Published:Updated:

பெண்களுக்கு எதிராக அதிகரிக்கும் குற்றங்கள்... தண்டனைகள் கடுமையாக்கப்படுவது தீர்வாகுமா?

குற்றங்கள்
பிரீமியம் ஸ்டோரி
News
குற்றங்கள்

க்ரைம்

த்தரப்பிரதேச மாநிலம், ஹத்ராஸ் மாவட்டத்தில் 19 வயது தலித் பெண்ணுக்கு நிகழ்த்தப்பட்டிருக்கும் கொடூரம் ஒட்டுமொத்த இந்தியாவையும் உலுக்கியிருக்கிறது. குறிப்பாக, பெண்களும் பெண் பிள்ளைகளை வைத்திருக்கும் குடும்பத்தினரும் நடுங்கிப் போயிருக்கின்றனர். நான்கு பேர் கூட்டாகச் சேர்ந்து பாலியல் வன்கொடுமை செய்தது மட்டுமல்லாமல் கழுத்து எலும்புகளை உடைத்து... கால்களை முறித்து... நாக்கைத் துண்டித்து... நினைத்தே பார்க்க முடியாத அரக்கத்தனத்தை அந்தப் பெண்ணின் மீது பிரயோகித்துள்ளனர். சிகிச்சை பலனளிக்காமல் இறந்துபோன அந்தப் பெண்ணின் உடலை அவரின் குடும்பத்தாரிடம் ஒப்படைக்காமல் அவரின் பெற்றோரை வீட்டில் பூட்டி வைத்துவிட்டு பெண்ணின் உடலை உ.பி போலீஸாரே எரித்தது கூடுதல் அதிர்வலைகளை ஏற்படுத்தியிருக்கிறது.

இந்தச் சம்பவத்தில் பாதிக்கப்பட்ட பெண்ணுக்கு நீதி கேட்டும் உ.பி அரசின் பாரபட்சமான செயல்பாட்டைக் கண்டித்தும் பல்வேறு போராட்டங்கள் நடந்துகொண்டிருக்கின்றன. இதற் கிடையில், பெண்களின் பாதுகாப்பை உறுதிசெய்ய ஏராளமான கோரிக்கைகளும் முன்வைக்கப்படுகின்றன. அதில் மிக முக்கியமான கோரிக்கை பாலியல் குற்றங்களுக்கான தண்டனையை அதிகப்படுத்த வேண்டும் என்பதுதான். சமீபத்தில்கூட, “பெண்கள் மற்றும் குழந்தைகளுக்கான பாதுகாப்பை மேலும் உறுதி செய்வதற்கு இந்திய தண்டனைச் சட்டம்-1860-ல் பெண்கள் மற்றும் குழந்தைகளுக்கு எதிரான குற்றங்களுக்கான தண்டனையைக் கடுமையாக்க மத்திய அரசின் அனுமதியைப் பெற்று சில சட்ட திருத்தங்களைக்கொண்டு வர நடவடிக்கை எடுக்கப்படும்” என்று தமிழக முதலமைச்சர் எடப்பாடி பழனிசாமி அறிவித்தார்.

பெண்களுக்கு எதிராக அதிகரிக்கும் குற்றங்கள்... தண்டனைகள் கடுமையாக்கப்படுவது தீர்வாகுமா?

அந்த அறிவிப்பில், “வரதட்சணை தொடர்பான மரணங்களுக்கு தற்போது குறைந்தபட்சம் ஏழு ஆண்டுகள் சிறைத்தண்டனை வழங்கப்படுகிறது. அதை மாற்றி குறைந்தபட்சமாக 10 ஆண்டுகள் சிறைத்தண்டனை வழங்குவதற்கும், குற்ற நோக்கத்துடன் (பெண்களின் ஆடைகளைக் களைதல்) செயல்படுவதற்கு குறைந்தபட்சமாக மூன்று ஆண்டுகளும் அதிகபட்சமாக ஏழு ஆண்டுகளும் சிறைத்தண்டனை வழங்கப்படுகிறது. அதை மாற்றி குறைந்தபட்சம் ஐந்து ஆண்டுகளாகவும், அதிகபட்சமாக 10 ஆண்டுகளாகவும் அதிகரிக்க நடவடிக்கை எடுக்கப்படும். அதுமட்டுமல்லாது, தவறான குற்ற நோக்கத்துடன் பெண்களைப் பின்தொடர்ந்தால், மீண்டும் தொடர்ந்து குற்றமிழைத்தால் தற்போது வழங்கப்படும் ஐந்து ஆண்டுகள் சிறைத்தண்டனை, ஏழு ஆண்டுகளாக அதிகரிக்கப்படும். பாலியல் தொழிலுக்காக 18 வயதுக்குட்பட்ட நபர்களை விற்பனை செய்வது மற்றும் விலைக்கு வாங்குவதற்கு தற்போது வழங்கப்படும் 10 ஆண்டுகள் சிறைத்தண்டனையை குறைந்தபட்சம் ஏழு ஆண்டுகளிலிருந்து அதிகபட்சம் ஆயுள் தண்டனைவரை வழங்குவதற்கு மத்திய அரசுக்குப் பரிந்துரை செய்யப்படும்” என்று கூறப்பட்டிருந்தது.

தண்டனையை அதிகரித்துவிட்டால் குற்றங்கள் குறைந்துவிடுமா... குற்றங்கள் அதிகரிக்க அல்லது குற்றங்களைக் குறைக்க முடியாததற்கு என்ன காரணம்?

வழக்கறிஞரும் சமூகச் செயற்பாட்டாளருமான சுமதியிடம் பேசினோம். ``முதலில் ஒரு வழக்கில் குற்றவாளிக்கு தண்டனை வாங்கித் தருவதில் உள்ள சிக்கலைப் பற்றி பேசுவதுதான் முக்கியம் என்று நான் நினைக்கிறேன். பாதிக்கப்பட்டவர்களுக்காக வாதாடி, குற்றவாளிக்குத் தண்டனை வாங்கித் தர வேண்டியவர்கள் அரசு வழக்கறிஞர்கள்தாம். பாதிக்கப்பட்டவர்களுக்காக ஆஜராகும் அரசு வழக்கறிஞர்களில் பலர் குற்றவாளிகளுக்கு ஆதரவாக ஆஜராகும் வழக்கறிஞர்களின் திறமைக்கு இணையாக இருப்பதில்லை. மிக முக்கியமான வழக்குகளில் அரசு சிறப்பு வழக்கறிஞர்களை நியமிப்பதற்கு காரணம் அரசு வழக்கறிஞர்கள் எதிர்தரப்பு வழக்கறிஞரின் திறமைக்கு இணையாக இருப்ப தில்லை என்பதால்தான்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

அரசுக்குத் தேவையென்றால் சிறப்பு வழக்கறிஞரை நியமித்துக்கொள்ளும். ஆனால், பாதிக்கப்பட்ட பொதுமக்களோ குற்றவாளிக்கு ஆதரவாக ஆஜராகும் வழக்கறிஞருக்கு இணையில்லாத அரசு வழக்கறிஞரை வைத்துக்கொண்டு வழக்கு நடத்த வேண்டும் என்பதுதான் இங்குள்ள சூழல். பாதிக்கப்பட்டவர் சொந்தச் செலவில் வழக்கறிஞரை வைத்துக்கொள்வதும் பலனளிப்பதில்லை. ஏனென்றால், நீங்கள் நியமிக்கும் வழக்கறிஞரை ஓர் ஓரமாக உட்கார வைத்துவிடுவார்கள். நடக்கிற வாதங்களை அவர் வேடிக்கை பார்க்கலாம். அனைத்து சாட்சிகளையும் விசாரித்து முடித்ததும் அவரை அழைப்பார்கள். அப்போது எழுத்துபூர்வமாக அவர் தன்னுடைய வாதத்தை சமர்ப்பிக்க முடியுமே தவிர, வாயைத் திறந்து பேச முடியாது.

பெண்களுக்கு எதிராக அதிகரிக்கும் குற்றங்கள்... தண்டனைகள் கடுமையாக்கப்படுவது தீர்வாகுமா?

சுருக்கமாகச் சொல்ல வேண்டுமென்றால் அரசு வழக்கறிஞரைத் தவிர்த்துவிட்டு நீங்கள் நியமிக்கும் வழக்கறிஞரால் எதுவுமே செய்ய முடியாது. இதுதான் இன்றைக்கு உள்ள நிதர்சனம். விசாரணையெல்லாம் முடிந்த பிறகு எழுத்துபூர்வமாக வாதத்தைக் கொடுத்து என்ன செய்ய முடியும்?

இந்தச் சூழலில் குற்றவாளி தரப்பில் சூப்பர் வழக்கறிஞர் ஆஜராவார். பாதிக்கப் பட்டவர்களுக்கு எப்படி நீதி கிடைக்கும்?

இவற்றையெல்லாம் சரிசெய்யாமல் தண்டனையை மட்டும் உயர்த்துவதால் எந்தப் பலனும் கிடைத்து விடாது. நீங்கள் எவ்வளவு வேண்டுமானாலும் தண்டனையை உயர்த்துங்கள். ஆனால், சட்டத்தில் உள்ள தண்டனையைப் பெற்றுத்தர தரமான வழக்கறிஞர் வேண்டுமல்லவா... ‘எனக்கு சிறப்பு வழக்கறிஞர் வேண்டும் என்று பாதிக்கப்பட்டவர்கள் மனு போட்டால் பாதிக்கப்பட்டவர்கள் விரும்பும் சிறப்பு வழக்கறிஞர்களை அரசு நியமிக்க வேண்டும். அதுமட்டுமல்லாமல் ஒரு வழக்கில் குறிப்பிட்ட வழக்கறிஞரை நியமிக்கும்போதே, அந்த வழக்கறிஞர் அதற்கு முன் வாதாடிய வழக்குகளின் விவரங்களையும் நியமன ஆணையுடன் சேர்த்து வெளியிட வேண்டும் அப்போதுதான் பாதிக்கப்பட்டவர்களுக்கும் நல்ல வழக்கறிஞர் கிடைப்பார்” என்றார்.சேலத்தைச் சேர்ந்த மனநல ஆலோசகரும் 10 ஆண்டுகளுக்கு மேல் சேலம் மத்திய சிறைக்குள் சமுதாயக் கல்லூரி நடத்தி கைதிகளுக்கு வகுப்பெடுத்த அனுபவம் பெற்றவருமான அமுல்ராஜிடம் பேசினோம், ‘`ஒருவன் ஏன் குற்றவாளி ஆனான் என்று தோண்டிப்பார்த்தோமானால் அவனுடைய குழந்தைப் பருவம் பாதிக்கப்பட்டிருக்கலாம். பெற்றோரின் அன்பு கிடைக்காமலோ, அவனுக்கான சமூக அங்கீகாரம் கிடைக்காமலோ போயிருக்கலாம். எனவே, ஒரு குற்றவாளி தண்டிக்கப்பட வேண்டும் என நினைப்பதற்கு முன்பு, அவன் குற்றவாளியாவதற்கு நாமும் ஏதோ வகையில் காரணம் என்பதை இந்தச் சமூகம் உணர வேண்டும். அப்போதுதான் இங்கே குற்றங்களைக் குறைக்க முடியும்.

ஒவ்வொருவருக்கும் தனி மனித அங்கீகாரமும், தனிமனித ஒழுக்கமும் முக்கியம். அதற்கு வாழ்வியல் கல்வி அவசியம். எனவே, அனைத்துப் பள்ளிகளிலும் வாழ்வியல் கல்வி ஆசிரியர்கள் இருக்க வேண்டும். மிக முக்கியமாக, பாலியல் உணர்வுகளைத் தூண்டக் கூடிய வகையில் செய்திகளை வெளியிடக் கூடாது என்று ஊடகங்கள் தங்கள் நிலைப்பாட்டில் உறுதியாக இருக்க வேண்டும். உணர்வுகளைத் தூண்டிவிடும் வேலையைச் செய்யக் கூடாது. குற்றத்துக்கான விதையைத் தூவி, நீரூற்றிவிட்டு குற்றங்கள் பெருகிவிட்டதாகப் புலம்புவதும் தண்டனையை அதிகரிக்க வேண்டும் எனக் கதறுவதும் நியாயமே இல்லை.

பெண்களுக்கு எதிராக அதிகரிக்கும் குற்றங்கள்... தண்டனைகள் கடுமையாக்கப்படுவது தீர்வாகுமா?

சிறைக் கைதிகளுடன் பணியாற்றிய அனுபவத்தில் சொல்கிறேன், தண்டனையால் அவர்கள் திருந்துவதே கிடையாது. ‘இந்தச் சமூகம் நம்மை மதிக்கிறது. நமக்கும் முக்கியத்துவம் கொடுக்கிறது’ என்று உணரும்போதுதான் அவர்கள் திருந்துகின்றனர். எனவே, ஒவ்வொரு குழந்தையையும் சிறுவயதிலிருந்தே மதித்து அவர்களின் முக்கியத்துவத்தைச் சொல்லிக் கொடுத்து வளர்ப்பதுதான் இதற்கான நிரந்தர தீர்வாக இருக்கும். தண்டனை அதிகரிப்பு என்பது தற்காலிகத் தீர்வுதான் என்பதை உணர்ந்து அரசு செயலாற்ற வேண்டும்” என்றார்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

‘`குற்றவாளிக்கு விடுதலை... அப்போ என் பொண்ணு எப்படி செத்துச்சு?”

கடந்த 2019-ம் ஆண்டு, திண்டுக்கல் வடமதுரை அருகே உள்ள கிராமத்தில், சிறார் வதைக்கு உள்ளாகி மூக்கு, வாயில் மின்சாரம் பாய்ச்சிக் கொல்லப்பட்ட 12 வயதுச் சிறுமியின் வழக்கில் கடந்த செப்டம்பர் 29-ம் தேதி, ‘போதிய ஆதாரங்கள் இல்லை’ எனக் கூறி குற்றவாளி கிருபானந்தன் விடுதலை செய்யப்பட்டார். சிறுமியின் தாயிடம் பேசினோம். ‘`என் வீட்டுக்காரர் சலூன் கடை வெச்சிருக்கார். கல்யாணமாகி ஏழு வருஷங்கள் கழிச்சு வரமா பொறந்த புள்ள. உடம்பு பூராவும் ரத்தம், கீறல். மார்பையும் உதட்டையும் கடிச்சு ரத்தம் கட்டிப்போயிருந்துச்சு. வாயிலயும் மூக்குலயும் வயரை செருகி கரன்ட் ஷாக் வெச்சிருந்தான். எம்பொண்ணு எவ்வளவு துடிச்சிப் போயிருப்பா..? எதிர்வீட்டுக் கிருபானந்தனை கைது செஞ்சாங்க. அவன், `மூணு பேர் சேர்ந்துதான் இப்படிப் பண்ணினோம்’னு வாக்குமூலம் கொடுத்தும், மத்த ரெண்டு பேரையும் விட்டுட்டாங்க. இப்போ கோர்ட்டுல, அவனையும் விடுதலை செஞ்சுட்டாங்க. அப்போ சொல்லுங்க... எங்க புள்ள எப்படித்தான் செத்துச்சு? யாருதான் கொன்னது?’’ - கண்ணீர் கொட்டுகிறது அவருக்கு.

பெண்களுக்கு எதிராக அதிகரிக்கும் குற்றங்கள்... தண்டனைகள் கடுமையாக்கப்படுவது தீர்வாகுமா?

அனைத்திந்திய மாதர் சங்க மாநிலக் குழு உறுப்பினர் வனஜா நம்மிடம், ``சம்பவம் நடந்து மூன்று நாள்கள்வரை குற்றவாளி யைக் கைது செய்யவில்லை. முறையான வழக்கு பதிவு இல்லை. குற்றவாளிகளைத் தப்ப வைக்கவே அனைத்து வேலைகளும் நடந்தன. மூன்று பேர் இந்தக் கொலையைச் செய்திருந்தும், 17 வயதுச் சிறுவனை மட்டுமே கைது செய்தனர். தற்போது அந்த ஒரு நபரும் விடுதலை செய்யப்பட்டுள்ளார். நீதிமன்றத்தில் 35 பேர் சாட்சிகளாக விசாரிக்கப்பட்டும், தக்க ஆதாரம் இல்லை என நீதிபதி குற்றவாளியை விடுதலை செய்துவிட்டார். உயர் நீதிமன்றத்தில் மேல்முறையீடு செய்து, சி.பி.சி.ஐ.டி விசாரணை கோருவோம்’’ என்றார்.

- எம்.கணேஷ்

படம்: ஈ.ஜே. நந்தகுமார்

பெண்களுக்கு எதிரான குற்றங்களில் உத்தரப்பிரதேசம்தான் முதலிடம்! பதற வைக்கும் NCRB ரிப்போர்ட்

தேசிய குற்ற ஆவணக் காப்பகம் (National Crime Records Bureau) சமீபத்தில் வெளியிட்டுள்ள அறிக்கையின் மூலம் 2019-ம் ஆண்டு இந்தியாவில் பெண்களுக்கு எதிராக 40,5861 குற்றங்கள் பதிவாகியிருப்பது தெரியவந்துள்ளது.

கடந்த நான்கு ஆண்டுகளைவிட இந்த ஆண்டு குற்றங்களின் எண்ணிக்கை அதிகரித்திருக்கிறது. 2015-ம் ஆண்டு 3,29,243 குற்றங்களும் 2016-ம் ஆண்டு 3,38,954 குற்றங்களும் 2017-ம் ஆண்டு 3,59,849 குற்றங்களும் 2018-ம் ஆண்டு 3,78,236 குற்றங்களும் பதிவாகியிருந்த நிலையில், 2019-ம் ஆண்டு 4,05,861 குற்றங்கள் பதிவாகியிருப்பது நாட்டில் பெண்களுக்கு எதிரான குற்றங்கள் அதிகரித்துக்கொண்டே செல்வதை உறுதிசெய்துள்ளது.

பெண்களுக்கு எதிராக அதிகரிக்கும் குற்றங்கள்... தண்டனைகள் கடுமையாக்கப்படுவது தீர்வாகுமா?

2019-ம் ஆண்டைப் பொறுத்தவரையில் 59,853 குற்ற வழக்குகளுடன் உத்தரப்பிரதேசம் முதலிடத்திலும் 41,550 குற்ற வழக்குகளுடன் ராஜஸ்தான் இரண்டாம் இடத்திலும் 37,144 மகாராஷ்டிரா மூன்றாம் இடத்திலும் உள்ளன. மாநிலங்களைப் பொறுத்தவரையில் குறைந்தபட்சமாக நாகலாந்தில் 43 வழக்குகளும் யூனியன் பிரதேசங்களில் டாமன் - டையூவில் 33 வழக்குகளும் பதிவாகியுள்ளன.

தமிழகத்தில் 2018-ம் ஆண்டு 5,822 குற்றங்கள் பதிவாகியிருந்த நிலையில், 2019-ம் ஆண்டு 5,934 குற்றங்களாக அதிகரித்துள்ளன. அண்டை மாநிலமான தெலங்கானாவில் 18,394 வழக்குகளும் ஆந்திராவில் 17,746 குற்றங்களும் கர்நாடகாவில் 13,828 குற்றங்களும் கேரளாவில் 11,462 குற்றங்களும் பதிவாகியுள்ளன. நாட்டின் தலைநகரான டெல்லியில் கடந்தாண்டு 13,640 குற்றங்கள் பதிவாகியிருந்த நிலையில், 2019-ம் ஆண்டு 13,395 குற்றங்களாகக் குறைந்துள்ளன.

2019-ம் ஆண்டு பெண்கள் பாலியல் வன்கொடுமை தொடர்பாக இந்திய அளவில் 32,033 வழக்குகள் பதிவாகியுள்ளன. 18 வயதுக்கும் குறைவானவர்கள் 4,977 பேரும்,18 வயதைக் கடந்தவர்கள் 27,283 பேரும் பாலியல் வன்கொடுமைக்கு ஆளாகியுள்ளனர்.

இந்திய அளவில் பாலியல் வன்கொடுமைக்கு உள்ளானவர்கள் வயது வாரியாக தனி நபர் மற்றும் கூட்டுப் பாலியல் வன்கொடுமைக்கு ஆளாகி 2019-ம் ஆண்டு மட்டும் இந்தியாவில் 286 பேர் பலியாகியுள்ளனர். அதிகபட்சமாக மகாராஷ்டிராவில் 47 பேரும், மத்தியப்பிரதேசத்தில் 37 பேரும் உத்தரப்பிரதேசத்தில் 35 பேரும் உயிரிழந்துள்ளனர். தமிழகத்தில் 8 பேர் உயிரிழந்துள்ளனர்.

2019-ம் ஆண்டு வரதட்சணை கொடுமை காரணமாக இந்தியாவில் 13,674 பாதிக்கப்பட்டுள்ளனர். இதில் 7,034 பேர் உயிரிழந்துள்ளனர். அதிகபட்சமாக உத்தரப்பிரதேசத்தில் 2,424 பேரும், பீகாரில் 1,127 பேரும் மத்தியப்பிரதேசத்தில் 550 பேரும் பலியாகியுள்ளனர். தமிழகத்தில் 239 பேர் பாதிக்கப்பட்டுள்ள நிலையில் 8 பேர் உயிரிழந்துள்ளனர்.

2019-ம் ஆண்டு இந்தியாவில் 73,884 பெண்கள் கடத்தப்பட்டுள்ளனர். தமிழகத்தில் 702 பெண்கள் கடத்தப்பட்டுள்ளனர். சைபர் குற்றங்களில் 1,645 பெண்களும் இந்திய அளவிலும் தமிழகத்தில் 45 பெண்களும் பாதிக்கப்பட்டுள்ளதாகப் பதிவு செய்யப்பட்டுள்ளது.

‘‘ரெண்டு வருஷமாச்சு... இன்னும் நீதி கெடைக்கல!”

இரண்டாண்டுகளுக்கு முன்பு, சாதியும் காம வெறியும் தலைக்கேறிய கேடுகெட்ட ஒரு மனித ஜென்மம், சேலத்தின் அருகில் உள்ள கிராமம் ஒன்றில் பட்டியலினத்தைச் சேர்ந்த ஏழைச் சிறுமியைப் பட்டப்பகலில் கழுத்தறுத்து கொலை செய்த சம்பவம் தமிழகத்தையே உலுக்கியது. சிறுமியின் அம்மா சரசு (பெயர் மாற்றப்பட்டுள்ளது), ‘`அன்னிக்கு பாப்பா வீட்டுல பூக்கட்டிக்கிட்டு இருந்துச்சு. பக்கத்து வீட்டு தினேஷ் வெறும் மேலோட டவுசர் போட்டுக்கிட்டு கையில வீச்சரிவாளோட வர, என்னன்னு புரியாம நான் அவன் காலைப் புடிச்சேன். என்னை ஒரே உதையில தள்ளிவிட்டான். ‘அண்ணா நான் என்னங்கண்ணா பண்ணுனேன்’னு கதறின எங்க 12 வயசுப் புள்ளய அவன் வெட்டுன ஒரே வெட்டுல கழுத்து தொங்கிடுச்சு. அப்புடியும் விடாம துடிதுடிக்க தரதரனு இழுத்துட்டு வந்து, வாசல்ல வெச்சு கழுத்தை அறுத்து தலையை எடுத்துட்டுப் போயிட்டான். என் கண்முன்னாடி மகளோட முண்டம் மட்டும் இழுத்து இழுத்து உயிர் அடங்குனதைப் பார்த்த பாவி நான். ரெண்டு வருஷமாச்சு... இன்னும் எங்களுக்கு நீதி கெடைக்கலயே’’ என்று அழத்தொடங்கினார்.

பெண்களுக்கு எதிராக அதிகரிக்கும் குற்றங்கள்... தண்டனைகள் கடுமையாக்கப்படுவது தீர்வாகுமா?

இவர்களின் வழக்கறிஞர் ஆசைத்தம்பி, ‘சிறுமியைப் பாலியல் தொல்லை கொடுத்த தினேஷ், அதைக் குழந்தை வெளியே சொல்லிடும்ங்கிற ஆத்திரத்தில் நடந்த கொலை இது. சிறுமி தரப்பு சாட்சியங்கள் விசாரணை அனைத்தும் நிறைவு பெற்றது. தினேஷ் தரப்பில் சாட்சியங்கள் இன்னும் முழுமையாக விசாரிக்கப்படவில்லை. அவர்கள் கால தாமதம் செய்வதால் வழக்கை நீர்த்துப்போகச் செய்கிறார்கள். பட்டியலின சிறுமிகள், பெண்களின் பாலியல் வழக்குகளில் விரைந்து தீர்ப்பு வழங்குவதே அவர்களின் பாதுகாப்பை உறுதிசெய்யும்’’ என்றார்.

- வீ.கே.ரமேஷ்