Published:Updated:

கல்யாண ராணியாக வலம்வந்த சந்தியா ராணி!

சந்தியா ராணி
பிரீமியம் ஸ்டோரி
News
சந்தியா ராணி

நான்கு திருமணங்கள்... அரைகுறை ஆடை போட்டோ... அடைத்துவைத்து சித்ரவதை...

பார்ப்பதற்கு சினிமா ஹீரோயின்போலத் தோற்றமளிக்கும் சந்தியா ராணி, ஹைதராபாத் ஆயுதப்படைப் பிரிவில் பணிபுரிந்தார். 30 வயது பெண்ணான இவர், ஒரு பெண் குழந்தைக்குத் தாய். ஆடம்பரமாக வாழ ஆசைப்பட்டு, வசதியான இளைஞர்களைக் காதல் வலையில் வீழ்த்தி, அவர்களைத் தனது கட்டுப்பாட்டுக்குள் கொண்டுவந்து கல்யாண ராணியாக வலம் வந்துகொண்டிருந்த விவகாரம்தான் ஹைதராபாத் காவல்துறையில் இப்போதைய பரபர செய்தி. சந்தியா ராணியைத் திருமணம் செய்தவர்களில் ஒருவரான சரண் தேஜா கொடுத்த புகாரை அடுத்துத்தான் இந்த வில்லங்க விவகாரங்கள் வெளியே வந்துள்ளன.

கல்யாண ராணியாக வலம்வந்த சந்தியா ராணி!

மூன்று கணவர்கள்... ஒருவர் தற்கொலை!

ஹைதராபாத் ஆயுதப்படையில் காவலராக பணியாற்றும் சந்தியா ராணிக்கு ஏற்கெனவே மூன்று திருமணங்கள் நடந்துள்ளன. அவற்றில் இரண்டாவது திருமணம் மூலம் ஒரு பெண் குழந்தையும் பெற்றிருக்கிறார். இவரைக் காதலித்து திருமணம் செய்த முதலிரண்டு கணவர்கள், சந்தியா ராணியின் சுயரூபத்தை அறிந்து, விவாகரத்து பெற்றுக்கொண்டு, விட்டால் போதுமென ஓடிவிட்டார்கள். மூன்றாவது கணவர் தற்கொலை செய்துகொண்டார். அதன் பிறகு தனிமையிலிருந்த சந்தியா ராணியின் காதல் வலையில் வீழ்ந்தவர்தான் இப்போது புகார் கொடுத்திருக்கும் சரண் தேஜா.

வேலை தேடி ஹைதராபாத்துக்கு வந்த இடத்தில்தான் சரண் தேஜாவுக்கு, சந்தியா ராணியுடன் பழக்கம் ஏற்பட்டிருக்கிறது. சந்தியா ராணியின் காதல் ரசம் சொட்டும் வார்த்தைகளால் கிறங்கிப்போன சரண் தேஜா, அவருடன் நெருக்கமாகப் பழகிய சில நாள்களிலேயே பலருடனும் சந்தியா ராணி இதேபோல பழகுவதை அறிந்து அதிர்ந்திருக்கிறார். இதனால், அவரிடமிருந்து விலக முயற்சி செய்யவே... சந்தியா ராணி விடவில்லை. தனது காவல்துறை செல்வாக்கைப் பயன்படுத்தி மிரட்டவே, பயந்துபோன சரண் தேஜா வேறு வழியின்றி அவரைத் திருமணமும் செய்திருக்கிறார்.

கல்யாண ராணியாக வலம்வந்த சந்தியா ராணி!

கொத்தடிமை வாழ்க்கை!

திருமணத்துக்குப் பிறகு சந்தியா ராணி போட்ட முதல் கண்டிஷன்... ‘வேலைக்குப் போகாதே’ என்பதுதான். எதிர்ப்பு தெரிவித்த சரண் தேஜாவை வீட்டில் பூட்டிவைத்துவிட்டு சந்தியா ராணி வெளியே கிளம்புவார். அடுத்தடுத்த நாள்களில் சண்டைகள் அதிகரித்தன. ஒருகட்டத்தில் சரண் தேஜாவின் செல்போனைப் பிடுங்கி வைத்துக்கொண்ட சந்தியா ராணி அவரைக் கொத்தடிமைபோலவே மாற்றினார்... அடித்து உதைத்து துணி துவைப்பது, சமையல் பாத்திரங்களைத் தேய்ப்பது, வீடு துடைப்பது போன்ற வேலைகளைக் கொடுத்து கொடுமைப்படுத்தியிருக்கிறார். இப்படியாக ஒன்பது மாதங்களாக வீட்டுக்குள் சிக்கித் தவித்தார் சரண் தேஜ்.

சில தினங்களுக்கு முன் சரண் தேஜாவின் பெற்றோர், தங்கள் மகனைப் பார்க்க வேண்டும் என்று அழைக்கவே... சந்தியா ராணி, சரண் தேஜாவிடம், “ஒழுங்காகப் பெற்றோரைப் பார்த்துவிட்டு மட்டும் வர வேண்டும். இங்கு நடப்பது எதையும் சொல்லக் கூடாது. வேறு யாருக்கும் போன் செய்யக் கூடாது. உன் போனை ஒட்டுக் கேட்பேன். குறிப்பிட்ட நேரத்துக்குள் திரும்பி வரவில்லையென்றால் காணாமல் போய்விட்டதாகப் புகார் கொடுத்துவிட்டு, உன்னையும் உன் பெற்றோரையும் கொலை செய்துவிடுவேன்” என்று மிரட்டியிருக்கிறார்.

வெளியே வந்த சரண் தேஜா, காவல்துறை உயரதிகாரிகள் இருவருக்கு நடப்பது அனைத்தையும் செல்போனில் மெசேஜ் அனுப்பி, காப்பாற்றும்படி கதறியிருக்கிறார். இதையடுத்தே சந்தியா ராணியின் வீட்டுக்குச் சென்ற போலீஸார் சரண் தேஜாவை மீட்டுள்ளனர். போலீஸாரின் விசாரணையில் சந்தியா, நான்கு திருமணங்களைச் செய்திருப்பதும், இன்னும் சில வசதி படைத்த இளைஞர்களுடன் நெருக்கமாகப் பழகிக்கொண்டிருப்பதும் தெரியவந்திருக்கிறது. அவர்கள் குறித்த விவரங்களையும் போலீஸார் சேகரித்துவருகின்றனர். மேலும், ‘சந்தியா ராணியிடம் ஏமாந்தவர்கள் தைரியமாக காவல் நிலையத்தில் புகார் அளிக்கலாம்’ என்றும் ஹைதராபாத் போலீஸார் அறிவித்திருக்கின்றனர்.

கல்யாண ராணியாக வலம்வந்த சந்தியா ராணி!

வலையில் வீழ்த்தியது எப்படி?

சந்தியா ராணியை விசாரித்த போலீஸார் சிலரிடம் பேசினோம். “வேலையிடத்தில் மிகவும் இறுக்கமாகவே நடந்துகொள்வார். அவ்வளவு சீக்கிரம் யாரிடமும் பேசிப் பழக மாட்டார். இதனால், இவரது கல்யாண மோசடி விஷயங்கள் எங்களுக்கே அதிர்ச்சியாக இருக்கின்றன. அவரிடம் விசாரித்த பிறகுதான் அவரைப் பற்றிய முழுத் தகவல்களும் தெரியவந்தன. சரண் தேஜாவைக் காதலிக்கும்போதே ஏராளமான பணத்தை அவரிடமிருந்து கறந்திருக்கிறார். சிறு வயதிலிருந்தே ஆடம்பர வாழ்க்கைக்கு ஆசைப்பட்ட சந்தியா ராணிக்கு, காவல்துறையில் அதற்கேற்ற வருமானம் கிடைக்கவில்லை.

கல்யாண ராணியாக வலம்வந்த சந்தியா ராணி!

அதனால் சமூக ஊடகங்களில் தனது கவர்ச்சியான படத்தைப் போட்டு, ஸ்மார்ட்டாகப் பேசி இளைஞர்களைத் தொடர்புகொள்வார். பிறகு நட்பாகப் பழகி, அவர்களுடன் ஃபைவ் ஸ்டார் ஹோட்டல் பார்ட்டிகளுக்குச் செல்வார். மது போதையில் அவர்களுடன் அரைகுறை ஆடையில் நெருக்கமாகி, புகைப்படங்களை எடுத்துக்கொள்வார். பிறகு அவற்றைக் காட்டியே, அந்த இளைஞர்களை மிரட்டி பணத்தைக் கறப்பார். சமூக அந்தஸ்து கருதி பலரும் லட்சக்கணக்கான பணத்தைப் பறிகொடுத்துவிட்டு, புகார் கொடுக்காமல் ஓடியிருக்கிறார்கள். காவல்துறையிலும் சில அதிகாரிகளையும் தனது காமவலையில் வீழ்த்தியதால், அவர்களின் செல்வாக்கும் சந்தியா ராணிக்கு வசதியாகப் போய்விட்டது. இப்போது துறைக்குள்ளேயே சந்தியா ராணிக்கு உதவியவர்களின் பட்டியலை சேகரித்துவருகிறோம். இந்த விவகாரத்தில் தோண்டத் தோண்ட மேலும் பல வில்லங்கங்கள் வெளியாகலாம்” என்றார்கள் விரிவாக.

சபலமே சகலத்துக்கும் காரணம்... வேறென்ன சொல்ல!