்கு அந்தக் காவல் நிலையத்தின்மீது தனிப்பட்ட முறையில் வருத்தமிருக்கிறது. அவர் வஞ்சம் தீர்க்கவே இப்படியொரு பொய்ப் புகாரைக் கொடுக்கவைத்திருக்கிறார்" என்றார். துறைரீதியிலான விசாரணையில் முடிவில்தான் உண்மை தெரியும்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism